នគរបាលខេត្តក្រចេះបានឲ្យដឹងថា ខ្លួនកំពុងស្វែងរកអ្នកបើកបររថយន្តធុនធំម្នាក់ដែលបានដឹកឈើខុសច្បាប់ឆ្លងកាត់ស្រុកស្នួលកាលពីរំលងអធ្រាត្រឈានចូលថ្ងៃសៅរ៍ ស្រាប់តែនៅពេលនោះរថយន្តបានក្រឡាប់ ហើយឆេះតែម្ដង។
លោក ចាន់ សុគីម អធិការនគរបាលស្រុកបានមានប្រសាសន៍ថា រថយន្តនេះផ្ទុកលើសទម្ងន់ ដោយដឹកឈើសុក្រំដែលជាប្រភេទឈើលេខ១ចំណុះប្រហែល២០ម៉ែត្រគូប ស្រាប់តែរថយន្តនេះបានបុករបាំងស្ពាននៅតាមផ្លូវជាតិលេខ៧នៅម៉ោងប្រហែល១រំលងអធ្រាត្រ ហើយបានក្រឡាប់ផ្ងាជើង បណ្ដាលឲ្យឆេះរថយន្ត និងឈើអស់ប្រហែល១០ភាគរយ។
បើទោះជាអ្នកបើកបរបានរត់គេចខ្លួនពីកន្លែងកើតហេតុនៅពេលអាជ្ញាធរមកដល់ ហើយមិនមានសាក្សីណាដឹងក៏ដោយ ក៏លោក សុគីម បានលើកឡើងថា លោកសង្ស័យថា អ្នកបើកបរងងុយដេកនៅពេលគ្រោះថ្នាក់កើតឡើង។
លោកមានប្រសាសន៍ថា ”រថយន្តនេះបានបុកស្ពានមុនពេលក្រឡាប់។ គ្រោះថ្នាក់នេះបានកើតឡើងដោយសារអ្នកបើកបរងងុយដេក ខណៈពេលកំពុងបើកបរ និងដោយសាររថយន្តដឹកឈើធ្ងន់ពេក”។ នគរបាលកំពុងស្វែងរកអ្នកបើកបរ និងម្ចាស់រថយន្ត ព្រមទាំងឈើខុសច្បាប់។
យោងតាមលោក លឹម វាសនា អធិការនគរបាលក្រុងប៉ៃលិន បានឲ្យដឹងថា នៅក្នុងហេតុការណ៍ដាច់ដោយឡែកមួយទៀត បុរសអាយុ២២ឆ្នាំម្នាក់បានស្លាប់ភ្លាមៗនៅពេលបុរសរូបនេះបានបើករថយន្តម៉ាកតូយ៉ូតាកាមរីដឹកឈើខុសច្បាប់ពេញរថយន្ត បុករបងបេតុងទីស្នាក់ការមន្ទីរពន្ធដារខេត្តប៉ៃលិនកាលពីល្ងាចថ្ងៃសុក្រ។
លោកថ្លែងថា “នៅម៉ោងប្រហែល៩យប់ថ្ងៃសុក្រ បុរសរូបនោះបានបើករថយន្តក្នុងល្បឿនយ៉ាងលឿន ហើយបានបុករបងបេតុង បណ្តាលឲ្យស្លាប់តែម្ដង។ រថយន្តនោះដឹកសុទ្ធ តែឈើធ្នង់ពេញរថយន្ត”។
លោក វាសនា បានបង្ហាញអត្តសញ្ញាណបុរសដែលស្លាប់រូបនោះថា ឈ្មោះ រិទ្ធ សាងថង មកពីខេត្តបាត់ដំបង ហើយលោកបានលើកឡើងថា ទាំងរថយន្ត និងឈើប្រណីតត្រូវបានយកទៅរក្សាទុកនៅទីស្នាក់ការខណ្ឌរដ្ឋបាលព្រៃឈើខេត្តប៉ៃលិន។
យោងតាមសាក្សីបានឲ្យដឹងថា លោក ជា ចាន់ឌីន ស្នងការនគរបាលខេត្តមានប្រសាសន៍ថា រថយន្តតូយ៉ូតានោះត្រូវរថយន្តពីរគ្រឿងទៀតបើកដេញតាម មុនពេលរថយន្តនេះបង្កគ្រោះថ្នាក់។
លោកថ្លែងថា “រថយន្តទាំងពីរមិនមែនជារបស់នគរបាលទេ។ ឥឡូវនេះ យើងកំពុងស្វែងរកអ្នកបើកបររថយន្តប្រដេញនោះ។ គ្មាននរណាម្នាក់បានឃើញស្លាកលេខរថយន្តទាំងនោះទេ ព្រោះវាងងឹតពេក ហើយភ្លៀង ធ្លាក់ខ្លាំងទៀតផង”។
លោក ជូ ចាន់តារា នាយខណ្ឌរដ្ឋបាលព្រៃឈើខេត្តប៉ៃលិនមិនអាចទាក់ទងសុំអត្ថាធិប្បាយបានទេ៕ សារុន