ក្រុម​អ្នកកាសែត​​អះអាង​ថា ​ការ​ចុះ​ផ្សាយ​​​អំពី​ការ​កាប់​ឈើធ្វើ​ឲ្យ​មន្ត្រី​ខេត្ត​រតនគិរី ផ្ទុះ​កំហឹង

ក្រុង​បានលុង, ខេត្ត​រតនគិរី- នៅ​តៀម​កាហ្វេ​ដ៏​សាមញ្ញ​មួយ​កន្លែង​ស្ថិត​តាម​បណ្ដោយ​​​ផ្លូវ​​មួយ​ដែល​​​​មាន​សភាព​ចាស់​ទ្រុឌទ្រោម​នៅ​​​ជាយ​ភាគ​ឧត្ដរ ​នៃ​ក្រុង​​របស់​​ខេត្ត​នេះ មាន​ក្រុម​​​អ្នក​កាសែត​​ជួប​ជុំគ្នា​ និង​រង់ចាំ​នៅ​ទីនោះ​។

cam-photo-journalists-roeun
អ្នកកាសែត​អង្គុយ​នៅតៀមកាហ្វេ​ក្នុង​ក្រុង​បានលុង​ កាលពី​ថ្ងៃ​អាទិត្យ​។

ម្នាក់​កំពុង​​កាត់​​​ និង​រូស​ក្រចក​ដៃ​​របស់​ខ្លួន អ្នក​ខ្លះ​ទៀត​កំពុង​ជក់​បារី​ ហើយ​ពួកគេ​ទាំង​អស់​នោះ​ផឹក​កាហ្វេ​ និង​និយាយ​រឿង​​កំប្លែង​​លេង​សើច​។

អ្នក​កាសែត​ម្នាក់​​និយាយ​ថា “​គាត់​រស់​នៅ​ក្នុង​ព្រៃ​ ចុះ​ម៉េច​ក៏គាត់​រវល់​ម៉េះ​” ខណៈ​រថ​យន្ត​​​លុច​ស៊ីស​ពណ៌​ស​មួយ​គ្រឿង​បើក​កាត់​​​យ៉ាង​លឿន ​ដោយ​អ្នក​ជិះ​ម្នាក់​នៅ​ក្នុង​រថយន្ត​នោះ​​​ជា​សមាជិក​ព្រឹទ្ធសភា​​ដែល​កំពុង​កាន់​ទូរស័ព្ទ​ដៃ​ផ្អឹប​ជាប់​នឹង​ត្រចៀក​។

ទោះបី​ជា​ពួកគេ​ហាក់​ដូច​រវល់​ជជែក​គ្នា​​រឿង​​ប្រកួត​ប្រដាល់​​ដណ្ដើម​ខ្សែក្រវាត់​របស់​កីឡាករ ហ្វ្លយ ម៉េវ៉េឌើ ​(Floyd Mayweather) ដែល​កំពុង​​ផ្សាយ​​តាម​កញ្ចក់​ទូរទស្សន៍​​អេក្រង់​​​សំប៉ែត​​ក្ដី ក៏​ភ្នែក​របស់​​អ្នក​កាសែត​​នៅ​ក្នុង​ក្រុង​​​​បានលុង​ ទាំង​នេះ​នៅ​តែ​បន្ត​​រំពៃ​​សម្លឹង​មើល​​​ចរាចរណ៍​​ជាប់​ជានិច្ច។

ខណៈ​ក្រុម​​​អ្នក​កាប់​ឈើ​​កំពុង​កាប់​បំផ្លាញ​ព្រៃ​​ឈើ​ខៀវ​ស្រងាត់​ក្នុង​ខេត្ត​រតនគិរី ​យ៉ាង​​លឿន​​ដោយ​គ្មាន​ទោស​ពៃ ក្រុម​អ្នក​កាសែត​​មក​ជួប​ជុំគ្នា​នៅ​លើ​ផ្លូវ​ដ៏​ស្ងាត់​នេះ​​ (ដែល​ភ្ជាប់​​​តំបន់​ភាគ​ឧត្ដរ​នេះ​ទៅ​នឹង​ច្រក​ត្រួត​ពិនិត្យ​ព្រំដែន​អូរយ៉ាដាវ ដែល​ឈើ​មាន​តម្លៃ​ជា​ច្រើន​​​ត្រូវ​បាន​​ដឹកជញ្ជូន​​ចូល​ទៅ​ក្នុង​ប្រទេស​វៀតណាម) ហើយ​រង់ចាំ​អ្នក​រត់​ពន្ធ​ឈើ​បើក​បរ​កាត់​​។

លោក កេត សុធី ជា​អ្នក​យក​​ព័ត៌មាន​​ឲ្យ​ទូរទស្សន៍​អាស៊ីអាគ្នេយ៍​​​​ បាន​និយាយ​ថា “យើង​​​​​​ដេញ​តាម​ឡាន​ ហើយ​ថត​ទុក​ជា​ភ័ស្តុ​តាង​​” ​ហើយបន្ទាប់​មក​ ពួកគេ​នឹង​ទាក់​ទង​​ទៅ​មន្ត្រី​ខេត្ត​ ដើម្បី​សុំ​ការ​បញ្ជាក់​​ថា ​តើ​ឈើ​ទាំង​​នោះ​​​​​ជា​របស់​អ្នក​​ណា​ ហើយ​វា​ជា​ឈើ​ស្រប​​ច្បាប់​ ឬ​ក៏​ខុស​ច្បាប់​។

លោក​ ផល ដំ ជា​អ្នក​យក​ព័ត៌មាន​ឲ្យ​ទូរ​ទស្សន៍​ប៉ុស្តិ៍​លេខ​៣ បាន​លើក​ឡើង​ថា ​”​​នៅ​ពេល​​​វា​​ជា​បញ្ហា​រសើប [អភិបាល​ខេត្ត​] មិន​ដែល​ឆ្លើយ​​តប​​សំណួរ​របស់​យើង​ទេ” ហើយ​បាន​ចោទ​ប្រកាន់​ថា ​​ការ​ដឹក​ឈើ​នេះ​​មាន​​ជាប់​​​​ពាក់​ព័ន្ធ​​នឹង​មន្ត្រី​ខេត្ត​មួយ​ចំនួន​។ “​យើង​បាន​រាយ​ការណ៍​ច្រើន​ណាស់​ទាក់​ទិន​ការ​​រត់ពន្ធ​ឈើ​។ អាជ្ញាធរ​​ចិត្ត​ចង្អៀត​ចង្អល់​”។

កាលពី​ខែ​ឧសភា អ្នក​​កាសែត​​ប្រមាណ​៣០​នាក់​មក​ពី​ទូទាំង​​ខេត្តរតនគិរី​ ត្រូវ​បាន​លោក ញ៉ែម សំអឿន អភិបាល​រង​ខេត្ត​​​នេះ​កោះ​ហៅ​ទៅ​សាលា​ខេត្ត​ដើម្បី​ប្រាប់​ឲ្យ​ឈប់​​ប្រមូល​ផ្ដុំគ្នា​នៅ​តាម​តៀម​​កាហ្វេ​​ទូទាំង​ក្រុង​ ពីព្រោះ​វា​ “​មិន​ល្អ​មើល​”។

លោក​ ញ៉ែម សំអឿន ​មាន​ប្រសាសន៍​​​ថា អ្នក​យក​ព័ត៌មាន​​មួយ​ចំនួន​ “​ធ្វើ​​​​មើល​តែ​ខ្លួន​​​​ឯង​​​ជា​កម្លាំង​នគរ​បាល​” ហើយ​​គ្មាន​​សេច​ក្ដី​​​ពិស្ដារ​ទេ​ នៅ​ពេល​ពួកគេ​ផ្សាយ​ព័ត៌មាន​របស់​ខ្លួន”។

កាលពី​ខែ​មុន អ្នក​កាសែត​ចំនួន​៣២​​នាក់​​បាន​ផ្ដិត​មេដៃ​លើ​ពាក្យ​បណ្ដឹង​​មួយ​​ ហើយ​បញ្ជូន​មក​ក្លឹប​អ្នក​កាសែត​កម្ពុជា បន្ទាប់ពី​​លោក ថោង សាវុន អភិបាល​ខេត្ត​នេះ​​បាន​​ផ្ញើ​លិខិត​​មួយ​ច្បាប់​​ចោទ​ប្រកាន់​ពួកគេ​​​ពីបទ​​កំហែង​ទារ​ប្រាក់​ដោយផ្ទាល់។

លោក​បាន​សរសេរ​ថា ”​ខ្ញុំ​សង្កេត​ឃើញ​ថា រាល់​ថ្ងៃ​​អ្នក​កាសែត​ហាក់​ដូច​យក​បទ​ល្មើស​​​មក​ធ្វើ​​ជា​របរ​របស់​ខ្លួន​ទៅ​ហើយ​ដូច​ជា​ពាក់​ព័ន្ធ​ការ​កាប់​ឈើ​​ជា​ដើម​។ មាន​ [អ្នក​កាសែត​​] ​​​មួយ​ចំនួន​​ដេញ​តាម​ឡាន​ ហើយ​សុំ​លុយ​ចាក់​សាំង​។ បើ​គេ​ [អ្នក​បើក​បរ​] មិន​ឲ្យ​​ ពួក​គេ​នឹង​ចុះ​ផ្សាយ”។

ពេល​ទាក់​ទង​តាម​ទូរស័ព្ទ​កាលពី​ម្សិល​មិញ អភិបាល​ខេត្ត​នេះ​​មាន​ប្រសាសន៍​ថា លោក​​នឹង​ធ្វើពាក្យ​បណ្ដឹង​​មួយ​​ដើម្បី​បញ្ជូន​មក​រដ្ឋា​ភិបាល​​ក្នុង​រាជធានី​ភ្នំពេញ។ លោក​​បាន​​គូស​បញ្ជាក់​ថា “​យើង​​កំពុង​ប្រមូល​ភ័ស្តុតាង​ ហើយ​​​នឹង​រាយការណ៍​ទៅ​ក្រសួង​ព័ត៌មាន” ប៉ុន្តែ​​បាន​បដិសេធ​មិន​​រៀបរាប់​​ពី​ខ្លឹមសារ​​​ក្នុង​របាយ​ការណ៍​នោះ​ឡើយ​។

នៅ​ពេល​កីឡាករ​ ហ្វ្លយ ម៉េវ៉េឌើ ឱន​ក្បាល ​​ហើយ​គេច​ចុះ​គេច​ឡើង​​ឆ្ពោះ​ទៅ​រក​ជ័យ​ជម្នះ​​​​កាលពី​ថ្ងៃ​អាទិត្យ អ្នក​កាសែត​ទាំង​ប្រាំបី​នាក់​​ដែល​មាន​វត្តមាន​នៅ​​តៀម​កាហ្វេ​គ្មានឈ្មោះ​ខាង​លើ​នេះ ​បាន​រអ៊ូរទាំ​ចំពោះ​​​​ស្នៀត​វ៉ៃ​របស់​កីឡាករ​រូប​នេះ​ថា ”​វា​គិត​តែ​ពី​រត់​” និង​​ចំពោះ​ការ​លើក​ឡើង​ថា ពួកគេ​ដេញ​​​តាម​អ្នក​កាប់​ឈើ​ខុស​ច្បាប់​ដើម្បី​​ផល​ប្រយោជន៍​ផ្ទាល់​ខ្លួន​។

លោក កេត សុធី ​​​បាន​និយាយ​ថា “​យើង​មិន​ដែល​ទារ​លុយ​​ទេ។ យើង​គ្រាន់​តែ​ដេញ​តាម​​​ឡាន​​ហើយ​ថត​សម្រាប់​ការ​ចុះ​ផ្សាយ​ប៉ុណ្ណោះ”។ ​​អ្នក​កាសែត​រូប​នេះ​បាន​​លើក​ឡើង​​​បន្ត​​ថា ពួកគេ​ធ្វើ​ការ​ជា​ក្រុម​ដើម្បី​ឲ្យ​មាន​ប្រសិទ្ធភាព​ និង​ដើម្បី​សុវត្ថិភាព​។

កាលពី​ខែ​សីហា អ្នក​កាសែត​បី​នាក់​ត្រូវ​បាន​​​ឃុំខ្លួន​នៅ​ក្នុង​ការិយាល័យ​រដ្ឋបាល​ព្រៃឈើ ​​បន្ទាប់ពីពួកគេ​​ទៅ​ទីនោះ​ដើម្បី​ប្រមូល​ភ័ស្តុ​តាង​​ពាក់​ព័ន្ធ​​ការ​កាប់​ឈើ​ខុស​ច្បាប់​។ កាលពី​ឆ្នាំ​២០១២ ​លោក ហង្ស សេរីឧត្ដម ដែល​បាន​​រាយការណ៍​អំពី​​បទល្មើស​ព្រៃឈើ​ឲ្យ​កាសែត​មិន​សូវ​ល្បី​ឈ្មោះ​មួយ​​ ត្រូវ​បាន​​ប្រទះ​​​ឃើញ​ស្លាប់​ក្នុង​​ឃ្លុប​ខាង​​ក្រោយ​នៃ​រថយន្ត​របស់​គាត់​។

លោក កេត សុធី ​​លើក​ឡើង​បន្ត​​ថា “​ឃាតករ​​​​​​សម្លាប់​អ្នក​កាសែត​រូប​នេះ​​មិន​ទាន់​ចាប់​ខ្លួន​បាន​​ទេ ហើយ​នោះជា​រឿង​គួរ​ឲ្យ​​​បារម្ភ​”។

នៅ​ម៉ោង​ប្រហែល​៨​ជា​រៀង​រាល់​​ព្រឹក​ នៅ​​​ពេល​មាន​ភ្លៀង​ធ្លាក់​ ឬ​ចុះ​អ័ព្ទ​​ខ្លាំង​ដែល​ធ្វើ​ឲ្យ​អ្នក​ដឹក​ឈើ​មិន​អាច​ដឹក​បាន​ ពួក​គេ​តែង​តែ​មក​ជួប​ជុំ​គ្នា​នៅ​តៀម​​កាហ្វេ​នេះ ហើយ​រង់ចាំ​​ព័ត៌​មាន​​​សម្ងាត់​ពី​​​ប្រភព​​​នានា​ដែល​ពួកគេ​​​ផ្ដល់​កាត​ទូរស័ព្ទ​ឲ្យ​នៅ​តាម​បណ្ដោយ​ផ្លូវ​ឆ្ពោះ​ទៅ​​ភាគ​ឧត្ដរ​។ ហើយ​​​ពួកគេ​មិន​ផ្ដោត​​លើ​អ្នក​​កាប់​ឈើ​ឡើយ​​។

លោក ភួង ផុន ​ជា​អ្នក​យក​​ព័ត៌មាន​​​​មកពី​កាសែត​ ភ្នំពេញដេលី ​និយាយ​ថា “​នៅ​ពេល​​​​អ្នក​ភូមិ​មាន​ជម្លោះ​ដីធ្លី ហើយ​ចង់​ជួប​​អ្នក​កាសែត ពួកគាត់​អាច​រក​យើង​ឃើញ​យ៉ាង​ស្រួល​”។

អ្នក​កាសែត​ទាំង​នេះ​​និយាយ​​ថា តៀម​កាហ្វេ​​​ដែល​ប្រើ​កៅអី​ជ័រក្រហម តុឈើ និង​​​លក់​​កាហ្វេ​​​ដាច់​ជា​​ហូរ​ហែ​​​ដោយ​មាន​ថែម​ទឹក​​​តែ​មិន​គិត​ប្រាក់​​នេះ ប្រៀប​​ដូច​ជា​ការិយា​ល័យ​​​របស់​ពួកគេ​ទៅ​ហើយ។ ហើយ​ពួកគេ​នឹង​មិន​​​ឈប់​​​ជួបជុំ​គ្នា​​ក្នុង​ពេល​ឆាប់ៗ​នេះ​ឡើយ។

ពេល​ទាក់​ទង​​កាលពី​ថ្ងៃ​ច័ន្ទ លោក​អភិបាល​​​រង​ខេត្ត​ ញ៉ែម សំអឿន បាន​មាន​ប្រសាសន៍​ថា រហូត​មក​ទល់​ពេល​នេះ​មិន​ទាន់​មាន​វិធាន​​ការ​​​​ផ្លូវ​ការ​​ណាមួយ​ទៅ​លើ​អ្នក​​កាសែត​​ទាំង​នេះ​​ទេ​ ប៉ុន្តែ​​ជាថ្មី​ម្ដង​ទៀត​​លោក​បាន​​​ចាត់​ទុក​​​​ពួកគេ​​ថា​ជា​ក្រុមទើស​ភ្នែក​​។

លោក​បាន​លើក​ឡើង​អំពី​ផ្លូវ​នៅ​ជាយ​ក្រុង​នេះ​ថា ”​មិន​មាន​វិធានការ​​លើ​ពួកគាត់​ទេ​ ប៉ុន្តែ​ពួកគាត់​​គួរ​តែ​ផ្លាស់​ទៅ​កន្លែង​ផ្សេង ពីព្រោះ​វា​ប៉ះពាល់​ដល់​មុខមាត់​របស់​ខេត្ត​ ​ព្រោះ​មាន​ភ្ញៀវ​ទេសចរ និង​អ្នក​ផ្សេង​ៗទៀត​​​នៅទី​នោះ”។ លោក​បាន​បដិសេធ​ថា អាជ្ញា​ធរ​​​​​មិន​​ជាប់​ពាក់​ព័ន្ធការ​កាប់​បំផ្លាញ​ព្រៃឈើ ឬ​ការ​ជួញដូរ​ឈើ​ប្រណីត​នោះ​ទេ​។

ទោះ​ជាយ៉ាង​ណា លោក ផល ដំ ជា​អ្នក​យក​​​ព័ត៌មាន​​មកពី​​ទូរទស្សន៍​ប៉ុស្តិ៍​លេខ​៣ ​បាន​និយាយ​ថា អ្នក​កាសែត​ធ្វើ​​ឲ្យ​អាជ្ញាធរ​​ផ្ទុះ​កំហឹង ​​បន្ទាប់ពី​​ធ្វើ​ឲ្យ​ពួកគេ​បាត់​បង់​ចំណូល​មិន​ស្រប​ច្បាប់​។ គាត់​បាន​គូស​បញ្ជាក់​ថា “ការ​រាយ​ការណ៍​​​របស់​យើង​អំពី​ការ​​រត់ពន្ធ​ឈើ​ បាន​ប៉ះពាល់​ដល់​អាជ្ញាធរ​តូច​តាច​មួយ​ចំនួន ពីព្រោះ​ថ្នាក់​លើ​របស់​ពួកគេជា​អ្នក​រក​ស៊ី​ឈើ​​។​ នោះ​ជា​មូល​ហេតុ​ដែល​ពួកគេ​ខឹង​​ខ្លាំង​”៕ សុខុម​​​​​​​​​​​​​​​​

© 2015, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.