កាលពីម្សិលមិញ លោក សាយ សំអាល់ រដ្ឋមន្ត្រីក្រសួងបរិស្ថានបានប្រកាសបង្កើតមូលនិធិប្រចាំឆ្នាំមួយដែលមានទំហំទឹកប្រាក់៥លានដុល្លារដើម្បីជួយរាជធានីភ្នំពេញ និងទីក្រុងនៅតាមគ្រប់បណ្ដាខេត្ត សម្អាតផ្លូវថ្នល់ដែលមានសំរាមរាយប៉ាយពាសពេញ ជាពិសេសនៅខាងក្រៅលំនៅដ្ឋាន និងភោជនីយដ្ឋាន។
ក្នុងពិធីបើកអង្គសន្និបាតបូកសរុបការងារប្រចាំឆ្នាំរបស់ក្រសួងបរិស្ថាន ដែលធ្វើឡើងរយៈពេលបីថ្ងៃនៅក្នុងរាជធានីភ្នំពេញ លោក សាយ សំអាល់ បានមានប្រសាសន៍ថា ថវិកាចំនួន៥លានដុល្លារដំបូងត្រូវបានលៃទុករួចហើយសម្រាប់ឆ្នាំទី១។ លោកបានមានប្រសាសន៍ទៀតថា ដើម្បីរក្សាមូលនិធិនេះឲ្យនៅគង់វង់បន្តទៅទៀត រដ្ឋាភិបាលនឹងដំឡើងពន្ធលើបារី គ្រឿងស្រវឹង និងគ្រឿងអេឡិចត្រូនិកជជុស ប៉ុន្តែលោកមិនបានលើកឡើងលម្អិតទេ។ នៅក្នុងខេត្តស្វាយរៀង មូលនិធិនេះក៏នឹងគ្របដណ្ដប់លើក្រុងបាវិតដែលជាក្រុងទី២ដែរ។
លោកបានមានប្រសាសន៍បន្ថែមថា “ យើងកំពុងចាប់ផ្ដើមគម្រោងទីក្រុងស្អាត ពីព្រោះរដ្ឋាភិបាលព្រួយបារម្ភចំពោះការបំពុល។ បន្ទាប់ពីឆ្នាំទី១ទៅយើងនឹងយក៥លានដុល្លារដែលប្រមូលបានពីពន្ធ ហើយចែកចាយវាក្នុងចំណោមក្រុងចំនួន២៦ ដើម្បីឲ្យពួកគេសម្អាតទីក្រុងរបស់ខ្លួន។ ក្រុងនីមួយៗនឹងទទួលបាន១៦០.០០០ដុល្លារ”។
ទោះជាយ៉ាងណា រដ្ឋមន្ត្រីរូបនេះហាក់ដូចជាមានបញ្ហាខាងគណនាគណិតវិទ្យា។ ការផ្ដល់១៦០.០០០ដុល្លារដល់ក្រុងនីមួយៗក្នុងចំណោមក្រុងចំនួន២៦ គឺស្មើនឹង៤,១៦លានដុល្លារ ពោលគឺតិចជាងឆ្ងាយណាស់បើប្រៀបធៀបនឹងចំនួនសរុប៥លានដុល្លារដែលរដ្ឋមន្ត្រីរូបនេះបានលើកឡើង។
នៅពេលទាក់ទងតាមក្រោយកាលពីម្សិលមិញ និងសុំឲ្យពន្យល់ពីភាពខុសគ្នានេះ លោក សាយ សំអាល់ បានមានប្រសាសន៍ថា តាមពិតមានតែ២,៥លានដុល្លារប៉ុណ្ណោះដែលនឹងត្រូវចែកចាយក្នុងចំណោមទីក្រុងទាំង២៦។ ប៉ុន្តែបើគិតពីចំនួននោះ គឺទីក្រុងនីមួយៗទទួលបានតែ៩៦.០០០ដុល្លារប៉ុណ្ណោះ។ នៅពេលសុំឲ្យពន្យល់ពីភាពខុសគ្នានេះម្ដងទៀត រដ្ឋមន្ត្រីរូបេនះបានបង្វែរសំណួរទៅមន្ត្រីក្រោមឱវាទរបស់លោក។
លោក ឌី ធីដែន អនុប្រធាននាយកដ្ឋានគ្រប់គ្រងការបំពុលនៃក្រសួងបរិស្ថាន បានពន្យល់ថា តាមពិតមូលនិធិនេះមានចំនួនសរុប៥លានដុល្លារ។ លោកបានមានប្រសាសន៍ទៀតថា ពាក់កណ្ដាលនឹងត្រូវបែកចែកក្នុងចំណោមទីក្រុងទាំងអស់ ហើយចំណែកដែលនៅសេសសល់នឹងត្រូវបែងចែកទៅតាមសមាមាត្រនៃចំនួនប្រជាជន។
អំឡុងសុន្ទរកថាបើកអង្គសន្និបាតកាលពីម្សិលមិញនោះដែរ លោក សាយ សំអាល់ បានចុចឈ្មោះរោងចក្រនៅក្នុងស្រុកជើងព្រៃ ខេត្តកំពង់ចាម ចំពោះការមិនទុកដាក់សំណល់រាវរបស់ខ្លួនឲ្យបានត្រឹមត្រូវ ដែលបច្ចុប្បន្នកំពុងតែហូរហៀរពាសពេញដីដោយគ្មានការធ្វើប្រព្រឹត្តិកម្ម។
លោកបានមានប្រសាសន៍ថា ” ដូច្នេះ នេះគឺជាបញ្ហាដ៏សំខាន់ដែលអាជ្ញាធរមូលដ្ឋាន និងម្ចាស់តំបន់ឧស្សាហកម្មត្រូវតែដោះស្រាយជាបន្ទាន់”។ លោកមិនបានមានប្រសាសន៍លម្អិតអំពីករណីនេះទេ ប៉ុន្តែវាហាក់ដូចជាផ្នែកនៃគំនិតផ្ដួចផ្ដើមមួយទៀតដែលលោកបានប្រកាសកាលពីដើមខែមុន។
នៅពេលនោះ លោកបានមានប្រសាសន៍ថា ក្រសួងបានផ្ញើលិខិតទៅរោងចក្រជិត១.០០០នៅទូទាំងប្រទេស ដោយបញ្ជាឲ្យពួកគេធ្វើការវាយតម្លៃផលប៉ះពាល់ផ្នែកបរិស្ថានដែលបង្កឡើងដោយប្រតិបត្តិការរបស់ពួកគេ ហើយចាត់វិធានការដោះស្រាយស្ថានភាពដែលមិនគោរពតាមការណែនាំរបស់រដ្ឋាភិបាល។ លោកបានបញ្ជាក់ថា ក្រុមអធិការកិច្ចនឹងចាប់ផ្ដើមត្រួតពិនិត្យរោងចក្ររាល់៦ខែម្ដង ហើយថា រោងចក្រដែលល្មើសនឹង ” ប្រឈមចំពោះមុខច្បាប់”៕ សុខុម