31 C
Phnom Penh

នគរបាល​ត្រឡប់​មក​ដុត​ជម្រក​នៅ​សេស​សល់​ក្នុង​ខេត្ត​មណ្ឌលគិរី

ដោយ ឌឹ ខេមបូឌា ដេលី

បទវិភាគ

បន្ទាប់​ពីពិនិត្យ​មើល​ការ​បំផ្លាញ​​ជម្រក​ស្ទើរ​តែទាំង​អស់​លើក​លែង​តែជម្រក​៦ក្នុង​ចំណោម​ជម្រក​បណ្តោះ​អាសន្ន​​១៧២ដែល​ត្រូវ​បាន​សាង​សង់​លើ​ដី​ដែល​អះ​អាង​កាន់កាប់​ដោយ​សហគមន៍​ជន​ជាតិ​ដើម​ភាគ​តិច​​​ព្នង​ក្នុង​ខេត្ត​មណ្ឌល​គិរី​កាលពី​ថ្ងៃអង្គារ​នោះ អាជ្ញាធរ​​​បាន​ត្រឡប់​មក​​បំផ្លាញ​ជម្រក​ដែលនៅ​សេស​សល់​​កាលពីម្សិលមិញម្តង​ទៀត​នៅ​លើដី​ដែល​​ជា​កម្មសិទ្ធិ​របស់​​ក្រុមហ៊ុន​ចម្ការ​កៅស៊ូ​វៀត​ណាម។

ប៉ុន្តែ​បើ​ទោះ​ជា​អ្នក​ភូមិ​ជន​ជាតិ​ដើម​ភាគតិច​ព្នង​​លើក​ឡើង​ថា ពួកគាត់​បាន​បំភ័យ​នគរបាល​និង​កង​រាជ​អាវុធ​ហត្ថ​​ដែលបាន​មកបញ្ចប់ការងារ​នេះក៏ដោយ ក៏​មន្ត្រី​មូលដ្ឋានម្នាក់​​​បាន​និយាយ​ថា មន្ត្រី​ទាំងនោះ​​ទទួលបាន​ជោគ​ជ័យ​ក្នុង​ការ​ងារ​របស់ខ្លួន​ដែរ។

អ្នកស្រី ឃុន វណ្ណី​ ដែល​ជម្រក​របស់គាត់​ស្ថិត​ក្នុង​ចំណោម​ជម្រក​ដែល​ត្រូវ​បាន​ដុត​បំផ្លាញ​នៅលើ​ដី​​ដែលមាន​វិវាទ​ស្ថិត​ក្នុងឃុំស្រែឈូក ​ស្រុក​កែវ​សីមាកាលពី​ថ្ងៃអង្គារ​​​បាននិយាយថា ​សមាជិកសហគមន៍​ជន​ជាតិ​ដើម​ភាគតិច​ប្រហែល​២០០នាក់​កាលពី​ម្សិលមិញ្​បាន​ការ​ពារ​ជម្រក​នៅ​សល់​ទាំង​៦នោះ។

អ្នកស្រី​ វណ្ណី បានលើកឡើង​ថា “​យើង​បាន​ឃើញ​​នគរបាល​និង​កង​រាជ​អាវុធ​ហត្ថ​​ប្រហែល​៣០នាក់​មកដល់​​នៅ​ព្រឹក​នេះ…​​ព្យាយាម​ដុត​ជម្រក​នៅ​សេស​សល់ ប៉ុន្តែ​ពួកគេ​ដក​ថយ​វិញ​បន្ទាប់ពី​ពួកគេ​ឃើញ​​មនុស្ស​រាប់​រយនាក់​​ប្រមូលផ្តុំគ្នានៅលើ​ដី​​ប្រដាប់ដោយ​ពូថៅ និង​កាំបិត​ផ្គាក់​”។

អ្នកស្រី​បាន​បន្ថែម​ថា “​យើង​ទាំង​អស់​មក​ជួប​ជុំគ្នា​ត្រៀម​​​ដុំថ្ម​១០បាវ​…​ដើម្បី​គប់​រថយន្ត​នគរបាល​ ប្រសិន​បើ​ពួកគេ​ព្យាយាម​បើក​ចូល​ក្នុង​ដីនោះ​ ហើយ​ដុត​ជម្រក​​ទាំងនោះ”។

គ្រួសារ​អ្នកស្រី វណ្ណី គឺ​ជាគ្រួសារ​មួយ​ក្នុង​ចំណោម​គ្រួសារ​ជាង​​២០០ ដែល​និយាយ​ថា​ពួកគាត់​​​បាន​រស់​នៅ​និង​ធ្វើស្រែ​ចម្ការ​​នៅក្នុង​​ឃុំស្រែ​ឈូកច្រើន​ជំនាន់​មក​ហើយ។

ទោះ​យ៉ាង​ណា អាជ្ញាធរ​មូលដ្ឋាន​និយាយ​ថា ​គ្រួសារ​ទាំងនោះ​មក​សាងសង់​ជម្រក​លើ​ដី​សម្បទាន​​ទំហំ​​៥.១០០ហិកតា​​ដែល​ត្រូវ​បាន​ផ្តល់​ទៅ​ឲ្យ​​ក្រុមហ៊ុន​ Binh Phuoc 1ក្នុង​ឆ្នាំ​២០១២។

លោក ស៊ិន វណ្ណវុធ អភិបាល​ស្រុក​​បានមាន​ប្រសាសន៍​កាលពី​ម្សិលមិញ​ថា នគរបាល​និង​កង​រាជ​អាវុធ​ហត្ថ​​បាន​បំផ្លាញ​ជម្រកនៅ​សេស​សល់​ដោយ​ជោគ​ជ័យ​​ដែល​កសិករ​​សម្រាប់​សម្រាក​នៅ​ពេល​ថ្ងៃ។

លោក​បាន​មាន​ប្រសាសន៍​ថា ក្រុមហ៊ុន​វៀត​ណាម កាលពី​ពេល​ថ្មីៗ​នេះ​បាន​ផ្តល់​ដីសម្បទាន​ទំហំ​​៣៧៥​ហិកតា​ដល់​អ្នក​ភូមិ​ ប៉ុន្តែ​ថា “អ្ន​ក​ចំណូល​ថ្មី”មួយ​ក្រុម​ចាប់តាំងពី​ពេលនោះ​មក​បាន​មក​តាំងទីលំនៅ​ក្នុង​តំបន់នោះ ដោយ​យក​ដ​ី​ទំហំ​១២៥ហិកតា​បន្ថែម​សម្រាប់​ពួកគេ។

លោក​បាន​មាន​ប្រសាសន៍ថា “​អ្នកចំណូល​ថ្មី មក​រស់នៅ​លើ​ដី​​នេះ ហើយ​បាន​ញុះញង់​​ជន​ជាតិ​ដើម​ភាគតិច​​ឲ្យ​តវ៉ា​​ប្រឆាំង​ក្រុមហ៊ុន​ ពីព្រោះ​​ពួកគេ​ចង់​កាន់កាប់​ដី​ដែលរាន​រួច”។

លោក វណ្ណវុធ បាន​មាន​ប្រសាសន៍​ថា កាលពី​ខែមុន មន្ត្រី​ស្រុក​​​បាន​ផ្តល់​ឱកាស​ដល់​អ្នក​ភូមិ​ជន​ជាតិ​ដើម​ភាគតិច​ព្នង​​ចុះ​ឈ្មោះ​​សម្រាប់​ក្បាល​ដី​ផ្សេង​ទៀត​ដែល​ត្រូវបាន​រាន​ដោយ​ក្រុមហ៊ុន​​ Binh Phuoc 1 ប៉ុន្តែ​​ថា អ្នក​ចំណូលថ្មី​​បាន​បញ្ចុះ​បញ្ចូល​អ្នកភូមិ​ជន​ជាតិ​ដើម​ភាគតិច​​​ឲ្យ​បដិសេធ​សំណើ​នោះ។

លោក​បានមាន​ប្រសាសន៍​ថា អាជ្ញាធរ​​នឹង​ “​អនុវត្ត​​ច្បាប់” ប្រសិន​បើ​គ្រួសារ​ទាំងនោះ​​​បាន​ព្យាយាម​សាងសង់​ជម្រក​របស់ខ្លួន​ឡើង​វិញ​នៅ​ថ្ងៃនេះ៕ សារុន​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស