31 C
Phnom Penh

រដ្ឋ​មន្ត្រី​​បរិស្ថាន​និយាយថា ​​ជនជាតិ​ដើមភាគតិច​​មិន​គួរ​ពឹង​ផ្អែក​លើ​ព្រៃ​ឈើខ្លាំង​ពេក​ទេ​

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​សុក្រ លោក​ សាយ សំអាល់ រដ្ឋមន្ត្រី​ក្រសួង​បរិស្ថាន​​ បាន​សន្យា​ការ​ពារ​វប្បធម៌​​​របស់​ជនជាតិ​ដើមភាគ​តិច​នៅ​ក្នុង​ប្រទេស​កម្ពុជា មុនពេល​លោក​​​មាន​ប្រសាសន៍​បន្ត​ថា ជន​ជាតិ​ដើមភាគតិច​ទាំង​នោះ​ចាំបាច់​ត្រូវ​រៀន​រស់​ដោយ​មិន​ពឹង​ផ្អែក​លើ​​ព្រៃ​ឈើ ដែលពួក​គាត់​បាន​ពឹង​ផ្អែក​រាប់​សតវត្សរ៍មក​ហើយ​។​​​

​​​ដោយចូលរួម​ធ្វើ​ជា​គណៈអធិបតី​​ក្នុង​ពិធី​ចាប់​ផ្ដើម​គំនិត​ផ្ដួច​ផ្ដើម​ថ្មី​មួយដែល​ដឹក​នាំ​ដោយ​អង្គការ​សង្គ្រោះ​សត្វព្រៃ (Save Cambodia’s Wildlife) ដើម្បី​ការពារ​ឧទ្យានជាតិ​វីរជ័យ​​ និងដែន​​ជម្រក​សត្វព្រៃ​លំផាត់​ ជា​ដំបូង​លោក សាយ សំអាល់ បាន​ព្យាយាម​​រម្ងាប់​​​កំហឹង​របស់​ជន​ជាតិ​ដើម​ភាគ​តិច​ប្រមាណ​៣០​នាក់ ដែល​បាន​​​ធ្វើ​ដំណើរ​​ពី​ព្រៃ​អភិរក្ស​ចំនួនពីរ​​ស្ថិត​​ក្នុង​ខេត្ត​ភាគឦសាន​នៃ​ប្រទេស​ មក​កាន់​រាជធានី​ភ្នំពេញ។

រដ្ឋ​មន្ត្រី​ក្រសួង​បរិស្ថាន​រូប​នេះ​បាន​មាន​ប្រសាសន៍​ទៅ​កាន់​​មនុស្ស​ប្រហែល​៨០​នាក់ ដែល​បានជួប​ជុំគ្នា​នៅ​សណ្ឋាគារ​ហ៊ីម៉ាវ៉ារី (Himawari Hotel) ថា ” នៅ​រតនគិរី និង​ស្ទឹងត្រែង មាន​ជនជាតិ​ដើមភាគ​តិច​ដែល​មាន​អត្តសញ្ញាណ​ផ្ទាល់​ខ្លួន។ យើង​មាន​កាតព្វ​កិច្ច​ការ​ពារ​អត្តសញ្ញាណ​​​ និង​វប្បធម៌​របស់ពួកគាត់​”។

ជន​ជាតិ​ដើមភាគ​តិច​គ្រឹង ចារ៉ាយ និង​ទំពួន មាន​ចំនួន​ច្រើនជាង​គេ​ក្នុង​ចំណោម​ជនជាតិ​ដើមភាគតិច​ទាំង​អស់​នៅភាគ​ឦសាន​នៃ​ប្រទេស​កម្ពុជា។ តាម​ទំនៀមទម្លាប់​​ ពួកគាត់​រស់​នៅ​ដោយ​អាស្រ័យ​លើ​ដីធ្លី ធ្វើ​ចម្ការ​ពនេចរ​ និង​បញ្ចុះ​សព​សាច់​ញាតិ​ដែល​ចែក​ឋាន​ទៅ​នៅ​ក្នុង​ព្រៃ​អារក្ស​អ្នក​តា​។

ទោះជាយ៉ាង​ណា ក្នុង​រយៈពេល​ប៉ុន្មាន​ឆ្នាំ​ថ្មីៗ​នេះ ព្រៃ​ទាំង​នោះត្រូវ​បាន​ប្រែក្លាយ​ទៅ​ជា​ដី​សម្បទាន​​សេដ្ឋកិច្ច និង​ត្រូវ​បាន​​អ្នក​កាប់​ឈើ​ខុស​ច្បាប់​កាប់​បំផ្លាញ​ឈើ​ប្រណីត និង​​កម្រ ដើម្បី​នាំចេញទៅបរទេស​។

ការ​សិក្សា​ស្រាវ​ជាវ​មួយ​ដែល​ធ្វើ​ឡើង​ដោយ​សាកលវិទ្យាល័យ​មា៉រីលែន (University of Maryland) បាន​រក​ឃើញ​ថា គ្រាន់​តែ​នៅ​ក្នុង​ឆ្នាំ​២០១៣ កម្ពុជា​បាន​បាត់​បង់​ព្រៃ​ទំហំ​រហូត​ដល់​ទៅ​២.១៣២​គីឡូម៉ែត្រក្រឡា។

ក្រោយពិធី​ចាប់​ផ្ដើម​គំនិត​ផ្ដួច​ផ្ដើម​ថ្មី​នេះ​កាលពី​ថ្ងៃសុក្រ លោក សាយ សំអាល់ បាន​មាន​ប្រសាសន៍​ថា ខណៈ​ ” ព្រៃ​ជា​ផ្នែក​មួយ​នៃ​វប្បធម៌​របស់​យើង​” ពេល​វេលា​បាន​មក​ដល់​ហើយ​សម្រាប់​ជនជាតិ​ដើមភាគ​តិច​សម្លឹង​រក​វិធី​ចិញ្ចឹម​ជីវិត​ក្រៅពី​ពឹង​ផ្អែក​លើ​ព្រៃឈើ​ ហើយ​ថា សម្បទាន​ដី​សេដ្ឋកិច្ច​​អាច​ផ្ដល់​ឱកាស​បែប​នេះ​បាន​។

លោក​បាន​មាន​ប្រសាសន៍​បន្ត​ថា ” អ្វី​ដែល​យើង​កំពុង​ព្យាយាម​ធ្វើ គឺ​អភិវឌ្ឍ​​កសិ​ឧស្សាហកម្ម​​របស់​យើង​​ដើម្បី​បង្កើត​ការ​ងារ​ជូន​ប្រជាពល​រដ្ឋ​របស់​យើង ដូច្នេះ​សង្ឃឹម​ថា ពួកគាត់​​មិន​ពឹង​ផ្អែក​លើ​ព្រៃ​ឈើ​ទៀត​ទេ។ ពួកគាត់​ [គួរ​តែ​] ពឹង​ផ្អែក​លើ​អ្វី​ផ្សេងដូច​ជា​ជំនាញ​ជា​ដើម”។

ទោះជាយ៉ាង​ណា លោក ហាប់ ទាប អាយុ​៤០​ឆ្នាំ ជា​ជន​​ជាតិ​ដើមភាគ​តិច​ព្រៅ ដែល​រស់​នៅ​ក្នុង​ស្រុក​វើនសៃ ខេត្ត​រតនគិរី បាន​និយាយ​ថា គាត់​មិន​ចង់​​​ផ្លាស់​ប្ដូរ​របៀប​រស់​នៅ​របស់​គាត់​នោះ​​ទេ។ បច្ចុប្បន្ន​ គាត់ប្រមូល​ផល​ពី​ដើម​សំរោង​ដោយ​បេះ​​ផ្លែ​របស់​វា​លក់​​​ពីរ​ខែ​ក្នុង​មួយ​ឆ្នាំ។

គាត់​និយាយ​ទៀត​ថា ” ខ្ញុំ​អាច​រក​​បាន​ចន្លោះពី​១០ម៉ឺន​ទៅ​២០​ម៉ឺន​រៀល [ប្រហែល​២៥​ដុល្លារ​​ទៅ​៥០​ដុល្លារ​] ​ក្នុង​មួយ​ថ្ងៃ។ យើង​មិន​ចាំបាច់​ឈប់​​ប្រើ​ប្រាស់​ព្រៃ​ទេ ពីព្រោះ​ក្រសួង​ឬ​ NGO បាន​និយាយ​យ៉ាង​​​ដូច្នេះ។ យើង​មាន​វប្បធម៌ និង​មធ្យោបាយ​ផ្ទាល់​ខ្លួន​របស់​យើង​”៕ សុខុម

(រាយការណ៍​បន្ថែម​ដោយ សេក ឧត្ដម​)​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស