29 C
Phnom Penh

តុលាការ​​​លើក​​​ពេល​​​សវនាការ​​​​​ជំនុំ​​​ជម្រះ​​​ឪពុក​​​ម្តាយ​​​ឧកញ៉ា ថោង សារ៉ាត់

ដោយ ឌឹ ខេមបូឌា ដេលី

បទវិភាគ

អ្នកស្រី កែវ សារី ជាម្តាយរបស់លោក ថោង សារ៉ាត់ ធ្វើដំណើរមកតុលាការក្រុងភ្នំពេញ កាលពី ថ្ងៃសុក្រ ប៉ុន្តែ សវនាការជំនុំជម្រះអ្នកស្រីត្រូវបានពន្យារពេល។ សីុវ ចាន់ណា
អ្នកស្រី កែវ សារី ជាម្តាយរបស់លោក ថោង សារ៉ាត់ ធ្វើដំណើរមកតុលាការក្រុងភ្នំពេញ កាលពី ថ្ងៃសុក្រ ប៉ុន្តែ សវនាការជំនុំជម្រះអ្នកស្រីត្រូវបានពន្យារពេល។ សីុវ ចាន់ណា

កាល​​​ពី​​​ថ្ងៃ​​​សុក្រ តុលាការ​​​ក្រុង​​​ភ្នំពេញ​​​បាន​​​លើក​​​ពេល​​​សវនាការ​​​ជំនុំ​​​ជម្រះ​​​ឪពុក​​​ម្តាយ​​​របស់​​​លោក ថោង សារ៉ាត់​​​ ជា​​​មន្ត្រី​​​ក្រសួង​​​ការ​​​ពារ​​​ជាតិ​​​ដែល​​​កំពុង​​​រត់​​​គេច​​​ខ្លួន​​​​​​​​​ ដែល​​​អ្នក​​​ទាំង​​​ពីរ​​​កំពុង​​​ប្រឈម​​​នឹង​​​បទ​​​ចោទ​​​កាន់​​​កាប់​​​​​​អាវុធ​​​ខុស​​​ច្បាប់​​​។

លោក ថោង ចំរើន និង​​​អ្នកស្រី កែវ សារី ត្រូវ​​​បាន​​​ចាប់​​​ខ្លួន​​​ និង​​​ដាក់​​​ពន្ធនាគារ​​​កាល​​​ពីខែ​​​ធ្នូ​​​ បន្ទាប់​​​ពី​​​នគរ​​​បាល​​​បាន​​​រក​​​ឃើញ​​​អាវុធ​​​ និង​​​គ្រាប់​​​កាំភ្លើង​​​ក្នុ​​​ង​​​ផ្ទះ​​​​​​របស់អ្នក​​​ទាំង​​​ពីរ​​​​​​ក្នុង​​​ពេល​​​កំពុង​​​​​​សើុប​​​អង្កេត​​​កូន​​​ប្រុស​​​របស់​​​ពួក​​​គាត់​​​ គឺ​​ឧត្តម​​សេនីយ៍ទោ ថោង​​​ សារ៉ាត់ ដែល​​​គេ​​​សង្ស័យ​​​ថា បាន​​​រៀប​​​ចំ​​​ឃាត​​​កម្ម​​​​​​កាល​​​ពី​​​ខែ​​​វិច្ឆិកា​​​​​​លើ​​​ឧកញ៉ា អឹុង ម៉េងជឺ ប្រធាន​​​ក្រុមហ៊ុន​​​សីុមិុច​​​។

ពេល​​​​​​បាន​​​ដោះ​​​លែង​​​ឲ្យ​​​នៅ​​​ក្រៅ​​​ឃុំ​​​ទៅ​​​ហើយ​​​ ឪពុក​​​ម្តាយ​​​របស់​​​ ថោង សារ៉ាត់ ​​​ត្រូវ​​​បាន​​​ចាប់ខ្លួន​​​ជា​​​ថ្មី​​​កាល​​​ពី​​​ខែ​​​កុម្ភៈ​​​ ខណៈ​​​ដែល​​​ពួក​​​គេ​​​ព្យាយាម​​​គេច​​​​​​ខ្លួន​​​ចេញ​​​ពី​​​ប្រទេស​​​តាម​​​រថយន្ត​​​ពេទ្យ​​​​​​ឆ្ពោះ​​​ទៅ​​​ព្រំដែន​​​វៀតណាម​​​។

ក្នុ​​​ងតុលាការ​​​កាល​​​ពី​​​ថ្ងៃ​​​សុក្រ ចៅក្រម​​​ ឃី ឆៃ បាន​​​និយាយ​​​ថា “តុលាការ​​​សម្រេច​​​លើក​​​រឿង​​​នេះ​​​ ពីព្រោះ​​​មេធាវី​​​របស់​​​ជន​​​ជាប់​​​ចោទ​​​បាន​​​ដាក់​​​ពាក្យសុំ​​​លើក​​​​​​​​​”។

ទាក់ទង​​​តាម​​​ទូរស័ព្ទ​​​ និង​​​​​​ស្នើ​​​​​​សុ​​​ំពន្យល់​​​អំពី​​​ការ​​​លើក​​​ពេល​​​នេះ ចៅ​​​ក្រម​​​ ឃី ឆៃ បាន​​​និយាយ​​​ថា “មេធាវី​​​សុំ​​​លើក​​​​​​​​​ ពីព្រោះ​​​គាត់​​​​​​សិក្សា​​​សំណុំ​​​រឿង​​​មិន​​​ទាន់​​​​​​គ្រប់​​​ជ្រុង​​​ជ្រោយ​​​”។

ក្នុង​​​បន្ទប់​​​តុលាការ​​​ អ្នកស្រី​​​ សារី បាន​​​និយាយ​​​ថា អ្នក​​​ស្រី​​​បាន​​​បន្ថយ​​​ចំនួន​​​ក្រុម​​​មេធាវី​​​ការ​​​ពារ​​​អ្នក​​​ស្រី​​​ ទុក​​​តែ​​​លោក​​​ លឹម វណ្ណា និង លោក ស៊ី សត្យា ប៉ុណ្ណោះ​​​ ហើយ​​​ថា​​​មេធាវី​​​ផ្សេង​​​ទៀត​​​​​​ដែល​​​អ្នក​​​​​​ស្រី និង​​​ប្តី​​​​​​របស់​​​អ្នកស្រី​​​ជួល​​​ពីមុន​​​​​​​​​​លែង​​​ធ្វើ​​​ការ​​​លើ​​​រឿង​​​ក្តី​​​នេះទៀត​​​ហើយ​​​។ អ្នក​​​ស្រី​​មិន​​​បាន​​​ផ្តល់​​​មូល​​​ហេតុ​​​ ចំពោះ​​​សេចក្តី​​​សម្រេច​​នេះ​​​ទេ​​​។

លោក វង្ស ប៊ុនវិសុទ្ធ ព្រះរាជ​​​អាជ្ញា​​​រង​​​​​​ បាន​​​ឲ្យ​​​ដឹង​​​ថា ពីមុន​​​​​​មាន​​​មេធាវី​​​ប្រាំពីរ​​​នាក់​​​ការពារ​​​អ្នក​​​ទាំង​​​ពីរ។

លោក ចំរើន និង​​​អ្នក​​​ស្រី​​​ សារី បាន​​​បដិសេធ​​​មិន​​​ឆ្លើយសំណួរ​​​អ្នក​​​កាសែត​​​ ពេល​​​ពួក​​​គេ​​​ចាក​​​ចេញ​​​ពី​​​បន្ទប់​​​សវនាការ​​​។

ដំបូង​​​ឡើយ​​​អ្នក​​​ទាំង​​​ពីរ​​​ត្រូវ​​​បាន​​​ចាប់​​​ខ្លួន​​​ និង​​​បញ្ជូន​​​ទៅ​​​ពន្ធនាគារ​​​ព្រៃ​​​ស​​​នៅ​​​ថ្ងៃ​​​ទី​​​៧ ខែធ្នូ​​ ឆ្នាំ​​​មុន ក្រោយ​​​ពី​​​មាន​​​ការ​​​ឆែក​​​ឆេរ​​​ផ្ទះ​​​សំបែង​​​របស់​​​ពួកគេ​​​ក្នុង​​​ក្រុង​​​ភ្នំពេញ​​​ ដែល​​​បាន​​​រក​​​ឃើញ​​​អាវុធ និង​​​គ្រាប់​​​កាំភ្លើង​​​ខុស​​​ច្បាប់​​​ ក្នុង​​​នោះ​​​មាន​​​កាំភ្លើង​​​អាកា-៤៧បី​​​ដើម​​​ និង​​​កាំភ្លើង​​​ខ្លី​​​មួួ​​​យ​​​ដើម។

ការ​​​ចូល​​​ឆែក​​​ឆេរ​​​នេះ​​​ជា​​​ផ្នែក​​​មួយ​​​នៃ​​​ការ​​​សើុបអង្កេត​​​លើ​​​កូន​​​ប្រុស​​​របស់​​​ពួក​​​គាត់​​​ ដែល​​​ជាប់​​​ចោទ​​​ថា​​​បាន​​​បញ្ជា​​​ឲ្យ​​​សម្លាប់​​​លោក​​​ អឹុង ម៉េងជឺ ដែល​​​​​​ត្រូវ​​​គេ​​​បាញ់​​​ជា​​​ច្រើន​​​គ្រាប់​​​ បន្ទាប់​​​ពី​​​ចុះពី​​​រថយន្ត​​​ SUV របស់​​​គាត់​​​នៅមុខ​​​ហាង​​​លក់​​​ផ្លែ​​​ឈើ​​​មួយ​​​កន្លែង​​​ក្នុង​​​ក្រុង​​​ភ្នំពេញ​​​។

អង្គរក្ស​​​បួន​​​​​​នាក់​​​របស់​​​ឧត្តមសេនីយ៍​​​ទោ ថោង សារ៉ាត់ កំពុង​​​ជាប់​​​ពន្ធនាគារ​​​នៅ​​​ឡើយ​​​​​​​ ដោយ​​​អង្គរក្ស​​​​​​ពីរ​​​នាក់​​​ជាប់​​​ចោទ​​​ពី​​​បទ​​​ឃាត​​​កម្ម​​​  និង​​​ពី​​​រ​​​នាក់​​​​​​ផ្សេង​​​ទៀត​​​ជាប់​​​ចោទ​​​ពី​​​បទ​​​ផ្សំ​​​គំនិត​​​ក្នុ​​​ង​​​អំពើ​​​​​​ឃាត​​​កម្ម​​​៕ និត

 

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស