កាលពីម្សិលមិញ ក្រសួងមហាផ្ទៃបានលើកឡើងថា ខ្លួននៅតែរក្សាការសម្រេចមិនបន្តទិដ្ឋាការឲ្យលោក អាឡិចហ្សង់ដ្រូ ហ្គន់ហ្សេលេស ដេវីតសុន (Alejandro Gonzales-Davidson) សកម្មជនការពារបរិស្ថានឥតសំចៃមាត់ ខណៈកំពុងមានការដាក់សម្ពាធពីសំណាក់សកម្មជនផ្សេងៗទៀត អង្គការមិនមែនរដ្ឋាភិបាល សហជីព និស្សិត និងព្រះសង្ឃ ព្រមទាំងលោក សម រង្ស៊ី មេដឹកនាំគណបក្សប្រឆាំងឲ្យមានការកែប្រែសេចក្ដីសម្រេចនេះក៏ដោយ។
ក្រសួងមហាផ្ទៃបានលើកឡើងទៀតថា ខ្លួននឹងមិនបន្តទិដ្ឋាការដែលនឹងផុុតសុពលភាពនៅថ្ងៃសុក្រឡើយ ព្រោះលោក ហ្គន់ហ្សេលេស ដេវីតសុន និងសកម្មជនផ្សេងទៀតមកពីអង្គការមិនមែនរដ្ឋាភិបាលឈ្មោះថា មាតាធម្មជាតិ (Mother Nature) របស់លោកបានប្រើរបាំងបិទផ្លូវទៅរារាំងក្បួនរថយន្តរបស់មន្ត្រីរដ្ឋាភិបាល ដែលធ្វើដំណើរទៅតំបន់ដែលគេគ្រោងសាងសង់ទំនប់វារីអគ្គិសនីនៅក្នុងខេត្តកោះកាលពីខែកញ្ញា។ អង្គការមិនមែនរដ្ឋាភិបាលនេះចង់ឲ្យរដ្ឋាភិបាលលុបចោលគម្រោងសាងសង់ទំនប់វារីអគ្គិសនី ដែលនឹងបង្ខំឲ្យអ្នកភូមិជនជាតិដើមភាគតិចរាប់រយគ្រួសារចាកចេញពីដីដូនតារបស់ខ្លួននៅក្នុងតំបន់ជ្រលងអារ៉ែង និងធ្វើឲ្យលិចលង់ជម្រករបស់សត្វជិតផុតពូជប្រមាណ៣០ប្រភេទ។
លោក សម រង្ស៊ី ប្រធានគណបក្សសង្គ្រោះជាតិបានផ្ញើលិខិតមួយច្បាប់ជូនលោក ស ខេង រដ្ឋមន្ត្រីក្រសួងមហាផ្ទៃកាលពីថ្ងៃច័ន្ទ ដោយស្នើឲ្យលោកជួយអន្តរាគមន៍ដើម្បីឲ្យមានការបន្តទិដ្ឋាការរបស់លោក ហ្គន់ហ្សេលេស ដេវីតសុន។ លោក កឹម សុខា អនុប្រធានគណបក្សសង្គ្រោះជាតិក៏បានធ្វើដូច្នេះដែរកាលពីម្សិលមិញ ដោយផ្ញើលិខិតជូនលោក ហេង សំរិន ប្រធានរដ្ឋសភា និងថ្វាយព្រះមហាក្សត្រ នរោត្តម សីហមុនី។
ប៉ុន្តែឧត្ដមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានលើកឡើងកាលពីម្សិលមិញថា រដ្ឋាភិបាលនឹងមិនផ្លាស់ប្ដូរគោលជំហររបស់ខ្លួនឡើយ។
ឧត្ដមសេនីយ៍ ខៀវ សុភ័គ បានមានប្រសាសន៍ថា “ក្រសួងតម្រូវឲ្យលោក ហ្គន់ហ្សេលេស ដេវីតសុន ចាកចេញពីព្រះរាជាណាចក្រកម្ពុជាមួយរយៈខ្លីមុនពេលលោកអាចត្រឡប់មកវិញបាន។ យើងគិតថា វិធានការនេះគឺអាចទទួលយកបានទាំងអស់គ្នា”។
រដ្ឋាភិបាលបានលើកឡើងថា លោក ហ្គន់ហ្សេលេស ដេវីតសុន អាចដាក់ពាក្យសុំទិដ្ឋាការថ្មីនៅពេលណាលោកចាកចេញពីប្រទេសកម្ពុជា ប៉ុន្តែមិនមែនមុនពេលដែលលោកមិនទាន់ចាកចេញនោះឡើយ។ ឧត្តមសេនីយ៍ ខៀវ សុភ័គ បានពន្យល់កាលពីម្សិលមិញថា សកម្មជនរូបនេះត្រូវតែចាកចេញពីប្រទេសកម្ពុជាជាមុនសិន ដោយសារមានពាក្យបណ្ដឹងប្ដឹងលោកដោយមន្ត្រីខេត្តកោះកុងជុំវិញការបិទផ្លូវ។
លោកបានលើកឡើងទៀតថា រដ្ឋាភិបាលអាចនិរទេស ឬផ្ដន្ទាទោសលោក ប៉ុន្តែបានជ្រើសវិធានការដ៏ល្អប្រសើរដែលអាចទទួលយកបានមួយ។
លោកបានមានប្រសាសន៍ថា “ការឆ្លើយតបត្រូវតែដើរផ្លូវកណ្ដាល។ គាត់បានទទួលស្គាល់ថា គាត់បានប្រព្រឹត្ត [បទល្មើស] ព្រោះបានបិទផ្លូវ។ ប៉ុន្តែយើងមិនចង់បង្កើតឲ្យមានបញ្ហាទេ…នៅពេលបញ្ហាវាតូចតាច យើងអាចមិនផ្ដន្ទាទោស”។
លិខិតកាលពីម្សិលមិញពីលោក ឯម សំអាន រដ្ឋមន្ត្រីក្រសួងមហាផ្ទៃស្ដីទីផ្ញើជូនលោក សម រង្ស៊ី បានបញ្ជាក់ម្ដងទៀតពីការសម្រេចរបស់រដ្ឋាភិបាល ហើយបានបន្ថែមថា លោក ហ្គន់ហ្សេលេស ដេវីតសុន ក៏បានប្រព្រឹត្តខុសទៅនឹងលក្ខន្តិកៈរបស់អង្គការមាតាធម្មជាតិដែលតម្កល់ទុកនៅក្រសួងមហាផ្ទៃ ដោយធ្វើសកម្មភាពរារាំងការគ្រប់គ្រងរដ្ឋបាលសាធារណៈរបស់អាជ្ញាធរខេត្តកោះកុងផងដែរ។
លិខិតនេះមានខ្លឹមសារថា រដ្ឋាភិបាលពុំមានគោលការហាមឃាត់លោក ហ្គន់ហ្សេលេស ដេវីតសុន ក្នុងការចូលមកព្រះរាជាណាចក្រកម្ពុជាវិញនោះទេ ប្រសិនបើគាត់បានបំពេញបែបបទ និងមានលក្ខណៈសម្បត្តិគ្រប់គ្រាន់ដូចជនអន្តោប្រវេសន៍ដទៃទៀតស្របតាមគោលការច្បាប់នៃព្រះរាជាណាចក្រកម្ពុជា។
លោក ហ្គន់ហ្សេលេស ដេវីតសុន និងអ្នកគាំទ្ររបស់លោកបានលើកឡើងថា ការសម្រេចរបស់រដ្ឋាភិបាលមិនបន្តទិដ្ឋាការឲ្យលោក គឺមានជាប់ពាក់ព័ន្ធនឹងរឿងនយោបាយ ព្រោះលោកកំពុងជួយឲ្យមានការបញ្ឈប់គម្រោងសាងសង់ទំនប់វារីអគ្គិសនី ដែលគាំទ្រដោយលោក ឡាវ ម៉េងឃិន សមាជិកព្រឹទ្ធសភាមកពីគណបក្សប្រជាជនកម្ពុជា និងភរិយារបស់លោកដែលគេស្គាល់ថា ជាអ្នកមានអំណាចបំផុតនៅក្នុងប្រទេសកម្ពុជា។ លោកនាយករដ្ឋមន្ត្រី ហ៊ុន សែន ខ្លួនលោកផ្ទាល់ក៏បានចេញមកគាំទ្រគម្រោងនេះដែរកាលពីដើមខែនេះ។
នៅក្នុងសន្និសីទកាសែតមួយក្នុងរាជធានីភ្នំពេញកាលពីព្រឹកម្សិលមិញ និស្សិតមួយក្រុម និងសកម្មជនជាព្រះសង្ឃបានប្រកាសពីផែនការធ្វើការតវ៉ានៅខាងមុខរដ្ឋសភានៅថ្ងៃសុក្រ ដើម្បីទាមទារឲ្យរដ្ឋាភិបាលបន្តទិដ្ឋាការឲ្យសកម្មជនរូបនេះជាបន្ទាន់។
លោក សន ច័ន្ទតារា ជាសមាជិកនៃយុវជនខ្មែរមហានគរ បាននិយាយថា “យើងមានការសោកស្ដាយយ៉ាងខ្លាំងដែលរដ្ឋាភិបាលបដិសេធមិនព្រមបន្តទិដ្ឋាការ ព្រោះលោក អាឡិច គឺជាសកម្មជនដ៏អស្ចារ្យមួយរូបដែលការពារធនធានធម្មជាតិនៅតំបន់ជ្រលងអារ៉ែង”។
ពេលទាក់ទងតាមក្រោយ លោក ហ្គន់ហ្សេលេស ដេវីតសុន បានបញ្ជាក់ម្ដងទៀតពីគោលជំហរមិនចាកចេញពីប្រទេសកម្ពុជា ទោះបីជាទិដ្ឋាការរបស់លោកត្រូវបានបន្តឬមិនបន្តក៏ដោយ។ លោកបានមានប្រសាសន៍ដោយសំដៅទៅលើផែនការធ្វើការតវ៉ានៅមុខរដ្ឋសភាថា “ប្រសិនបើគេចង់កម្ចាត់ខ្ញុំ ពួកគេត្រូវតែធ្វើក្នុងលក្ខណៈប្រជាធិបតេយ្យពិតប្រាកដ ឬអ្វីដែលជាចំណុចសំខាន់”។
តែទោះជាយ៉ាងណា នៅពេលត្រូវបានសួរម្ដងទៀតអំពីការតវ៉ា លោកមិនបានបញ្ជាក់ឬបដិសេធឡើយថា តើលោកនឹងចូលរួម ឬក៏អត់នោះ ព្រោះខ្លាចក្រែងកើតមានការបង្ក្រាបដ៏ហិង្សាពីសំណាក់នគរបាល។
លោក ហ្គន់ហ្សេលេស ដេវីតសុន បានលើកឡើងទៀតថា លោកកំពុងតែពិភាក្សាជាមួយមេធាវីម្នាក់ ដើម្បីសិក្សាថាតើលោកអាចឬគួរតែតទល់នឹងសេចក្ដីសម្រេចរបស់រដ្ឋាភិបាលតាមមូលដ្ឋានច្បាប់ឬក៏អត់។ លោកបានមានប្រសាសន៍ថា “ខ្ញុំគិតថា វាមានច្រើនជាងអ្វីដែលអាជ្ញាធរបាននិយាយឆ្ងាយណាស់…ខ្ញុំកំពុងតែស្រាវជ្រាវ និងអាន ដើម្បីសិក្សាមើលថាតើអ្វីដែលអាជ្ញាធរបាននិយាយពិតប៉ុណ្ណា”៕ ស៊ុយឈាង