36 C
Phnom Penh

​​ភ្នាក់​ងារ​លក់​រថយន្ត​ BMW ​ស្រវឹង​បើក​រថយន្ត​​​​បុក​ភូមិគ្រឹះ​​លោក ហ៊ុន សែន បណ្ដាល​ឲ្យ​អង្គរក្ស​​រង​របួស​

ដោយ ឌឹ ខេមបូឌា ដេលី

បទវិភាគ

នគរ​បាល​បាន​​​និយាយ​ថា អង្គរក្ស​ផ្ទាល់​ខ្លួន​បី​នាក់​របស់​លោក​នាយក​រដ្ឋមន្ត្រី ហ៊ុន សែន បាន​រងរបួស​កាលពី​ពេល​រំលង​អធ្រាត្រ​ឈាន​ចូល​ព្រឹក​ថ្ងៃពុធ នៅ​ពេល​​​​នារី​ម្នាក់ដែល​ស្ថិត​ក្នុង​ស្ថាន​ភាព​​ស្រវឹង​ជោក​ជាំ ​បើក​បររថយន្ត​ BMW របស់​នាង​ក្រឡឹង​ជុំវិញ​វិមាន​ឯករាជ្យ​ ​ហើយ​រេចង្កូត​ជ្រុល​ទៅ​បុក​ពួកគេ​នៅ​ជិត​ខ្លោង​ទ្វារ​ចូល​ភូមិ​គ្រឹះ​របស់​​នាយក​រដ្ឋមន្ត្រី​។

លោក​​ សេង ចាន់ថន នាយ​​នគរ​បាល​ចរាចរ​រាជធានី​​​​ បាន​មាន​ប្រសាសន៍​ថា គ្រោះ​ថ្នាក់​ចរាចរណ៍​នេះ​បាន​កើត​ឡើង​នៅ​វេលា​ម៉ោង​ប្រហែល​ ១ ​និង​ ៤០​ នាទី​រំលង​អធ្រាត្រ​ នៅ​ពេល​​នារី​ម្នាក់​ឈ្មោះ អ៊ុង កុលហ្សានិច អាយុ​២៥​ឆ្នាំ ដែល​ជា​ភ្នាក់​ងារ​លក់​​​របស់​ក្រុម​ហ៊ុន​ BMW បាន​បាត់​​បង់​ម្ចាស់​ការ​​ក្នុង​ការ​បញ្ជា​រថយន្ត​របស​់​ខ្លួន ហើយ​បាន​រេ​ចង្កូត​ជ្រុល​ទៅ​បុក​ដើម​ឈើ​មួយ​ដើម នៅ​​​​កន្លែង​ដែល​អង្គរក្ស​បី​នាក់​កំពុង​ឈ​​ជិត​​ប៉ុស្តិ៍​យាម​របស់​ពួកគេ​។

លោក​បាន​មាន​ប្រសាសន៍​ទៀត​ថា “នាង​ស្រវឹង​ជោកជាំ ហើយ​បើក​បរ​លើស​ល្បឿន​កំណត់​​​មិន​អាច​គ្រប់​គ្រង​ចង្កូត​បាន​ ទើប​នាង​ជ្រុល​​ទៅ​បុក​ដើម​ឈើ​មួយ​ដើម​បណ្តាល​​ឲ្យ​​បាក់​រលំ​សង្កត់​លើ​ម៉ូតូ​ និង​មនុស្ស​នៅ​ក្បែរ​នោះ​”។ លោក​បាន​​បញ្ជាក់ថា នារី​​វ័យ​២៥​ឆ្នាំ​ម្នាក់​ទៀត​​ឈ្មោះ តាន់ គីមលី គឺ​ជា​អ្នក​រួម​ដំណើរ​នៅ​ក្នុង​រថយន្ត​​នោះ​។

លោក​បាន​បន្ត​ថា នារី​ទាំងពីរ​នាក់​​នេះ​ទើប​​​​ចេញ​ពី​កន្លែង​​​ផឹក​ស៊ី​នៅ​ម្ដុំ​ផ្សារ​កាប់​គោ ហើយថា អង្គរក្ស​នាយក​រដ្ឋមន្ត្រី​ពីរ​នាក់​គឺ​លោក យិុន ចាន់​ធួន អាយុ​៤៧​ឆ្នាំ ដែល​ជា​នាយ​រង​សេនា​ធិការ​បញ្ជាការដ្ឋាន​អង្គរក្ស និង​លោក​ ស៊ីង សុជាតិ អាយុ​២៩​ឆ្នាំ ពិត​ជា​អាយុ​ថ្លៃ​​ណាស់​ដែល​គេច​ផុត​ពី​ស្លាប់។

លោក​​មាន​ប្រសាសន៍​ថា “ម៉្លេះ​លោក យិុន ចាន់​ធួន ​ស្លាប់​បាត់​ទៅ​ហើយ​ប្រសិន​បើ​អង្គរក្ស​របស់​គាត់​មិន​ជួយ​ទាញ​គាត់​ចេញពី​ផ្លូវ​រថយន្ត​ទេ​នោះ ពីព្រោះ​​រថ​យន្ត​បាន​បុក​ម៉ូតូ​របស់​ពួកគេ​ផ្ទុប​​នឹង​ជញ្ជាំង​។ រថយន្ត​បាន​ជាប់​នឹង​ដើម​ឈើ​ ដូច្នេះ​​ហើយ​វា​មិន​បាន​បុក​ត្រូវ​ភូមិគ្រឹះ​របស់​សម្ដេច​ [ហ៊ុន សែន​] ​ទេ”។ លោក​បាន​បន្ថែម​ថា ​​​នគរ​បាល​កំពុង​​ឃាត់​ខ្លួន​នារីទាំង​ពីរ​នាក់​នេះ​ដើម្បី​ធ្វើការ​សាក​សួរ​។

លោក​ ចេវ ហាក់ ​នាយ​ការិយាល័យ​នគរ​បាល​ចរាចរ​រាជធានី បានមាន​ប្រសាសន៍​ថា នារី​ទាំងពីរ​នាក់​នេះ​នឹង​ត្រូវ​បញ្ជូន​ខ្លួន​ទៅ​សាលា​ដំបូងរាជធានី​ភ្នំពេញ​​នៅ​ថ្ងៃ​នេះ​ដើម្បី​សាកសួរ​បន្ថែម​ទៀត​។

លោក សេង ចាន់ថន បាន​មាន​ប្រសាសន៍ថា រថយន្ត​បង្ក​ជា​ “​របស់​ក្រុម​ហ៊ុន BMW” ហើយ​ត្រូវ​បាន​យក​ទៅ​រក្សា​ទុក​នៅ​​ផ្នែក​នគរ​បាល​ចរាចររាជធានី​។អង្គរក្ស​ទាំងពីរ​​​នាក់​ត្រូវ​បាន​បញ្ជូន​ទៅ​ព្យាបាល​នៅ​មន្ទីរ​ពេទ្យ​កាល់ម៉ែត​ បន្ទាប់ពី​រង​របួស​ស្រាល​រួម​មាន​ជើង​ហើម និង​​​ស្នាម​ជាំ​ ហើយ​ជន​រងគ្រោះទី៣​​ម្នាក់​ទៀតបាន​ចេញ​ឈាម​តាម​ត្រចៀកដោយ​សារ​ដើម​ឈើ​​​បាក់​រលំ​សង្កត់​លើ​។

នាយ​ឧត្ដម​សេនីយ៍ ហ៊ីង ប៊ុនហៀង ប្រធាន​អង្គភាព​កង​អង្គរក្ស​នាយក​រដ្ឋមន្ត្រី​ បាន​មាន​ប្រសាសន៍​ថា ជន​រង​ក្រោះ​ទាំងបី​កំពុង​ទទួល​ការ​ព្យាបាល​នៅ​ឡើយ​កាលពី​ម្សិលមិញ។ “មាន​អង្គរក្ស​បី​នាក់​រង​របួស​។ ម្នាក់​របួស​ក្បាល និង​មាត់ ហើយ​ត្រចៀក​ចេញ​ឈាម​។ ពួកគេ​ទាំងបី​នាក់​ស្ទើរ​តែ​សន្លប់​បាត់​ស្មារតី”។

លោក​បាន​បន្ត​ថា ប្រសិន​បើ​ពួកគេ​អង្គុយ​លើ​ម៉ូតូ​នៅពេល​គ្រោះ​ថ្នាក់​ចរាចរណ៍​កើត​ឡើង​ ​ម៉្លេះ​ពួកគេ​ស្លាប់​បាត់​ទៅ​ហើយ​​។ “សំណាង​ណាស់​ដែល​ពួកគេ​នៅ​ឆ្ងាយ​ពី​ដើម​ឈើ​​នោះ​”។

លោក ភីតធើ ប្រូនហ្គើស (Peter Brongers)​ នាយក​ប្រតិបត្តិ​ក្រុម​ហ៊ុន Premium Auto Import ដែល​ជា​ក្រុម​ហ៊ុន​ចែក​ចាយ​របស់ BMW ​ប្រចាំ​​ប្រទេស​កម្ពុជា​​ និង​ដែល​បាន​ទទួល​យក​​ អ៊ុង កុល​ហ្សានិច ឲ្យ​ចូល​បម្រើ​ការ​ងារ​ចាប់​តាំងពី​ខែ​មករា​មក​នោះ បាន​មាន​ប្រសាសន៍​កាលពី​យប់​មិញ​ថា លោក​ទើប​តែទទួល​បាន​ដំណឹង​ស្ដីពី​គ្រោះ​ថ្នាក់​ចរាចរណ៍​នេះ​ប៉ុណ្ណោះ​។ “យើង​នឹង​មើល​ថែ​បុគ្គលិក​របស់​យើង​គ្រប់​ពេល ប៉ុន្តែ​ខ្ញុំ​គ្មាន​ព័ត៌មាន​គ្រប់គ្រាន់​ដើម្បី​ឆ្លើយ​បំភ្លឺ​​ទេ​នៅ​ដំណាក់កាល​នេះ​”។

ទោះ​ជាយ៉ាង​ណា លោក​បាន​បដិសេធ​ថា រថយន្ត​នោះ​មិន​មែន​ជា​កម្មសិទ្ធិ​របស់​​ក្រុម​ហ៊ុន​លោក​ទេ។ លោក​បាន​បញ្ជាក់​ថា “ទេ ​វា​មិន​មែន​រថយន្ត​របស់​យើង​ទេ វា​ជា​រថយន្ត​ផ្ទាល់​ខ្លួន​របស់​នាង”៕ សុខុម​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស