36 C
Phnom Penh

រដ្ឋាភិបាល​ទទួល​ស្គាល់​ម៉ុងតាញ៉ា​១៣នាក់​ជា​ជន​ភៀស​ខ្លួន​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ ក្រសួង​មហាផ្ទៃ​បាន​ទទួល​ស្គាល់​​ជនជាតិ​​​ម៉ុងតាញ៉ា​១៣​នាក់​នៅ​ក្នុង​រាជធានី​ភ្នំពេញ​ ថាជា​ជន​ភៀស​ខ្លួន ​ពោល​គឺ​​មិន​ដល់​១សប្ដាហ៍​ផង​ទេ​​ក្រោយពី​​ការ​និរទេស​​ជនជាតិ​​​​ម៉ុងតាញ៉ា​៣៦​នាក់​ទៀត​ ដែល​ជាជន​ស្វែង​រក​សិទ្ធិ​ជ្រក​កោន​នៅ​ក្នុង​ខេត្ត​រតនគិរី នេះ​បើ​យោង​តាម​​ការ​លើក​​ឡើង​របស់​អ្នក​នាំពាក្យ​ក្រសួង​នេះ​។

លោក​ ខៀវ សុភ័គ អ្នក​នាំពាក្យ​ក្រសួង​មហាផ្ទៃ​បានមាន​ប្រសាសន៍​ថា លោក​ ស ខេង រដ្ឋមន្ត្រី​ក្រសួង​នេះ​​បាន​ចុះ​ហត្ថលេខា​លើ​ពាក្យ​ស្នើ​សុំ​របស់​ជនជាតិ​​ម៉ុងតាញ៉ា​ទាំង​១៣​នាក់​កាលពី​រសៀល​ម្សិលមិញ ដោយ​ទទួល​ស្គាល់​ពួកគេ​ជា​ជន​ភៀស​ខ្លួន​​ជា​ផ្លូវ​ភេទ​។

លោក​បាន​ថ្លែង​ថា “ឧបនាយក​រដ្ឋមន្ត្រី ស ខេង បាន​សម្រេច​ថា មនុស្ស​ទាំង​១៣​នាក់​នេះ​គួរ​​តែ​ទទួល​បាន​ឋានៈ​ជាជន​ភៀស​ខ្លួន”។ សំដៅ​ដល់​ឧត្ដម​ស្នង​ការ​នៃ​អង្គការ​សហ​ប្រជា​ជាតិ​​ទទួល​​បន្ទុក​សិទ្ធិ​មនុស្ស (UNHCR) លោក​បានមាន​ប្រសាសន៍​បន្ថែម​ថា ” យើង​កំពុង​ធ្វើ​ការ​ជាមួយ​ UNHCR ដើម្បី​តាំង​លំនៅ​ពួកគេ​នៅ​ក្នុង​ប្រទេស​ទី៣”។

លោកស្រី​ វីវៀន តាន (Vivian Tan) មន្ត្រី​ផ្នែក​ព័ត៌មាន​ប្រចាំ​តំបន់​​នៃ​ UNHCR បាន​មាន​​ប្រសាសន៍​ថា អាជ្ញាធរ​កម្ពុជា​បាន​ប្រាប់​ការិយាល័យ​របស់​លោកស្រី​ថា ពួកគេ​បាន​ផ្ដល់​អនុសាសន៍​ឲ្យ​ទទួល​ស្គាល់​ជនជាតិ​​​ម៉ុងតាញ៉ា​​ទាំង​១៣​នាក់​នោះ​ជា​ជន​ភៀស​ខ្លួន។ លោកស្រី​បាន​លើក​ឡើង​នៅ​ក្នុង​អុីម៉េល​មួយ​ថា ” UNHCR នឹង​ពិភាក្សា​​ជំហាន​បន្ទាប់​ជាមួយ​រដ្ឋាភិបាល​ ដើម្បី​ស្វែង​រក​ដំណោះ​ស្រាយ​​សមរម្យ​បំផុត​សម្រាប់​ក្រុម​នេះ”។

លោក ខៀវ សុភ័គ បាន​​ថ្លែង​ថា ក្រសួង​របស់​លោក​ក៏​បាន​​ទាក់​ទង​ទៅ​ស្ថានទូត​សហរដ្ឋ​អាមេរិក​​ដែរ​ ដើម្បី​ជជែក​អំពី​ការ​តាំង​លំនៅ​ថ្មី​របស់​​ជនជាតិ​​​​ម៉ុងតាញ៉ា​​ទាំង​១៣​នាក់​នេះ ហើយ​កំពុង​រង់ចាំ​ការ​ឆ្លើយ​តប​។

នៅ​ពេល​សួរ​ថា តើ​ស្ថានទូត​សហរដ្ឋអាមេរិក​កំពុង​ពិភាក្សា​អំពី​​ការ​តាំង​លំនៅថ្មី​ជាមួយ​ក្រសួង​នេះ​ ឬយ៉ាង​ណា​នោះ លោក ចេយ៍ រ៉ាមែន (Jay Raman)​ អ្នក​នាំពាក្យ​ស្ថានទូត​សហ​រដ្ឋអាមេរិក​បាន​បដិសេធ​មិន​ឆ្លើយ​សំណួរ​នេះ​ទេ។ លោក​បានមាន​ប្រសាសន៍​ថា “សហរដ្ឋ​អាមេរិក​នៅតែ​ព្រួយ​បារម្ភ​យ៉ាង​ខ្លាំង​ចំពោះ​ការ​ការ​ពារ​ជន​ស្វែង​រក​សិទ្ធិ​ជ្រក​កោន និង​ជន​ចំណាក​ស្រុក​ដែល​ងាយ​រងគ្រោះ​”។

ទោះ​ជាយ៉ាង​ណា លោក កែម សារិន ប្រធាន​នាយកដ្ឋាន​ជន​ភៀស​ខ្លួន​នៃ​ក្រសួង​មហាផ្ទៃ​ បានមាន​ប្រសាសន៍​កាលពី​ល្ងាច​​ម្សិលមិញ​ថា លោក​មិន​ទាន់​​ផ្ដល់​អនុសាសន៍​ឲ្យ​ទទួល​ស្គាល់​​ជនជាតិ​​​ម៉ុងតាញ៉ា​​ទាំង​១៣​នាក់​នេះ​​​ជា​ជន​ភៀស​ខ្លួន​នៅ​ឡើយ​ទេ។ លោក​បាន​លើក​ឡើង​ថា ” ប៉ុន្តែ​​បើ​ឯក​ឧត្ដម​ ខៀវ សុភ័គ មាន​ប្រសាសន៍​បែប​នេះ​ទៅ​ហើយ គឺ​គាត់​និយាយ​ត្រូវ​ ពីព្រោះ​គាត់​ជា​អ្នក​នាំពាក្យ​”។

លោក​បាន​​មាន​ប្រសាសន៍​បន្ថែម​ថា លោក​មិន​អាច​ផ្ដល់​ព័ត៌មាន​លម្អិត​ស្ដីពី​ករណី​​​ជនជាតិ​​​​ម៉ុងតាញ៉ា​​ទាំង​១៣​នាក់​​នេះ​បាន​ទេ ពីព្រោះ​វា​អាច​ធ្វើ​ឲ្យ​ពួកគេ​មាន​គ្រោះ​ថ្នាក់​។ “មនុស្ស​ទាំង​១៣​នាក់​នេះ​បាន​ភៀស​ខ្លួន​ពី​ប្រទេស​របស់​ពួកគេ​ដើម្បី​ស្វែក​រក​សិទ្ធិជ្រក​កោន ដូច្នេះ​ហើយ​យើង​គួរ​តែ​លាក់​បាំង​ព័ត៌មាន​ ដើម្បី​ធ្វើ​ឲ្យ​ពួកគេ​មាន​សុវត្ថិភាព​”។

ពេល​ទាក​់​ទង​មុន​នេះ​ក្នុង​ថ្ងៃ​ដដែល​ លោក កែម សារិន បានមាន​ប្រសាសន៍​ថា លោក​មិន​អាច​និយាយ​បាន​ទេ ​ពីព្រោះ​លោក​ជាប់​ប្រជុំ​ជាមួយ​ស្ថានទូត​សហរដ្ឋអាមេរិក​។

លោកស្រី ដេនីស ខូកលែន (Denise Coghlan) ប្រធាន​អង្គការ​​​ Jesuit Refugee Service ​ជា​អង្គការ​​​សាសនា​គ្រិស្ត​នៅ​ក្នុង​រាជធានី​ភ្នំពេញ​ បានមាន​ប្រសាសន៍​ថា ពេល​នេះ​រដ្ឋាភិបាល​មាន​ជម្រើស​ពីរ​ គឺ​ទី១​ទទួល​ស្គាល់​ពួកគេ​ទាំង​១៣​នាក់​ជា​ជនភៀស​ខ្លួន​។​ រដ្ឋា​ភិបាល​​​អាច​​បញ្ចូល​ពួកគេ​ទៅ​ក្នុង​សង្គម​កម្ពុជា​បាន ប្រហែល​ជា​នៅ​ជិត​​ជនជាតិ​​ចារា៉យ​ផ្សេង​ទៀត​។ ហើយ​ជម្រើស​មួយ​ទៀត​គឺ​ជួយ​ឲ្យ​ពួកគេ​​ទទួល​បាន​ការ​តាំង​លំនៅ​ថ្មី។ ជា​ធម្មតា​ [នៅ​កម្ពុជា​] ជនភៀស​ខ្លួន​ស្វែង​រក​ការ​ជួយ​​ឧបត្ថម្ភ​នៅ​ក្នុង​ប្រទេស​មួយផ្សេង​​ទៀត ដែល​​ពួកគេ​អាច​នឹង​មាន​មិត្ត​ភក្ដិ ឬ​ក្រុម​គ្រួសារ​ បន្ទាប់មក​ពួកគេ​ត្រូវ​បាន​ប្រទេស​នោះ​សម្ភាស”។

​ជនជាតិ​​​ម៉ុងតាញ៉ា​​ទាំង​១៣​នាក់ ដែល​ជា​ជន​ជាតិ​ភាគ​តិច​មក​ពី​តំបន់​ខ្ពង់​រាប​ភាគ​កណ្ដាល​នៃ​ប្រទេស​វៀតណាម បាន​មក​ដល់​ខេត្ត​រតនគិរី​កាលពីចុង​ខែ​តុលា ដើម្បី​រត់​គេច​ពី​អ្វី​ដែល​ពួកគេ​និយាយ​ថា ជា​ការ​ធ្វើ​ទុក្ខ​បុកម្នេញ​ផ្នែក​​សាសនា និង​នយោបាយ​ពី​សំណាក់​រដ្ឋាភិបាល​វៀតណាម។

ដោយ​ទទួល​បាន​ជំនួយ​ព​ី​អ្នកភូមិ​ជនជាតិ​ដើម​ភាគតិច​ចារ៉ាយ​ក្នុង​ស្រុកអូរយ៉ាដាវ និង​ស្រុក​លំផាត់ ​ជនជាតិ​​​ម៉ុងតាញ៉ា​​ទាំង​នេះ​បាន​គេច​ខ្លួន​រួច​ច្រើន​លើក ​នៅ​​ពេល​អាជ្ញាធរ​មូលដ្ឋាន​ព្យាយាម​ចាប់​ខ្លួន​ពួកគេ និង​និរទេស​ចេញពី​កម្ពុជា​។

អាជ្ញាធរ​ខេត្ត​បាន​រារាំង​ប្រតិភូមួយ​ក្រុម​​ដឹកនាំ​ដោយ​អង្គការ​សហប្រជាជាតិ​ និង​ក្រសួង​មហាផ្ទៃ​ចំនួន​បីដង មុនពេល​ពួកគេ​អាច​ចូលទៅ​ដល់​​ក្រុម​នេះ​កាលពី​ចុង​ខែ​ធ្នូ។ ពេល​នោះ​អង្គការ​សហប្រជាជាតិ​បាន​បញ្ជូន​ពួកគេ​ទាំង​១៣​នាក់​មក​កាន់រាជធានី​ភ្នំពេញ ហើយ​ប្រគល់​ពួកគេ​ឲ្យ​ទៅ​នាយកដ្ឋាន​ជន​ភៀស​ខ្លួន​។

ដោយ​ចាប់​ផ្ដើម​កាលពី​ដើម​ខែ​មករា ​ជនជាតិ​​​​ម៉ុងតាញ៉ា​​ប្រហែល​៦០​នាក់​ទៀត​បាន​ឆ្លង​ដែន​ចូល​មក​​​​កម្ពុជា​ជា​ក្រុម​ផ្សេងគ្នា។ ក្នុង​ចំណោមពួកគេ​ទាំង​នោះ​​ មាន​តែ​១០​នាក់​ប៉ុណ្ណោះ​ដែល​បាន​មក​ដល់​រាជធានី​ភ្នំពេញ និង​កំពុងរង់ចាំ​ដាក់​ពាក្យ​សុំសិទ្ធិ​ជ្រក​កោន​។

យោង​តាម​អង្គការ​សហប្រជាជាតិ និង​អ្នកភូមិ​ក្នុង​មូលដ្ឋាន​បាន​​ឲ្យ​ដឹង​ថា ៣៦​នាក់​ក្នុង​ចំណោម​​ជនជាតិ​​​​ម៉ុងតាញ៉ា​​ទាំង​នោះ​​ត្រូវ​បាន​ចាប់​ខ្លួន និង​និរទេស​ទៅ​​វៀតណាម​វិញ​កាលពី​សប្ដាហ៍​មុន ខណៈ​ពេល​ពួកគេ​ព្យាយាម​​ចូល​មក​​រាជធានី​ភ្នំពេញ។

ទោះ​ជាយ៉ាង​ណា កាលពី​ថ្ងៃ​​ច័ន្ទ ស្នង​ការ​នគរ​បាល​ខេត្ត​នេះ​បាន​បដិសេធ​ថា ពួកគេ​មិន​ត្រូវ​បាន​ចាប​់​ខ្លួន​ទេ​។

លោក​ ឆាយ ធី អ្នក​សម្របសម្រួល​នៅ​អង្គការ​សិទ្ធិ​មនុស្ស​អាដហុក​ប្រចាំ​ខេត្ត​រតនគិរី បានមាន​ប្រសាសន៍​ថា មគ្គុទេសក៍​​ជនជាតិ​ចារ៉ាយម្នាក់​​ក្នុង​មូលដ្ឋាន​ ​ត្រូវ​បាន​ចាប់​ខ្លួន​រួម​ជាមួយ​​ជនជាតិ​​​ម៉ុងតាញ៉ា​​​៣៦​នាក់​​ ហើយ​ពេល​នេះ​គេ​មិន​ដឹង​ថា មគ្គុទេសក៍​រូប​នោះ​នៅទីណា​ទេ។ លោក​បានមាន​ប្រសាសន៍​កាលពី​ម្សិលមិញ​ថា “បុរស​ជនជាតិ​ចារ៉ាយ​នោះ​កំពុង​បាត់​ខ្លួន​នៅ​ឡើយ ហើយ​យើង​កំពុង​ស៊ើបអង្កេត​”។

អ្នក​ភូមិ​ជនជាតិ​ចារ៉ាយ​ម្នាក់​ដែល​សុំមិន​បញ្ចេញ​ឈ្មោះដោយ​សារ​​ភ័យ​ខ្លាច​ការ​សង​សឹក​ បាន​និយាយ​ថា ​មាន​​ជនជាតិ​​​​ម៉ុងតាញ៉ា​​១៣​នាក់​កំពុង​លាក់​ខ្លួន​នៅ​ក្នុង​ស្រុក​អូរយ៉ាដាវ​នៅ​ឡើយ​។

អ្នកភូមិ​ដែល​បាន​ជួយ​គ្រប់​​ជនជាតិ​​​​ម៉ុងតាញ៉ា​​​ ដែល​បាន​ឆ្លង​ដែន​ចូល​មក​ក្នុង​ខេត្ត​នេះ​ចាប់​តាំង​ពី​ខែ​តុលា​មក បាន​និយាយ​កាលពី​ម្សិលមិញ​ថា គាត់​សប្បាយ​ចិត្ត​ពេល​ដែល​ឮ​ថា​ ពួកគេ​​ទាំង​១៣​នាក់​នៅ​ក្នុង​រាជធានី​ភ្នំពេញ​ត្រូវ​បាន​ទទួល​ស្គាល់ជាជន​ភៀស​ខ្លួន​។

គាត់​បាន​និយាយ​ទៀត​ថា “ខ្ញុំ​នឹង​លែង​បារម្ភ​​អំពី​សុវត្ថិភាព​របស់​ពួកគេ​ទៀត​ហើយ​។ ខ្ញុំ​គិត​ថា ពួកគេ​ទាំង​១៣​នាក់​ [នៅ​ក្នុង​រាជធានី​ភ្នំពេញ] នឹង​អាច​រស់​នៅ​បាន​នៅ​ពេល​នេះ ពីព្រោះ​​បើ​អាជ្ញាធរ​​ចាប់​ខ្លួន​ពួកគេ​បញ្ជូន​ទៅ​ប្រទេស​របស់​ពួកគេ​វិញ ពួកគេ​អាច​នឹង​ត្រូវ​គេ​សម្លាប់​ចោល​”៕ សុខុម​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស