30 C
Phnom Penh

លោក សម រង្ស៊ី មិន​ទាន់​មាន​គម្រោង​​វិល​ត្រឡប់​មក​កាន់​​​ប្រទេស​​​កម្ពុជា​វិញ​​ក្នុង​ពេល​​​ឆាប់ៗ​​​

ដោយ ឌឹ ខេមបូឌា ដេលី

បទវិភាគ

​លោក អេង ឆៃអ៊ាង តំណាង​រាស្ត្រ​គណ​​​បក្ស​​សង្គ្រោះ​ជាតិ​បាន​​ថ្លែង​ទៅ​កាន់​ក្រុម​អ្នក​យក​ព័ត៌មាន​កាលពី​ម្សិលមិញ​ថា លោក សម រង្ស៊ី ប្រធាន​គណបក្ស​​របស់​លោក​​នឹង​មិន​វិល​ត្រឡប់​មក​កាន់​ប្រទេស​កម្ពុជា​វិញ​​ដើម្បី​ប្រឈម​​​​មុខ​​​នឹង​​​ទោស​​ជាប់​ពន្ធនាគារ​រយៈ​ពេល​​​​២ឆ្នាំ​នៅ​ប៉ុន្មាន​ថ្ងៃ​ខាង​មុខ​នេះ​ទេ ហើយ​​សង្ឃឹម​ថា នឹង​​មាន​កិច្ច​ព្រមព្រៀង​ជាមួយ​គណបក្ស​ប្រជាជន​កម្ពុជា​ដើម្បី​អនុញ្ញាត​ឲ្យ​លោក​វិល​ត្រឡប់​មក​វិញ​ដោយ​មាន​សេរី​​ភាព​។

បន្ទាប់ពី​ការ​ប្រជុំ​​គណៈកម្មការ​អចិន្ត្រៃយ៍​​របស់​គណបក្ស​សង្គ្រោះ​ជាតិ​​ និង​តំណាង​រាស្ត្រ​​របស់​ខ្លួន​នៅ​ទីស្នាក់ការ​កណ្ដាល​​របស់​គណបក្ស​​នៅ​ក្នុង​រាជធានី​ភ្នំពេញ លោក អេង ឆៃអ៊ាង ដែល​ជា​​មនុស្ស​ជំនិត​​​របស់​លោក​ សម រង្ស៊ី បាន​មាន​ប្រសាសន៍​ថា ​ប្រធាន​គណ​​​បក្ស​ប្រឆាំង​រូប​នេះ​គ្មាន​គម្រោង​វិល​ត្រឡប់​មក​វិញ​ភ្លាមៗ​ទេ។

លោក​ថ្លែង​ថា “​គណៈកម្មការ​អចិន្ត្រៃយ៍ ​របស់​គណបក្ស​សង្គ្រោះ​ជាតិ​​​​បាន​ប្រជុំ​​ ហើយ​​របៀបវារៈ​នៃ​កិច្ច​ប្រជុំ​​ គឺ​យើង​ពិភាក្សា​អំពី​​​ដំណើរ​​វិវត្តន៍​មក​កាន់​មាតុប្រទេស​វិញ​របស់​លោក​ប្រធាន​ សម រង្ស៊ី ហើយ​និង​ការ​ងារ​​​នៅ​រដ្ឋសភាជាតិ​​​​។ ជារួម​​គណៈកម្មការ​អចិន្ត្រៃយ៍​​យើង​ទាំង​អស់​គ្នា​​​​យល់​ឃើញ​ថា លោក​ប្រធាន​​នឹង​ចាំបាច់​ត្រូវ​​វិល​ត្រឡប់​មក​ប្រទេស​កម្ពុជា​វិញ​ ប៉ុន្តែ​មិន​មែន​វិល​ត្រឡប់​មក​​ស្អែក​ឬ​ខាន​ស្អែក​ទេ​ គឺ​ត្រូវ​ជ្រើស​ពេល​វេលា​សម​ស្រប​ណាមួយ​។ ចន្លោះ​ពេល​វេលា​​​​ ហ្នឹង​​គណបក្ស​នឹង​ខិតខំ​ធ្វើ​កិច្ច​ការ​​ដើម្បី​​មាន​ដំណោះ​ស្រាយ​នយោបាយ​ដោយ​​​ ​សន្តិវិធី។ ​បាន​ន័យ​ថា ការ​វិល​ត្រឡប់​របស់​លោក​​​​មក​វិញ គឺ​ដោយ​សន្តិវិធី។ ហ្នឹង​គឺ​យើង​បាន​ឯកភាព​​គ្នា​”។

លោក អេង ឆៃអ៊ាង តំណាង​​​រាស្ត្រ​​​គណបក្ស​​​ប្រឆាំង​​​​​​ ថ្លែង​​​ទៅកាន់​​​ក្រុម​​​អ្នក​​​យក​​​ព័ត៌មាន​​​នៅ​​​ទ​​​ីស្នាក់​​​ការ​​​កណ្តាល​​​របស់​​​គណបក្ស​​​សង្គ្រោះ​​​ជាតិ​​​ ក្នុង​​​រាជធានីភ្នំពេញ​​​​​​កាល​​​ពីម្សិល​​​មិញ ក្រោយ​​​កិច្ច​​​ប្រជុំ​​​របស់​​​គណៈកម្មការអចិន្ត្រៃយ៍​​​បក្ស​​​។ រូបថតៈ ម៉ា ចិត្រា
លោក អេង ឆៃអ៊ាង តំណាង​​​រាស្ត្រ​​​គណបក្ស​​​ប្រឆាំង​​​​​​ ថ្លែង​​​ទៅកាន់​​​ក្រុម​​​អ្នក​​​យក​​​ព័ត៌មាន​​​នៅ​​​ទ​​​ីស្នាក់​​​ការ​​​កណ្តាល​​​របស់​​​គណបក្ស​​​សង្គ្រោះ​​​ជាតិ​​​ ក្នុង​​​រាជធានីភ្នំពេញ​​​​​​កាល​​​ពីម្សិល​​​មិញ ក្រោយ​​​កិច្ច​​​ប្រជុំ​​​របស់​​​គណៈកម្មការអចិន្ត្រៃយ៍​​​បក្ស​​​។ រូបថតៈ ម៉ា ចិត្រា

ដោយ​បច្ចុប្បន្ន​​រដ្ឋសភា​កំពុង​​ស្ថិត​ក្នុង​សម័យ​ប្រជុំ​​​ និង​កំពុង​ត្រៀម​ពិភាក្សា​​អនុម័ត​ច្បាប់​មួយ​ចំនួន​​ ដែល​ទំនង​ជា​​រាប់​បញ្ចូល​ទាំង​ច្បាប់​សហជីព​ថ្មី​ដ៏​ចម្រូងចម្រាស​ផង​ដែរ​នោះ លោក អេង ឆៃអា៊ង ​ក៏​បាន​លើក​​ឡើង​ដែរ​ថា តំណាង​រាស្ត្រ​​​ទាំង​៥៥​រូប​របស់​គណ​​​បក្ស​សង្គ្រោះជាតិ​​នឹង​​មាន​ការ​លំបាក​ក្នុង​ការ​ចូល​រួម​ ដោយ​សារ​តែ​​ព្រឹត្តិការណ៍​​ដែល​បាន​កើត​ឡើង​កាលពីពេល​ថ្មីៗ​នេះ។

លោក​បាន​មាន​ប្រសាសន៍​បន្ត​ថា “​ទាក់​ទង​ នឹង​​ការ​ងារ​នៅ​រដ្ឋសភា​​ គឺ​យើង​រង់ចាំ​មើល​ស្ថាន​ការណ៍​សិន​ ព្រោះ​យើង​ដឹង​ហើយ​ថា ​​បើ​យើង​និយាយអំពី​រទេះ​ភ្លើង​ ក្បាល​រទេះ​យើង​​​​​​ត្រូវ​គេ​កាត់​ ដូច្នេះ​​កន្ទុយ​រទេះ​ភ្លើង​​ទៅ​ណា​ក៏ទៅ​តាម​ក្បាល​ដែរ​ អញ្ចឹង​ទាល់​តែ​ដោះ​​​​ស្រាយ​​​ធ្វើ​ម៉េច​ឲ្យ​មាន​ការ​ភ្ជាប់​​ក្បាល​រទេះ​ភ្លើង​​មក​វិញ​សិន​។ កន្ទុយ​ត្រូវ​រង់ចាំ​​​មើល​​​​សិន​ រង់ចាំ​មើល​ឲ្យ​មាន​ដំណោះ​ស្រាយ ​នយោបាយ​មួយ​សមរម្យ​សមស្រប​​ដែល​ធានា​ពី​ស្ថិរភាព​ ធានា​អំពី​ការ​ការ​ពារ​អ្នក​តំណាង​រាស្ត្រ​​ដោយ​អត់​មាន​ការ​ភ័យ​ខ្លាច​ អាហ្នឹង​បាន​យើង​អាច​​​បំពេញ​កិច្ចការ​របស់​យើង​​ឲ្យ​បាន​ត្រឹម​ត្រូវ​”។

លោក កែវ ភិរម្យ តំណាង​រាស្ត្រ​គណបក្ស​សង្គ្រោះ​ជាតិ​ដែល​បាន​ចូល​រួម​​ការ​ប្រជុំ​នេះ​ដែរ​ បាន​​មាន​ប្រសាសន៍​ថា ​ត្រង់​ថា​​តើ​ការ​សម្រេច​​ទាំង​នោះ​មាន​ន័យ​ថា ​លោក សម រង្ស៊ី នៅ​ពេល​នេះ​នឹង​វិល​ត្រឡប់​មក​វិញ​លុះ​ត្រា​តែ​មាន​កិច្ច​ព្រមព្រៀង​​ដែល​អនុញ្ញាត​ឲ្យ​លោក ​ចូល​មក​វិញ​ដោយ​មាន​សេរីភាព​ ឬ​​​យ៉ាង​ណា​នោះ លោក​មិន​អាច​និយាយ​បាន​ទេ​​​។

លោក​បាន​មាន​ប្រសាសន៍​​​សំដៅ​ដល់​តំណាង​រាស្ត្រ​​​​គណបក្ស​ប្រឆាំង​​សំខាន់ៗ​ ចំនួន​បី​រូប​​​ថា “​យើង​​នឹង​បញ្ជូន​​គណៈប្រតិភូ​​​មួយ​ក្រុម​ទៅ​ជួប​​​លោក​ប្រធាន​នៅ​ថ្ងៃ​ស្អែក​​ ដូច្នេះ​​រាល់​ព័ត៌មាន​ណាមួយ​យើង​មិន​អាច​និយាយ​​បាន​ទេ​​ រហូត​​ទាល់​តែ​គណៈ​ប្រតិភូ​ដែល​មាន​លោក សុន ឆ័យ លោក អេង ឆៃអ៊ាង ​​​និង​លោក យ៉ែម បុញ្ញរិទ្ធ វិល​ត្រឡប់​មក​វិញ​”។

មន្ត្រី​របស់​​​គណបក្ស​ប្រឆាំង​​​​មិន​និយាយ​ថា តើ​​ពេល​នេះ​លោក​ សម រង្ស៊ី កំពុង​ស្ថិត​នៅ​ក្នុង​ប្រទេស​ណា​ឡើយ ដោយ​គ្រាន់​តែ​​​​ឲ្យ​ដឹង​ថា លោក​​កំពុង​​នៅ​ជាមួយ​​លោក កឹម សុខា អនុ​​​ប្រធាន​របស់​លោក​​នៅ​ក្នុង​ប្រទេស​​អាស៊ាន “​ជាមិត្ត​” ​ហើយ​កំពុង​​​ពិចារណា​ជម្រើស ​របស់​លោក​។

នៅ​ក្នុង​ទីក្រុង​ប៊ូសាន (Busan) ​ប្រទេស​កូរ៉េ​ខាង​ត្បូង​កាលពី​យប់​ថ្ងៃ​សៅរ៍ លោក សម រង្ស៊ី បាន​សន្យា​​វិល​ត្រឡប់​មក​ប្រទេស​កម្ពុជា​​​វិញ​តាម​ការ​គ្រោង​ទុក​នៅ​យប់​ថ្ងៃ​ច័ន្ទ​។ ទោះ​ជា​យ៉ាង​ណា ​លោក​បាន​ផ្លាស់​ប្ដូរ​គម្រោង​​​​ នេះ​​នៅ​ប៉ុន្មាន​ម៉ោង​មុន​ពេល​​​​ដែល​លោក​ត្រូវ​មក​ដល់​​កម្ពុជា​​មុន​ការ​គ្រោង​ទុក ដោយ​លើក​ឡើង​ពី​ការ​ព្រួយ​បារម្ភ​អំពី​​​​​អំពើ​ហិង្សា​។

ទោស​ជាប់​ពន្ធនាគារ​របស់​លោក សម រង្ស៊ី កើត​ចេញពី​បណ្ដឹង​បរិហារ​កេរ្តិ៍​​មួយ​​ដែល​លោក ហោ ណាំហុង រដ្ឋមន្ត្រី​ក្រសួង​ការ​បរទេស​បាន​ឈ្នះ​​កាល​ពី​ឆ្នាំ​២០១១​​ ទាក់​ទិន​នឹង​សុន្ទរកថា​របស់​លោក សម រង្ស៊ី ចោទ​ប្រកាន់​​លោក​​ថា ​បាន​​ជួយ​គ្រប់​គ្រង​​គុក​បឹង​ត្របែក​ជាមួយ​​ក្រុម​ចាប់​ចង​​របស់​ខ្មែរ​​​ក្រហម​​នៅ​ចុង​ទសវត្សរ៍​ឆ្នាំ​១៩៧០។

​មជ្ឈដ្ឋាន​ទូទៅ​​ជឿ​ថា ការ​​ផ្ដន្ទាទោស​នេះ​ត្រូវ​បាន​ចាត់​ទុក​ជាមោឃៈ​ដោយ​​​​សារ​មាន​ព្រះរាជទាន​លើក​លែង​ទោស​​ដែល​លោក សម រង្ស៊ី ទទួល​បាន​​នៅ​ប៉ុន្មាន​សប្ដាហ៍​មុន​ការ​បោះ​ឆ្នោត​​ជ្រើស​តាំង​តំណាង​រាស្ត្រ​ឆ្នាំ​២០១៣ ​​​ហើយ​មេធាវី​របស់​លោក ហោ ណាំហុង ទើប​​​​ តែ​ស្នើ​សុំ​ឲ្យ​តុលាការ​អនុវត្ត​សាល​​ក្រម​​ក្នុង​សំណុំ​រឿង​នេះ​កាលពី​ថ្ងៃ​សុក្រ​​​​ប៉ុណ្ណោះ។ ​​​បន្ទាប់​មក​ គណបក្ស​ប្រជាជន​កម្ពុជា​បានទាត់​លោក សម រង្ស៊ី ចេញ​​ពី​សភា​កាលពី​ថ្ងៃ​ច័ន្ទ។

កាលពី​ថ្ងៃ​អង្គារ លោក សម រង្ស៊ី បាន​មាន​​​​ប្រសាសន៍​ថា លោក​​ជឿ​ថា លោក សយ សុភាព ​ដែល​ជា​ម្ចាស់​សារព័ត៌មាន​ដើម​​​អំពិល​ និង​ជា​អ្នក​សម្រុះ​សម្រួល​​​ជាយូរ​មក​ហើយ​សម្រាប់​លោក ហ៊ុន សែន កំពុង​តែ​​​ចរចា​​ជាមួយ​​​មន្ត្រី​គណបក្ស​សង្គ្រោះជាតិ​ដែល​ប្រហែល​ជា​អនុញ្ញាត​ឲ្យ​លោក​វិល​ត្រឡប់​មក​កាន់​មាតុ​ប្រទេស​វិញ​​ដោយ​មាន​សេរីភាព។

ចំណែក​ឯ​លោក សយ សុភាព ​បាន​​ចាត់​ទុក​ថា ការ​ប្រឹង​ប្រែង​របស់លោក​ក្នុង​ការ​​សម្រុះ​សម្រួល​​ឲ្យ​មាន​ការ​ចរចា​គ្នា​​រវាង​លោក​​​ សម រង្ស៊ី និង​លោក ហ៊ុន សែន ​​គឺ​គ្រាន់​ តែ​ជា​​​ “ការ​ផ្ដល់​គំនិត​យោបល់​” ប៉ុណ្ណោះ បើ​ទោះ​បី​​ជា​កន្លង​មក​លោក​ ហ៊ុន សែន ​ធ្លាប់​បាន​​ថ្លែង​អំណរ​គុណ​លោក​ចំពោះ​​ការ​​ចរចា​​ឲ្យ​មាន​ដំណោះ​ស្រាយ​​ជាមួយ​​គូប្រជែង​ខាង​នយោបាយ​របស់​​លោក​ក្ដី។

កាលពី​ម្សិលមិញ លោក សយ សុភាព បាន​មាន​ប្រសាសន៍​ថា លោក​ជឿ​ថា ការ​រៀប​​​ចំ​ដែល​អាច​ទៅ​រួច​ណា​មួយ​ដើម្បី​​អនុ​​​ញ្ញាត​ឲ្យ​លោក​ សម រង្ស៊ី វិល​ត្រឡប់​មក​​​​​កម្ពុជា​វិញ​ ប្រហែល​ជា​​តម្រូវ​​ឲ្យ​ប្រធាន​គណបក្ស​ប្រឆាំង ​រូប​នេះ​សរសេរ​លិខិត​សុំទោស​លោក ហោ ណាំហុង​ ចំពោះ​ការ​ដែល​លើក​ឡើង​ថា លោក​​​​បាន​ចូល​ដៃជើង​​​ជាមួយ​ខ្មែរ​ក្រហម​។

លោក​បាន​ថ្លែង​ថា “​នៅ​ពេល​ខាង​មុខ​ ប៉ុន្តែ​មិន​មែន​ពេល​នេះ​ទេ នេះ​អាច​ជា​ច្រក​ចេញ។ យើង​ជា​អ្នក​កាសែត​ ហើយ​យើង​​ត្រូវ​តែ​សុំទោស​ចំពោះ​រឿង​នេះ។ គាត់​អាច​​សរសេរ​លិខិត​សុំទោស​​​ទៅ​លោក ហោ ណាំហុង ​បាន​។ វា​​​ស្រេច​ទៅ​លើ​លោក សម រង្ស៊ី និង​អ្នក​នយោបាយ”។

នៅ​ពេល​សួរ​ថា តើ​​​លោក​​​បាន​ស្នើ​ដោយ​​​​ផ្ទាល់​​ឲ្យ​មាន​ដំណោះ​ស្រាយ​បែប​នេះ​ទៅ​តំណាង​របស់​លោក សម រង្ស៊ី នៅ​ក្នុង​ការ​​​ចរចា​គ្នា​​ឬ​យ៉ាង​ណា​នោះ លោក សយ សុភាព បាន​​ឆ្លើយ​ថា​ លោក​ពិត​ជា​​បាន​លើក​ឡើង​​​មែន​ ប៉ុន្តែ​​មិន​បាន​សង្កត់​ធ្ងន់​ពី​បញ្ហា​នេះ​ទេ​។

លោក​បាន​​លើក​ឡើង​ទៀត​ថា ​”​អ្នក​កាសែត​​​​តែង​តែ​មាន​គំនិត​យោបល់។ កើត​ចេញពី​ចិត្ត​សប្បុរស​ យើង​គ្រាន់​តែ​​អាច​​​លើក​ ឡើង​ពី​វា​ប៉ុណ្ណោះ​ ហើយ​វា​ស្រេច​ទៅ​លើ​ពួកគាត់​​ថា​តើ​ពួកគាត់​ស្ដាប់​ឬក៏អត់”។

ទោះ​ជា​យ៉ាង​ណា លោក សយ សុភាព បាន​ គូស​បញ្ជាក់​ថា សូម្បី​ការ​សរសេរ​លិខិត​បែប​នេះ​ក៏​​​ប្រហែល​ជា​មិន​អាច​ធានា​​​ឲ្យ​លោក សម រង្ស៊ី វិល​ត្រឡប់​មក​​កម្ពុជា​វិញ​ដោយ​មាន​សេរីភាព​​បាន​​ដែរ​ ហើយ​បាន​អំពាវ​នាវ​ឲ្យ​ប្រធាន ​គណបក្ស​ប្រឆាំង​រូប​នេះ​ឈប់​ព្យាយាម​ធ្វើ​ឲ្យ​រដ្ឋាភិបាល​ខឹង​​ ខណៈ​កំពុង​នៅ​បរទេស។

លោក​បាន​​លើក​ឡើង​ថា “​ប្រសិន​បើ​​បញ្ហា​បុគ្គល​នៅ​តែ​បន្ត​កើត​ឡើង​​​​​ វា​នឹង​មាន​

ការ​លំបាក។ ​ដូច្នេះ​​សូម​ទទួល​ស្គាល់​​ភាព​ពិត​នៃ​ប្រវត្តិសាស្ត្រ​​​ និងអ្នក​ដែល​បាន​ធ្វើ​អ្វី​ខ្លះ​ដើម្បី​ប្រទេស​ជាតិ​។ អ្វី​ដែល​យើង​មាន​ថ្ងៃ​នេះ​​គឺ​ដោយសារ​ការ​រួម​ចំណែក​យ៉ាង​ធំធេង​​ពី​គណបក្ស​ប្រជាជន​កម្ពុជា​​”។

លោក សម រង្ស៊ី ​មិនអាច​ទាក់​ទង​សុំ​ការ​បំភ្លឺ​បាន​ទេ​​ជុំវិញ​ថា តើ​លោក​នឹង​​​ពិចារណា​សុំ​ទោស​ឬយ៉ាង​ណា​​​ចំពោះ​ការ​អះអាង​របស់​លោក​ដែល​លោក​បាន​​​គាំទ្រ​​ជាច្រើន​ឆ្នាំ​មក​ហើយ​ និង​​ខណៈ​​លោក ហោ ណាំហុង កំពុង​​ដំណើរ​ការ​ប្ដឹង​ផ្ដល់​​នៅ​ក្នុង​ប្រទេស​បារាំង និង​​ប្រទេស​កម្ពុជា​។

កាលពី​ឆ្នាំ​២០០៦​​ប្រធាន​គណបក្ស​ប្រឆាំង​រូប​នេះបាន​​​​​​ធ្វើ​មាតុភូមិ​និវត្តពីការ​និរទេស​ខ្លួន​មក​កាន់​ប្រទេស​កម្ពុជា​វិញ​ បន្ទាប់ពី​លោក​បាន​សរសេរ​លិខិត​សុំទោស​ចំពោះ​ការ​ចោទ​ប្រកាន់​លោក ហ៊ុន សែន ថា​ជា​អ្នក​បញ្ជា​ឲ្យ​គប់​គ្រាប់​បែក​​​ក្នុង​ឆ្នាំ​១៩៩៧​​ទៅ​លើ​បាតុកម្ម​មួយ​​​នៅ​ក្នុង​រាជធានី​ភ្នំពេញ​ដែល​បណ្ដាល​​ឲ្យ​មនុស្ស​១៦​នាក់​បាត់​បង់​ជីវិត​ និង​ជា​ច្រើន​ទាក់​ទៀត​រង​របួស​។

គណបក្ស​កាន់​អំណាច​​បាន​​ប្រើ​ប្រាស់​​ការ​មិន​​និយាយ​ស្ដី​របស់​លោក​ សម រង្ស៊ី អំពី​ការ​វិល​ត្រឡប់​មក​ប្រទេស​កម្ពុជា​វិញ​​ ហើយ​ប្រឈម​​​មុខ​ការ​ជាប់​ពន្ធនាគារ ដើម្បី​ចំអក​ឡក​ឡាយ​​​ឲ្យ​ប្រធាន​គណបក្ស​សង្គ្រោះជាតិ​រូប​នេះ​​ដែល​កាលពី​ពេល​ថ្មីៗ​នេះ​ព្យាយាម​ប្រៀប​ធៀប​​​ចលនា​គណបក្ស​ប្រឆាំង​របស់​លោក​​​ទៅ​នឹង​ចលនា​គណបក្ស​ប្រឆាំង​​របស់​លោកស្រី អ៊ុង សាន ស៊ូជី មេដឹកនាំ​ប្រជាធិប​​​តេយ្យ​នៅ​ភូមា​។

ទោះ​ជា​យ៉ាង​ណា លោក គល់ បញ្ញា ​នាយក​​​​ប្រតិបត្តិ​នៃ​គណៈកម្មាធិការ​​ដើម្បី​ការ​បោះ​ឆ្នោត​ដោយ​សេរី និង​យុត្តិធម៌​នៅ​កម្ពុជា ​(ខុមហ្វ្រែល) បាន​មាន​ប្រសាសន៍​ថា លោក​ជឿ​ថា ​លោក​ សម រង្ស៊ី កំពុង​ធ្វើ​ត្រូវ​ក្នុង​ការ​​​គេចវេះ​ពី​ការ​ជាប់​ពន្ធនាគារ ដោយ​លើក​ឡើង​ថា ការ​តស៊ូ​ប្រយុទ្ធ​របស់​លោក​​គឺ​ស្ថិត​ក្នុង​ដំណាក់​កាល​ខុស​គ្នា​​ពី​ការ​​តស៊ូ​ប្រយុទ្ធ​ របស់​លោកស្រី អ៊ុង សាន ស៊ូជី នៅពេល​លោកស្រី​​ត្រូវ​បាន​​ឃុំខ្លួន​អស់​រយៈ​ពេល​ជាង​២ទសវត្សរ៍​​​​។

​​​​​​​​​​​​​​​​​​​​​លោក​មាន​ប្រសាសន៍​ទៀត​ថា “​​បញ្ហា​គឺ​នៅ​ត្រង់​ថា គេ​កំពុង​​ប្រៀបធៀប​​លោក សម រង្ស៊ី ទៅ​​លោកស្រី អ៊ុង សាន ស៊ូជី។ លោក​​​ស្រី​ត្រូវ​បាន​ឃុំ​ខ្លួន​ឲ្យ​នៅ​តែ​ក្នុង​ផ្ទះ​ វា​ខុស​គ្នា​ស្រឡះ​​​​ពី​​នៅ​ទីនេះ​​​។ វា​គ្មាន​កិត្តិយស​ទេ​នៅ​ពេល​​ជាប់​ពន្ធនាគារ។ គេ​នឹង​​ធ្វើ​បាប​​​យើង​ហើយ​បន្ទាប់​មក​​បង្ហាញ​វា​​ឲ្យ​សាធារណជន​បាន​ឃើញ។ ​ពួកគេ​បាន​ចាប់​ផ្ដើម​​ការ​សន្ទនា​គ្នា​រួច​ទៅ​ហើយ ពួកគេ​គួរ​តែ​ពង្រឹង​វា​បន្ថែម​។ ​​​​នោះ​ជា​​អនាគត​ ប្រសិន​បើពួកគេ​ចង់​ឲ្យ​មាន​អន្តរកាល​រលូន។ ​ដើម្បី​​ឲ្យ​មាន​អន្តរកាល​រលូន ​វា​ត្រូវ​ការ​ឲ្យ​ថ្នាក់​ដឹកនាំ​នៃ​ដៃគូ​នយោ​​​បាយ​​​​ពិភាក្សា​គ្នា”។

លោក​បាន​​លើក​ឡើង​បន្តថា លោក សម រង្ស៊ី ​ដឹង​ច្បាស់​​​ណាស់​​​​អំពី​ភាព​ព្រៃផ្សៃ និង​ភាព​ឆេវឆាវ​របស់​លោក ហ៊ុន សែន ដែល​មាន​​​​​ទៅ​លើ​​អ្នក​ប្រឆាំង​​របស់​លោក​ខាង​នយោ​​​បាយ។ “វា​មិន​ងាយ​ស្រួល​ទេ។ ក្មេង​ជំនាន់​ក្រោយ​គិត​ខុស​ពី​ខ្ញុំ។ ជំនាន់​ខ្ញុំ​មាន​ការ​បាក់​ស្បាត​ច្រើន​។ សូម្បី​លោក សម រង្ស៊ី ប៊ិះ​នឹង​បាត់​បង់​ជីវិត​នៅ​ក្នុង​ហេតុការណ៍​គប់គ្រាប់​បែក​នៅ​ក្នុង​ឆ្នាំ​១៩៩៧​។ រឿង​នោះ​​វា​អាច​កើត​ឡើង​ម្ដង​ទៀត។ ប៉ុន្តែ​ក្មេង​ជំនាន់​ក្រោយ ​​​​ដែល​ខ្ញុំ​មើល​ឃើញ​តាម​ហ្វេសប៊ុក ពួក​​​គេ​គ្មាន​ការ​ភ័យ​ខ្លាច​បែប​នេះ​ទេ​។ ពួកគេ​និយាយ ​ថា ត្រូវ​តែ​ប្រឈម​​មុខ​ ពួកគេ​ហា៊ន​ប្រឈម​មុខ​។ ប្រហែល​ជា​​​យើង​​ត្រូវ​រៀន​សូត្រ​ពី​ពួកគេ​ហើយ”៕ សុខុម

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស