30 C
Phnom Penh

នគរ​បាល​​បោះបង់​ការ​ព្យាយាម​​ដក​ហូត​ម៉ូតូ​អ្នក​ជល់មាន់​​ ដោយ​សារ​​មាន​ការ​តបត​ពី​ក្រុម​អ្នកភូមិ​

ដោយ ឌឹ ខេមបូឌា ដេលី

បទវិភាគ

នគរ​បាល​​​បាន​​លើក​ឡើង​កាលពី​ម្សិលមិញ​ថា នគរ​បាល​ខេត្ត​កំពត​បាន​ឆ្មក់​បង្ក្រាប​ការ​ជល់មាន់​មួយ​កាលពី​ថ្ងៃ​អាទិត្យ ហើយ​ដក​ហូត​បាន​មាន់​ជល់ និង​សម្ភារ​មួយ​ចំនួន​ទៀត ប៉ុន្តែ​ពួកគេ​បាន​បោះ​បង់​ការ​ព្យាយាម​ដកហូត​ម៉ូតូ​​ជា​ច្រើន​​គ្រឿង​ពី​សង្វៀន​​​ជល់មាន់​​នោះ​ នៅ​ពេល​ក្រុម​អ្នកភូមិ​​ដែល​ពោរពេញ​ដោយ​កំហឹង​និង​​ដែល​ប្រដាប់​ដោយ​អាវុធ​ និង​ក្របី​​បាន​តតាំង​ជាមួយពួកគេ​។

លោក ម៉ៅ ចាន់​មធុរិទ្ធ ស្នង​ការ​រង​ខេត្ត​កំពត​​​បាន​ឲ្យ​ដឹងថា មន្ត្រី​នគរ​បាល​ប្រហែល​១៥​នាក់​បាន​ឆ្មក់​បង្ក្រាប​ការ​ជល់​មាន់មួយ​នៅ​ក្នុង​ឃុំ​ជម្ពូ​វ័ន្ត​ ស្រុក​ជុំគិរី នៅ​វេលា​ម៉ោង​ប្រហែល​៤និង​៣០​នាទី​រសៀល​ថ្ងៃអាទិត្យ​។

លោក​បាន​មាន​ប្រសាសន៍​ទៀត​ថា បុរស​ឈ្មោះ កាន់ ភា អាយុ​៤៨​ឆ្នាំ ដែល​គេ​សង្ស័យ​ថា ជា​អ្នក​រៀបចំ​ការ​ជល់​មាន់​នេះ ​បាន​រត់​គេច​ខ្លួន​រួច​ពី​នគរ​បាល​ ប៉ុន្តែ​បុរស​ប្រាំពីរ​នាក់​ត្រូវ​បាន​ចាប់​ខ្លួន​​ពី​បទ​លេង​ល្បែង​ស៊ីសង ហើយ​ទ្រុង​មាន់​ចំនួន​ប្រាំមួយ រួម​ជាមួយ​នឹង​មាន់​ចំនួន​បួន​ក្បាលត្រូវ​បាន​ដក​ហូត​។

​ឧត្ដម​សេនីយ៍ត្រីរូប​នេះ​​បាន​​បន្ថែម​ថា នគ​រ​បាល​ក៏​បាន​ព្យាយាម​ដក​ហូត​ម៉ូតូ​ចំនួន​២៩​គ្រឿង​​ពី​ក្រៅ​សង្វៀន​ជល់​មាន់​​ដែរ ប៉ុន្តែ​អ្នកភូមិ​បាន​រារាំង​ពួកគេ​។ លោក​បាន​បន្ត​ថា “នៅ​ពេល​នគរ​បាល​របស់​យើង​​ចាប់​ម៉ូតូទាំង​នោះ​លើក​ឡើង​​ដាក់​លើ​រថយន្ត​ អ្នកភូមិ​ជិត​១០០​នាក់​បាន​​វ៉ៃ​ជាមួយ​ពួកយើង​​ដើម្បី​​ដណ្ដើម​យក​ម៉ូតូ​ទៅវិញ​”។

លោក​​ថ្លែង​​ថា អ្នកភូមិទាំង​នោះ​មិន​ត្រឹម​តែ​ប្រដាប់​ដោយអាវុធ​ប៉ុណ្ណោះ​ទេ ពួកគេ​ថែម​ទាំង​​ដឹក​ក្របី​​ប្រដេញ​តម្រង់​​​មក​រក​រថយន្ត​​របស់​​នគរ​បាល​ទៀត​ផង ធ្វើ​ឲ្យ​នគរ​បាល​បង្ខំ​ចិត្ត​គេច​ខ្លួន​​​ចោល​ម៉ូតូ​​។

លោក​​បាន​បន្ថែម​​ថា “យើង​បាន​​សម្រេច​ចិត្ត​បោះ​បង់​ម៉ូតូ​ទាំង​នោះ​ចោល​នៅ​កន្លែង​កើត​ហេតុ ដោយ​សារ​តែ​យើង​មិន​ចង់​តតាំង​ជាមួយ​អ្នកភូមិ​​ដែល​ពោរពេញ​ដោយ​កំហឹង​ ដែល​ប្រដាប់​ដោយ​កំាបិត​ផ្គាក់ ពូថៅ និង​ដំបង”។

លោក​បាន​បញ្ជាក់ថា គ្មាន​នរណា​ម្នាក់​រង​របួស​ទេ​នៅ​ក្នុង​​ការ​​ប្រឈម​មុខ​ដាក់​គ្នា​នេះ ដោយ​​គ្រាន់​តែ​តតាំង​​គ្នា​ជា​ពាក្យ​សម្ដី និង​រុញ​ច្រាន​គ្នា​​​ខ្លះ​ៗ​ប៉ុណ្ណោះ។

លោក អៀម ច័ន្ទតារា ជាមន្ត្រី​នគរ​បាល​មួយ​រូប​នៅ​​ការិយាល័យ​នគរ​បាល​​ព្រហ្មទណ្ឌ​កម្រិត​ធ្ងន់​នៃ​ស្នង​ការដ្ឋាន​នគរ​បាល​ខេត្ត​ បាន​មាន​ប្រសាសន៍​ថា បុរស​ពីរ​នាក់​​ក្នុង​ចំណោម​បុរស​​ដែល​ត្រូវ​បាន​​​ចាប់​ខ្លួន​ទាំង​​ប្រាំពីរ​នាក់​​ ត្រូវ​បាន​ដោះលែង​វិញ​​កាលពី​ព្រឹក​ម្សិលមិញ ដោយ​សារ​ពួកគេ​​មាន​ជំងឺ​​ ហើយ​ឪពុក​ម្ដាយ​របស់​ពួកគេ​បានធានា​ថា ពួកគេ​នឹង​ចូល​ខ្លួន​តាម​ការ​កោះ​ហៅ​របស់​តុលាការ​។ ” ប៉ុន្តែ​ជន​សង្ស័យទាំង​ប្រាំនាក់​ទៀត​នឹង​ត្រូវ​បញ្ជូន​ខ្លួន​ទៅ​សាលា​ដំបូង​ខេត្ត​ដើម្បី​​ធ្វើ​​ការ​ចោទ​ប្រកាន់​”។

លោក​បាន​បន្ថែម​ទៀត​ថា នគរ​បាល​ក៏​កំពុង​តាម​ចាប់​ខ្លួន​​ប្អូន​ប្រុស​របស់​លោក​ កាន់ ភា ឈ្មោះ កាន់ ផាត អាយុ​៤០​ឆ្នាំ និង​កូន​ប្រុស​របស់​គាត់​ឈ្មោះ កាន់ មុល អាយុ​២៣​ឆ្នាំ​​ផង​ដែរ​ ដោយសារ​តែ​ពួកគេ​ជាប់​សង្ស័យ​ពីបទ​ញុះញង់​អ្នកភូមិ​ឲ្យ​តតាំង​ជា​មួយ​នគរ​បាល​​។ ” យើង​កំពុង​តាម​ចាប់​ខ្លួន​មេខ្លោង និងអ្នក​​ដឹកនាំ​អ្នកភូមិ​ឲ្យ​វាយ​បក​មក​លើ​នគរ​បាល​។ យើង​បាន​បង្ខំ​ចិត្ត​ចាក​ចេញពី​កន្លែង​កើត​ហេតុ​ចោល​ម៉ូតូ​ ដោយ​សារ​តែ​អ្នកភូមិ​មួយ​ចំនួន​បាន​ដឹក​ក្របី​ប្រដេញ​យើង​តាម​ពីក្រោយ​”៕ សុខុម​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស