យោងតាមសេចក្តីប្រកាសព័ត៌មានមួយដែលចេញដោយក្រសួងការបរទេសកាលពីថ្ងៃអង្គារឲ្យដឹងថា ជនជាតិភាគតិចម៉ុងតាញ៉ា១៣នាក់ដែលទទួលបានឋានៈជនភៀសខ្លួនក្នុងក្រុងភ្នំពេញ មានពេលបីខែបន្ថែមទៀតសម្រាប់ការស្វែងរកប្រទេសទី៣ណាមួយដើម្បីតាំងទីលំនៅ។
មនុស្សមួយក្រុមមានគ្នា១៣ ដែលបានមកដល់ខេត្តរតនគិរីក្រោយពីឆ្លងព្រំដែន ដោយអះអាងថាភៀសខ្លួនចេញពីការធ្វើទុក្ខបុកម្នេញក្នុងប្រទេសវៀតណាមមួយឆ្នាំមកហើយ បានទទួលឋានៈជាជនភៀសខ្លួននៅខែមីនា ហើយកំពុងរស់នៅក្នុងក្រុងភ្នំពេញ នៅពេលដែលឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ខិតខំស្វែងរកប្រទេសអចិន្ត្រៃយ៍មួយឲ្យពួកគេ។
សេចក្តីប្រកាសព័ត៌មានមានខ្លឹមសារថា ពេលកំណត់ចុងក្រោយសម្រាប់ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនឲ្យពួកគេតាំងលំនៅជាថ្មីបានផុតកំណត់នៅថ្ងៃទី១០ខែតុលា ប៉ុន្តែដោយសារ “កិច្ចសហការល្អ” រវាងរដ្ឋាភិបាលនិងអង្គការសហប្រជាជាតិ មនុស្សទាំង១៣នាក់មានពេលរហូតដល់ថ្ងៃទី១០ខែមករា ដើម្បីស្វែងរកប្រទេសថ្មីមួយ។ នៅមិនទាន់ច្បាស់ ថាពួកគេនឹងប្រឈមវាសនាបែបណាទេ ប្រសិនបើមិនអាចរកបានប្រទេសទី៣នោះ។
ក្នុងសេចក្តីប្រកាសរបស់ខ្លួន ក្រសួងនេះក៏បានពន្យារពេលកំណត់របស់ខ្លួនសម្រាប់ជនជាតិម៉ុងតាញ៉ាជាង២០០នាក់ទៀត ដែលបានជាប់នៅក្នុងក្រុងភ្នំពេញដោយរដ្ឋាភិបាលមិនដំណើរការការសុំឋានៈជនភៀសខ្លួនរបស់ពួកគេ ហើយថែមទាំងប្រាប់ពួកគេឲ្យត្រឡប់ទៅប្រទេសវៀតណាមវិញនៅត្រឹមថ្ងៃទី៦ខែកុម្ភៈ។ នៅពាក់កណ្តាលខែកញ្ញា រដ្ឋាភិបាលបាននិយាយថា ម៉ុងតាញ៉ា២០០នាក់មានពេលបីខែដើម្បីត្រឡប់ទៅប្រទេសវៀតណាមវិញ បើពុំនោះទេ នឹងត្រូវបញ្ជូនទៅវិញទាំងបង្ខំ។
ក្រសួងនេះក៏បានចោទឧត្តមស្នងការអង្គការសហប្រជាជាតិទទួលបន្ទុកជនភៀសថាបានជួយអ្នកស្វែងរកសិទ្ធិជ្រកកោនឲ្យចូលប្រទេសកម្ពុជាដោយខុសច្បាប់។
សេចក្តីប្រកាសព័ត៌មានបានឲ្យដឹងថា “ចំពោះម៉ុងតាញ៉ាជាង២០០នាក់ដែលUNHCR លួចដឹកចូលកម្ពុជាដោយខុសច្បាប់ ជាការរំលោភអធិបតេយ្យភាព”។
លោកស្រី វីវៀន តាន (Vivian Tan) អ្នកនាំពាក្យប្រចាំតំបន់របស់ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន បាននិយាយតាមរយៈអីុម៉េលថា អង្គការនេះកំពុងបន្តស្វែងរកប្រទេសទី៣ណាមួយសម្រាប់ជនភៀសខ្លួន១៣នាក់ ហើយបានបដិសេធការអះអាងដែលថា អង្គការនេះបានរំលោភច្បាប់ណាមួយនោះ។
លោកស្រី តាន បាននិយាយថា “ចំពោះមូលហេតុសម្ងាត់ យើងជាធម្មតាមិនប្រាប់ប្រទេសដែលយើងទាក់ទង [សម្រាប់ការតាំងលំនៅថ្មីទេ] ប៉ុន្តែនឹងស្វែងរកជម្រើសនេះ”។
លោកស្រីបាននិយាយថា “យើងមិនជួយមនុស្សឲ្យចាកចេញពីប្រទេសរបស់ពួកគេ ដើម្បីស្វែងរកសិទ្ធិជ្រកកោននៅកន្លែងផ្សេងទេ។ នៅពេលជនស្វែងរកសិទ្ធិជ្រកកោនមកដល់ប្រទេសកម្ពុជា យើងបញ្ជូនពួកគេទៅរដ្ឋាភិបាលដើម្បីចុះឈ្មោះនិងពិនិត្យសំណុំបែបបទ”៕ និត