យោងតាមច្បាប់ចម្លងនៃព្រះរាជក្រឹត្យដែលទទួលបានកាលពីម្សិលមិញមានខ្លឹមសារថា លោក មឿង សុន សកម្មជននយោបាយនិរទេសខ្លួនដែលត្រូវបានរកឃើញពិរុទ្ធភាពពីបទផ្សព្វផ្សាយព័ត៌មានមិនពិតកាលពីខែកក្កដា ឆ្នាំ២០០៩ ជុំវិញការអះអាងថា ការដាក់អំពូលបំភ្លឺនៅប្រាសាទអង្គរវត្តអាចធ្វើឲ្យប៉ះពាល់ដល់ប្រាសាទនោះ ត្រូវបានព្រះមហាក្សត្រ នរោត្តម សីហមុនី ព្រះរាជទានលើកលែងទោសជាផ្លូវការហើយ។
លោក មឿង សុន ជាអតីតបេក្ខជនសមាជិកសភាគណបក្សប្រឆាំង និងជាប្រធានអង្គការមូលនិធិទ្រទ្រង់អរិយធម៌ខ្មែរ ដែលបានភៀសខ្លួនចេញពីប្រទេសកម្ពុជាមុនពេលលោកត្រូវបានផ្ដន្ទាទោសឲ្យជាប់ពន្ធនាគាររយៈពេល២ឆ្នាំជុំវិញការអត្ថាធិប្បាយនៅសន្និសីទកាសែតមួយកាលពីខែឧសភា ឆ្នាំ២០០៩។
ចាប់តាំងពីពេលនោះមក លោកបានរស់នៅប្រទេសបារាំង និងប្រទេសថៃ ប៉ុន្តែបានមកជួបលោកនាយករដ្ឋមន្ត្រី ហ៊ុន សែន នៅក្នុងទីក្រុងគូឡាឡាំពួកាលពីខែមុន បន្ទាប់ពីលោកនាយករដ្ឋមន្ត្រីបានរៀបចំជំនួបជាសាធារណៈមួយនៅក្នុងរដ្ឋធានីម៉ាឡេស៊ីជាមួយលោក សម រង្ស៊ី មេដឹកនាំគណបក្សប្រឆាំង ដោយសន្យាថាលោកអាចត្រឡប់មកកាន់ប្រទេសវិញ។
យោងតាមលោក សម រង្ស៊ី បានឲ្យដឹងថា ស្ថិតក្នុងស្មារតីខ្ពស់បន្ទាប់ពីជំនួបប្រកបដោយជោគជ័យជាមួយប្រជាជនខ្មែររស់នៅក្នុងប្រទេសម៉ាឡេស៊ី លោក ហ៊ុន សែន បានសន្យាជាមួយលោក មឿង សុន ថា លោកនឹងទូលថ្វាយព្រះមហាក្សត្រ នរោត្តម សីហមុនី ឲ្យព្រះរាជទានលើកលែងទោសដល់រូបលោក។ យោងតាមព្រះរាជក្រឹត្យបានឲ្យដឹងថា បន្ទាប់មក ព្រះរាជទានលើកលែងទោសត្រូវបានធ្វើឡើងនៅថ្ងៃទី៨ ខែឧសភា។
ដោយសំដៅដល់សេចក្តីសម្រេចរបស់តុលាការដែលបានបិទការប្តឹងទាស់ចុងក្រោយរបស់លោក មឿង សុន ព្រះរាជក្រឹត្យមានខ្លឹមសារថា “ព្រះរាជទានលើកលែងទោសដល់ទណ្ឌិត មឿង សុន អាយុ៦២ឆ្នាំ ដែលតុលាការបានផ្ដន្ទាទោសតាមរយៈសាលដីការបស់តុលាការកំពូលចុះថ្ងៃទី២១ ខែមេសា ឆ្នាំ២០១៣”។
ព្រះរាជក្រឹត្យបន្តថា “លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាត្រូវអនុវត្តតាមព្រះរាជក្រឹត្យនេះ។ ព្រះរាជក្រឹត្យមានប្រសិទ្ធភាពចាប់ពីថ្ងៃឡាយព្រះហស្តលេខាតទៅ”។
ថ្លែងតាមទូរស័ព្ទពីប្រទេសថៃកាលពីម្សិលមិញ លោក មឿង សុន បានមានប្រសាសន៍ថា ឥឡូវនេះលោកមានគម្រោងវិលត្រឡប់មកប្រទេសកម្ពុជាវិញនៅថ្ងៃច័ន្ទ ហើយលោកនឹងទៅគោរពអដ្ឋិធាតុរបស់ឪពុកម្ដាយលោកនៅពិធីមួយក្នុងក្រុងតាខ្មៅ ស្ថិតក្នុងខេត្តកណ្ដាល។
លោកបានមានប្រសាសន៍ថា “ខ្ញុំរំភើបរីករាយណាស់។ ខ្ញុំរង់ចាំរយៈពេល៥ឆ្នាំ និង១១ខែហើយ ឥឡូវនេះសុបិនរបស់ខ្ញុំក្លាយជាការពិតហើយ។ យើងជាជនជាតិខ្មែរត្រូវរស់នៅក្នុងប្រទេសកំណើតរបស់ខ្លួន”។
លោក មឿង សុន បានមានប្រសាសន៍ថា ការងារដំបូងរបស់លោកពេលត្រឡប់មកដល់មាតុប្រទេសវិញនឹងត្រូវរៀបចំអង្គការមិនមែនរដ្ឋាភិបាលជាតិនិយម ដែលលោកនិយាយជំនួសមុខឲ្យពេលដែលលោកត្រូវបានចោទប្រកាន់ពីបទផ្សព្វផ្សាយព័ត៌មានមិនពិតកាលពីខែឧសភា ឆ្នាំ២០០៩។
លោក មឿង សុន បានមានប្រសាសន៍ថា “នៅពេលខ្ញុំមកដល់ប្រទេសវិញ ការងារដំបូងរបស់ខ្ញុំគឺត្រូវរៀបចំអង្គការមូលនិធិទ្រទ្រង់អរិយធម៌ខ្មែរឡើងវិញ ដើម្បីពង្រឹង និងការពារវប្បធម៌ខ្មែរ”។
លោកបានមានប្រសាសន៍ថា “យើងត្រូវធ្វើឲ្យអង្គការមូលនិធិទ្រទ្រ់អរិយធម៌ខ្មែររស់ឡើងវិញ។ ប្រទេសកម្ពុជានឹងធ្វើសមាហរណកម្មចូលអាស៊ាន ដូច្នេះនឹងមានជនបរទេសច្រើនណាស់មកកាន់ប្រទេសរបស់យើង ដូច្នេះប្រសិនបើយើងមិនការពារវប្បធម៌ខ្មែរទេនោះ វប្បធម៌នឹងត្រូវបាត់បង់ជាមិនខាន”៕ សារុន