កាលពីថ្ងៃព្រហស្បតិ៍ លោក ម៉ៅ មុនីវណ្ណ តំណាងរាស្ត្រគណបក្សប្រឆាំង បានបន្ទោសរដ្ឋាភិបាលទាក់ទិននឹងការបដិសេធជាច្រើនលើកមិនបញ្ចេញជាសាធារណៈនូវផែនទីព្រំដែនកម្ពុជាជាមួយប្រទេសវៀតណាម ដោយនិយាយថា លោកនឹងបន្តជំរុញធ្វើសន្និសីទកាសែតដែលត្រូវគេហាមប្រាម ដើម្បីផ្សព្វផ្សាយឲ្យដឹងអំពីកង្វះតម្លាភាពអំពីបញ្ហានេះ។
លោក មុនីវណ្ណ កាលពីខែមុន បានដឹកនាំយុទ្ធនាការក្រុមប្រឆាំងដើម្បីឲ្យដឹងឮអំពីការរំលោភបំពានព្រំដែនខាងកើតរបស់ប្រទេសកម្ពុជាពីសំណាក់ប្រទេសវៀតណាម ប៉ុន្តែលោកលើកហេតុផលថា ការប្រឹងប្រែងនេះត្រូវរារាំងដោយការបដិសេធរបស់រដ្ឋាភិបាល មិនព្រមផ្តល់ផែនទីដែលខ្លួនប្រើក្នុងការចរចាកំណត់ព្រំដែនជាមួយប្រទេសវៀតណាម។
ដោយលោក វ៉ា គឹមហុង ប្រធានគណៈកម្មាធិការព្រំដែនរួមកម្ពុជាជាមួយវៀតណាម ច្រានចោលលិខិតជាច្រើនរបស់លោកស្នើសុំផែនទីនោះ តំណាងរាស្ត្ររូបនេះមានផែនការធ្វើសន្និសីទកាសែតនៅសភានៅថ្ងៃនេះ ប៉ុន្តែបានបដិសេធមិនផ្តល់ការអនុញ្ញាតដោយលោក ហេង សំរិន ប្រធានសភាគណបក្សប្រជាជនកម្ពុជា។
លោក សំរិន បានសរសេរលើលិខិតនោះដែលលោក មុនីវណ្ណ បានផ្ញើឲ្យលោកជូនដំណឹងលោកអំពីសន្និសីទកាសែតគ្រោងទុកនៅព្រឹកនេះថា “សភាមិនដែលចេញលិខិតបេសកកម្មឲ្យឯកឧត្តមធ្វើការអំពីបញ្ហានេះទេ ដូច្នេះខ្ញុំមិនអាចអនុញ្ញាតឲ្យមានសន្និសីទកាសែតនៅសភាបានទេ”។
លោក មុនីវណ្ណ បានមានប្រសាសន៍ថា ឥឡូវនេះលោកមានផែនការនឹងធ្វើសន្និសីទកាសែតនៅថ្ងៃច័ន្ទ ដោយនិយាយថា លោកប្រហែលធ្វើសន្និសីទនៅមុខអគារសភា ប្រសិនបើគាត់មិនអនុញ្ញាតឲ្យប្រើទីតាំងរបស់សភាដើម្បីផ្សព្វផ្សាយការបដិសេធរបស់លោក គឹមហុង។
លោក មុនីវណ្ណ បាននិយាយថា “ប្រសិនបើគាត់មិនបញ្ចេញ [ផែនទីព្រំដែន] មានន័យថា អ្វីដែលពួកគេបានធ្វើទាក់ទិននឹងការបោះបង្គោលព្រំដែន មានភាពសម្ងាត់។ អ្នកខ្លះមានមតិថា គាត់បានបោះបង្គោលព្រំដែនដោយមិនប្រើផែនទីខ្នាត១លើ១០០.០០០ ដែលរក្សាទុកនៅអង្គការសហប្រជាជាតិទេ”។
រដ្ឋធម្មនុញ្ញចែងថា ផែនទីខ្នាត១លើ១០០.០០០ទទួលស្គាល់ដោយអង្គការសហប្រជាជាតិក្នុងទសវត្សរ៍ឆ្នាំ១៩៦០ ដែលផ្ទុយពីផែនទីផ្សេងៗ ដូចជាផែនទីខ្នាត១លើ៥០.០០០ ដែលក្រុមប្រឆាំងនិយាយថា របបក្រុងភ្នំពេញដែលគាំទ្រដោយវៀតណាមបានប្រើខុសក្នុងទសវត្សរ៍ឆ្នាំ១៩៨០នោះ ចាំបាច់ត្រូវប្រើជាមូលដ្ឋានសម្រាប់ព្រំដែន។
ប៉ុន្តែ គណបក្សសង្គ្រោះជាតិ តវ៉ាថា ខ្លួនមិនអាចពិនិត្យផ្ទៀងផ្ទាត់ថាតើ រដ្ឋាភិបាលកំពុងប្រើផែនទីត្រឹមត្រូវយ៉ាងណាទេ ព្រោះខ្លួនមិនមានផែនទីសោះ។
លោក មុនីវណ្ណ បាននិយាយថា “ប្រសិនបើផែនទីខ្នាត១លើ១០០.០០០ពិតប្រាកដដែលរក្សាទុកនៅអង្គការសហប្រជាជាតិ អ៊ីចឹងយើងអាចផ្ទៀងផ្ទាត់លេខស៊េរីនិងលេខកូដលើផែនទីជាមួយនឹងបង្គោលព្រំដែនជាក់ស្តែង”។
លោក គឹមហុង បានបដិសេធមិនធ្វើអត្ថាធិប្បាយកាលពីថ្ងៃព្រហស្បតិ៍ អំពីមូលហេតុដែលមិនអាចបញ្ចេញផែនទីព្រំដែនជាសាធារណៈ ដោយលោកបាននិយាយថា ក្រុមមន្ត្រីបានបង្ហាញផែនទីអំឡុងការពិភាក្សាតុមូលផ្សាយតាមទូរទស្សន៍ជាច្រើនលើក ទៅនឹងការឆ្លើយតបតិចតួចពីគណបក្សសង្គ្រោះជាតិ។
លោក គឹមហុង បាននិយាយថា “វាជាករណីចាស់ ហើយយើងបានផ្តល់ចម្លើយជាច្រើនដង ដូច្នេះខ្ញុំមិនចង់បន្ថែមទៀតទេ”។
លោកបានពន្យល់ថា “ពួកគេមិនស្តាប់អ្វីដែលយើងបានបង្ហាញនៅឯការពិភាក្សាតុមូល។ យើងបានបង្ហាញផែនទីនោះតាមកញ្ចក់ទូរទស្សន៍ ហើយសម្តេច [លោក ហ៊ុន សែន] បានពន្យល់វាជាច្រើនលើក ប៉ុន្តែពួកគេមិនយកចិត្តទុកដាក់នឹងវាទេ”។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បាននិយាយថា មិនមែនជារឿងប្រុងប្រយ័ត្នធម្មតាទេក្នុងការបញ្ចេញផែនទីផ្លូវការ នៅពេលដែលការដោះដូរទឹកដីទំហំតូចបន្តចរចានោះ។ ការដោះដូរទាំងនេះទទួលបានអាណត្តិពីសន្ធិសញ្ញាព្រំដែនបំពេញបន្ថែមឆ្នាំ២០០៥ជាមួយប្រទេសវៀតណាម ដើម្បីកាត់បន្ថយភាពចលាចលសង្គម។ ការដោះដូរអនុញ្ញាតឲ្យភូមិខ្មែរនិងវៀតណាមដែលស្ថិតនៅលើទីតាំងខុសនៃបន្ទាត់ព្រំដែនផ្លូវការ ត្រូវប្រគល់ទៅប្រទេសកំណើតរបស់ខ្លួនវិញ។
លោក ស៊ីផាន បាននិយាយថា “ព្រំដែនវៀតណាមជាបញ្ហារសើបណាស់ ហើយទោះបីជាយើងមានសន្ធិសញ្ញានិងអនុសញ្ញាជាច្រើនក៏ដោយ ក៏ការកំណត់ព្រំដែននៅតែជាបញ្ហាបន្ត និងកំពុងត្រូវចរចាគ្នា។ ពួកគេកំពុងធ្វើកិច្ចការនេះយោងតាមអនុសញ្ញានានា”។
លោកបាននិយាយថា “សូម្បីខាងវៀតណាមក៏មិនចេះតែបញ្ចេញផែនទីឲ្យសាធារណជនរបស់គេឃើញអំឡុងការកំណត់ព្រំដែនដែរ។ នេះជាបទដ្ឋានអន្តរជាតិ។ ព្រំដែនដែលកំណត់រួចហើយ យើងអាចបញ្ចេញឲ្យដឹង ប៉ុន្តែយើងមិនចង់ឲ្យបញ្ហានយោបាយកើតចេញពីតំបន់នានាដែលនៅកំពុងកំណត់ព្រំដែននៅឡើយនោះទេ”។
លោកបាននិយាយថា “យើងមិនចង់មានជម្លោះទឹកដីទេ យើងចង់បានស្ថិរភាពតាមព្រំដែនដើម្បីកំណត់ព្រំដែន”។
ក៏ប៉ុន្តែ លោក អ៊ូ វីរៈ អ្នកប្រឹក្សានយោបាយ និងជាស្ថាបនិកនៃស្ថាប័នប្រឹក្សាយោបល់ វេទិកាអនាគត បាននិយាយថា តម្លាភាពច្រើនអំពីការកំណត់ព្រំដែនអាចមានប្រយោជន៍ ហើយការដោះស្រាយប្រតិកម្មតបដែលអាចមានជាការធម្មតានៃការគ្រប់គ្រងបែបប្រជាធិបតេយ្យ។
លោក វីរៈ បាននិយាយថា “មិនមានខុសទាស់អ្វីនឹងការទទួលខុសត្រូវចំពោះសាធារណជនទេ ហើយខ្ញុំមិនមើលឃើញអ្វីដែលជាបញ្ហាជាមួយនឹងការឲ្យដឹងជាសាធារណៈនោះឡើយ”។
លោកបានបន្ថែមថា “ខ្ញុំអាចយល់ភាពរសើបនៃបញ្ហានេះ ប៉ុន្តែដំណើរការនេះខ្លួនឯងក៏សំខាន់ដែរ។ អ្នកមិនអាចគ្រាន់តែសន្មតថា អ្នកអាចធ្វើ [ការកំណត់ព្រំដែន] ហើយមិនខ្វល់នឹងមតិសាធារណៈនោះទេ។ ពួកគេធ្វើវាកាន់តែសម្ងាត់ សាធារណជនអាចមានបញ្ហាក៏កាន់តែច្រើន”។
លោក សម រង្ស៊ី មេដឹកនាំបក្សប្រឆាំង បាននិយាយថា លោកគាំទ្រការខំប្រឹងប្រែងរបស់លោក មុនីវណ្ណ ក្នុងការជំរុញរដ្ឋាភិបាលឲ្យបញ្ចេញផែនទីនេះ ដោយលោកបានបន្ថែមថា ការអះអាងដែលថាគណៈកម្មាធិការព្រំដែនមិនបានប្រើផែនទីខ្នាត១លើ១០០.០០០ មិនអាចបដិសេធចោលបានឡើយ លុះត្រាតែរដ្ឋាភិបាលលាតត្រដាងព្រំដែនកម្ពុជាជាមួយវៀតណាម។
លោក រង្ស៊ី បាននិយាយថា “នេះជាលទ្ធភាពមួយ ហើយដើម្បីជម្រះមន្ទិលសង្ស័យណាមួយនោះ រដ្ឋាភិបាលគួរនិយាយថា យើង ខាងភាគីកម្ពុជា កំពុងប្រើផែនទីណាមួយ។ មានតំបន់ជាច្រើនដែលព្រំដែននៅមិនទាន់គូសនៅឡើយ ដូច្នេះយើងចង់ដឹង គឺការគូសព្រំដែន ផែនទីណាដែលពួកគេនឹងប្រើ? លោក រង្ស៊ី បាននិយាយថា គណបក្សប្រឆាំង ក្នុងពេលប៉ុន្មានខែខាងមុននេះ នឹងបង្កើនយុទ្ធនាការដើម្បីពិនិត្យឡើងវិញនូវសន្ធិសញ្ញាព្រំដែនឆ្នាំ២០០៥ដ៏ចម្រូងចម្រាសជាមួយប្រទេសវៀតណាម ដែលក៏ត្រូវបានចរចាដោយរដ្ឋាភិបាលជាសម្ងាត់ ដោយផ្តោតលើការចរចាវាឡើងវិញ ប្រសិនបើពួកគេរកឃើញថា វាមិនអាចការពារប្រជាពលរដ្ឋសហគមន៍ព្រំដែនកម្ពុជាបានទេនោះ។
លោកបាននិយាយនៅថ្ងៃព្រហស្បតិ៍ថា ផែនការមួយដែលប្រកាសឲ្យដឹងនៅដើមសប្តាហ៍នេះដោយលោក មុនីវណ្ណ និងលោក អ៊ុំ សំអាន តំណាងរាស្ត្រគណបក្សសង្គ្រោះជាតិ នឹងកោះហៅលោកនាយករដ្ឋមន្ត្រី ហ៊ុន សែន លោក ហោ ណាំហុង រដ្ឋមន្ត្រីក្រសួងការបរទេស និងលោក គឹមហុង មកសាកសួរជុំវិញបញ្ហាព្រំដែន ត្រូវបានវេតូដោយថ្នាក់ដឹកនាំគណបក្ស។
លោក រង្ស៊ី បាននិយាយថា “កាលពីម្សិលមិញ យើងមានកិច្ចប្រជុំគណៈកម្មាធិការនាយករបស់យើង ហើយយើងបានប្រាប់ពួកគេថា យើងចង់សម្របសម្រួលការផ្តួចផ្តើមម្នាក់ៗទាំងអស់ពីតំណាងរាស្ត្រម្នាក់ៗរបស់យើង។ យើងត្រូវធ្វើកិច្ចការនេះមួយជំហានម្តងៗ”។
លោកបានពន្យល់ថា “គ្រាន់តែហៅអ្នកទាំងនេះឲ្យឆ្លើយទៅនឹងការចោទប្រកាន់ មិនមានលទ្ធផលទេ ហើយមិនស្ថិតក្នុងស្មារតីនៃវប្បធម៌សន្ទនាឡើយ។ យើងមិនចង់ប្រឈមមុខដែលមិនចាំបាច់នឹងគណបក្សកាន់អំណាច ដើម្បីប្រយោជន៍នយោបាយបោះឆ្នោតទេ”។
លោក រង្ស៊ី បាននិយាយថា គណបក្សសង្គ្រោះជាតិដំបូងនឹងផ្តោតលើការឲ្យបញ្ចេញផែនទី ជាមួយនឹងការបង្កើតឡើងវិញនូវក្រុមប្រឹក្សាជាតិជាន់ខ្ពស់ស្តីពីកិច្ចការព្រំដែន ដោយមានបក្សនយោបាយច្រើន ដែលនឹងអនុញ្ញាតឲ្យគណបក្សសង្គ្រោះជាតិចូលរួមក្នុងការកំណត់ព្រំដែន៕ និត