26 C
Phnom Penh

នគរបាល​ចាប់ខ្លួន​​ប្តី​ប្រពន្ធ​ពីរ​នាក់​​បន្ទាប់ពី​ចាប់​បង្ខាំង​អ្នក​ជិត​ខាង​របស់​ខ្លួន

ដោយ ឌឹ ខេមបូឌា ដេលី

បទវិភាគ

មន្ត្រី​ម្នាក់​បាន​ឲ្យ​ដឹង​កាលពី​ម្សិល​មិញ​ថា នគរបាល​ខណ្ឌ​ពោធិ៍​សែន​ជ័យ​​ រាជធានី​ភ្នំពេញ​​បាន​ចាប់ខ្លួន​ប្តី​ប្រពន្ធ​ពីរ​នាក់​កាលពី​ថ្ងៃអង្គារ​ពី​បទ​បង្ខាំង​អ្នក​ជិត​ខាង​របស់​ខ្លួន​រយៈពេល​ខ្លី ដែល​បើក​ផ្ទះ​សំណាក់​ប្រកួត​ប្រជែង​​នៅ​ជាប់គ្នា។

លោក យឹម សារ៉ាន់ អធិការ​នគរបាល​ខណ្ឌ​បាន​មាន​ប្រសាសន៍​ថា លោក ផា កុសល អាយុ​៣០ និង​ប្រពន្ធ​ឈ្មោះ​ ហ៊ឹម លីដា អាយុ​៣២ឆ្នាំ​ ត្រូវ​បាន​ចាប់ខ្លួន​កាលពី​ល្ងាច​ថ្ងៃ​អង្គារ​នៅ​ក្នុង​សង្កាត់​ចោម​ចៅ​ បន្ទាប់ពី​​នគរបាល​ទទួល​បាន​ព័ត៌មាន​ថា ប្តី​ប្រពន្ធ​នេះ​​បាន​ចាប់​បង្ខាំង​អ្នក​ស្រី កែវ ណារ៉ា អាយុ​៤៥ឆ្នាំ​ ជា​អ្នក​ជិត​ខាង​ខ្លួន​ដោយ​បង្ខំ​ នៅក្នុងផ្ទះ​សំណាក់​របស់​ខ្លួន។

លោក​ សារ៉ាន់ បាន​មាន​ប្រសាសន៍​ថា ប្តី​ប្រពន្ធ​នេះ​​បើក​ផ្ទះ​សំណាក់​​​ត្រពាំង​ថ្លឹង​ ស្ថិត​ក្នុង​ភូមិ​ត្រពាំង​ថ្លឹង​ ចំណែក​​អ្នកស្រី ណារ៉ា បើក​ផ្ទះ​សំណាក់​មាន​តម្លៃ​បន្ទប់​៣ដុល្លារ​នៅ​ជាប់​គ្នា​តែ​ម្តង។

លោក សារ៉ាន់ បាន​មាន​ប្រសាសន៍​ថា “​យើង​បាន​ព្យាយាម​សម្រប​សម្រួល​ជាមួយ​ប្តី​ប្រពន្ធ​នេះ​ឲ្យ​ដោះ​លែង​​ស្ត្រី​ដែល​ត្រូវ​បាន​បង្ខាំង​នោះ ប៉ុន្តែ​ពួកគេ​មិន​ព្រម​ឡើយ ដូច្នេះ​ហើយ​ យើង​បាន​សុំ​ឲ្យ​ព្រះ​រាជ​អាជ្ញា​រង​អម​សាលាដំបូង​រាជ​ធានី​ចេញ​ដីកា​ចាប់ខ្លួន​ប្តី​ប្រពន្ធ​នេះ”។

អធិការ​នគរបាល​ខណ្ឌ​រូប​នេះ​បាន​បន្ថែម​ថា នគរបាល​បា​ន​ចាប់ខ្លួន​​លោក កុសល និង​​អ្នកស្រី លីដា ហើយ​បាន​ដោះលែង​​អ្នកស្រី​ ណារ៉ា នៅ​ម៉ោង​ប្រហែល​​៦​ល្ងាច​​ មួយ​ម៉ោង​បន្ទាប់ពី​គាត់​ត្រូវ​បាន​ចាប់​បង្ខាំង។

លោក​បាន​មាន​ប្រសាសន៍​ថា “​ឥឡូវ​នេះ​ ប្តី​ប្រពន្ធ​ទាំង​ពីរ​នាក់​នេះ​​នៅ​អធិការ​ដ្ឋាន​នគរបាល​ខណ្ឌ​ ហើយ​យើង​កំពុង​កសាង​សំណុំរឿង​​បញ្ជូន​ពួកគេ​ទៅ​តុលាការ”។

យោង​តាម​លោក សារ៉ាន់ បាន​ឲ្យ​ដឹង​ថា ហេតុការណ៍​កាលពី​ថ្ងៃអង្គារ​បាន​កើត​ឡើង​​បន្ទាប់ពី​លោក​ កុសល បាន​យក​ទឹក​កខ្វក់​មួ​យ​ធុង​ចាក់​មុខ​ផ្ទះ​សំណាក់​របស់​អ្នក​ស្រី ណារ៉ា។

នៅ​ពេល​ត្រូវ​បាន​ទាក់ទង​​កាលពី​ម្សិលមិញ អ្នកស្រី ណារ៉ា​ បាន​មាន​ប្រសាសន៍​ថា ប្តី​ប្រពន្ធ​នេះ​បាន​ចាប់​ខ្ញុំ​​ បន្ទាប់ពី​​ខ្ញុំ​ទៅ​ជិត​ពួកគេ​រអ៊ូ​រ​ទាំអំពី​ទឹក​នោះ។

អ្នក​ស្រី​បាន​និយាយ​ថា “​ប្តី​ប្រពន្ធ​នេះ និង​​សាច់ញាតិ​បី​នាក់​ទៀត​​​បាន​មក​ចាប់​ខ្ញុំ​ ហើយ​រុញ​ខ្ញុំ​ចូល​ទៅ​ក្នុង​ផ្ទះ​​រួច​ដាក់​គន្លឹះទ្វារ​តែ​ម្តង។ ខ្ញុំ​បាន​ព្យាយាម​តតាំង​ជាមួយ​ពួកគេ​ដែរ ប៉ុន្តែ​មិន​អាច​ធ្វើ​អ្វី​កើត​ឡើយ ពីព្រោះ​​ពួកគេ​មាន​គ្នា​ច្រើន”។

អ្នកស្រី​ ណារ៉ា បាន​និយាយ​ថា អ្នក​ស្រី​បាន​បើក​ផ្ទះសំណាក់​​ប្រហែល​មួយ​ខែ​មក​ហើយ​ ហើយ​ថា ប៉ុន្មាន​ថ្ងៃ​មុន​ពេល​ហេតុការណ៍​កើត​ឡើង​កាលពី​ថ្ងៃអង្គារ​ ប្តី​ប្រពន្ធ​នេះ​បាន​គប់​ថង់​លាមក​​តាម​ទ្វារ​មុខ​ផ្ទះ​សំណាក់​របស់​អ្នកស្រី។ អ្នកស្រី​បាន​និយាយ​ថា “​ខ្ញុំ​គិត​ថា ប្តី​ប្រពន្ធ​នេះ​​មាន​កំហឹង​ ពីព្រោះ​ខ្ញុំ​បាន​បើក​របរ​រកស៊ី​ដូច​ពួកគេ”៕សារុន​

 

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស