ចៅក្រមស៊ើបសួរបានលើកឡើងកាលពីម្សិលមិញថា សាលាដំបូងខេត្តព្រះសីហនុ បានបដិសេធសំណើសុំនៅក្រៅឃុំរបស់លោក នីកូឡៃ ដូរ៉ូសិនកូ ពាណិជ្ជករជនជាតិរុស្ស៊ី ដែលត្រូវបានចាប់ខ្លួននៅភោជនីយដ្ឋានរបស់ក្រុមគ្រួសារលោកនៅក្នុងក្រុងព្រះសីហនុកាលពីសប្តាហ៍មុន ហើយត្រូវបានជាប់ពន្ធនាគារតាមចោទប្រកាន់ពីបទឆបោកចំនួនបីទាក់ទងនឹងជម្លោះក្នុងការរកស៊ីជាមួយលោក សេរហ្គេ ប៉ូលុនស្គី។
លោកចៅក្រម អុី ឃាង បានមានប្រសាសន៍ថា “តុលាការបានសម្រេចបដិសេធមិនឲ្យលោកនៅក្រៅឃុំកាលពីម្សិលមិញ [ថ្ងៃអង្គារ] ប៉ុន្តែបានប្រាប់មេធាវីរបស់លោកនៅថ្ងៃនេះប៉ុណ្ណោះ”។ លោកបានបដិសេធមិននិយាយលម្អិតពីសេចក្តីសម្រេចនេះ ឬធ្វើអត្ថាធិប្បាយបន្ថែមអំពីករណីនេះឡើយ។
លោក ដូរ៉ូសិនកូ អាយុ៥៤ឆ្នាំ ដែលបានរស់នៅក្រុងព្រះសីហនុរយៈពេលជាង២ទសវត្សរ៍មកហើយ ហើយមានសញ្ជាតិខ្មែរទៀតនោះ ត្រូវបានកងរាជអាវុធហត្ថចាប់ខ្លួននៅភោជនីយដ្ឋានផ្ទះពស់របស់ក្រុមគ្រួសារលោកស្ថិតក្នុងសង្កាត់លេខ៣ កាលពីរសៀលថ្ងៃទី២៥ ខែមីនា។
លោកត្រូវបានបញ្ជូនទៅពន្ធនាគារខេត្តនៅយប់នោះ ដើម្បីរង់ចាំការកាត់ក្តីតាមការចោទប្រកាន់ពីបទក្លែងហត្ថលេខា ប្រើប្រាស់ឯកសារក្លែងក្លាយ និងរំលោភសេចក្ដីទុកចិត្ត បទឧក្រិដ្ឋដែលតាមចោទថា លោកបានឆបោកប្រាក់១០លានដុល្លារដែលលោក ប៉ូលុនស្គី បានវិនិយោគនៅក្នុងក្រុមហ៊ុន Sea Snake Investmentរួមគ្នារបស់ពួកគេ។
លោក ប៉ូលុនស្គី អាយុ៤២ឆ្នាំ ដែលមេធាវីរបស់លោកអះអាងថា ពួកគេបានដាក់ពាក្យបណ្ដឹងជាង១២ប្ដឹងលោក ដូរ៉ូសិនកូ ចំពោះបទល្មើសជាច្រើននោះ រីករាយជាខ្លាំងនឹងការចាប់ខ្លួននេះ។
លោក អូសថេប កូនប្រុសរបស់លោក ដូរ៉ូសិនកូ និងជាអនុសេនីយ៍ឯកក្នុងកងកម្លាំងនគរបាលអន្តោប្រវេសន៍ខេត្តបានមានប្រសាសន៍ថា ឪពុករបស់លោកគ្មានកំហុសទេ ហើយបានប្ដេជ្ញាចាត់វិធានការផ្លូវច្បាប់ប្រឆាំងលោក ប៉ូលុនស្គី ដែលគេកំពុងតាមចាប់ខ្លួននៅក្នុងប្រទេសរុស្ស៊ីតាមការចោទប្រកាន់ពីបទកិបកេងប្រាក់រាប់លានដុល្លារ។
លោក ប៉ូលុនស្គី បានជាប់ពន្ធនាគាររយៈពេលបីខែកាលពីឆ្នាំ២០១៣ តាមការចោទប្រកាន់ពីបទវាយជនជាតិខ្មែរមួយក្រុមនៅលើទូក។
នៅពេលត្រូវបានទាក់ទងកាលពីម្សិលមិញ លោក អូសថេប ដូរ៉ូសិនកូ បានបដិសេធមិនធ្វើអត្ថាធិប្បាយទេ។ លោក ឈុន ជ្រា មេធាវីរបស់ឪពុកលោកដែលបានដាក់សំណើសុំនៅក្រៅឃុំនៅថ្ងៃនៃការចាប់ខ្លួននោះ បានមានប្រសាសន៍ថា តុលាការគួរអនុញ្ញាតឲ្យកូនក្ដីរបស់លោកមានសេរីភាព ពីព្រោះគាត់ជាសមាជិកសហគមន៍មូលដ្ឋាន។
លោក ឈុន ជ្រា បានមានប្រសាសន៍ថា ” ខ្ញុំគិតថា តុលាការមិនគួរឃុំខ្លួនគាត់ទេ ពីព្រោះគាត់ជាពាណិជ្ជករម្នាក់ ហើយគាត់មានទីលំនៅអចិន្ត្រៃយ៍ ហើយគាត់ជាជនជាតិខ្មែរ”។
លោកបានមានប្រសាសន៍ថា ” ចៅក្រមគួរដាក់ឲ្យគាត់ស្ថិតក្រោមការឃ្លាំមើលរបស់តុលាការ”។ លោកបានបន្ថែមថា លោកនឹងស្នើសុំឲ្យសាលាឧទ្ធរណ៍ពិចារណាសំណើសុំនៅក្រៅឃុំឡើងវិញកុំឲ្យហួសពីថ្ងៃសុក្រ។
លោក បែនសុន សម័យ មេធាវីលោក ប៉ូលុនស្គី បានមានប្រសាសន៍ថា សេចក្ដីសម្រេចរបស់តុលាការត្រឹមត្រូវហើយ ប៉ុន្តែថា បើទោះជាលោក ដូរ៉ូសិនកូ ត្រូវបានដោះលែងឲ្យនៅក្រៅឃុំក៏ដោយ ក៏គាត់នៅតែត្រូវឆ្លើយនឹងពាក្យបណ្ដឹងព្រហ្មទណ្ឌផ្សេងៗទៀតនៅក្នុងដៃតុលាការដែរ។
លោកបានមានប្រសាសន៍ថា ” បើទោះជាគាត់ទទួលបានការឲ្យនៅក្រៅឃុំក៏ដោយ ក៏គាត់ជាប់ពាក់ព័ន្ធករណីដទៃទៀតជាច្រើនដែរ”៕ សារុន