មន្ត្រីតុលាការមួយរូបបានឲ្យដឹងកាលពីម្សិលមិញថា ព្រះរាជអាជ្ញាកំពុងបន្តពិនិត្យមើលរូបភាពវីដេអូនៃហេតុការណ៍ប្រើអំពើហិង្សាកាលពីខែមុនទៅលើតំណាងរាស្ត្រគណបក្សប្រឆាំងពីររូប គឺលោក ញ៉យ ចំរើន និង លោក គង់ សុភា ហើយអាចនឹងបង្គាប់ឲ្យចាប់ខ្លួនមនុស្សបន្ថែមទៀត បន្ទាប់ពីទាហានបីនាក់ចូលសារភាពកាលពីសប្តាហ៍មុន។
ប៉ុន្តែ សមត្ថកិច្ចនៅតែបន្តអះអាងថា ខ្លួនមិនដឹងអង្គភាពយោធារបស់ទាហានទាំងបីនាក់នេះឡើយ ទោះបីជាសាធារណជនអំពាវនាវឲ្យបញ្ចេញឈ្មោះ និងស៊ើបអង្កេតថ្នាក់លើរបស់ពួកគេដោយសារមានការចោទប្រកាន់ថា ការវាយប្រហារនេះត្រូវបានរៀបចំទុកយ៉ាងល្អក៏ដោយ។
លោក មាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញ ដែលទទួលបន្ទុកសំណុំរឿងនេះ បានបញ្ជាក់ម្តងហើយម្តងទៀតថា សមត្ថកិច្ចមិនប្រាកដថា ទាហានដែលត្រូវបានចាប់ខ្លួនទាំងបីនាក់មកពីណាទេ។
លោកថ្លែងថា “ខ្ញុំគ្រាន់តែដឹងថា ពួកគេជាទាហាន ប៉ុន្តែ ខ្ញុំមិនដឹងថា ពួកគេធ្វើការនៅអង្គភាពណាទេ។
យោងតាមវីដេអូបង្ហាញថា “មានអ្នកប្រើអំពើហិង្សាច្រើននាក់ផ្សេងទៀត ដូច្នេះយើងកំពុងបន្តសើុបអង្កេត។ ខ្ញុំមិនអាចប្រាប់អស់លោកបានទេពាក់ព័ន្ធអ្នកផ្សេងទៀត ពីព្រោះនេះជាការសើុបអង្កេត។ បើខ្ញុំប្រាប់អស់លោកពីបញ្ហានេះ ពួកគេនឹងដឹងខ្លួន ហើយរត់គេចជាមិនខាន”។
ព្រះរាជអាជ្ញារងរូបនេះបានបដិសេធមិនធ្វើអត្ថាធិប្បាយបន្ថែមទៀតទេជុំវិញសំណុំរឿងនេះ ហើយបានបង្វែរសំណួរទៅចៅក្រមសើុបសួរ អីុ ថាវរៈ ដែលបានបដិសេធមិនឆ្លើយបំភ្លឺ។
ចំណែកឯលោក សៀង សេន ប្រធាននាយកដ្ឋានសន្តិសុខផ្ទៃក្នុងនៃក្រសួងមហាផ្ទៃ និងជាសមាជិកមួយរូបនៃគណៈកម្មការដែលមានសមាជិកប្រាំបីរូបទទួលបន្ទុកសើុបអង្កេតការវាយប្រហារនេះ បានថ្លែងថា ពួកលោកកំពុងបន្តសើុបអង្កេតដោយប្រុងប្រយ័ត្ន។
ឧត្តមសេនីយ៍ទោរូបនេះបានមានប្រសាសន៍ថា “គណៈកម្មការកំពុងបន្តសើុបអង្កេត” ដោយពន្យល់ថា ក្រុមរបស់លោកមានការប្រុងប្រយ័ត្នណាស់ចំពោះរូបភាពដែលបង្ហោះតាមបណ្ដាញទំនាក់ទំនងសង្គម ពីព្រោះវាអាចត្រូវគេកែ។
លោកលើកឡើងបន្តថា ”វីដេអូនៅតាមទំព័រហ្វេសប៊ុកមិនអាចយកធ្វើជាផ្លូវការបានទេក្នុងសម័យទំនើបនេះ”។
បណ្តាគេហទំព័របណ្តាញទំនាក់ទំនងសង្គម ជាពិសេសហ្វេសប៊ុក មានពេញទៅដោយវីដេអូឃ្លីប និងរូបថតនៃការវាយប្រហារនោះចាប់តាំងពីហេតុការណ៍នោះបានកើតឡើងកាលពីថ្ងៃ២៦ ខែតុលាមក ដោយបណ្ដាអ្នកប្រើប្រាស់បណ្តាញទំនាក់ទំនងសង្គមបានព្យាយាមកំណត់អត្តសញ្ញាណក្រុមបុរសដែលគេមើលឃើញធ្វើសកម្មភាពទាត់ធាក់ និងជាន់តំណាងរាស្ត្រគណបក្សសង្គ្រោះជាតិ។
ដោយឡែកលោក ឆៃ ស៊ីណារិទ្ធ អគ្គស្នងការរងនគរបាលជាតិ និងជាអនុប្រធានគណៈកម្មការសើុបអង្កេតនេះ មិនអាចទាក់ទងបានទេ។
ទោះជាយ៉ាងណា លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា គណៈកម្មការត្រៀមខ្លួនរួចជាស្រេចដើម្បីអនុវត្តតាមដីកាបង្គាប់របស់សាលាដំបូងរាជធានី។លោកលើកឡើងថា “យើងកំពុងរង់ចាំដីកាបង្គាប់ពីតុលាការ រង់ចាំមើលថា តើតុលាការបញ្ជាឲ្យធ្វើអី”។ ដោយលោកគូសបញ្ជាក់ថា លោកក៏មិនដឹងដែរថាទាហានទាំងនោះមកពីណា ប៉ុន្តែលោកប្រាកដថា ពួកគេមិនមែនមកពីអង្គភាពអង្គរក្សនាយករដ្ឋមន្ត្រីឡើយ។
លោកមានប្រសាសន៍ថា ”[អង្គភាពអង្គរក្ស] បានប្រកាសបដិសេធហើយថា ពួកគេមិនមែនជាមន្ត្រីយោធាចេញពីអង្គភាពអង្គរក្សទេ”។
លោក សម រង្ស៊ី ប្រធានគណបក្សប្រឆាំងដែលបានធ្វើដំណើរទៅកាន់ប្រទេសម៉ុងហ្គោលី កាលពីថ្ងៃព្រហស្បតិ៍ បានអំពាវនាវឲ្យមានការសើុបអង្កេតទូលំទូលាយ ហើយបានចោទប្រកាន់លោកនាយករដ្ឋមន្ត្រី ហ៊ុន សែន ថាជាអ្នករៀបចំការវាយប្រហារតំណាង រាស្ត្ររបស់លោក។
កាលពីសប្តាហ៍មុន លោក ខៀវ សុគ័ក បានមានប្រសាសន៍ថា លោកជឿថា ទាហានដែលត្រូវបានចាប់ខ្លួនទាំងបីនាក់ដែលមានឈ្មោះ ចាយ សារិទ្ធ អាយុ៣៣ឆ្នាំ ម៉ៅ ហឿន អាយុ៣៤ឆ្នាំ និង សុត វណ្ណនី អាយុ៤៥ឆ្នាំ បានធ្វើសកម្មភាពដោយខ្លួនឯង មិនមែនធ្វើតាមបទបញ្ជារបស់នរណាឡើយ។
លោក ហ៊ុន សែន បានមានប្រសាសន៍ថា លោកជឿថា ទាហានទាំងនេះគ្រាន់តែប្រតិកម្មទៅនឹងពាក្យប្រមាថមាក់ងាយពីសំណាក់តំណាងរាស្ត្រទាំងពីរប៉ុណ្ណោះ ខណៈ តំណាងរាស្ត្រទាំងពីរចាកចេញពីវិមានរដ្ឋសភា ហើយបានប្រើអំពើហិង្សាដោយសារតែកំហឹង។
ប៉ុន្តែ បណ្តាអង្គការសង្គមស៊ីវិល និងគណបក្សសង្គ្រោះជាតិបានធ្វើការកត់សម្គាល់ថា ការវាយប្រហារដែលបានកើតឡើងអំឡុងបាតុកម្មប្រឆាំងលោក កឹម សុខា អនុប្រធានគណបក្សប្រឆាំង ដែលលោក ហ៊ុន សែន បានជំរុញនៅយប់មុននោះហាក់ដូចជាមានការរៀបចំទុកមុនយ៉ាងល្អ។
ពួកគេនិយាយថា សន្តិសុខនៅរដ្ឋសភាបានបញ្ជាឲ្យរថយន្តរបស់តំណាងរាស្ត្រទាំងពីរបើកឆ្ពោះទៅកន្លែងដែលកើតមានអំពើហិង្សាលើពួកលោក បន្ទាប់ពីពួកគេមិនអនុញ្ញាតឲ្យរថយន្តរបស់ពួកលោកបើកចេញតាមច្រកទ្វារចេញដូចសព្វមួយដង ហើយថា នគរបាលដែលឈរជើងនៅក្បែរនោះ បានបណ្តោយឲ្យហេតុការណ៍នោះកើតឡើង។
លោក សម រង្ស៊ី អះអាងថា ការវាយប្រហារនេះធ្វើឡើងដើម្បីតបតទៅនឹងបាតុកម្មដែលបានស្វាគមន៍លោក ហ៊ុន សែន នៅបរទេស ហើយលោកនាយករដ្ឋមន្ត្រីដែលបានថ្កោលទោសការវាយប្រហារនេះ បានមានប្រសាសន៍ថា ពិតណាស់ បាតុកម្មដែលបានកើតឡើងគឺត្រូវបានរៀបចំឡើងដើម្បីសងសឹក។
លោក ហ៊ុន សែន បានលើកឡើងក្នុងសុន្ទរកថាកាលពីថ្ងៃព្រហស្បតិ៍ថា “បើគ្មានភ្លើង វាក៏គ្មានផ្សែងដែរ បើគ្មានបាតុកម្មនៅញូវយ៉ក និងបាតុកម្មនៅប៉ារីស ក៏អត់មានបាតុកម្មនៅភ្នំពេញដែរ”៕សុខុម