31.8 C
Phnom Penh

​រដ្ឋមន្ត្រី​ក្រសួង​សុខាភិបាល​ត្រូវ​បាន​កោះហៅ​មក​​សាកសួរ​

ដោយ ឌឹ ខេមបូឌា ដេលី

បទវិភាគ

យោង​តាម​​ច្បាប់​ចម្លង​​នៃ​​លិខិត​អញ្ជើញ​​ដែល​ចេញ​ដោយ​លោក កឹម សុខា ប្រធាន​រដ្ឋសភា​ស្ដីទី​ និង​ដែល​ទទួល​បាន​កាលពី​ម្សិលមិញ​បាន​ឲ្យ​ដឹង​ថា លោក ម៉ម ប៊ុនហេង រដ្ឋមន្ត្រី​ក្រសួង​សុខាភិបាល​​ត្រូវ​បាន​កោះហៅ​ឲ្យ​មក​បង្ហាញ​ខ្លួន​ចំពោះ​មុខ​គណៈកម្មការ​​ប្រឆាំង​អំពើ​ពុក​រលួយ​នៃ​រដ្ឋសភា។

យោង​តាម​លិខិត​​ចុះ​ថ្ងៃទី៣០ ខែមីនា លោក ម៉ម ប៊ុនហេង ​ត្រូវ​ចូល​ឆ្លើយ​បំភ្លឺ​នៅ​ចំពោះ​មុខ​គណៈកម្មការ​ប្រឆាំង​អំពើ​ពុករលួយ​នេះ​​នៅ​ថ្ងៃសុក្រ។

លិខិត​នេះ​មាន​ខ្លឹម​សារ​ថា គណៈកម្មការ​នេះ​ទទួល​បាន​ពាក្យ​បណ្ដឹង​ប្ដឹង​រដ្ឋមន្ត្រី​ក្រសួង​សុខាភិបាល​រូប​នេះ​ជុំវិញ​បញ្ហា​មួយ​ចំនួន រួម​មាន​ដូច​ជា ” ការ​គ្រប់គ្រង​តម្លៃ​ និង​គុណភាព​ថ្នាំពេទ្យ ” និង​ ” ការ​ដោះដូរ​មន្ទីរពេទ្យ​មួយ​ចំនួន​ក្នុង​រាជធានី​ភ្នំពេញ​ជា​ដើម​។

លិខិត​នេះ​​មាន​ខ្លឹម​សារ​បន្ថែម​ទៀត​ថា លោក ម៉ម ប៊ុនហេង ក៏​នឹង​ត្រូវ​សាកសួរ​ទាក់​ទិន​នឹង​ការ​ប្រើ​ប្រាស់​ជំនួយ​ពី​មូលនិធិពិភព​លោក​ ដើម្បី​ប្រយុទ្ធប្រឆាំង​ជំងឺ​អេដស៍ ជំងឺរបេង និង​គ្រុន​ចាញ់​ដោយ​មិន​ត្រូវ​ផង​ដែរ​។

លោក វ៉ាន់ ណារិទ្ធ សមាជិក​សភា​មកពី​គណបក្ស​ប្រឆាំង​ដែលជា​សមាជិក​នៃ​គណៈ​កម្មការ​​ប្រឆាំង​អំពើពុករលួយ​នេះ​បាន​លើក​ឡើង​ថា សំណួរ​ជាច្រើន​ទៀត​កំពុង​រង់ចាំ​លោក ម៉ម ប៊ុនហេង។

លោក​បានមាន​ប្រសាសន៍​ដោយ​សំដៅទៅ​លើ​ការ​ឆ្លង​រាលដាល​នៃ​មេរោគ​អេដស៍​នៅ​ក្នុង​ឃុំរកា ខេត្ត​បាត់​ដំបង​ថា ” យើង​ក៏​ចង់​សួរ​អំពី​ការ​បិទ​គ្លីនិក​ខុស​ច្បាប់​ផង​ដែរ ហេតុ​អ្វី​បាន​ជា​​ដំបូង​ឡើយ​ត្រូវ​បាន​អនុញ្ញាត​ឲ្យ​បើក ហើយ​​ក្រោយ​មក​​ត្រូវ​គេ​បិទ​ទៅវិញ​បន្ទាប់ពី​មាន​ការ​ឆ្លង​រាល​ដាល​នៃ​មេរោគ​អេដស៍​?”៕ ស៊ុយឈាង​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស