បុគ្គលិកព្រះវិហារបាននិយាយកាលពីម្សិលមិញថា មណ្ឌលថែទាំកុមារដែលគ្រប់គ្រងដោយព្រះវិហារគ្រិស្តសាសនាក្នុងខេត្តក្រចេះ ទីដែលនគរបាលលើកឡើងថា ក្មេងស្រីបីនាក់ត្រូវបានប្ដីរបស់ប្រធានមណ្ឌលនេះរំលោភបំពានផ្លូវភេទនោះ គ្រោងនឹងបើកឡើងវិញក្នុងរយៈពេលប៉ុន្មានថ្ងៃខាងមុខនេះក្រោមការគ្រប់គ្រងរបស់អ្នកគ្រប់គ្រងដដែល។
ព្រះវិហារដំណឹងទាំងបួន (Four Square Churc) ស្ថិតក្នុងឃុំឆ្លូង ស្រុកឆ្លូង ដែលគ្រប់គ្រងដោយអ្នកស្រី ណាវ សៃហូ អាយុ៣២ឆ្នាំ ជាមណ្ឌលថែទាំកុមារប្រហែល១០នាក់ ដែលដេកស្នាក់នៅព្រះវិហារនេះចន្លោះ ពេលរៀនសូត្រនៅសាលាក្បែរនោះ ។
យោងតាមនគរបាលខេត្តបានឲ្យដឹងថា អ្នកស្រី សៃហូ បានទុកឲ្យប្ដីរបស់ខ្លួនឈ្មោះ ញ៉ ធី អាយុ៣៧ឆ្នាំ មើលការខុសត្រូវព្រះវិហារនោះ ខណៈដែលអ្នកស្រីធ្វើដំណើរទៅ ស្រុកសម្បូរ ដើម្បីធ្វើការបណ្ដុះបណ្ដាលកាលពីដើមខែកញ្ញា។អំឡុងពេលលោកស្រីមិននៅ លោក ធី បានបៀតបៀន និងប៉ុនប៉ងរំលោភក្មេងស្រីបីនាក់អាយុចន្លោះ១០ឆ្នាំដល់១២ឆ្នាំ។ លោក ធី ដែលគេកំពុងតាមរកចាប់ខ្លួន កំពុងរត់គេចខ្លួននៅឡើយ។
លោក ពៅ ណារ៉េត អ្នកគ្រប់គ្រងព្រះ វិហារដំណឹងទាំងបួននៅកម្ពុជាបានមានប្រសាសន៍ថា ព្រះវិហារស្ថិតក្នុងឃុំឆ្លូងនេះ នឹងបើកឡើងវិញមិនហួសពីថ្ងៃទី១ ខែវិច្ឆិកាឡើយ ដោយអ្នកស្រី សៃហូ ជាប្រធានរហូតដល់ព្រះវិហារអាចរកតួនាទីថ្មីឲ្យអ្នកស្រីបាន។
លោក ណារ៉េត បានថ្លែងថា “យើងមានគម្រោងផ្លាស់អ្នកស្រីទៅព្រះវិហារផ្សេង ពីព្រោះអ្នកស្រីលែងមានកេរ្តិ៍ឈ្មោះល្អនៅក្នុងតំបន់នេះទៀតហើយ”។ លោកបានបន្ថែម ថា លោកមិនជឿថា វាចាំបាច់ត្រូវបណ្ដេញអ្នកស្រីចេញទេ ពីព្រោះប្ដីអ្នកស្រីបានប្រព្រឹត្តការរំលោភបំពាននេះដោយអ្នកស្រីមិនបានដឹងឡើយ។
ព្រះវិហារ Four Square Gospel អន្តរជាតិដែលមានមូលដ្ឋាននៅអាមេរិកបើកដំណើរការ៩៩កន្លែង ដែលសំដៅដល់ “កន្លែងស្នាក់នៅរបស់កុមារកំព្រាក្នុងព្រះវិហារ” ទូទាំងប្រទេសកម្ពុជា។ លោក ថេដ អុលប្រ៊ីជ (Ted Olbrich) ប្រធានព្រះវិហារដំណឹងទាំង៤នៅ កម្ពុជាបាននិយាយក្នុងបទសម្ភាសន៍កាលពីឆ្នាំ២០១០ជាមួយមណ្ឌល Berkley របស់សាកលវិទ្យាល័យ Georgetown សម្រាប់សាសនា សន្តិភាព និងកិច្ចការពិភពលោកថា ព្រះវិហារនេះបានបញ្ចៀសការគំរាមកំហែងផ្លូវភេទទៅលើកុមារដោយការដាក់ស្ត្រីវ័យចំណាស់ឲ្យមើលការខុសត្រូវលើពួកគេ។
លោក អុលប្រ៊ីជ បានថ្លែងថា “យើងទាំងអស់គ្នាមិនមានបញ្ហាជាមួយជនរំលោភបំពានកុមារដែលអង្គការមិនមែនរដ្ឋាភិបាល ឬព្រះវិហារផ្សេងៗទៀតមាននោះឡើយ ពីព្រោះយើងមានស្ត្រីវ័យចំណាស់ជាច្រើននាក់មើលថែពួកគេ”។
កាលពីម្សិលមិញ លោក ណារ៉េត បានទទួលស្គាល់ថា ព្រះវិហារបានដឹងថា លោក ធី បានចូលរួមមើលថែកុមារនៅមណ្ឌលនេះ ដែលប្រពន្ធរបស់គាត់គ្រប់គ្រង ប៉ុន្តែថា កុមារនៅព្រះវិហារដំណឹងទាំងបួននឹងត្រូវទុកឲ្យនៅជាមួយបុគ្គលិកជាស្ត្រីប៉ុណ្ណោះ។
លោក ណារ៉េត បានថ្លែងថា “ដំណោះស្រាយដែលយើងមានគឺថា នៅពេលអនាគត យើងនឹងទុកឲ្យស្ត្រីម្នាក់នៅចាំព្រះវិហារនេះ គ្រប់ពេលទាំងអស់ ដោយមិនទុកឲ្យបុរសនៅជាមួយក្មេងៗឡើយ”។
បើទោះជាព្រះវិហារទាំងអស់របស់ព្រះ វិហារដំណឹងទាំងបួន ជាមណ្ឌលថែទាំកុមារក៏ដោយ ក៏ភាគច្រើននៃព្រះវិហារទាំងនោះមិនបានចុះបញ្ជីជាមួយក្រសួងសង្គមកិច្ចដែរ។
លោក អ៊ុំ សុផាន់ណារ៉ា ប្រធាននាយក ដ្ឋានសុខុមាលភាពកុមារនៃក្រសួងសង្គមកិច្ចបានមានប្រសាសន៍ថា លោកបានដឹងពីករណី ក្នុងឃុំឆ្លូងនេះ ប៉ុន្តែថា ដោយសារព្រះវិហារ នេះមិនមែនជាមណ្ឌលកុមារកំព្រាផ្លូវការ លោកមិនមានកាតព្វកិច្ចពិនិត្យមើលឡើយ។
លោកបានថ្លែងថា “យើងមិនពិនិត្យមើលមណ្ឌលដែលមានមូលដ្ឋាននៅក្នុងសហគមន៍ឡើយ។ នគរបាលស៊ើបអង្កេតករណីទាំងនោះ ហើយនគរបាលកំពុងធ្វើការលើករណីនេះ”។
លោក សុផាន់ណារ៉ា បានបន្ថែមថា “មានបញ្ហាជាច្រើនដែលគ្មានការថែទាំត្រឹមត្រូវ ហើយ [មណ្ឌលថែទាំសហគមន៍ទាំងនេះ] មិនបានឆ្លើយតបតាមស្ដង់ដារឡើយ។ លោកបានថ្លែងថា នឹងមានការរៀបចំកិច្ចប្រជុំនៅខែក្រោយរវាងមន្ត្រីមន្ទីរសង្គមកិច្ចខេត្ត និងមន្ត្រីមន្ទីរធម្មការ និងសាសនាខេត្តដើម្បីកំណត់ថា នរណាទទួលខុសត្រូវក្នុងការពិនិត្យមើលមណ្ឌលទាំងនេះ”។
លោក តូ ដុង ប្រធានមន្ទីរសង្គមកិច្ចខេត្តបានមានប្រសាសន៍ថា លោកបានស៊ើបអង្កេត រួចហើយពីការរំលោភបំពាននេះ ប៉ុន្តែមិនអាចចាត់វិធានការដាក់ទោសទណ្ឌបានឡើយ ពីព្រោះព្រះវិហារនេះបានចុះបញ្ជីជាមួយក្រសួងធម្មការ និងសាសនា។
លោកបានលើកឡើងថា ”មិនថាព្រះវិហារ នេះនឹងនៅតែបើកដំណើរការឬក៏បិទនោះឡើយ គឺអាស្រ័យលើ[ការប្រជុំ] នៅខែក្រោយ”៕ សារុន