តុលាការក្រុងភ្នំពេញកាលពីព្រឹកមិញនេះ បានសាកសួរកូនស្រីរបស់លោក លី ស៊្រាងខេងក្នុងពាក្យបណ្តឹងទាក់ទងនឹងការប៉ុនប៉ងមនុស្សឃាត ដែលបានចោទកូនចៅរបស់ឧកញ៉ា ឃុន ស៊ា ថា យកពស់វែកទៅបោះចូលផ្ទះរបស់នាង។
កញ្ញា លី សៀវមិញ អាយុ២៣ឆ្នាំ ដែលជាប់ពន្ធនាគារក្រោយពីប៉ះទង្គិចជាមួយសន្តិសុខក្រុមហ៊ុន ឃុន ស៊ា កាលពីខែវិច្ឆិកាពីបទប្រើអំពើហិង្សាលើម្ចាស់អចលនទ្រព្យតាមច្បាប់ភូមិបាល បាននិយាយថា កញ្ញា សុំឲ្យតុលាការក្រុងភ្នំពេញ ស្វែងរកចាប់ខ្លួនជនដៃដល់ដែលបានបោះពស់ចូលក្នុងផ្ទះរបស់នាងកាលពីឆ្នាំ២០១៣។
កញ្ញា សៀវមិញ បាននិយាយថា “ខ្ញុំសូមឲ្យចៅក្រមជួយរកយុត្តិធម៌ឲ្យយើងខ្ញុំផង និងសុំឲ្យតុលាការស្វែងរកចាប់ខ្លួនជនដៃដល់ និងបក្ខពួកដើម្បីកាត់ទោសតាមច្បាប់”។
លោក លី ស៊្រាងខេង អាយុ៥៨ឆ្នាំ ដែលជាឪពុករបស់កញ្ញា សៀវមិញ កំពុងបានតតាំងផ្លូវច្បាប់នឹងក្រុមហ៊ុនអស់រយៈពេល៥ឆ្នាំមកហើយ ក្នុងជម្លោះដីធ្លីមួយក្នុងខណ្ឌទួលគោក ក្រុងភ្នំពេញ។ លោក ស៊្រាងខេង បានជាប់ពន្ធនាគារក្នុងខែវិច្ឆិកា ហើយត្រូវបានដោះលែងឲ្យនៅក្រៅឃុំកាលពីខែធ្នូ។
លោក ស៊្រាងខេង បាននិយាយថា លោកសង្ឃឹមថា តុលាការក្រុងភ្នំពេញ នឹងចាត់ការរឿងក្តី ដែលលោកបានដាក់ប្តឹងក្រុមហ៊ុន ឃុន ស៊ាឲ្យបានឆាប់។ លោក ស្រា៊ងខេង បានអះអាងថា ក្នុងរយៈពេលពីរបីឆ្នាំកន្លងមកនេះ ក្រុមហ៊ុនបានបញ្ជូនក្រុមអន្ធពាលមកដុតផ្ទះរបស់លោក បោះពស់វែកចូលផ្ទះ វាយដំគ្រួសាររបស់លោក ហើយឃ្លាំមើលពួកលោក២៤ម៉ោងលើ២៤ម៉ោង៕