31 C
Phnom Penh

មេធាវី​និយាយ​ថា វិវាទ​ដីធ្លី​រវាង​គ្រួសារ​មួយ​ជាមួយ​ឧកញ៉ា ឃុន សៀ ទំនង​ជា​ត្រូវ​បាន​ដោះ​ស្រាយ​ហើយ​

ដោយ ឌឹ ខេមបូឌា ដេលី

បទវិភាគ

ជា​ថ្មី​ម្ដង​ទៀត​ កាលពី​ម្សិលមិញ​សាលា​ដំបូង​រាជធានី​ភ្នំពេញ បាន​ពន្យារពេល​សវនាការ​ជំនុំជម្រះ​នារី​ម្នាក់​ដែល​គ្រួសារ​របស់​នាង​​មាន​ជម្លោះ​ដីធ្លីជាមួយ​​ឧកញ៉ា ឃុន សៀ ដោយ​លើក​នេះ​ធ្វើ​ឡើង​តាម​សំណើ​របស់​មេធាវី​នាង​ ដែល​ផ្ដល់​យោបល់​ឲ្យ​គ្រួសារ​នាង​បោះ​បង់​ការ​ប្ដឹង​ផ្ដល់​របស់​ពួកគេ​ដែល​បាន​អូស​បន្លាយ​អស់​រយៈពេល​៥ឆ្នាំ ហើយ​ទទួល​យក​សំណង​ចំនួន​១៦០.០០០​ដុល្លារ​។

កញ្ញា លី សា៊វមិញ អាយុ​២៣​ឆ្នាំ និង​គ្រួសារ​របស់​នាង​បាន​ប្ដឹង​ផ្ដល់​លោក​ ឃុន សៀ និង​ក្រុម​ហ៊ុន​របស់​លោកជុំវិញ​ដី​មួយឡូត៍​ក្នុង​ខណ្ឌ​ទួល​គោក រាជធានី​ភ្នំពេញ។ នាង​​កំពុង​ប្រឈម​ការ​ចោទ​ប្រកាន់​​ពីបទ​ប្រើ​អំពើ​ហិង្សា​លើ​ម្ចាស់​អចលនទ្រព្យ​តាម​ច្បាប់​ភូមិ​បាល​ពាក់​ព័ន្ធ​នឹង​ហេតុការណ៍​ប្រវាយ​ប្រតប់​គ្នា​មួយ​កាលពី​ឆ្នាំ​២០១៣ ជាមួយ​សន្តិសុខ​របស់​លោក ឃុន សៀ ហើយ​នាង​បាន​ជាប់​ឃុំ​បណ្ដោះ​អាសន្ន​ចាប់​តាំងពី​ត្រូវ​ចាប់​ខ្លួន​កាលពី​ខែ​វិច្ឆិកា​មក។ ចំណែក​​ឯ​ឪពុក​របស់​នាងឈ្មោះ លី ស្រា៊ងខេង នៅ​ក្រៅ​ឃុំ​ជា​បណ្ដោះ​អាសន្ន​។

លោក ជូង ជូងី មេធាវី​តំណាង​គ្រួសារ​នេះ​ បាន​មាន​ប្រសាសន៍​អំឡុង​សវនាការ​កាលពី​ម្សិលមិញថា លោក​ជាអ្នក​ស្នើ​សុំ​ឲ្យ​ពន្យារពេល​សវនាការ​ ពីព្រោះ​លោក​បាន​ដាក់​ពាក្យ​បណ្ដឹង​ទៅ​សាលា​ឧទ្ធរណ៍ជុំវិញ​ការ​បដិសេធ​របស់​សាលា​ដំបូង​រាជធានី​ដែល​មិន​អនុញ្ញាត​ឲ្យ​ដោះ​លែង​កញ្ញា លី ស៊ាវមិញ នៅ​ក្រៅឃុំ​។

ចៅក្រម​ជំនុំជម្រះ​ ស្វាយ​ តុញ បាន​អនុញ្ញាត​ការ​ពន្យារ​ពេល​នៅ​ក្នុង​សំណុំរឿង​នេះ​ ហើយ​ការ​ពន្យារ​ពេល​នេះ​គឺ​ជាលើក​ទី២​ហើយ​ក្នុង​រយៈពេល​២​សប្ដាហ៍។

ទោះជាយា៉ាង​ណា ក្រោយពី​សវនាការ​ លោក ជូង ជូងី បាន​បញ្ជាក់​ថា គ្រួសារ​នេះ​និង​តំណាង​ក្រុម​ហ៊ុន​របស់​លោក ឃុន សៀ បាន​ព្រមព្រៀង​គ្នា​ផ្ទាល់​មាត់​កាលពី​សប្ដាហ៍​មុន​ថា ក្រុម​ហ៊ុន​នឹង​ដក​ពាក្យ​បណ្ដឹង​ចេញ ហើយ​ផ្ដល់​សំណង​១៦០.០០០​ដុល្លារ​ដល់​គ្រួសារ​នេះ ជា​ថ្នូរ​នឹង​ការ​បោះបង់​ផ្ទះ​របស់​ពួកគាត់​។

លោក​បាន​មាន​ប្រសាសន៍​ទៀត​ថា “លោក​ឧកញ៉ា [លោក ឃុន សៀ] ចង់​បាន​ដី​នេះ ហើយ​គ្រួសារ​នេះ​បាន​ទទួល​យក​សំណង​ហើយ។ ដូច្នេះ​ ក្រុម​ហ៊ុន​នឹង​ដកពាក្យ​​បណ្ដឹង​ចេញ។ គ្រួសារ​នេះ​បង្ខំ​ចិត្ត​ទទួល​យក​ការ​ព្រមព្រៀង​នេះ ដោយ​សារ​តែពួកគាត់​ចង់​ឲ្យ​គេ​ដោះលែង​ ស៊ាវមិញ ពីពន្ធនាគារ​”។

ប៉ុន្តែ​លោក​ ទូច ឆាយ មេធាវី​តំណាង​ក្រុម​ហ៊ុន​របស់​លោក ឃុន សៀ បានមាន​ប្រសាសន៍​ថា លោក​មិន​ដឹង​​រឿង​ទេពាក់​ព័ន្ធ​នឹង​ការ​ព្រមព្រៀង​ផ្ទាល់​មាត់​នេះ​។ លោក​បាន​លើក​ឡើង​ថា “ខ្ញុំ​មិន​ដឹង​ច្បាស់​ពី​ការ​ចរចា​គ្នា​ ឬ​សំណង​ណាមួយ​ឡើយ។ ខ្ញុំ​មិន​ទទួល​បាន​​ព័ត៌មានពី​កូន​ក្ដី​​របស់​ខ្ញុំទេពាក់​ព័ន្ធ​បញ្ហា​នេះ​”។

លោក លី ស្រា៊ង​ខេង និង​ប្រពន្ធ​របស់​គាត់​ឈ្មោះ ម៉ុក ស៊ីវហុង បាន​និយាយ​បន្ទាប់​ពី​សវនាការ​កាលពី​ម្សិលមិញ​ថា ពួកគាត់​គ្មាន​ជម្រើស​ផ្សេង​ក្រៅពី​បោះបង់​ការ​តស៊ូ​តាម​ផ្លូវ​ច្បាប់​នោះ​ទេ។ អ្នកស្រី ម៉ុក ស៊ីវហុង និយាយ​ថា “ខ្ញុំ​ [នឹង​]​ ទទួល​យក​សំណង​ ដោយ​សារ​តែ​ខ្ញុំ​ចង់​ឲ្យ​គេ​ដោះលែង​​កូនស្រី​ខ្ញុំពីពន្ធនាគារ​”៕ សុខុម​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស