យោងតាមអង្គការដែលមានមូលដ្ឋាននៅប្រទេសអូស្ត្រាលីដែលតស៊ូមតិសម្រាប់សិទ្ធិជនភៀសខ្លួនបានឲ្យដឹងថា ជនភៀសខ្លួននៅក្នុងប្រទេសណូរូបាននិយាយថា មន្ត្រីកម្ពុជាបានត្រឡប់មកប្រទេសដែនកោះបាស៊ីហ្វិកខាងត្បូងដ៏តូចនេះជាថ្មីម្តងទៀតព្យាយាមបញ្ចុះបញ្ចូលពួកគេមួយចំនួនឲ្យតាំងទីលំនៅក្នុងប្រទេសកម្ពុជា។
ពីដំបូងប្រទេសកម្ពុជាបានបញ្ជូនគណៈប្រតិភូទៅប្រទេសណូរូកាលពីខែមករា បួនខែបន្ទាប់ពីសម្រេចបានកិច្ចព្រមព្រៀងជាមួយក្រុងកង់បេរ៉ាទទួលយកជនភៀសខ្លួនមួយចំនួនក្នុងចំណោមជនភៀសខ្លួនរាប់រយនាក់ដែលប្រទេសអូស្ត្រាលីកំពុងឃុំខ្លួននៅលើកោះនេះ ជាថ្នូរនឹងទឹកប្រាក់ជំនួយ៣៥លានដុល្លារបន្ថែមសម្រាប់រយៈពេលបួនឆ្នាំក្រោយ។
មន្ត្រីទាំងនេះបានជួបជាមួយពួកគេបីគ្រួសារប៉ុណ្ណោះក្នុងដំណើរមកលើកនេះ ហើយមិនអាចបញ្ចុះបញ្ចូលពួកគេឲ្យទទួលយកអ្វីដែលជាសំណើនោះឡើយ។ ជនភៀសខ្លួននៅលើកោះនេះបានធ្វើការតវ៉ាជាច្រើនលើកជំទាស់នឹងកិច្ចព្រមព្រៀងនេះ។
កាលពីម្សិលមិញ លោក Ian Rintoul នៅសម្ព័ន្ធសកម្មភាពជនភៀសខ្លួនបានមានប្រសាសន៍ថា ជនភៀសខ្លួនបានប្រាប់លោកនៅពេលលោកទាក់ទងពួកគេនៅប្រទេសណូរូថា គណៈប្រតិភូកម្ពុជាទី២បានមកដល់កោះនេះកាលពីថ្ងៃអាទិត្យ ហើយនៅទីនោះនៅឡើយដើម្បីជួបជាមួយគ្រួសារទាំងនោះ។
លោកបានមានប្រសាសន៍ថា “មន្ត្រីកម្ពុជាស្ថិតនៅប្រទេសណូរូ។ ពួកគេកំពុងរៀបចំជំនួបជាច្រើនដោយប្រើភាសាខុសៗគ្នា។ មានមនុស្សតែពីរនាក់ប៉ុណ្ណោះមកពីគ្រួសារទាំងនោះ…បានទៅចូលរូមជំនួបនោះ”។ប្រទេសកម្ពុជាបានបដិសេធថា មិនបានធ្វើដំណើរទៅទេ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍កាលពីថ្ងៃអង្គារថា មិនមានមន្ត្រីកម្ពុជាបានធ្វើដំណើរទៅប្រទេសណូរូទេចាប់តាំងពីខែមករាមក ហើយថា មិនមានមន្ត្រីនៅទីនោះទេបច្ចុប្បន្ននេះ ហើយថា មិនមានគម្រោងធ្វើដំណើរទៅទៀតឡើយ។
គេមិនអាចទាក់ទងឧត្តមសេនីយ៍ ខៀវ សុភ័គ បានទេកាលពីម្សិលមិញ។
លោក កែម សារិន ដែលជាប្រធានការិយាល័យជនភៀសខ្លួននៅនាយកដ្ឋានអន្តោប្រវេសន៍ក្រសួងមហាផ្ទៃមិនបានបញ្ជាក់ ឬបដិសេធអំពីវត្តមានរបស់មន្ត្រីកម្ពុជានៅប្រទេសណូរូ ទេ ហើយបានបង្វែរសំណួរទៅឧត្តមសេនីយ៍ ខៀវ សុភ័គ។
លោក កុយ គួង អ្នកនាំពាក្យក្រសួងការបរទេសបានមានប្រសាសន៍ថា លោកមិនដឹង ថា តើគណៈប្រតិភូកម្ពុជានៅលើកោះនោះឬ យ៉ាងណានោះឡើយ ហើយក៏បានបង្វែរសំណួរទៅឧត្តមសេនីយ៍វិញ។
លោក ស ខេង រដ្ឋមន្ត្រីក្រសួងមហាផ្ទៃបច្ចុប្បន្ននេះស្ថិតនៅប្រទេសអូស្ត្រាលី ទី ដែល លោកទំនងជានឹងពិភាក្សាពីកិច្ចព្រមព្រៀងជនភៀសខ្លួនអំឡុងជំនួបរបស់លោកជាមួយលោក Peter Dutton រដ្ឋមន្ត្រីក្រសួងអន្តោប្រវេសន៍អូស្ត្រាលី៕សារុន