កាលពីម្សិលមិញ តំណាងរាស្ត្រគណបក្សប្រឆាំងពីររូបគឺលោក ញ៉យ ចំរើន និងលោក គង់ សភា បានរងរបួសជាទម្ងន់ បន្ទាប់ពីក្រុមមនុស្សហិង្សានៅក្នុងបាតុកម្មមួយដឹកនាំដោយក្រុមយុវជនដែលគាំទ្រគណបក្សប្រជាជនកម្ពុជា បានទាញពួកលោកចេញពីរថយន្ត ហើយវាយដំពួកលោកនៅខាងមុខរដ្ឋសភា។
នៅពេលរដ្ឋសភាបើកសម័យប្រជុំពេញអង្គនាពេលព្រឹក បាតុកររាប់រយនាក់បានបង្ហាញវត្តមាននៅខាងមុខវិមានរដ្ឋសភាដើម្បីទាមទារឲ្យលោក កឹម សុខា អនុប្រធានគណបក្សសង្គ្រោះជាតិ ចុះចេញពីតំណែងអនុប្រធានរដ្ឋសភា។
ដោយស្រែកបន្ទរថា “ កឹម សុខា ចុះចេញទៅ” ដែលយកលំនាំតាមការស្រែកបន្ទរដែលគណបក្សសង្គ្រោះជាតិ ធ្លាប់បានប្រើប្រាស់ក្នុងយុទ្ធនាការរបស់ខ្លួនដើម្បីទាមទារឲ្យលោកនាយករដ្ឋមន្ត្រី ហ៊ុន សែន ចុះចេញពីអំណាចក្រោយការបោះឆ្នោតឆ្នាំ២០១៣នោះ បាតុករទាំងនេះបានរក្សាភាពអហិង្សាភាគច្រើននៃវេលាព្រឹកនេះ។
ទោះជាយ៉ាងណា នៅពេលក្រុមតំណាងរាស្ត្រគណបក្សសង្គ្រោះជាតិ ចាប់ផ្ដើមចាកចេញពីរដ្ឋសភាអំឡុងពេលប្រហែលពាក់កណ្ដាលថ្ងៃត្រង់ ក្រុមបាតុករបានសំដៅទៅរករថយន្តរបស់លោក ញ៉យ ចំរើន និងលោក គង់ សភា ដោយទាញពួកលោកចេញពីរថយន្តមុនពេលជាន់ក្បាល និងរាងកាយរបស់ពួកលោកយ៉ាងរន្ថើន។
នគរបាលដែលត្រូវបានដាក់ពង្រាយនៅចុងសងខាងនៃផ្លូវខាងមុខវិមានរដ្ឋសភា មិនបានអន្តរាគមន៍ឡើយ ខណៈពេលក្រុមបាតុករដែលរួមមានទាំងសន្តិសុខខណ្ឌដែលល្បីខាងវាយដំបាតុកររបស់គណបក្សសង្គ្រោះជាតិផង បានវាយប្រហារទៅលើតំណាងរាស្ត្រទាំងពីរ។
វីដេអូឃ្លីបនៃអំពើហិង្សានោះបង្ហាញពីសកម្មភាពលោក ញ៉យ ចំរើន ដែលមិនអាចការពារខ្លួនឯងបាន និងដែលប្រឡាក់ឈាមស្រោចខ្លួនរួចទៅហើយ ត្រូវបានក្រុមអ្នកតវ៉ាជាន់ដើមទ្រូង ហើយបន្ទាប់មកត្រូវជំនួយការម្នាក់ទាញលោកទៅកន្លែងមានសុវត្ថិភាព ហើយលោក គង់ សភា ត្រូវបានទាញទម្លាក់ពីរថយន្តជាលើកទី២ដោយក្រុមហិង្សាដែលទាត់ធាក់មុខរបស់លោក។
លោក ញ៉យ ចំរើន ដែលធ្លាប់ត្រូវសន្តិសុខខណ្ឌដូនពេញ វាយដំអំឡុងពេលតវ៉ាមួយរបស់គណបក្សសង្គ្រោះជាតិ កាលពីឆ្នាំមុន ដែលធ្វើឲ្យលោកប្រេះលលាដ៍ក្បាល បានមានប្រសាសន៍ថា បាតុករបានទាញទម្លាក់លោកចេញពីរថយន្តកាលពីម្សិលមិញ ដោយគ្មានប្រាប់ជាមុនឡើយ។
លោកបានលើកឡើងថា “គេវាយខ្ញុំនៅខាងក្រៅរដ្ឋសភា បន្ទាប់ពីប្រជុំរួច។ ពួកគេបានរុញខ្ញុំទៅលើស្មៅ ហើយវាយដំខ្ញុំ។ ពួកគេធ្វើឲ្យបាក់ខ្ទង់ច្រមុះខ្ញុំ បាក់ធ្មេញ និងបាក់ស្លឹកត្រចៀក ឆ្អឹងជំនីរ និងបែកភ្នែកខាងស្ដាំ”។
នៅពេលសួរថា តើលោកមានទាស់ពាក្យសម្ដីជាមួយបាតុករដែរឬទេ មុនពេលផ្ទុះអំពើហិង្សា លោក ញ៉យ ចំរើន ឆ្លើយថាលោកមិនបានធ្វើអ្វីទាំងអស់ ហើយលោកគ្រាន់តែព្យាយាមចាកចេញពីរដ្ឋសភាប៉ុណ្ណោះ។ លោកបានមានប្រសាសន៍ថា ”បាតុករនៅខាងក្រៅ ហើយពួកគេគ្រាន់តែឡោមព័ទ្ធខ្ញុំ។ ពួកគេបានទាញខ្ញុំចេញពីឡាន”។
លោក គង់ សភា ដែលជិះក្នុងរថយន្តផ្សេងគ្នា មានប្រសាសន៍ថា លោកក៏កំពុងព្យាយាមចាកចេញពីរដ្ឋសភាដែរ នៅពេលលោកត្រូវគេទាញទម្លាក់ចេញពីក្នុងរថយន្ត ហើយនគរបាលមិនបានប្រឹងប្រែងជួយឡើយ។
លោកថ្លែងថា “ ពេលខ្ញុំចាកចេញពីសភា មានបុរសម្នាក់និយាយតាមអាយកូមទៅអ្នកផ្សេងទៀត បន្ទាប់មកមានបុរសម្នាក់ឈរនៅពីមុខឡានដើម្បីឲ្យយើងឈប់។ ពួកគេបើកទ្វារហើយក៏អូសខ្ញុំចេញ។ ពេលគេកំពុងវាយខ្ញុំដួលទៅលើដី មានមនុស្ស២០នាក់ផ្សេងទៀតបានមកដល់ ហើយព្យាយាមចាប់ខ្ញុំ នៅពេលដែលខ្ញុំព្យាយាមចូលទៅក្នុងឡាន។ ខ្ញុំបានព្យាយាមចូលទៅក្នុងឡានបីដង ប៉ុន្តែគេនៅតែព្យាយាមទាត់ធាក់ខ្ញុំ”។
លោកមានប្រសាសន៍បន្តថា បាតុករក៏បានលួចកាបូបលុយ ទូរស័ព្ទដៃ និងប្រាក់ប្រហែល៣០០ដុល្លាររបស់លោកផងដែរ អំឡុងពេលវាយតប់នោះ។ លោកបញ្ជាក់ថា “មានប៉ូលិសចរាចរពីរបីនាក់ឈរនៅទីនោះ ហើយគ្មានអាជ្ញាធរណាចូលមកធ្វើអន្តរាគមន៍ទេ។ គេគ្រាន់តែឈរមើល ហើយមិនបានចូលមកឃាត់ឡើយ។ ខ្ញុំគិតថា វាជាការរៀបចំទុក ពីព្រោះនៅពេលមនុស្ស២០នាក់មកដល់ បុរសម្នាក់ដែលឈរកាន់អាយកូមបានប្រាប់ទៅអ្នកផ្សេងទៀតឲ្យមកវ៉ៃខ្ញុំ។ ពួកគេប្រហែលជានគរបាល ឬទាហាន ហើយពួកគេចំណាំឡានខ្ញុំបាន”។
លោក សុង លី ស្នងការរងរាជធានីភ្នំពេញបានមានប្រសាសន៍ថា លោកដឹងថា តំណាងរាស្ត្រទាំងនេះត្រូវបានវាយដំអំឡុងពេលចាកចេញពីរដ្ឋសភា ប៉ុន្តែបានបដិសេធមិនឆ្លើយបំភ្លឺទេ ដោយបង្វែរសំណួរទៅនគរបាលខណ្ឌដែលឈរជើងនៅទីនោះ។
លោក ហៀង ថារ៉េត អធិការរងនគរបាលខណ្ឌចំការមន ដែលរដ្ឋសភាស្ថិតក្នុងខណ្ឌនេះ បានបដិសេធមិនធ្វើអត្ថាធិប្បាយជុំវិញហេតុការណ៍នេះ ឬពន្យល់ថា ហេតុអ្វីបានជានគរបាលមិនអន្តរាគមន៍ឡើយ។
បាតុកម្មកាលពីម្សិលមិញ ត្រូវបានដឹកនាំដោយលោក ប៉ាន់ខែម ប៊ុនថន ប្រធានក្រុមសម្ព័ន្ធសេនានាគ ជាក្រុមមួយដែលកាលពីខែមិថុនា បានស្បថជាសាធារណៈថានឹងស្មោះស្ម័គ្រចំពោះគណបក្សប្រជាជនកម្ពុជា និងលោក ហ៊ុន សែន។
មុនពេលបាតុកម្មនេះបានប្រែក្លាយទៅជាហិង្សា តំណាងរាស្ត្រគណបក្សប្រជាជនកម្ពុជា បីរូបគឺលោកស្រី ឡោក ខេង លោក ហ៊ុន ម៉ានី និងលោក សុខ ឥសាន និងលោក ជា ប៉ូច តំណាងរាស្ត្រគណបក្សសង្គ្រោះជាតិ បានទទួលយកញត្តិពីលោក ប៉ាន់ខែម ប៊ុនថន ដែលអំពាវនាវសុំឲ្យដកលោក កឹម សុខា ចេញពីតំណែង។ បន្ទាប់មក មេដឹកនាំបាតុកម្មរូបនេះបាននិយាយទៅកាន់អ្នកគ្រប់គ្នាដែលនៅជុំវិញខ្លួនថា “យើងស្នើសុំឲ្យរដ្ឋសភាដកលោក កឹម សុខា ចេញពីតំណែង។ គាត់ហា៊នដឹកនាំបាតុកម្មប្រឆាំងសម្ដេចរបស់យើង [លោក ហ៊ុន សែន]។ យើងមិនអាចអត់ឱនឲ្យគាត់បានទេ ហើយគាត់ហ៊ានប្រមាថ និងចោទប្រកាន់សម្ដេចថាជាជនកុម្មុយនីស្ត និងជនក្បត់ជាតិ។ បើសម្ដេចជាជនកុម្មុយនីស្តមែន ម៉្លេះលោក កឹម សុខា មិនអាចឈរជើងលើទឹកដីកម្ពុជា ហើយទិញដី ចម្ការម្រេច និងបើកឡានលុចស៊ីសដោយសេរីបានឡើយ។ បក្សប្រឆាំងមិនដែលធ្វើអ្វីដើម្បីប្រទេសទេ ក្រៅតែពីបង្កបញ្ហា និងធ្វើឲ្យប្រជាពលរដ្ឋខ្មែរស្អប់ខ្ពើមគ្នា”។
បន្ទាប់មក លោកស្រី ឡោក ខេង មានប្រសាសន៍ក្នុងទឹកមុខញញឹមរីករាយទៅកាន់ក្រុមបាតុករថា ពួកគេជាគំរូដ៏ល្អនៃការពង្រឹងលទ្ធិប្រជាធិបតេយ្យក្នុងប្រទេសកម្ពុជា។ លោកស្រីលើកឡើងថា ”ថ្ងៃនេះជាថ្ងៃដ៏ចម្លែកដែលទទួលញត្តិពីបងប្អូនដើម្បីដកលោក កឹម សុខា ចេញពីតំណែងអនុប្រធានរដ្ឋសភា” នៅពេលលោកស្រីទទួលយកញត្តិនោះ ហើយសន្យាប្រគល់វាជូនទៅលោក ហេង សំរិន ប្រធានរដ្ឋសភា។
លោកស្រីថ្លែងថា ”អ្វីដែលបងប្អូនបានបង្ហាញគឺឆន្ទៈរបស់បងប្អូនដើម្បីបង្ហាញដល់ពិភពលោកថា នេះគឺជាលទ្ធិប្រជាធិបតេយ្យនៅកម្ពុជា។ ប្រសិនបើរដ្ឋសភាយល់ស្របតាមសំណើរបស់បងប្អូន នឹងមានការបោះឆ្នោត [ជ្រើសរើសអនុប្រធានថ្មី]”។
លោក កឹម សុខា មិនស្ថិតនៅក្នុងសភាទេអំឡុងការតវ៉ា ឬក៏នៅផ្ទះរបស់លោកឡើយនៅពេលរសៀល ពេលដែលអ្នកតវ៉ាជាច្រើនបានទៅទីនោះ ដើម្បីបន្តតវ៉ាទាមទារឲ្យលោកចុះចេញពីតំណែង។
លោក មុត ចន្ថា នាយខុទ្ទកាល័យរបស់លោក កឹម សុខា បានលើកឡើងថា អនុប្រធានគណបក្សសង្គ្រោះជាតិរូបនេះមិនបានចូលរួមសម័យប្រជុំនៅក្នុងសភាឡើយអំឡុងពេលព្រឹក ហើយមិនបានទៅផ្ទះទេដោយសារព្រួយបារម្ភពីសុវត្ថិភាពរបស់លោក។
លោកបានមានប្រសាសន៍ថា “ខ្ញុំមិនអាចបង្ហាញពីទីតាំងរបស់គាត់បានឡើយនៅពេលនេះ ប៉ុន្តែ គាត់មិនបានចូលរួមសម័យប្រជុំពេញអង្គទេព្រឹកមិញនេះ។ ហេតុផលចម្បងគឺសុវត្ថិភាព និងសន្តិសុខរបស់គាត់។ ដូចដែលអ្នកបានដឹងហើយ ក្រុមនេះរៀបផែនការតវ៉ាមានគោលដៅលើរូបគាត់”។
លោកបានបន្ថែមថា “នៅក្នុងស្ថានភាពនេះអ្នកគួរតែយល់ហើយ កុំចាក់សាំងលើភ្លើង។ ភ្លើងបានឆាបឆេះ។ប្រសិនបើយើងដាក់អ្វីមួយលើភ្លើង វានឹងឆាបឆេះកាន់តែខ្លាំង”។
លោក សុខ ឥសាន ដែលក៏ជាអ្នកនាំពាក្យគណបក្សមួយរូបដែរនោះបានលើកឡើងថា លោកមិនច្បាស់ទេថា តើគណបក្សកាន់អំណាចជាអ្នកទទួលខុសត្រូវចំពោះការវាយដំលើតំណាងរាស្ត្រ ឬយ៉ាងណានោះ ដោយពន្យល់ថា អ្នកតវ៉ាគ្មានមេដឹកនាំជាក់លាក់ហើយពួកគេមិនមែនសុទ្ធតែមានទំនាក់ទំនងជាមួយគណបក្សប្រជាជនកម្ពុជាទាំងអស់នោះទេ។
លោកបានមានប្រសាសន៍ថា “ខ្ញុំមិនដឹងទេពីព្រោះមានអ្នកតវ៉ាចម្រុះ។ ខ្ញុំសោកស្តាយណាស់ដែលអ្នកតវ៉ាមកសំដែងសិទ្ធិរបស់គេនៅឯសភាជាតិ ប៉ុន្តែ បែរជាប្រើហិង្សាទៅវិញ។ វាពិបាកនឹងរកឲ្យឃើញអ្នកប្រព្រឹត្តិណាស់” ។
លោកបានបន្ថែមថា “វាមិនមែនរៀបចំដោយគណបក្សប្រជាជនកម្ពុជាទេ។ វាចម្រុះ មិនមែនមានតែគណបក្សប្រជាជនកម្ពុជាប៉ុណ្ណោះទេ។
ពេលថ្លែងកាលពីយប់ថ្ងៃអាទិត្យក្នុងប្រទេសបារាំង ដែលលោកកំពុងបំពេញទស្សនកិច្ចផ្លូវរដ្ឋ លោកនាយករដ្ឋមន្ត្រី ហ៊ុន សែន បានលើកឡើងថា លោកបានដឹងអំពីការតវ៉ានៅព្រឹកថ្ងៃច័ន្ទ ប្រឆាំងលោក កឹម សុខា ។
លោកបានមានប្រសាសន៍ពេលថ្លែងសុន្ទរកថាថា”នៅពេលដែលទីនេះ[ក្រុងបា៉រីស] ធ្វើបាតុកម្ម ខ្ញុំក៏បានទទួលនូវសារពីក្រុងភ្នំពេញ ស្អែកនេះសុំធ្វើបាតុកម្មដែរ។ ឥឡូវឲ្យខ្ញុំត្រូវដោះស្រាយរឿងនេះយ៉ាងម៉េច?” ។
លោកបានមានប្រសាសន៍បន្ថែមថា ”ស្អែកនេះនឹងមានបាតុកម្មនៅក្រុងភ្នំពេញ ដើម្បីប្រឆាំងបក្សប្រឆាំង ហើយនិងទាមទារដកអនុប្រធានសភាជាតិដែលចេញពីបក្សប្រឆាំងព្រោះគេឡើងតាមសន្លឹកឆ្នោតគណបក្សប្រជាជន ដូច្នេះគេត្រូវធ្លាក់វិញតាមសន្លឹកឆ្នោតគណបក្សប្រជាជនដែរ”។
កាលពីឆ្នាំមុនលោក ហ៊ុន សែន និងលោក សម រង្ស៊ី មេដឹកនាំគណបក្សប្រឆាំងបានលើកកម្ពស់ “វប្បធម៌សន្ទនា” ថ្មីមួយដែលមានន័យថា មេដឹកនាំគណបក្សទាំងពីរធ្វើការរកមធ្យោបាយដោះស្រាយការខ្វែងគំនិតគ្នាដោយមិនប្រើអំពើហិង្សា ឬពាក្យមិនសមគួរ។
ទោះជាយ៉ាងណា លោក កែម ឡី ស្ថាបនិក ក្រុម “ខ្មែរដើម្បីខ្មែរ” ជាក្រុមតស៊ូមតិផ្នែកនយោបាយបានលើកឡើងថា លោកសង្ស័យ ថា លោក ហ៊ុន សែន ស្ថិតនៅពីក្រោយអំពើហិង្សាកាលពីម្សិលមិញ ដោយគូសបញ្ជាក់ថា លោកនាយករដ្ឋមន្ត្រីទំនងជាខឹងមួរម៉ៅចំពោះការតវ៉ាដែលតែងតែប្រឆាំងរូបលោកនៅក្រៅប្រទេស។
លោកបានថ្លែងថា “វាជានយោបាយរបស់ លោកនាយករដ្ឋមន្ត្រី ហ៊ុន សែន។ វាផ្អែកលើការតវ៉ានៅសហរដ្ឋអាមេរិកកាលពីពីរបីខែចុងក្រោយនេះ និងនៅក្នុងប្រទេសបារាំងក្នុងពេលឥឡូវ។វាគឺជាវប្បធម៌នយោបាយរបស់ ហ៊ុន សែន។ គាត់តែងតែសងសឹក”។
លោកបានថ្លែងបន្ថែមថា “បើខ្ញុំអានសៀវភៅ ខ្ញុំមិនទាន់បានមើលអ្នកនិពន្ធទេ ប៉ុន្តែមើលខ្លឹមសារសៀវភៅហ្នឹងយើងដឹងថា អ្នកណា អ្នកសរសេរ។ចាប់តាំងពីរបបខ្មែរក្រហមរហូតដល់ពេលនេះ… វប្បធម៌របស់លោកនាយករដ្ឋមន្ត្រី ហ៊ុន សែន តែងតែដូចនេះ។ គាត់រៀនពីវប្បធម៌យោធា ពេលគាត់នៅក្មេង ហើយនេះគឺជាវប្បធម៌យោធា”។
ទោះជាយ៉ាងណា លោក ឡុង ឌីម៉ង់ អ្នកនាំពាក្យសាលារាជធានី បានលើកឡើងថា អ្នកដែលវាយដំតំណាងរាស្ត្រនៅខាងមុខរដ្ឋសភាមិនជាប់ពាក់ព័ន្ធនឹងការតវ៉ាទាមទារឲ្យលោក កឹម សុខា ចុះចេញពីតំណែងអំឡុងពេលព្រឹកឡើយ។
លោកបានមានប្រសាសន៍ថា “ការតវ៉ានេះបានបញ្ចប់នៅម៉ោង១១ព្រឹក ប៉ុន្តែ នៅម៉ោង១២ថ្ងៃត្រង់ មានហេតុការណ៍ប្រើអំពើហិង្សាបង្កឡើងដោយមនុស្សមួយក្រុមតូចដែលយើងមិនស្គាល់មុខ និងដែលប្រើអំពើហិង្សាលើតំណាងរាស្ត្រ”។
លោកបានបន្ថែមថា “យើងថ្កោលទោសពួកគេយ៉ាងដាច់អហង្ការ ហើយអាជ្ញាធរនៅសាលារាជធានីនឹងសើុបអង្កេតតាមរកអ្នកប្រព្រឹត្ត ហើយយកពួកគេមកផ្តន្ទាទោសតាមច្បាប់”៕ សុខុម និង ស៊ុយឈាង (រាយការណ៍បន្ថែមដោយ សេក ឧត្តម ឃួន ណារីម និង គុច ណារ៉េន)