អំឡុងពេលថ្លែងសុន្ទរកថានៅក្នុងពិធីពិសាអាហារសាមគ្គី[រៀបចំដោយសមាគមឧកញ៉ា] កាលពីថ្ងៃសៅរ៍ លោកនាយករដ្ឋមន្ត្រី ហ៊ុន សែន បានស្ដីបន្ទោសលោក វីលៀម ថូដ ឯកអគ្គរដ្ឋទូតអាមេរិកដែលទើបតែបញ្ចប់អាណត្តិក្នុងពេលថ្មីៗ ដោយលើកឡើងថា លោក “ធុញទ្រាន់នឹងដំបូន្មាន” របស់អ្នកការទូតបរទេស ហើយថា លោកគួរតែជាបុគ្គលម្នាក់ដែលបង្រៀនពួកគេអំពី “ការផ្លាស់ប្ដូរ”។
ពេលថ្លែងទៅកាន់ពាណិជ្ជកររាប់រយនាក់នៅមជ្ឈមណ្ឌលកោះពេជ្រ លោក ហ៊ុន សែន បាននិយាយអួតអំពីការចេះបត់បែនរបស់លោកក្នុងការកាន់អំណាចជាង៣០ឆ្នាំ មកនេះ ហើយបានស្ដីបន្ទោសលោក វីលៀម ថូដ ថាបានព្យាយាមដាក់សម្ពាធមកលើរូប លោកពាក់ព័ន្ធនឹងសារៈសំខាន់នៃការផ្លាស់ប្ដូរអំឡុងជំនួបលាគ្នារវាងអ្នកទាំងពីរកាលពីដើមខែនេះ។
លោក ហ៊ុន សែន បានមានប្រសាសន៍ថា “ថ្ងៃមុនខ្ញុំជួបជាមួយឯកអគ្គរដ្ឋទូតអាមេរិក មុនពេលដែលគាត់ចាកចេញពីកម្ពុជា។ នៅពេល ដែលគាត់និយាយជាមួយខ្ញុំ គាត់និយាយយ៉ាងច្រើនអំពីអ្វីដែលហៅថា ការផ្លាស់ប្ដូរ។ ខ្ញុំក៏បាននិយាយទៅកាន់គាត់វិញថា តើអ្នកភ្លេចទេ ឬអ្នកកំពុងនិយាយអ្នកណា? ឯកឧត្ដមកំពុងនិយាយជាមួយអ្នកណា? ឯកឧត្ដមពិតជាកំពុងនិយាយជាមួយសាស្ត្រាចារ្យម្នាក់ដែលអាចបង្រៀនឯកឧត្ដម ឬប្រធានាធិបតីប្រទេសឯកឧត្ដម ឬនាយករដ្ឋមន្ត្រីប្រទេសផ្សេងលើបញ្ហាការផ្លាស់ប្ដូរ”។
លោកបានមានប្រសាសន៍បន្តថា ”បើខ្ញុំមិនស្គាល់ការផ្លាស់ប្ដូរ និងមិនអាចគ្រប់គ្រងបាននូវដំណើរការនៃការផ្លាស់ប្ដូរ តើខ្ញុំអាចអង្គុយធ្វើនាយករដ្ឋមន្ត្រីជាង៣០ឆ្នាំបានទេ”។
លោក ហ៊ុន សែន បានលើកឡើងទៀតថា លោកបានប្រាប់លោក វីលៀម ថូដ ថា សហរដ្ឋអាមេរិកគួរតែគិតគូរឲ្យហ្មត់ចត់អំពីតួនាទីរបស់ខ្លួននៅក្នុងជម្លោះនៅតំបន់មជ្ឈិមបូពា៌។
លោកបានមានប្រសាសន៍ថា ”ខ្ញុំបានប្រាប់ គាត់ថា ដោយសារអាមេរិកមិនអាចគ្រប់ គ្រងការផ្លាស់ប្ដូរនៅលីប៊ី ស៊ីរី អុីរ៉ាក់ និងអាហ្វហ្គានីស្ថាន បាននេះហើយ ទើបបានជាបណ្ដោយឲ្យមានការកើតឡើងនូវពួក ISIS នៅទីនោះបាន”។ លោកបានបន្តពន្យល់អំពីការផ្លាស់ប្ដូរសេដ្ឋកិច្ចនៅកម្ពុជាក្នុងរយៈពេល៣ទសវត្សរ៍កន្លងមកនេះ។
លោកបានមានប្រសាសន៍ថា “កម្ពុជាមានការផ្លាស់ប្ដូរពីបែបផែនសេដ្ឋកិច្ចផែនការទៅជាសេដ្ឋកិច្ចទីផ្សារតាមរយៈកំណែទម្រង់។ កម្ពុជាមានការផ្លាស់ប្តូរពីបែបផែនសេដ្ឋកិច្ចផែនការមកកាន់សេដ្ឋកិច្ចទីផ្សារ តាមរយៈនៃកំណែទម្រង់។ ខ្លួនខ្ញុំផ្ទាល់ បានដឹកនាំនូវកំណែទម្រង់នេះ តាមរយៈការផ្តល់ប័ណ្ណ កម្មសិទ្ធិដីធ្លីឲ្យប្រជាពលរដ្ឋ តាមរយៈនៃការធ្វើឯកជនភាវូបនីយកម្មរោងចក្រ សហគ្រាស និងក្រុមហ៊ុនដទៃៗ ដើម្បីឲ្យចរន្តទីផ្សារទ្រ ទ្រង់ទៅនឹងដំណើរការអភិវឌ្ឍប្រទេស។តើនេះមិនមែនជាការផ្លាស់ប្តូរទេឬ តើការ ផ្លាស់ប្តូរមានត្រឹមតែប្តូរមេដឹកនាំ ឬអ្វីដែល គេហៅថាបដិវត្តន៍ព័ណ៌?”។
ស្ថានទូតអាមេរិកបានបដិសេធមិនធ្វើអត្ថាធិប្បាយលើការលើកឡើងរបស់លោក ហ៊ុន សែន ឡើយ។
លោក អ៊ូ វីរៈ អ្នកវិភាគនយោបាយមួយរូបបានលើកឡើងថា បន្ទាប់ពីការធ្លាក់ចុះប្រជាប្រិយភាពដ៏គួរឲ្យកត់សម្គាល់របស់គណបក្សកាន់អំណាចនៅក្នុងការបោះឆ្នោតជាតិឆ្នាំ២០១៣ លោក ហ៊ុន សែន កំពុងតែព្យាយាមការពារការដឹកនាំរបស់ខ្លួនក្នុងនាមជានាយករដ្ឋមន្ត្រី ហើយថា សហរដ្ឋអាមេរិក [ដែលជារឿយៗតែងតែរិះគន់លោក] បានបន្តជាគោលដៅរបស់លោក។
លោកបានមានប្រសាសន៍ទាក់ទិននឹងសុន្ទរកថារបស់លោកនាយករដ្ឋមន្ត្រីថា “ហេតុដូច្នេះ នេះគឺជាយន្តការការពារខ្លួនរបស់លោក ហ៊ុន សែន ដើម្បីការពារខ្លួនឯង។ ខ្ញុំគិតថា វាទាក់ទិននឹងការមួម៉ៅរបស់គាត់ ដោយសារមិនមានលទ្ធភាពក្នុងការទាក់ទងជាមួយសហរដ្ឋអាមេរិក និងលោកខាងលិចឲ្យបានត្រឹមត្រូវ”។
លោក អ៊ូ វីរៈ បានលើកឡើងទៀតថា អ្នក ដែលចូលរួមនៅក្នុងពិធីកាលពីថ្ងៃសៅរ៍ ដែល រួមមានទាំងឧកញ៉ាដែលមានទំនាក់ទំនងយ៉ាងជិតស្និទ្ធជាមួយគណបក្សកាន់អំណាចមួយចំនួនផងដែរនោះ ទំនងជាមិនមានការភ្ញាក់ផ្អើលចំពោះសុន្ទរកថានេះឡើយ។
លោកបានមានប្រសាសន៍ថា ”វាជាការនិយាយដដែល ហើយខ្ញុំគិតថា ពលរដ្ឋមិនចាប់អារម្មណ៍ទៀតឡើយ”៕ស៊ុយឈាង (រាយការណ៍បន្ថែមដោយ Colin Meyn)