ស្ត្រីម្នាក់ដែលជាប់ចោទពីបទជួញដូរសរីរាង្គ ត្រូវបានតុលាការក្រុងភ្នំពេញកាត់ឲ្យជាប់ពន្ធនាគាររយៈពេល១៥ឆ្នាំពីបទបញ្ចុះបញ្ចូលបងប្អូនជីដូនមួយពីរនាក់និងអ្នកជិតខាងម្នាក់ដើម្បីលក់ក្រលៀនរបស់គេនៅក្នុងប្រទេសថៃកាលពីឆ្នាំមុន។
លោក កែវ មុនី ចៅក្រមតុលាការក្រុងភ្នំពេញ បានប្រកាសសាលក្រមនៅព្រឹកមិញថា” ញ៉ែម ស៊ីនួន ហៅ អាហ្ស៊ីសា ត្រូវជាប់ពន្ធនាគារ១៥ឆ្នាំយោងតាមបទល្មើសក្នុងឆ្នាំ២០១២ ២០១៣ និង២០១៤ ពីបទនាំចេញដោយខុសច្បាប់ ជួញដូរមនុស្ស និងអាជីវកម្មក្នុងប្រទេស”។
នគរបាលប្រឆាំងការជួញដូរមនុស្ស បានចាប់ខ្លួនអ្នកស្រី ញ៉ែម ស៊ីនួន អាយុ២៩ឆ្នាំ ក្នុងខណ្ឌជ្រោយចង្វា ក្រុងភ្នំពេញកាលពីខែកក្កដា បន្ទាប់ពីបើកការសើុបអង្កេតអស់រយៈពេល១០ថ្ងៃក្រោយពេលមានពាក្យបណ្តឹងពីជនរងគ្រោះចំនួនពីរនាក់។
នគរបាលបានលើកឡើងនៅពេលមានការចាប់ខ្លួននោះថា អ្នកស្រី ស៊ីនួន បានធ្វើជាមេខ្លោងក្នុងការសម្របសម្រួលឲ្យមានការដោះដូរក្រលៀនជិតមួយឆ្នាំមកហើយ តែទោះជាយ៉ាងណា ពួកគេមិនបានផ្តល់ព័ត៌មានលម្អិត ថាតើស្ត្រីរូបនេះបានជួញដូរក្រលៀនអស់ប៉ុន្មានរួចមកហើយនោះទេ។ បន្ទាប់ពីស្តាប់សាលក្រមរួច អ្នកស្រី ស៊ីនួន ទ្រហោយំ ហើយបានបដិសេធមិនធ្វើអត្ថាធិប្បាយទាក់ទងនឹងសាលក្រមនោះទេ។
តុលាការក៏បានកាត់ទោសលោក ញ៉ែម ស៊ីនួន អាយុ៤៩ឆ្នាំ ឪពុកចុងរបស់អ្នកស្រី ស៊ីនួន និងផេង សប្បាយ អាយុ២២ឆ្នាំ ជាប្អូនថ្លៃរបស់អ្នកស្រី ស៊ីនួន ឲ្យជាប់ពន្ធនាគារកំបាំងមុខ១០ឆ្នាំម្នាក់ៗពីបទផ្សំគំនិតជួញដូរសរីរាង្គ។ លោក ញ៉ែម ផល្លា និង ផេង សប្បាយ បានរត់គេចខ្លួន៕