31 C
Phnom Penh

គណបក្ស​សង្គ្រោះ​ជាតិ​​ត្រូវ​បាន​​ស្នើ​សុំ​ឲ្យ​រក​ផែនទី​ព្រំដែន​ពី​ផ្ទាំង​ដែល​បាត់​

ដោយ ឌឹ ខេមបូឌា ដេលី

បទវិភាគ

អ្នក​ស្រាវជ្រាវ​មួយ​រូប​ដែល​ទទួល​ភារកិច្ច​ដោះ​ស្រាយ​ការ​ខ្វែង​គំនិត​គ្នា​​ទៅ​លើ​​ព្រំដែន​ប្រទេស​កម្ពុជា​ជាមួយ​វៀតណាម​ បាន​ស្នើ​សុំ​ឲ្យ​គណបក្ស​សង្គ្រោះជាតិ​​ស្វែង​រក​​ផែនទី​ពីរ​ផ្ទាំង​​ដែល​បាត់​​នៃ​​ផែនទី​ព្រំដែន​២៦​ផ្ទាំង​របស់​ខ្លួន​កាលពី​ថ្ងៃ​សុក្រ អំឡុង​​ពេល​សន្និសីទ​កាសែត​មួយ​​​ដែលចូល​រួម​ដោយ​​តំណាង​រាស្ត្រ​​មក​ពី​គណបក្ស​កាន់អំណាច និង​គណបក្ស​ប្រឆាំង​។

លោក សុខ ទូច ចង្អុលផែនទីនៃ ព្រំដែនកម្ពុជាកាលពីថ្ងៃសុក្រ អំឡុងពេលសន្និសីទកាសែតនៅឯរាជបណ្ឌិត្យសភាកម្ពុជាក្នុងក្រុងភ្នំពេញ។ រូបថត​: ស៊ីវ ចាន់ណា/The Cambodia Daily
លោក សុខ ទូច ចង្អុលផែនទីនៃ ព្រំដែនកម្ពុជាកាលពីថ្ងៃសុក្រ អំឡុងពេលសន្និសីទកាសែតនៅឯរាជបណ្ឌិត្យសភាកម្ពុជាក្នុងក្រុងភ្នំពេញ។ រូបថត​: ស៊ីវ ចាន់ណា/The Cambodia Daily

លោក សុខ ទូច ប្រធាន​ក្រុម​​ស្រាវជ្រាវ​ព្រំដែន​​នៅ​រាជបណ្ឌិត្យសភា​កម្ពុជា​​បាន​ថ្លែង​ប្រាប់​អ្នក​ចូល​រួម​ប្រមាណ​១០០​នាក់​​​នៅ​ឯ​រាជបណ្ឌិត្យសភា​ក្នុង​ក្រុង​ភ្នំពេញ​ថា ផែនទី​បាន​មក​ពី​រដ្ឋាភិបាល និង​គណបក្ស​ប្រឆាំង​គឺ​ដូច​គ្នា ក្រៅពី​​ផែនទី​ពីរ​ផ្ទាំង​របស់​គណបក្ស​សង្គ្រោះជាតិ​ប៉ុណ្ណោះ​។

លោក​ ទូច បាន​មាន​ប្រសាសន៍​ថា “​យើង​នឹង​ទុក​ពេល​ឲ្យ​គណបក្ស​សង្គ្រោះជាតិ​ស្វែង​រក​​ផែនទី​ពីរ​ផ្ទាំង​ទៀត​ដែល​បាត់​។ ប្រសិន​បើ​មិនអាច​រក​ឃើញ​ទេ យើង​នឹង​​បដិសេធ​ចោល​ផែនទី​​របស់​គណបក្ស​សង្គ្រោះជាតិ​”។ លោក​បាន​​បន្ថែម​ថា ផែនទី​មួយ​ដែល​ដាក់​ជូន​ដោយ​គណបក្ស​សង្គ្រោះជាតិ​​គឺ​ជា​ផែនទី​ក្រៅ​ផ្លូវ​ការ​របស់​​ខេត្ត​ឡាំដុង វៀតណាម។

អ្នក​ស្រាវជ្រាវ​រូប​េនះ​បាន​មាន​ប្រសាសន៍​ថា “​ប្រសិន​បើ​​អ្នក​ប្រើ​ផ្ទាំង​ផែនទី​នោះ យើង​នឹង​មាន​ជម្លោះ​ដែល​អាច​ឈានទៅ​រក​សង្គ្រាមជា​មួយ​វៀតណាម​”។

លោក សុខ ទូច បាន​​លើក​ឡើង​ពី​​​ដំណាក់​កាលបី​ដើម្បី​វាយ​តម្លៃ​ការ​ងារ​របស់​រដ្ឋាភិបាល​ក្នុង​ការ​កំណត់ព្រំដែន​ភាគ​ខាង​កើត​របស់​ខ្លួន​ជាមួយ​វៀតណាម​ ដោយ​ចាប់​ផ្ដើម​ពិនិត្យមើល​ផែនទី​ដែល​ប្រើ​ដោយភាគី​ផ្សេងៗ​ បន្ទាប់​មក​ធ្វើ​វិភាគ​លើ​សន្ធិសញ្ញា​ព្រំដែន​ដែល​ចុះ​ហត្ថលេខា​ដោយ​ក្រុង​ភ្នំពេញ និង​ក្រុង​ហាណូយ ហើយ​ជា​​​ចុង​ក្រោយ​ចុះ​ផ្ទាល់​ទៅ​កាន់​​បង្គោល​ព្រំដែនដើម្បី​បញ្ជាក់​ថា បង្គោល​​ទាំង​នោះ​​ត្រូវ​បាន​​បោះ​ត្រឹម​ត្រូវ​។

ឆ្លើយ​តប​ទៅ​នឹង​ការ​រិះគន់​ដែល​ថា ការ​ស្រាវជ្រាវ​​​នឹង​មាន​​ការ​លម្អៀង​​ដោយ​សារ​តែ​រាជបណ្ឌិត្យសភា​ជា​​ស្ថាប័ន​រដ្ឋ​​នោះ លោក ទូច បាន​មាន​ប្រសាសន៍​ថា ក្រុម​អ្នក​ស្រាវជ្រាវ​ប្រើ​ភ័ស្តុតាង​ជាក់​ស្ដែង​ដើម្បី​គាំទ្រ​ការ​រក​ឃើញ​របស់​ខ្លួន។

លោក ទូច បាន​មាន​ប្រសាសន៍​ថា “​យើង​នឹង​​មិន​និយាយ​អ្វី​​​ទេ​ប្រសិន​បើ​មិន​មាន​ឯកសារ​ដើម្បី​ប្រើ​ជា​ឯកសារ​យោង​។ យើង​និយាយ​អ្វី​ៗ​ផ្អែក​លើ​ឯកសារ​ច្បាស់​លាស់​ ជាក់​ស្ដែង ពីព្រោះ​គេ​អាច​ហៅ​យើង​ថា​គ្រូទាយ​ ឬ​គ្រូបូរាណ​​ ដែល​និយាយ​អ្វី​ដោយ​គ្មាន​ឯកសារ​ជា​សំអាង​”។

ក្នុង​រយៈ​ពេល​​៣​ខែ​កន្លង​មក​នេះ គណបក្ស​សង្គ្រោះជាតិ​បាន​ធ្វើ​យុទ្ធនាការ​​​បន្តុះបង្អាប់​ការ​ងារ​របស់​រដ្ឋាភិបាល​​គណបក្ស​ប្រជាជន​កម្ពុជា​​ក្នុង​ការ​កំណត់​បង្គោល​ព្រំដែន​ខាង​កើត ដែល​នាំ​ឲ្យ​មាន​ការ​ធ្វើ​ដំណើរ​​ទៅ​កាន់​តំបន់​ព្រំដែន​​ ដែល​ពួកគេ​អះអាង​ថា វៀតណាម​បាន​រំលោភ​ចូល​ដី​កម្ពុជា​។

លោក សម រង្ស៊ី​ មេដឹកនាំគណបក្ស​ប្រឆាំង​ដែល​​ជា​យូរ​មក​ហើយ​ចោទ​គណបក្ស​ប្រជាជន​កម្ពុជា​​ថា ប្រគល់​ដី​ឲ្យ​វៀតណាម​​ បាន​មាន​ប្រសាសន៍​ថា ការ​​កាត់​ឲ្យ​ជាប់​ទោស​​ចំពោះ​សកម្មជន​គណបក្ស​សង្គ្រោះជាតិ​ចំនួន​១១​នាក់​ពីបទ​​ចូល​រួម​​កុបកម្ម​​ គឺ​ជា​ការ​ព្រមាន​ដល់​គណបក្ស​​ឲ្យ​ឈប់​ចុះ​ទៅ​ព្រំដែន​។

លោក ទូច បាន​មាន​ប្រសាសន៍​កាលពី​ថ្ងៃ​សុក្រថា លោក​សង្ឃឹម​ថា ការ​ស្រាវជ្រាវ​របស់​លោក​​នឹង​ជួយ​ដោះ​ស្រាយ​ជម្លោះ​នយោបាយ​​ដែល​ធ្វើ​ឲ្យ​ប្រទេស​ប្រេះឆា​។

អ្នក​ស្រាវជ្រាវ​រូប​នេះ​បាន​មាន​ប្រសាសន៍​ថា “​មុន​នឹង​យើង​​ស្វែង​រក​ដំណោះ​ស្រាយ​ជាមួយ​នឹង​បរទេស យើង​ត្រូវ​ការ​សុចរិត​ភាព​មុន​គេ ពីព្រោះយើង​បាន​ឃើញ​​រហូត​មក​ដល់​ពេល​នេះ គណបក្ស​នយោបាយ​ទាំង​ពីរ​បាន​ចោទ​គ្នា​ទៅវិញ​ទៅ​មក​ថា ប្រើ​ផែនទីមិន​ត្រឹម​ត្រូវ​ឬ​ក្លែង​ក្លាយ​”។

លោក អ៊ូ ច័ន្ទរិទ្ធ អ្នក​នាំពាក្យ​គណបក្ស​សង្គ្រោះជាតិ​ស្ដីទី​ដែល​បានចូល​រួម​សន្និសីទ​កាសែត​នោះ បានមាន​ប្រសាសន៍​ថា ​លោក​មិន​ទាន់​បាន​​ត្រៀម​ខ្លួន​ឆ្លើយ​តប​​នឹង​សំណើ​​របស់​លោក ទូច បាន​ទេ​។

អ្នក​នាំពាក្យ​គណបក្ស​សង្គ្រោះជាតិ​​ស្ដីទី​រូប​នេះបាន​មាន​ប្រសាសន៍​ថា “​ខ្ញុំត្រូវ​ជួប​ និង​ពិភាក្សា​​ជាមួយ​មេដឹកនាំ​គណបក្ស​សង្គ្រោះជាតិ​​ទៅ​លើ​បញ្ហា​នេះ​ជា​មុន​សិន”៕ រើន​​​​​​​​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស