បណ្ដាញសកម្មជនប្រហែល៤០០នាក់បានបញ្ចប់ការល្បាតព្រៃឡង់ទំហំ៦៥០.០០០ហិកតាដែលគ្មានការការពាររយៈពេល៥ថ្ងៃ នៅក្នុងខេត្តភាគខាងជើងនៃប្រទេសកាលពីថ្ងៃអាទិត្យ ដោយចាប់បាននិងដុតចោលឈើកាប់រួចខុសច្បាប់ និងរឹបអូសបានរណារយន្តពីអ្នកដែលពួកគាត់រកឃើញថា បានកាប់ឈើ។
ការល្បាតដែលជាការល្បាតដ៏ធំបំផុតក្នុងរយៈពេលជាង១ឆ្នាំរបស់បណ្ដាញសហគមន៍ព្រៃឡង់នេះ បានចាប់ផ្ដើមកាលពីថ្ងៃពុធ ដោយមនុស្សបួនក្រុមចូលក្នុងព្រៃនៅក្នុងខេត្តកំពង់ធំ ក្រចេះ ព្រះវិហារ និងខេត្តស្ទឹងត្រែង ដើម្បីធ្វើការឃ្លាំមើលអ្វីដែលពួកគាត់ជឿថា អាជ្ញាធរបានធ្វើមិនដឹងមិនឮ។
លោក អ៊ុន វៀន អាយុ៤៣ឆ្នាំ ជាសកម្មជនម្នាក់ដែលបានចូលក្នុងព្រៃនៅក្នុងខេត្តព្រះវិហារ បាននិយាយកាលពីម្សិលមិញថា គាត់បានដឹកនាំមនុស្សប្រហែល៨០នាក់ល្បាតព្រៃនោះ ដែលគ្របដណ្ដប់ក្នុងស្រុកចំនួនពីរ ហើយជាលទ្ធផលរឹបអូសបានរណារយន្ត១២គ្រឿង និងឈើផ្ដៀកជាប្រភេទឈើលេខ២បានចំនួន៨៣ដុំ។
លោក អ៊ុន វៀន បាននិយាយថា ” យើងបានឡោមព័ទ្ធមនុស្សក្រុមមួយមានគ្នាបីនាក់កំពុងកាប់ឈើ ហើយយើងដកហូតបានរណារយន្តមួយគ្រឿង បន្ទាប់មកបានដោះលែងអ្នកទាំងនោះវិញបន្ទាប់ពីបានណែនាំពួកគេកុំឲ្យមកទៀត”។
លោកបានបន្ថែមថា ” យើងបានសួរអ្នកកាប់ឈើទាំងនោះ ហើយពួកគេបានប្រាប់យើងថា ពួកគេត្រូវបានឈ្មួញកណ្ដាលម្នាក់ឈ្មោះ ជ័យ ញ៉េន ជួលឲ្យកាប់ឈើឲ្យ…ហើយថា បុរសរូបនោះបានលក់ឈើនេះទៅឲ្យក្រុមហ៊ុនទ្រីភាព។
លោកបានបន្ថែមថា ” យើងបានប្រមូលឈើទាំងនោះ ដឹកទៅភូមិនៅថ្ងៃនេះ ដើម្បីយកទៅសាងសង់កន្លែងសម្រាប់អ្នកភូមិដែលចង់មកបន់ស្រន់អំឡុងពេលបុណ្យទានបែបព្រះពុទ្ធសាសនា”។
លោក អ៊ុន វៀន បាននិយាយថា ” សកម្មជនក៏បានរកឃើញឈើកកោះ និងឈើទាលជាង១០០ដុំ ដែលឈើទាំងអស់នេះមានប្រវែងបួនម៉ែត្រទៅប្រាំបីម៉ែត្រ ហើយបន្ទាប់មកបានដុតឈើទាំងនោះចោល។
លោកបាននិយាយថា ” ដំបូងយើងមានគម្រោងប្រគល់រណារយន្តទាំងអស់ទៅឲ្យរដ្ឋបាលព្រៃឈើខេត្ត ប៉ុន្តែយើងគិតថា ពួកគេប្រហែលជាប្រគល់រណារយន្តទាំងនោះទៅឲ្យអ្នកកាប់ឈើវិញ។ ដូច្នេះហើយយើងថតរូបទុកជាភ័ស្តុតាង ហើយបន្ទាប់មកបានដុតចោលតែម្ដង”។
អ្នកស្រី លន់ ឡាំ អាយុ៦១ឆ្នាំដែលបានដឹកនាំសកម្មជនចូលក្នុងព្រៃនៅក្នុងខេត្តស្ទឹងត្រែង បាននិយាយថា ក្រុមរបស់អ្នកស្រីបានរកឃើញឈើធ្នង់ជាប្រភេទឈើប្រណីតប្រវែង៣ម៉ែត្រចំនួន៤០០ដុំ ព្រមទាំងឈើកកោះផងដែរ ប៉ុន្តែបានទុកឈើទាំងនោះនៅកន្លែងដដែល។
អ្នកស្រីបាននិយាយថា ” យើងបានរាយការណ៍ទៅរដ្ឋបាលព្រៃឈើខេត្តអំពីចំនួនឈើទាំងនេះ ពីព្រោះយើងមិនអាចដឹកឈើទាំងនេះចេញពីព្រៃបានទេ។
នៅក្នុងខេត្តកំពង់ធំឯណោះវិញ លោក មិញ នី អាយុ៣៨ឆ្នាំបាននិយាយថា សកម្មជនមួយក្រុមមានគ្នាប្រហែល៤០នាក់បានល្បាតព្រៃនេះពីថ្ងៃព្រហស្បតិ៍ ដល់ថ្ងៃម្សិលមិញ ហើយបានរកឃើញអ្វីដែលពួកគាត់ជឿថា ជាប្រតិបត្តិការកាប់ឈើដែលគ្រប់គ្រងដោយមន្ត្រីយោធាក្នុងមូលដ្ឋានម្នាក់។
លោកបាននិយាយថា ” យើងបានឃើញរថយន្តយ៉ាងតិចប្រាំពីរគ្រឿង និងរទេះគោជាង១០ដឹកឈើចេញពីព្រៃឡង់។ ខ្ញុំបានសួរអ្នកបើកបរមួយចំនួន ហើយពួកគេបានប្រាប់យើងថា ពួកគេបានដឹកឈើនេះឲ្យឈ្មោះ ‘ធា’ ហើយយើងបានស្គាល់បុរសរូបនេះ”។
លោក នី បាននិយាយថា “ គាត់គឺជាមេបញ្ជាការយោធាស្រុកសណ្ដាន់”។
ទោះជាយ៉ាងណា លោក អ៊ុន បុត្រ អភិបាលស្រុកសណ្ដាន់បានមានប្រសាសន៍ថា លោក អ៊ូ សុធា ដែលជាមេបញ្ជាការយោធាស្រុកមិនជាប់ពាក់ព័ន្ធក្នុងប្រតិបត្តិការកាប់ឈើណាមួយនៅក្នុងព្រៃឡង់ឡើយ។
លោកបានមានប្រសាសន៍ថា ” លោក សុធា មិនជាប់ពាក់ព័ន្ធក្នុងការកាប់ឈើទេ ប៉ុន្តែខ្ញុំជឿថា ការចោទប្រកាន់នេះសំដៅដល់ឈ្មោះ ធា ផ្សេងទៀត”៕ សារុន