34 C
Phnom Penh

រដ្ឋាភិបាល​សម្រេច​​​ដំឡើង​ប្រាក់​​ខែ​គោល​​​ក្នុង​វិស័យ​កាត់​ដេរ​ត្រឹម​​​​១៤០​ដុល្លារ​​​​​សម្រាប់​ឆ្នាំ​២០១៦

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ​ រដ្ឋាភិបាល​បាន​​កំណត់​​​ប្រាក់​ខែ​គោល​ថ្មី​​​សម្រាប់​ឧស្សាហកម្ម​កាត់​ដេរ​ដែល​មាន​ទំហំ​ទឹក​ប្រាក់​ជាច្រើន​ពាន់​លាន​​​ដុល្លារ​​របស់​កម្ពុជា ត្រឹម​១៤០​ដុល្លារ​ ​គឺ​កើន​ពី​១២៨​ដុល្លារ​​ បន្ទាប់ពី​​ការ​ចរចា​​​រាប់​ខែ​យ៉ាង​​ស្វិត​ស្វាញ​​ដែល​​​មិន​​អាច​​​​សូម្បី​ធ្វើ​ឲ្យ​​និយោ​ជក និង​​សហជីព​​​ខិត​ជិត​​​​ទៅ​រក​ការ​ឯកភាព​រួម។

លោក អាត់ ធន់ ប្រធាន​​​សហជីព​​​ អំឡុង​​​ពេល​​​ចូល​​​រួម​​​​​កិច្ច​​​ប្រជុំ​​​របស់​​​គណៈកម្មការ​​​ប្រឹក្សា​​​ការ​​​ងារ ដែល​​​មាន​​​សមាសភាព​​​តំណាង​​​មក​​​ពី​​​រដ្ឋាភិបាល រោង​​​ចក្រ និង​​​សហជីព​​​ នៅក្នុង​​​រាជធានីភ្នំពេញ កាល​​​ពីម្សិលមិញ។ រូបថតៈ ស៊ីវ ចាន់ណា/The Cambodia Daily
លោក អាត់ ធន់ ប្រធាន​​​សហជីព​​​ អំឡុង​​​ពេល​​​ចូល​​​រួម​​​​​កិច្ច​​​ប្រជុំ​​​របស់​​​គណៈកម្មការ​​​ប្រឹក្សា​​​ការ​​​ងារ ដែល​​​មាន​​​សមាសភាព​​​តំណាង​​​មក​​​ពី​​​រដ្ឋាភិបាល រោង​​​ចក្រ និង​​​សហជីព​​​ នៅក្នុង​​​រាជធានីភ្នំពេញ កាល​​​ពីម្សិលមិញ។ រូបថតៈ ស៊ីវ ចាន់ណា/The Cambodia Daily

សេចក្ដី​សម្រេច​នេះ​​​កើត​មាន​ឡើង​​បន្ទាប់​ពី​ការ​ដំឡើង​​​២៨​ដុល្លារ​​លើ​ប្រាក់​ខែ​គោល​កាល​ពី​ខែ​មករា និង​ធ្វើ​ឡើង​បន្ទាប់ពី​ការ​បោះ​​​ឆ្នោត​​​នៅ​ពេល​ព្រឹក​​ដោយ​គណៈ​​កម្មការ​​​​ប្រឹក្សា​​ការ​ងារ​​​ (LAC) សម្រេច​យក​១៣៥​ដុល្លារ ប៉ុន្តែ​​​តួលេខ​នេះ​ត្រូវ​បាន​​លោក​នាយក​រដ្ឋមន្ត្រី ហ៊ុន សែន ដំឡើង​ភ្លាមៗ​​ដល់​១៤០​​ដុល្លារ​។

លោក អុិត សំហេង រដ្ឋមន្ត្រី​ក្រសួង​ការ​ងារ​​​​​បាន​ថ្លែង​​ទៅ​កាន់​ក្រុម​អ្នក​យក​ព័ត៌មាន​ថា ​”​ថ្ងៃ​​នេះ យើង​​​សម្រេច​យក​១៣៥​ដុល្លារ។ នេះ​ជា​​ចំនួន​សម​រម្យ ទោះបី​ជា​យើង​មិន​​អាច​​​បំពេញ​​​តាម​សំណើ​​របស់​ភាគី​នីមួយៗ​បាន​​ក្ដី។ សហ​ជីព​មិន​សប្បាយ​ចិត្ត ហើយ​​និយោ​ជក​​​តវ៉ា​ ចំណែក​​​​ឯ​ភាគី​ផ្សេង​ទៀត​និយាយ​ថា មិន​សម​ហេតុ​ផល​។ ប៉ុន្តែ​ យើង​គ្មាន​ជម្រើស​ទេ ពីព្រោះ​ការ​ដំឡើង​​របស់​យើង​​ធ្វើ​ឡើង​ផ្អែក​ទៅ​​លើ​កត្តា​ចំនួន​ប្រាំពីរ។ បន្ថែម​ពី​លើ​១៣៥​ដុល្លារ​ ​សម្ដេច​នាយក​រដ្ឋមន្ត្រី​បាន​បន្ថែម​៥ដុល្លារ​ទៀត​​ ដូច្នេះ​ប្រាក់​ខែ​គោល​សម្រាប់​ឆ្នាំ​២០១៦ ​​គឺ​១៤០​ដុល្លារ”។

សូម​បញ្ជាក់​ថា ប្រាក់​ខែ​គោល​ថ្មីនេះ​នឹង​ចូល​ជាធរមាន​​នៅ​ថ្ងៃទី០១ ខែ​មករា។ ​

អំឡុង​ពេល​​កំពុង​ចរចា ​​​ថៅ​កែ​រោងចក្រ​​បាន​ព្រមាន​ថា ​ការ​ដំឡើង​ខ្ពស់​ជាង​កម្រិត​អតិផរណា​បច្ចុប្បន្ន​​ដែល​មាន​ប្រហែល​៣,៥​ភាគរយ​ នឹង​​​ប៉ះពាល់​ធ្ងន់ធ្ងរ​​ដល់​ឧស្សាហកម្ម​កាត់​ដេរ ដែល​ជា​កម្លាំង​ចលករ​មួយនៅ​​ក្នុង​ចំណោម​កម្លាំង​ចលករ​សំខាន់ៗ​នៃ​សេដ្ឋកិច្ច​របស់​កម្ពុជា។ ឧស្សាហកម្ម​នេះ​ផ្ដល់​ការ​ងារ​ដល់​ប្រជាពលរដ្ឋ​ប្រមាណ​៧០០.០០០​នាក់​ ស្មើនឹង​៨០​ភាគរយ​នៃ​ចំណូល​នាំចេញ​របស់​ប្រទេស​ ហើយ​ស្មើនឹង​១ភាគ៣​នៃ​ផលិត​ផល​​​ក្នុង​ស្រុក​សរុប (GDP) របស់​ប្រទេស។

ប៉ុន្តែ​ ​លោក​រដ្ឋ​មន្ត្រី​ក្រសួង​ការ​ងារ​​បាន​ព្យាយាម​ធានា​អះអាង​​នៅ​ចំពោះ​​និយោជក​ថា ការដំឡើង​​១២​ដុល្លារ​បន្ថែម​ពី​លើ​​​ប្រាក់​ខែ​​គោល​បច្ចុប្បន្ន​ដែល​ស្មើ​ជាង​៩ភាគរយ​ នឹង​​​​​​​រក្សា​ឲ្យ​កម្ពុជា ​​មាន​ការ​ប្រកួត​ប្រជែង​ជាមួយ​គូប្រជែង​សំខាន់ៗ​របស់​ខ្លួន​។

លោក​​​បាន​ថ្លែង​​យ៉ាង​ដូច្នេះ​ថា “​នេះ​​ [ការ​ដំឡើង​​] គឺ​ដោយ​សារ​ការ​សិក្សា​បែប​​វិទ្យា​សាស្ត្រ​ ហើយ​ខ្ញុំ​ជឿ​ថា នឹង​គ្មាន​ផល​ប៉ះពាល់​​​​​សម្រាប់​វិនិយោគិន​ឡើយ​។ បើ​ធៀប​​នឹង​ប្រទេស​​ជិត​ខាង​មួយ​ចំនួន​របស់​យើង​ ​១៤០​​ដុល្លារ​ធ្វើ​ឲ្យ​យើង​ខ្ពស់​ជាង​គេ​​ ដូច្នេះ​អាច​មាន​​​បញ្ហា​ប្រកួត​ប្រជែង​ខ្លះ​។ ប៉ុន្តែ​យើង​​​មាន​ចំណុច​​​​ខ្លាំង​ដើម្បី​ទាក់​ទាញ​វិនិយោគិន​”។

លោក​បាន​​​លើកឡើង​ជា​ទឡ្ហីករណ៍​ថា ចំណុច​ខ្លាំង​ទាំង​នោះ​​​រួម​មាន​​សេច​ក្តី​​ស្ងប់​ចិត្ត​របស់​​វិនិយោគិន​​ពេល​​ដឹង​ថា ប្រជា​ពលរដ្ឋ​​ដែល​ផលិត​​សម្លៀក​បំពាក់​ឲ្យ​ពួកគាត់​ទទួល​បាន​ប្រាក់​ឈ្នួល​សម​រម្យ។

យោង​​​តាម​ទិន្នន័យ​ថ្មី​បំផុត​របស់​អង្គការ​ពលកម្ម​​អន្តរ​ជាតិ ILO ស្ដីពី​​ការ​ដំឡើង​​​ប្រាក់​ខែ​គោល​​ក្នុង​​បណ្ដា​ប្រទេស​នាំចេញ​សម្លៀក​បំពាក់​ធំៗ​នៅ​អាស៊ី ​កម្ពុជាជាប់​ចំណាត់​ថ្នាក់​ជិត​​​បាត​​តារាង​នៅ​ឡើយ​​​សម្រាប់​ប្រាក់​ខែ​​គោល​​ត្រឹម​១៤០​ដុល្លារ​ ពោល​គឺ​​ខ្ពស់​ជាង​ប្រទេស​​​បង់ក្លាដែស និង​​ប្រទេស​ស្រីលង្កា ប៉ុន្តែ​​​នៅ​ក្រោម​វៀតណាម​ ដែល​មាន​ប្រាក់​ខែ​គោល​ចន្លោះ​ពី​១០០​ដុល្លារ​​ទៅ​១៤៦​ដុល្លារ​អាស្រ័យ​​​លើ​តំបន់។ ប្រទេស​ឥណ្ឌូណេស៊ី ម៉ាឡេស៊ី ហ្វីលីពីន និង​ថៃ នៅ​តែ​ខ្ពស់​ជាង​។ ​នៅ​ក្នុង​កិច្ច​ប្រជុំ​​កាល​ពី​ម្សិលមិញ​ របស់​គណៈកម្មការ​ប្រឹក្សា​ការ​ងារ​ដែល​មាន​សមាសភាព​​តំណាង​១៤រូបមក​ពី​​រដ្ឋាភិបាល ៧រូប​​មក​ពី​រោងចក្រ​ និង​៧រូប​មក​ពី​សហជីព រោងចក្រ​​មិន​​ព្រម​ដំឡើង​លើស​ពី​​១៣៣​ដុល្លារ​ឡើយ។ ប៉ុន្តែ​នៅ​ពេល​​ដល់​ពេល​គណៈកម្មការ​បោះ​ឆ្នោត​​ តំណាង​ទាំង​អស់​បាន​បោះ​ឆ្នោត​គាំទ្រ​សំណើ​​១៣៥​ដុល្លារ​​របស់​រដ្ឋាភិបាល​​ លើក​លែង​តែ​សំឡេង​ឆ្នោត​ចំនួន​បួន​។

លោក ណាង សុធី ដែល​ស្ថិត​ក្នុង​ចំណោម​​តំណាង​ប្រាំពីរ​រូប​មក​ពី​រោងចក្រ បាន​លើក​ឡើង​ថា ”​តំណាង​ប្រាំពីរ​រូប​របស់​​និយោជក​ដែល​ស្ថិត​​ក្នុងជួរ​​គណៈ​កម្មការ​ប្រឹក្សា​ការ​ងារ​គាំទ្រ​វា  ព្រោះ​​ដោយ​មានការ​គាំទ្រ​ពី​អង្គការ​ ​​ILO រដ្ឋា​ភិបាល​បាន​សិក្សា​ពី​​ចំនួន​នេះ​យ៉ាង​ប្រុង​​​ប្រយ័ត្ន ដូច្នេះ​យើង​អាច​ទទួល​យក​វា​​បាន​”។

លោក កែន លូ អគ្គលេខាធិការ​​នៃ​សមា​គម​​​​រោងចក្រ​​កាត់ដេរ​នៅ​កម្ពុជា ​ដែល​តំណាង​ឲ្យ​​​រោងចក្រ​​នាំចេញ​សម្លៀក​បំពាក់​ទាំង​អស់​ បាន​​មាន​ប្រសាសន៍​ថា និយោជក​​នឹង​បើក​ប្រាក់​ខែ​​ឲ្យ​កម្មករ​របស់​ខ្លួន​​ចំនួន​១៤០​ដុល្លារ​​តាម​ការ​ដំឡើង​​របស់​លោក​នាយក​រដ្ឋមន្ត្រី​។

លោក​ថ្លែង​ថា “ ប៉ុន្តែ​​ប្រសិន​បើ​ផលិត​ភាព ​​ការងារ​របស់​កម្មករ​មិន​កើន​​​​ឡើង​ ហើយ​​អ្នក​បញ្ជាទិញ​មិន​ចាប់​ផ្ដើម​ដំឡើង​ថ្លៃ​​​សម្រាប់​ការ​​បញ្ជាទិញ​​ទេ​នោះ”​មាន​ដំណោះ​ស្រាយ​តែ​មួយ​​​​​​​​គត់​ គឺ​រោងចក្រ​ត្រូវ​បិទ​ទ្វារ​ ដូច្នេះ​​មិន​ថា​យើង​​​​សប្បាយ​ចិត្ត​ ឬ​មិន​សប្បាយ​ចិត្ត​នោះ​ទេ”។

លោក​​​​បន្ត​​ថា រោងចក្រ​មួយ​ចំនួន​ដែល​​គ្មាន​លទ្ធភាព​​ដោះស្រាយ​​ការ​ដំឡើង​​ប្រាក់​ខែ​​ចុង​ក្រោយ​នេះ​​ បាន​បិទ​ទ្វារ​រួច​ទៅ​ហើយ​ ហើយ​បាន​ព្រមាន​ថា ​វា​ “​ធ្វើ​ឲ្យ​មាន​បញ្ហា​កាន់​​​តែ​ធំទៅ​វិញ​​ទេ​” ប្រសិន​បើ​​​ទំនោរ​បច្ចុប្បន្ន​នៅ​តែ​បន្ត​។ “​យើង​មិន​សង្ឃឹម​ថាវា​នឹង​កើត​ឡើង​ទេ​។ ​​​​ផលិត​ភាព​​​ប្រហែល​ជា​នឹង​កើន​ឡើង​ ហើយ​អ្នក​បញ្ជា​ទិញ​​នឹង​ដំឡើង​ថ្លៃ​​ទិញ ហើយ​រោង​ចក្រ​មិន​​បិទទ្វារ ប៉ុន្តែ​​យើង​មិន​រំពឹង​​បែប​នេះ​​ទេ”។

ទិន្នន័យ​​​ថ្មីបំផុត​​របស់​​រដ្ឋាភិបាល​​បង្ហាញ​ថា ​ពេល​នេះ​កំណើន​នាំចេញ​កំពុង​បង្អន់​ល្បឿន ប៉ុន្តែ​នៅ​តែ​រឹងមាំ​។ តំណាង​ពីរ​រូប​​ដែល​ស្ថិត​​ក្នុង​ជួរ​គណៈ​កម្មការ​ប្រឹក្សា​ការងារ​ បាន​បោះ​​អនុប្បវាទ​​នៅ​ក្នុង​​ការ​បោះ​ឆ្នោត​​​សម្រេច​លើ​​ប្រាក់​ខែ​គោល​កាលពី​ម្សិលមិញ។ ប្រធាន​​​​​សហជីព​ឯករាជ្យ​ពីរ​រូប​​​នៅ​ក្នុង​​ជួរ​គណៈ​កម្មការ​​​​​នេះ គឺ​លោក​ អាត់ ធន់ និង​លោក​ស្រី កែន ឆេង​ឡាង ​មាន​ប្រសាសន៍​ថា ​ពួកគាត់​​ទាំង​ពីរ​​​បាន​បោះ​ឆ្នោត​គាំទ្រ​សំណើ​​​១៦០​ដុល្លារ។

អំឡុង​ពេល​ចរចា​​ លោក អាត់ ធន់ ដែល​ជា​ប្រធាន​​សហជីព​​ឯករាជ្យ​ធំ​បំផុត​នៅ​ក្នុង​ប្រទេស ​បាន​ព្រមាន​ថា ​នឹង​មាន​មហា​កូដកម្ម​ផ្ទុះ​​ឡើង ​ប្រសិន​បើ​កម្មករ​មិន​ពេញ​ចិត្ត​នឹង​ប្រាក់​ខែ​គោល​ថ្មី​នេះ​។

បន្ទាប់​ពី​ការ​ប្រកាស​កាលពី​ម្សិលមិញ លោក​​បាន​បដិសេធ​​មិន​លើក​ឡើង​ថា តើ​១៤០​ដុល្លារ​​សម​នឹង​បញ្ចប់​ការ​ធ្វើ​កូដ​កម្ម ឬ​យ៉ាង​​ណា​ឡើយ ហើយ​បាន​មាន​ប្រសាសន៍​ថា ​​សហជីព​មួយ​ចំនួន​​នឹង​ជួប​ប្រជុំគ្នា​មុន​ពេល​សម្រេច​ថា តើ​ត្រូវ​​ឆ្លើយ​តប​​តាម​​វិធី​ណា។ លោក​ថ្លែង​ថា “បន្ទាប់ពី​ភ្ជុំបិណ្ឌ​រួច ​​យើង​នឹង​ប្រកាស​​ពី​វិធី​ដែល​យើង​នឹង​ធ្វើ​ការ​តវ៉ា​ ហើយ​​​​តស៊ូ​មតិ​លើ​បញ្ហា​នេះ​ យើង​មិន​ទាន់​សម្រេច​​​នៅ​ឡើយ​ទេ”។

សហជីព​ឯករាជ្យ​ភាគច្រើន​​​បាន​បន្ទាប​សំណើ​​ប្រាក់​ខែ​គោល​របស់​ខ្លួន​​ជា​លំដាប់​រហូត​មក​​សល់​​ត្រឹម​​១៦០​ដុល្លារ​អំឡុង​ពេល​ចរចា​ បន្ទាប់ពី​​ចាប់​ផ្ដើម​​​ពី​២០៧​ដុល្លារ ជា​ការ​​ចំណាយ​ជា​មធ្យម​ប្រចាំ​ខែ​របស់​​កម្មករ​កាត់​ដេរ​ជាង​៧០០នាក់​​ ដែល​ត្រូវ​បាន​ស្ទង់មតិ​សម្រាប់​ការ​សិក្សា​​មួយ​កាលពី​ពេល​ថ្មីៗ​នេះ​​ដែល​ធ្វើ​ឡើង​ដោយ​បណ្ដា​អង្គការ​សិទ្ធិ​ការ​ងារ​។ យោង​តាម​ការ​សិក្សា​​ដដែល​នេះ​​​បង្ហាញ​​​​ថា ប្រាក់​ខែ​​ជា​មធ្យម​​របស់​ពួកគេ​​ដែល​រួម​​មាន​​​​​​ទាំង​ប្រាក់​ធ្វើ​ការ​​បន្ថែម​ម៉ោង ប្រាក់​បន្ថែម និង​​​​ប្រាក់​ឧបត្ថម្ភ​សម្រាប់​ចំណី​អាហារ​ និង​ការ​ធ្វើ​ដំណើរ​ផង​​នោះ គឺ​​ស្មើ១៩១​ដុល្លារ​។

ការ​​ស្ទង់​មតិ​នេះ​ក៏​បាន​​រក​ឃើញ​ដែរ​ថា ​​កម្មករ​ភាគច្រើន​លើស​លប់​មិន​ពេញ​ចិត្ត​នឹង​​ប្រាក់​ខែ​គោល​១២៨​ដុល្លារ​​ទេ ហើយ​​​​រំពឹង​ថា រដ្ឋាភិបាល​នឹង​​កំណត់​ប្រាក់​ខែ​គោល​ថ្មី​ចន្លោះ ​​​​ពី​១៦០​ដុល្លារ​ទៅ​១៨០​ដុល្លារ​។

ការ​​ខក​ខាន​របស់​រដ្ឋាភិបាល​មិន​​​បាន​​ធ្វើ​​​តាម​ការ​ទាម​ទារ​​របស់​កម្មករ​​​​កាលពី​ខែ​ធ្នូ ឆ្នាំ​២០១៣ ​បាន​​បង្ក​ឲ្យ​មាន​កូដកម្ម​​ និង​បាតុកម្ម​​ទូទាំង​ប្រទេស​ ដែល​បាន​ធ្វើ​​ឲ្យ​ឧស្សា​​ហកម្ម​នេះ​​ជាប់​គាំង​​មួយ​រយៈ​ពេល​ខ្លី ​ហើយ​បាន​បញ្ចប់​​ទៅ​វិញ​នៅ​ខែ​បន្ទាប់​​ ​ក្រោយ​ពី​​កង​អាវុធហត្ថ​បើក​ការ​បាញ់​ប្រហារ​ទៅ​លើ​ក្រុម​​កម្មករ​ដែល​កំពុង​ធ្វើ​ការ​តវ៉ា​​ក្នុង​​រាជធានី​ភ្នំពេញ បណ្ដាល​ឲ្យ​ពួកគេ​យ៉ាង​ហោច​ណាស់​​ប្រាំ​នាក់​បាត់​បង់ជីវិត​៕ សុខុម

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស