យោងតាមនគរបាលបានឲ្យដឹងថា កូនប្រុសរបស់មន្ត្រីគយមានបុណ្យស័ក្តិខ្ពស់ម្នាក់ បានជាប់ពាក់ព័ន្ធនៅក្នុងហេតុការណ៍បាញ់បោះមួយនៅមជ្ឈមណ្ឌលកម្សាន្តរ៉ុក ក្នុងខណ្ឌចំការមន រាជធានីភ្នំពេញ នៅវេលារំលងអធ្រាត្រកាលពីម្សិលមិញ ដោយបណ្ដាលឲ្យបុរសម្នាក់បានរងរបួស។
ទោះបីជារបាយការណ៍ប្រចាំថ្ងៃរបស់នគរបាលរាជធានី ដែលកត់ត្រាបទល្មើសកើតឡើងកាលពីម្សិលមិញក្នុងរាជធានីភ្នំពេញ មិនបាននិយាយពីហេតុការណ៍នេះក្ដី តែនគរបាលជាតិបានចុះផ្សាយនៅលើគេហទំព័ររបស់ខ្លួនថា កូនប្រុសរបស់លោក កែវ សុខឃាងដែលជាប្រធានផ្នែកត្រួតពិនិត្យចល័តនៅក្នុងនាយកដ្ឋានគយ និងរដ្ឋាករ នៃក្រសួងសេដ្ឋកិច្ច និងហិរញ្ញវត្ថុ គឺស្ថិតនៅក្នុងចំណោមក្រុមដែលធ្វើការបាញ់បោះនេះ។
ការចុះផ្សាយនៅលើគេហទំព័ររបស់នគរបាលជាតិបានលើកឡើងថា បងប្អូនប្រុសម្នាក់របស់ភរិយាលោក សុខឃាង និងអង្គរក្សម្នាក់ក៏ស្ថិតនៅក្នុងក្រុមនេះដែរ ប៉ុន្តែមិនបានបញ្ជាក់ថា តើនរណាជាអ្នកបាញ់បោះ ឬក៏ថាតើបាញ់អស់ប៉ុន្មានគ្រាប់នោះឡើយ។
លោក ហៀង ថារ៉េត អធិការរងនគរបាលខណ្ឌនេះបានលើកឡើងថា ការបាញ់បោះបានកើតឡើងនៅវេលារំលងអធ្រាត្រឈានចូលព្រឹកម្សិលមិញ។
លោកបានមានប្រសាសន៍ថា “ការបាញ់បោះនេះកើតឡើងនៅក្នុងមជ្ឈមណ្ឌលកម្សាន្តរ៉ុក នៅវេលាម៉ោង២និង១០នាទីរំលងអធ្រាតឈានចូលព្រឹកនេះដោយក្រុមរបស់កូនប្រុសប្រធានគយ ហើយបណ្ដាលឲ្យបុរសយ៉ាងតិចម្នាក់រងរបួស”។
លោក រ័ត្ន ស្រា៊ង មេបញ្ជាការកងរាជអាវុធហត្ថរាជធានីភ្នំពេញបានលើកឡើងថា រថយន្តម៉ាកលុចស៊ីសមួយគ្រឿង និងកាំភ្លើងអាកា៤៧មួយដើម ត្រូវបានរឹបអូសពីផ្ទះរបស់លោក សុខឃាង នៅក្នុងថ្ងៃដដែល ប៉ុន្តែលោកបានបដិសេធមិននិយាយច្រើននោះឡើយ ព្រោះករណីនេះត្រូវបានប្រគល់ទៅឲ្យនគរបាលរាជធានី ដើម្បីស្វែងរកជនសង្ស័យ។
គេមិនអាចទាក់ទងលោក ជួន សុវណ្ណ ស្នងការនគរបាលរាជធានីភ្នំពេញបានឡើយ។
សន្តិសុខយាមនៅច្រកចូលបុរីមួយក្នុងខណ្ឌសែនសុខ ជាទីដែលលោក សុខឃាង រស់នៅបានបញ្ជាក់ដោយនិយាយក្នុងលក្ខខណ្ឌអនាមិកព្រោះព្រួយបារម្ភពីសុវត្ថិភាពផ្ទាល់ខ្លួនថា ពិតជាមានរថយន្តស៊េរីទំនើបមួយគ្រឿងត្រូវបានរឹបអូសមែន។ សន្តិសុខរូបនេះបានបន្ថែមថា ខ្លួនមិនបានឃើញនគរបាលចាប់នរណាម្នាក់បញ្ជូនទៅពន្ធនាគារឡើយនៅពេលនោះ។
សន្តិសុខរូបនេះបាននិយាយថា “ពួកគេគ្រាន់តែរឹបអូសរថយន្តប៉ុណ្ណោះ។ ខ្ញុំមិនបានឃើញនគរបាលចាប់ខ្លួនម្ចាស់រថយន្តឡើយ”។ សន្តិសុខរូបនេះបានបន្ថែមទៀតថា ខ្លួនបានឮនគរបាលនិយាយថា មានការបាញ់បោះប្រហែល៣០គ្រាប់នៅក្នុងមជ្ឈមណ្ឌលកម្សាន្តរ៉ុក។
ទាំងនគរបាល និងគេហទំព័ររបស់នគរបាលជាតិសុទ្ធតែមិនបានផ្ដល់ព័ត៌មានទាក់ទិននឹងគោលបំណងនៃការបាញ់ប្រហារ ឬអត្តសញ្ញាណ ឬក៏ស្ថានភាពរបស់ជនរងគ្រោះនោះឡើយ។
ស្ថានីយទូរទស្សន៍ BTV ដែលគ្រប់គ្រងដោយលោកស្រី ហ៊ុន ម៉ាណា កូនស្រីរបស់លោកនាយករដ្ឋមន្ត្រី ហ៊ុន សែន បានបញ្ជាក់អត្តសញ្ញាណរបស់កូនប្រុសលោក សុខឃាង ថា មានឈ្មោះ កែវ វិទូ អាយុ២៤ឆ្នាំ៕ ស៊ុយឈាង