ក្រុមសកម្មជន និងក្រុមមន្ត្រីបានឲ្យដឹងថា អ្នកភូមិ និងសកម្មជនប្រហែល៨០នាក់ក្នុងខេត្តកោះកុង កាលពីម្សិលមិញ បានឡើងលើ សាឡង់ ហើយបានព្យាយាមសណ្ដោងសាឡង់បូមខ្សាច់ ប្រាំគ្រឿងទៀតចេញជាផ្នែកមួយនៃការបន្តយុទ្ធនាការរបស់ពួកគាត់ប្រឆាំងក្រុមហ៊ុនពីរ ដែលពួកគាត់ចោទថា បានបំពុលផ្លូវទឹកក្នុងមូលដ្ឋាន ហើយបានបណ្ដាលឲ្យបាក់ច្រាំងទន្លេ ទៀតផង។
លោក យឿន ទីនិត សមាជិកអង្គការមាតាធម្មជាតិជាអង្គការមិនមែនរដ្ឋាភិបាលការពារបរិស្ថានបានលើកឡើងថា ក្រុមហ៊ុន Rainbow International Co.Ltd និងក្រុមហ៊ុន Direct Access បានបូមខ្សាច់នៅពាមអណ្ដូងទឹក ស្ថិតក្នុងស្រុកបទុមសាគរ ដែលហូរចូលក្នុងឆកសមុទ្រកំពង់សោម ចាប់តាំងពីឆ្នាំ២០០៩មក។
លោកបានឲ្យដឹងថា “យើងបានតវ៉ានៅថ្ងៃនេះ ដើម្បីសុំឲ្យក្រុមហ៊ុនទាំងពីរឈប់បូមខ្សាច់ទៀត ពីព្រោះសកម្មភាពទាំងនេះបានបណ្ដាលឲ្យទឹកកខ្វក់ ប៉ះពាល់ដល់បរិស្ថាន និងបំផ្លាញជម្រកត្រី”។
យោងតាមលោក ទីនិត បានឲ្យដឹងថា សកម្មជនអង្គការមាតាធម្មជាតិប្រាំបួននាក់បានចូលរួមជាមួយអ្នកភូមិដោយប្រើទូកនេសាទប្រាំពីរគ្រឿងឡោមព័ទ្ធសាឡង់បូមខ្សាច់ប្រាំគ្រឿងរបស់ក្រុមហ៊ុនទាំងពីរនេះ មុនពេលឡើងជិះសាឡង់ទាំងនោះហើយប្រាប់កម្មករឲ្យឈប់បូមខ្សាច់។
ក្រុមសកម្មជនបានត្រឡប់មកកាន់ទូកនេសាទវិញ ហើយបានព្យាយាមសណ្ដោងសាឡង់ទាំងនោះចេញដោយមានកម្មករទាំងអស់ជិះនៅលើសាឡង់នោះផងដែរ ហើយនៅតែព្យាយាមធ្វើដូច្នេះដដែលរហូតមកដល់យប់ម្សិលមិញ។
លោក អន វីរៈ អភិបាលស្រុកបានមានប្រសាសន៍ថា អាជ្ញាធរមូលដ្ឋាននឹងមិនបញ្ឈប់ ក្រុមហ៊ុនទំាងនេះមិនឲ្យបូមខ្សាច់់បានឡើយ ពីព្រោះក្រសួងរ៉ែនិងថាមពល បានចេញអាជ្ញាប័ណ្ណឲ្យពួកគេដើម្បីបូមខ្សាច់សម្រាប់នាំចេញ។
លោកមានប្រសាសន៍ថា “ខ្ញុំសូមបញ្ជាក់ ថា ក្រសួងរ៉ែនិងថាមពល ពីមុនបានអនុញ្ញាតឲ្យក្រុមហ៊ុនទាំងនោះធ្វើអាជីវកម្មនៅទីនេះ។ពួកគេបានសិក្សាពីផលប៉ះពាល់ដោយសារការបូមខ្សាច់ទាំងនេះរួចហើយ”។
លោក វីរៈ បានមានប្រសាសន៍ថា នគរបាលនឹងមិនចាប់ខ្លួនទេ ឲ្យតែសកម្មជនទាំងនោះឈប់ឡើងលើសាឡង់ទាំងនេះទៀត។
លោក ឌិត ទីណា អ្នកនាំពាក្យក្រសួងរ៉ែ និងថាមពលបានមានប្រសាសន៍កាលពីម្សិលមិញថា ចាប់តាំងពីលោកនាយករដ្ឋមន្ត្រី ហ៊ុន សែន បានហាមឃាត់មិនឲ្យមានការនាំចេញខ្សាច់ទន្លេនៅក្នុងឆ្នាំ២០០៩ដើម្បីការពារជីវចម្រុះមក ក្រុមហ៊ុន Rainbow International និង ក្រុមហ៊ុន Direct Access គឺជាក្រុមហ៊ុនតែពីរ គត់ដែលត្រូវបានចេញអាជ្ញាប័ណ្ណឲ្យនាំ ខ្សាច់ចេញ។
លោក ទីណា បានបដិសេធមិននិយាយថា តើក្រុមហ៊ុនទាំងពីរនេះនាំខ្សាច់ទៅណានោះឡើយ។ លោកបានមានប្រសាសន៍ថា “ក្រសួងមិនមានសិទ្ធិបង្ហាញអ្វីដែលក្រុមហ៊ុនកំពុងធ្វើនោះឡើយ។
លោក អាឡិច ហ្គន់ហ្សេលេស ដាវីតសុន សហស្ថាបនិកអង្គការមាតាធម្មជាតិដែលត្រូវបានបណ្តេញចេញកាលពីខែកុម្ភៈ បន្ទាប់ ពីរដ្ឋាភិបាលមិនព្រមបន្តទិដ្ឋាការដល់លោកនោះ បានមានប្រសាសន៍ថា បើទោះជាមានអាជ្ញាប័ណ្ណក៏ដោយ ក៏ក្រុមហ៊ុនទាំងនេះនៅតែរំលោភច្បាប់ដដែល។
លោក ហ្គន់ហ្សេលេស ដាវីតសុន បានមានប្រសាសន៍ថា ការស្ទាក់ស្ទើររបស់រដ្ឋាភិបាលមិនហា៊នដាក់ទោសក្រុមហ៊ុនទាំងនេះហើយ បានធ្វើឲ្យអ្នកភូមិចាត់វិធានការដោយខ្លួនឯង។លោកបានបន្ថែមថា “នេះគឺជាលើកទី១ហើយដែលបញ្ហានេះបានកើតឡើងទីដែលសហគមន៍មូលដ្ឋាន និងសកម្មជនបាន ជួបជុំគ្នា មិនមែនដើម្បីធ្វើការតវ៉ាទេ ប៉ុន្តែគឺដើម្បីអនុវត្តច្បាប់”៕ សារុន (រាយការណ៍បន្ថែមដោយ Chris Mueller)