សមាជិកសភាអ៊ុយក្រែនម្នាក់និងជាអតីតនាយកប្រតិបត្តិទូរទស្សន៍កំពុងត្រូវអាជ្ញាធរកម្ពុជាស្វែងរកចាប់ខ្លួន ពីបទរំលោភអនីតិជនម្នាក់ក្នុងក្រុងភ្នំពេញកាលពីឆ្នាំ២០១១ និងត្រូវដាក់ឈ្មោះក្នុងបញ្ជីអាំងទែប៉ូលនៃឧក្រិដ្ឋជនត្រូវតាមចាប់ខ្លួនបំផុត។
យោងតាមវិបសាយរបស់អាំងទែប៉ូលបានឲ្យដឹងថា លោក មីកូឡា ខ្ញាហ្ស៊ឺស្គី (Mykola Kniazhytsky) អាយុ៤៦ឆ្នាំដែលបានជាប់ឆ្នោតជាសមាជិកសភានៃគណបក្សរណសិរ្សប្រជាជនកាលពីខែវិច្ឆិកា និងមុននោះបានបម្រើការជានាយកប្រតិបត្តិនៃទូរទស្សន៍ប៉ុស្តិ៍ TVi “ត្រូវអាជ្ញាធរតុលាការកម្ពុជាតាមចាប់ខ្លួនយកមកកាត់ទោស” ពីបទរំលោភផ្លូវភេទ។
វិបសាយនេះមិនបាននិយាយថាការចាប់រំលោភបានកើតឡើងនៅទីណា ឬពេលណាទេ ហើយក៏មិនបានផ្តល់សេចក្តីលម្អិតផ្សេងទៀតអំពីករណីនេះដែរ។
លោក លឹម សុខារស្មី ប្រធានស្តីទីនៃនាយកដ្ឋាននគរបាលអន្តរជាតិកម្ពុជា មិនអាចទាក់ទងបានទេ។
ដោយដកស្រង់ព័ត៌មានការិយាល័យអាំងទែប៉ូលអ៊ុយក្រែន កាសែត កៀវ ប៉ុស្តិ៍ ជាភាសាអង់គ្លេស បានរាយការណ៍ថា លោក ខ្ញាហ្ស៊ឺស្គី ជាប់ចោទពីបទរំលោភអនីតិជនម្នាក់នៅក្រុងភ្នំពេញកាលពីថ្ងៃទី៩ខែវិច្ឆិកាឆ្នាំ២០១១ ប៉ុន្តែគាត់ត្រូវគេដាក់ឈ្មោះក្នុងបញ្ជីតាមចាប់ខ្លួនរបស់កម្លាំងប៉ូលិសសាកលទើបតែកាលពីថ្ងៃច័ន្ទនេះទេ។
លោក ខ្ញាហ្ស៊ឺស្គី មិនអាចទាក់ទងបានទេកាលពីថ្ងៃច័ន្ទ ប៉ុន្តែជំនួយការស្រាវជ្រាវរបស់លោក លោកស្រី អាណាសតាស្យា មែលនីក បាននិយាយថា លោកស្រីមិនជឿថា ប្រធានរបស់លោកស្រីជាអ្នករំលោភក្មេងទេ។
លោកស្រីបាននិយាយតាមទូរស័ព្ទពីក្រុងកៀវថា “ចំពោះខ្ញុំ ស្តាប់ទៅមិនពិតទាល់តែសោះ ពីព្រោះខ្ញុំបានស្គាល់គាត់ច្បាស់ជាងមួយឆ្នាំមកហើយមកដល់ពេលនេះ។ យើងបានជួបគ្នាបន្តិចមុនពេលបដិវត្តន៍។ ស្តាប់ទៅគួរឲ្យអស់សំណើចណាស់ចំពោះខ្ញុំ”។
ក្នុងអីុម៉េលមួយកាលពីយប់មិញ ការិយាល័យព័ត៌មានរបស់លោក ខ្ញាហ្ស៊ឺស្គី បានហៅការចោទប្រកាន់លើលោកសមាជិកសភាថា “បរិហារកេរ្តិ៍និងប្រឌិត”។ អីុម៉េលបានឲ្យដឹងថា គាត់ប្រហែលមិនអាចរំលោភអនីតិជនក្នុងក្រុងភ្នំពេញនៅថ្ងៃទី៩កញ្ញាឆ្នាំ២០១១បានទេ ពីព្រោះគាត់បានរៀបចំកម្មវិធីជជែកតាមទូរទស្សន៍ ឈ្មោះថា “ពេលល្ងាចជាមួយ មីកូឡា ខ្ញាហ្ស៊ឺស្គី” នៅយប់ថ្ងៃទី៨ខែកញ្ញា។
អីុម៉េលនិយាយថា “ភាពខុសគ្នានៃពេលវេលារវាងក្រុងកៀវនិងក្រុងភ្នំពេញគឺប្រាំម៉ោង”។ ពេលហោះហើរពីក្រុងកៀវមកភ្នំពេញ ១២ម៉ោង។ មិនមានការហោះហើរផ្ទាល់រវាងទីក្រុងទាំងពីរនេះទេ។ អីុម៉េលឲ្យដឹងទៀតថា យោងតាមសេវាការពារព្រំដែនអ៊ុយក្រែនបានឲ្យដឹងថា សមាជិកសភា មីកូឡា ខ្ញាហ្ស៊ឺស្គី ស្ថិតនៅក្នុងប្រទេសអ៊ុយក្រែន នៅពេលដែលឧក្រិដ្ឋកម្មដែលគេចោទបានកើតឡើង”។
អីុម៉េលបន្តទៀតថា “សមាជិកសភា មីកូឡា ខ្ញាហ្ស៊ឺស្គី ជឿជាក់ថា សម្ពាធនេះជាការប៉ុនប៉ងមួយដើម្បីបង្ខូចកិត្តិយសរបស់គាត់ពីសំណាក់អាជ្ញាធរក្រុងមូស្គូ និងរៀបចំដោយសេវាពិសេសរុស្ស៊ី ពីព្រោះគាត់បានផ្តួចផ្តើមឲ្យមានបម្រាមទូរទស្សន៍ឃោសនារុស្ស៊ី ដែលជេរប្រមាថប្រទេសអ៊ុយក្រែន និងប្រជាជនអ៊ុយក្រែន”។
ក្នុងអត្ថបទកាសែត កៀវ ប៉ុស្តិ៍ លោក ខ្ញាហ្ស៊ឺស្គី ចោទពាណិជ្ជកររុស្ស៊ី កុនស្តានទីន កាហ្គាឡូវស្គី ថាព្យាយាមឃុបឃិតទម្លាក់កំហុសលើលោក។
គេបានដកស្រង់សម្តីលោកដែលនិយាយថា “ខ្ញុំនឹងបញ្ជាក់ឲ្យឃើញច្បាស់ថា ការចោទប្រកាន់នេះ មិនពិតទេ”។
អត្ថបទនិយាយថា “ខ្ញាហ្ស៊ឺស្គី និយាយថា ការចោទប្រកាន់នេះត្រូវបានប្រឌិតដោយ…កាហ្គាឡូវស្គី ដែលជាម្ចាស់ប៉ុស្តិ៍ទូរទស្សន៍អ៊ុយក្រែន TVi រហូតដល់មានជម្លោះគ្រប់គ្រងស្ថានីយនៅខែមេសាឆ្នាំ២០១៣។ កាហ្គាឡូវស្គី បានចោទ ខ្ញាហ្ស៊ឺស្គី ដែលជានាយកប្រតិបត្តិ TVi ពេលនោះ ថាបានរៀបចំដណ្តើមគ្រប់គ្រងស្ថានីយទូរទស្សន៍នេះ”។
អត្ថបទនិយាយថា លោក ខ្ញាហ្ស៊ឺស្គី បានទទួលស្គាល់ថាបានធ្វើដំណើរទៅប្រទេសកម្ពុជាម្តងរយៈពេលពីរថ្ងៃ ប៉ុន្តែថា លោកមិនបានបញ្ជាក់ថាពេលណាទេ។
លោក ជួន ណារិន ស្នងការរងនគរបាលរាជធានីភ្នំពេញបានមានប្រសាសន៍ថា លោកមិនដឹងករណីរបស់លោក ខ្ញាហ្ស៊ឺស្គី ទេ។
និយាយដល់ប្រធានការិយាល័យអាំងទែប៉ូលរបស់ប្រទេសកម្ពុជា លោកបានមានប្រសាសន៍ថា “ខ្ញុំមិនដឹងអ្វីអំពីរឿងនេះទេ ប៉ុន្តែខ្ញុំនឹងទាក់ទងលោក រស្មី”៕ និត(រាយការណ៍បន្ថែមដោយ ម៉ិច ដារ៉ា និង វណ្ណ រើន)