កាលពីថ្ងៃអង្គារ អ្នកភូមិខេត្តមណ្ឌលគិរីបានឃាត់ខ្លួនបុរសជនជាតិវៀតណាមម្នាក់ប្រគល់ឲ្យអាជ្ញាធរដែលបុរសរូបនេះបានប្រាប់នគរបាលថា លោក សុះ ម៉ាឡែន ជាមន្ត្រីបរិស្ថានម្នាក់បានអនុញ្ញាតឲ្យគាត់ចូលក្នុងប្រទេសកម្ពុជាដើម្បីកាប់ឈើខុសច្បាប់។
ទោះយ៉ាងណា នគរបាលអន្តោប្រវេសន៍បានដោះលែងបុរសរូបនេះវិញ ដោយអះអាងថា មិនមានភ័ស្តុតាងគ្រប់គ្រាន់ក្នុងការឃុំខ្លួនគាត់ឡើយ។
លោក ឃុត ចាន់រ៉ា បានមានប្រសាសន៍ថា លោកនិងអ្នកភូមិប្រហែល៤០នាក់ទៀតបានល្បាតនៅក្នុងដែនជម្រកសត្វព្រៃណាំលៀ ក្នុងស្រុកពេជ្រាដា ដើម្បីឃ្លាំមើលអ្នកកាប់ឈើខុសច្បាប់កាលពីយប់ថ្ងៃអង្គារ ស្រាប់តែពួកគាត់បានប្រទះឃើញជនជាតិវៀតណាមប្រាំមួយនាក់ហៀបនឹងបើករថយន្តពីរគ្រឿងដឹកឈើគគីរឆ្លងព្រំដែនចូលក្នុងប្រទេសវៀតណាមទៅហើយ។
ក្រុមអ្នកភូមិបានចាប់ឈើនោះ និងចាប់បានអ្នកកាប់ឈើម្នាក់់ ប៉ុន្តែប្រាំនាក់ទៀតបានរត់គេចខ្លួនអស់។
លោក ចាន់រ៉ា បានមានប្រសាសន៍ថា ” យើងបានប្រគល់បុរសរូបនេះឲ្យនគរបាលឃុំប៊ូស្រា កាលពីម្សិលមិញ [ថ្ងៃពុធ] ហើយយើងបានយករថយន្តទៅរក្សាទុកក្នុងសហគមន៍ ដើម្បីទុកជាភ័ស្តុតាង។ យើងនឹងមិនអនុញ្ញាតឲ្យនរណាម្នាក់មកយករថយន្តទាំងនេះឡើយ លុះណាតែតុលាការបានចាត់វិធានការសិន”។
លោក ចាន់រ៉ា បានមានប្រសាសន៍ថា កាលពីថ្ងៃពុធ អ្នកភូមិក៏បានដាក់ពាក្យបណ្ដឹងទៅសាលាដំបូងខេត្តផងដែរ សុំឲ្យធ្វើការចោទប្រកាន់លោក ម៉ាឡែន ដែលមើលការខុសត្រូវដែនជម្រកសត្វព្រៃនេះ និងអ្នកសមគំនិតដទៃទៀត។
លោក ប្លង់ ជ នាយរងប៉ុស្តិ៍ឃុំប៊ូស្រា បានមានប្រសាសន៍ថា លោកនិងមន្ត្រីរបស់លោកបានសាកសួរបុរសជនជាតិវៀតណាមទាំងនេះកាលពីថ្ងៃពុធមុនពេលប្រគល់ទៅឲ្យនគរបាលអន្តោប្រវេសន៍ខេត្ត ពីព្រោះគាត់ជាជនបរទេស។
លោក ជ បានមានប្រសាសន៍ថា “បុរសរូបនេះបានប្រាប់យើងថា គាត់ត្រូវបានគេជួលឲ្យមកកាប់ឈើឲ្យលោក លឿង ដែលជាពាណិជ្ជករម្នាក់រស់នៅប្រទេសវៀតណាម។ ហើយបុរសរូបនេះបានប្រាប់យើងថា លោក សុះ ម៉ាឡែន ជាមន្ត្រីបរិស្ថានកម្ពុជាបានបើកច្រកព្រំដែនឲ្យពួកគេចូលមកកាប់ឈើ”។
លោក អុិន ហេង នាយនគរបាលអន្តោប្រវេសន៍ខេត្តបានមានប្រសាសន៍ថា លោកបានដោះលែងបុរសរូបនេះ ដោយសារមានការព្រមព្រៀងរវាងកម្ពុជា និងវៀតណាមឲ្យបញ្ជូននរណាម្នាក់ដែលបានឆ្លងព្រំដែនរួមខុសច្បាប់ត្រឡប់ទៅវិញ និងពីព្រោះយើងមិនមានភ័ស្តុតាងគ្រប់គ្រាន់ដើម្បីឃុំខ្លួនជននេះឡើយ។ លោកបានមានប្រសាសន៍ថា ក្រុមអ្នកភូមិបានបដិសេធមិនបោះបង់រថយន្ត និងឈើដែលពួកគាត់បានរឹបអូសនោះឡើយ។
លោកបានមានប្រសាសន៍ថា ” យើងទទួលបានបុរសរូបនេះ ប៉ុន្តែខ្ញុំបានសុំការអនុញ្ញាតពីព្រះរាជអាជ្ញាអមសាលាដំបូងខេត្តឲ្យដោះលែងជននេះ ពីព្រោះយើងមិនមានភ័ស្តុតាងដើម្បីចោទប្រកាន់ថា គាត់បានប្រព្រឹត្តបទល្មើសឡើយ”។
លោក អុិន ហេង បានមានប្រសាសន៍ថា លោកទទួលបានការអនុញ្ញាតដែលលោកបានស្នើសុំ ប៉ុន្តែបានបដិសេធមិនចេញឈ្មោះព្រះរាជអាជ្ញានោះឡើយ។
លោក យ៉ា ណារិន ប្រធានសាលាដំបូងខេត្តមណ្ឌលគិរី បានមានប្រសាសន៍ថា លោកមិនដឹងអំពីករណីនេះទេ ប៉ុន្តែបានបន្ថែមថា អាជ្ញាធរគួរតែបញ្ជូនជននេះទៅតុលាការ។ លោកបានមានប្រសាសន៍ថា ដោយសារបុរសរូបនេះត្រូវបានដោះលែងទៅហើយនោះ តុលាការមិនអាចធ្វើអ្វីកើតឡើយ។
លោក ឈិត សុផល ប្រធានមន្ទីរបរិស្ថានខេត្តបានអះអាងថា លោក ម៉ាឡែន គឺជាមន្ត្រីមន្ទីរម្នាក់ ប៉ុន្តែបានលើកឡើងថា លោកមិនបានឮអំពីការចោទប្រកាន់លើរូបគាត់ឡើយ។
លោកបានមានប្រសាសន៍ថា ” ខ្ញុំមិនច្បាស់ថា តើលោក ម៉ាឡែន ពិតជាបានប្រព្រឹត្តបទល្មើសនេះឬយ៉ាងណានោះឡើយ ប៉ុន្តែខ្ញុំនឹងស៊ើបអង្កេតរឿងនេះ”៕ សារុន