នគរបាលខេត្តមណ្ឌលគិរីបាននិយាយកាលពីម្សិលមិញថា ខ្លួនកំពុងតាមប្រមាញ់បុរសមិនស្គាល់អត្តសញ្ញាណម្នាក់ដែលបានរំលោភក្មេងស្រីអាយុ១២ឆ្នាំម្នាក់កាលពីថ្ងៃច័ន្ទ បន្ទាប់ពីជននោះបានល្បួងឲ្យនាងឃ្វៀលគោជាមួយខ្លួន។
លោក សូ សុវណ្ណ ស្នងការរងខេត្តនេះបានមានប្រសាសន៍ថា បុរសរូបនោះបានចូលទៅជិតជនរងគ្រោះ និងក្មេងស្រីបីនាក់ទៀតដែលមានអាយុចន្លោះពី១០ទៅ១២ឆ្នាំ ខណៈពួកគេកំពុងស្ទូចត្រីនៅអូរមួយកន្លែងស្ថិតនៅចម្ងាយប្រហែល៤គីឡូម៉ែត្រពីផ្ទះរបស់ពួកគេក្នុងឃុំស្រែឈូក ស្រុកកែវសីមា។
លោកមានប្រសាសន៍ទៀតថា “ក្មេងស្រី ទាំងនោះបាននិយាយថា ជនសង្ស័យបានកុហកពួកគេដោយនិយាយថា គេចង់ឲ្យក្មេងស្រីដែលមានអាយុច្រើនជាងគេឃ្វៀលគោជាមួយខ្លួន ហើយបន្ទាប់មកបានសន្យាឲ្យរបស់នាងញ៉ាំ។ ប៉ុន្តែជនសង្ស័យទាញក្មេងស្រីរងគ្រោះចូលទៅក្នុងព្រៃ ហើយបន្ទាប់មកបានសម្រាតខោអាវរបស់នាងចេញរួចចាប់រំលោភនាងនៅពេលនោះ”។
ស្នងការរងរូបនេះបានបន្តថា ឪពុកក្មេងស្រីរងគ្រោះបានដាក់ពាក្យបណ្ដឹងទៅនគរបាលឃុំបន្ទាប់ពីក្មេងស្រីរងគ្រោះប្រាប់ពួកគាត់អំពីហេតុការណ៍នោះ។ “បន្ទាប់ពីយើងទទួលបានពាក្យបណ្ដឹង ខ្ញុំបានបញ្ជាឲ្យនគរបាលឃុំ និងស្រុកតាមស្វែងរកជនសង្ស័យនៅម្ដុំៗនោះ”។
លោកបានលើកឡើងបន្ថែមទៀតថា រកមិនឃើញជនសង្ស័យទេ ពីព្រោះពាក្យបណ្ដឹងត្រូវបានដាក់២ម៉ោងបន្ទាប់ពីការចាប់រំលោភបានកើតឡើង។ នគរបាលជឿថា ជនសង្ស័យមកពីក្រៅតំបន់នេះ ដែលមានច្រើនទៅដោយជនជាតិដើមភាគតិចព្នង។ “ខ្ញុំជឿថា ជនសង្ស័យមកពីក្រៅឃុំនេះ ពីព្រោះបើជនសង្ស័យជាអ្នកនៅក្នុងមូលដ្ឋាន ម្លេ៉ះក្មេងស្រីទាំងនោះចំណាំមុខគេបានទៅហើយ”។
លោកបានមានប្រសាសន៍ទៀតថា អ្នកភូមិម្នាក់បានប្រទះឃើញបុរសមិនស្គាល់អត្តសញ្ញាណម្នាក់ដើរចេញពីព្រៃយ៉ាងលឿន ភ្លាមៗបន្ទាប់ពីហេតុការណ៍ចាប់រំលោភបានកើតឡើង។ លោកបានលើកឡើងថា “ថ្ងៃនេះ យើងបានបញ្ជូនក្មេងស្រីទៅមន្ទីរពេទ្យ [បង្អែកខេត្ត] ដើម្បីពិនិត្យ ប៉ុន្តែមិនទាន់ចេញលទ្ធផលនៅឡើយទេ”។
លោក ស៊ុន ប៊ុនធឿន អធិការស្រុកបានមានប្រសាសន៍ថា នគរបាលកំពុងស៊ើបអង្កេតនៅឡើយកាលពីល្ងាចម្សិលមិញ ហើយបានបដិសេធមិនធ្វើអត្ថាធិប្បាយបន្ថែមទៀតទេ៕ សុខុម