មន្ត្រីគណបក្សបាននិយាយកាលពីម្សិលមិញថា ជនជាតិដើមភាគតិចក្នុងខេត្តមណ្ឌលគិរីបានរួមគ្នាបង្កើតគណបក្សនយោបាយថ្មីមួយ ដើម្បីផ្ដល់សំឡេងដល់ក្រុមជនជាតិដើមភាគតិចក្នុងប្រទេសកម្ពុជា។
លោក ស្រូយ ខេត ជនជាតិដើមភាគតិចព្នង និងជាអនុប្រធានបណ្ដោះអាសន្នគណបក្សជនជាតិដើមប្រជាធិបតេយ្យកម្ពុជា (CIDP) បានមានប្រសាសន៍ថា ជនជាតិ ដើមភាគតិចជាង២០នាក់បានសម្រេចបង្កើត គណបក្សនេះ។ លោកបានបន្ថែមថា ស្ថាបនិកភាគច្រើនធ្លាប់មានបទពិសោធន៍ក្នុងសង្គមស៊ីវិល។
លោកបានថ្លែងថា “យើងមានបំណងបង្កើតគណបក្សនេះតាំងពីឆ្នាំ២០០៥មកម៉្លេះ ប៉ុន្តែយើងមិនមានលទ្ធភាពបង្កើត។ យើងនឹងការពារអត្តសញ្ញាណ ជំនឿ ភាសា ទំនៀមទម្លាប់ និងវប្បធម៌របស់ជនជាតិខ្មែរ”។
លោក ស្រូយ ខេត បានមានប្រសាសន៍ថា គណបក្សមានអ្នកគាំទ្រដែលបានតម្រូវយ៉ាងតិច៨០នាក់ និងឯកសារត្រឹមត្រូវដើម្បីចុះបញ្ជី ជាមួយក្រសួងមហាផ្ទៃរួចហើយ ហើយថា គណបក្សមានគម្រោងចុះបញ្ជីនៅខែវិច្ឆិកា។
លោក សុខ រដ្ឋា អ្នកសម្របសម្រួលអង្គការ សិទ្ធិមនុស្សអាដហុកប្រចាំខេត្តនេះ បានមានប្រសាសន៍ថា លោកបានជួបជាមួយស្ថាបនិកគណបក្ស CIDP ហើយបានពិភាក្សាអំពីមូល
ហេតុដែលពួកគាត់ចង់បង្កើតគណបក្ស ថ្មីនេះ។ លោក សុខ រដ្ឋា បានថ្លែងថា “ពួក គាត់គិតថា អ្នកនយោបាយកម្ពុជាមិនយល់អំពីអ្វីដែល ពួកគាត់ចង់បានឡើយ។ ពួកគាត់គិតថា មានតែជនជាតិដើមភាគតិចប៉ុណ្ណោះយល់ពីជីវភាពរស់នៅដ៏លំបាក និងទំនៀមទម្លាប់របស់ពួកគាត់”។
លោកបានបន្ថែមថា ស្ថាបនិកទាំង២០នាក់បានសង្កត់ធ្ងន់ថា ពួកគាត់ឯករាជ្យពីក្រុមនយោបាយផ្សេងទៀតនៅក្នុងប្រទេស។
គណបក្ស CIDP នឹងជាគណបក្សនយោបាយទី៥ដែលបានចុះបញ្ជីនៅឆ្នាំនេះដោយលោក ម៉ម សូណង់ដូ ម្ចាស់ស្ថានីយវិទ្យុដ៏ឆ្នើមមួយរូប លោក យ៉េង វីរៈ អតីតនាយកអង្គការមិនមែនរដ្ឋាភិបាល លោក សួន សេរីរដ្ឋា ជាអ្នកប្រឆាំង និងលោកស្រី ឡាក់ សុភាព មន្ត្រីគណបក្សសង្គ្រោះជាតិដែលត្រូវបានបណ្ដេញចេញសុទ្ធតែដឹកនាំគណបក្សថ្មី។
លោកស្រី យុន ម៉ាណេ នាយកប្រតិបត្តិអង្គការជនជាតិដើមភាគតិចកម្ពុជា បានមានប្រសាសន៍ថា ប្រសិនបើមេដឹកនាំគណបក្ស CIDP អាចស្វែងរកមធ្យោបាយដើម្បីផ្ដល់ហិរញ្ញប្បទានដល់គណបក្ស វាអាចជាឥទ្ធិពលដ៏សំខាន់។
លោកស្រី ម៉ាណេ បានមានប្រសាសន៍ថា “ខ្ញុំគិតថា វានឹងផ្ដល់សំឡេងបន្ថែមទៀតសម្រាប់ប្រជាជនរបស់ពួកគាត់នៅពេលអនាគត ហើយវាអាចធ្វើឲ្យមានការចាប់អារម្មណ៍បន្ថែមទៀតចំពោះបញ្ហារបស់ពួកគាត់ផ្ទាល់។ វានិយាយអំពីការដោះស្រាយបញ្ហាដីធ្លី…និងបញ្ហាប្រឈមផ្សេងៗទៀតដូចជាបញ្ហាអប់រំ និងសុខភាពជាដើម”៕ សារុន (រាយការណ៍បន្ថែមដោយ Anthony Jensen)