ស្នងការនគរបាលខេត្តព្រះសីហនុថ្មី កាលពីម្សិលមិញ បានប្តេជ្ញាអនុវត្តតាមបទបញ្ជាដើម្បីការពារ និងឃ្លាំមើលជនបរទេសក្នុងក្រុងឆ្នេរសមុទ្រនេះ បន្ទាប់ពីត្រូវបានតែងតាំងឲ្យកាន់តួនាទីនេះជាផ្លូវការនៅក្នុងពិធីមួយកាលពីព្រឹកម្សិលមិញ។
លោក ជួន ណារិន អតីតស្នងការរងនគរបាលរាជធានីបានកាន់តួនាទីជំនួសលោក ស៊ាង កុសល ដែលត្រូវបានលោក ស ខេង រដ្ឋមន្ត្រីក្រសួងមហាផ្ទៃដកចេញកាលពីខែមុន ដោយសារមិនសូវធ្វើសកម្មភាព។
យោងតាមលោក ឈិត សុខុន អភិបាលខេត្តដែលមានវត្តមានក្នុងពិធីនោះដែរបានឲ្យដឹងថា នៅក្នុងសុន្ទរកថាអំឡុងពិធីផ្ទេរតំណែងនៅសាលាខេត្តកាលពីម្សិលមិញ លោក នេត សាវឿន អគ្គស្នងការនគរបាលជាតិបានដាស់តឿននគរបាលដែលចូលរួមក្នុងពិធីនោះថា ពួកគេមានភារកិច្ចការពារ និងគ្រប់គ្រងភ្ញៀវទេសចរបរទេស វិនិយោគិន និងជនបរទេសក្នុងក្រុងព្រះសីហនុ។
លោកបានមានប្រសាសន៍ថា “លោក នេត សាវឿន បានស្នើឲ្យកម្លាំងរបស់យើងការពារភ្ញៀវទេសចរ និងជនបរទេស ដែលស្នាក់នៅទីនេះ។ វាសំខាន់ណាស់ដែលយើងមានកម្លាំងត្រៀមចាត់វិធានការនៅពេលហេតុការណ៍កើតឡើង”។
បន្ទាប់ពីមានអំពើប្លន់ជនបរទេសពីរនាក់នៅកោះរ៉ុង ក្នុងខេត្តព្រះសីហនុកាលពីខែមុន លោក សុខុន ត្រូវបានបន្ទោសពីសំណាក់រដ្ឋមន្ត្រីក្រសួងមហាផ្ទៃផងដែរចំពោះការមិនបានគ្រប់គ្រងបទល្មើសសម្រាប់ជនបរទេសនៅក្នុងខេត្តេនះ។
ទោះជាយ៉ាងណាចាប់ពីពេលនេះទៅអភិបាលខេត្តរូបនេះទំនងជាមានសុវត្ថិភាពក្នុងតួនាទីរបស់លោកដោយធ្វើការជាមួយលោកស្នងការថ្មី។
លោក សុខុន បានមានប្រសាសន៍ដល់លោកឧត្តមសេនីយ៍ត្រី ជួន ណារិន ថា “គាត់បានប្តេជ្ញារួមដៃគ្នាធ្វើការជាមួយខ្ញុំ”។
អំពើប្លន់នៅកោះរ៉ុងដែលគេឃើញនគរបាលក្រសួងមហាផ្ទៃពិសេសមួយក្រុមចាប់ខ្លួនមនុស្សបួននាក់ បន្ទាប់ពីមានការជិះរថយន្តបាញ់ ការប្រវាយប្រតប់ និងការចាក់សម្លាប់ ទាំងអស់នេះពាក់ព័ន្ធនឹងជនបរទេសនៅក្នុងក្រុងព្រះសីហនុ។ ក្រុងនេះក៏មានជម្លោះដ៏ហិង្សារវាងជនជាតិរុស្សីជាគូប្រជែងពីរនាក់ផងដែរ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍កាលពីសប្តាហ៍មុនថា ឧត្តមសេនីយ៍ត្រី ជួន ណារិន ត្រូវបានសម្រេចឲ្យមកកាន់តួនាទីក្នុងខេត្តព្រះសីហនុ ដោយសារលោកមានសមត្ថភាពគ្រប់គ្រងក្រុង។
បន្ទាប់ពីសុន្ទរកថារបស់លោកកាលពីម្សិលមិញ ឧត្តមសេនីយ៍ត្រី ជួន ណារិន បានសន្យាបំពេញភារកិច្ចតាមការរំពឹងទុករបស់ថ្នាក់លើ។
លោកបានមានប្រសាសន៍ថា “ខ្ញុំនឹងនាំយកជំនាញរបស់ខ្ញុំមកអនុវត្តក្នុងការងារេនះ។ នៅពេលវិនិយោគិន និងភ្ញៀវទេសចរបរទេសមកដល់ប្រទេសកម្ពុជា យើងនឹងការពារសុវត្ថិភាពរបស់ពួកគេ ប៉ុន្តែ ប្រសិនបើពួកគេប្រព្រឹត្តបទឧក្រិដ្ឋ យើងនឹងចាត់វិធានការតាមផ្លូវច្បាប់”៕ សារុន