កាលពីម្សិលមិញ លោក ហោ ណាំហុង រដ្ឋមន្ត្រីក្រសួងការបរទេសបានកោះហៅបណ្ដាអង្គទូតប្រចាំប្រទេសកម្ពុជា ដើម្បីប្រាប់ថា លោកមិនជាប់ពាក់ព័ន្ធការចេញដីកាចាប់ខ្លួនលោក សម រង្ស៊ី ប្រធានគណបក្សប្រឆាំងកាលពីសប្ដាហ៍មុនឡើយ។
រដ្ឋមន្ត្រីរូបនេះក៏បានព្យាយាមពន្យល់បកស្រាយអំពីវិធានការរបស់រដ្ឋាភិបាលនៅក្នុងការស្វះស្វែងចាប់ខ្លួនលោក សម រង្ស៊ី តាមការផ្ដន្ទាទោសបទបរិហារកេរ្តិ៍ដែលមានអាយុកាល៤ឆ្នាំទៅហើយក្នុងបណ្ដឹងរបស់លោក ហោ ណាំហុង ដោយអះអាងថា ជម្លោះនេះមិនមែនជារឿងនយោបាយឡើយ ប៉ុន្តែគឺជារឿងផ្ទាល់ខ្លួន។
លោកបានថ្លែងទៅកាន់ក្រុមអ្នកយកព័ត៌មានក្រោយពីជំនួបរបស់លោកជាមួយមន្ត្រីការទូតនៅឯក្រសួងការបរទេសថា “ទាក់ទិនឯកឧត្ដម សម រង្ស៊ី ខ្ញុំបានជម្រាបអង្គទូតថា មិនមែនជាទំនាស់រវាងគណបក្ស និងគណបក្សទេ។ មិនមែនជាបញ្ហានយោបាយទេ។ វាជាបញ្ហារវាងឯកឧត្ដម សម រង្ស៊ី និងខ្ញុំចាប់តាំងពីឆ្នាំ២០០៨នៅឯជើងឯក ឯកឧត្ដម សម រង្ស៊ី បានបរិហារកេរ្តិ៍ខ្ញុំនៅចំពោះមុខមនុស្សរាប់រយនាក់ “។
លោក ហោ ណាំហុង បានប្ដឹងលោក សម រង្ស៊ី បន្ទាប់ពីប្រធានគណបក្សប្រឆាំងរូបនេះបានថ្លែងសុន្ទរកថាចោទប្រកាន់លោកថា ចូលដៃជើងជាមួយខ្មែរក្រហម ខណៈពេលជាប់ឃុំនៅគុកបឹងត្របែក។ លោក សម រង្ស៊ី ត្រូវបានតុលាការកាត់ឲ្យជាប់ទោសកាលពីឆ្នាំ២០១១ ហើយផ្ដន្ទាទោសឲ្យជាប់ពន្ធនាគាររយៈពេល២ឆ្នាំ ប៉ុន្តែសាលក្រមនេះមិនត្រូវបានអនុវត្តរហូតដល់សប្ដាហ៍មុន ជាពេលដែលសាលាដំបូងរាជធានីភ្នំពេញ ចេញដីកាចាប់ខ្លួនប្រធានគណបក្សប្រឆាំងរូបនេះក្រោយពីមានសំណើពីលោក ការ សាវុត្ថ មេធាវីរបស់លោក ហោ ណាំហុង។
ទោះជាយ៉ាងណា លោក ហោ ណាំហុង បានបញ្ជាក់កាលពីម្សិលមិញថា លោក ការ សាវុត្ថ មិនបានធ្វើជួសមុខឲ្យរូបលោកនោះទេ ហើយថា សំណើនេះបានធ្វើឲ្យលោករួមទាំងលោកនាយករដ្ឋមន្ត្រី ហ៊ុន សែន ដែលជាកូនក្ដីមួយរូបទៀតរបស់លោក ការ សាវុត្ថ ផង មានការភ្ញាក់ផ្អើលយ៉ាងខ្លាំង។
រដ្ឋមន្ត្រីរូបនេះបានលើកឡើងបន្តថា “ខ្ញុំបានផ្ទេរសិទ្ធិដោះស្រាយសំណុំរឿងនេះទៅមេធាវីរបស់ខ្ញុំហើយ ហើយខ្ញុំមិនបានបញ្ជាគាត់ទាល់តែសោះ។ សំណើសុំឲ្យចេញដីកាចាប់ខ្លួននេះធ្វើឡើងដោយមេធាវីរបស់ខ្ញុំ វាមិនមែនជាបញ្ជារបស់ខ្ញុំទេ។ ទាំងខ្ញុំទាំងសម្ដេចតេជោ ហ៊ុន សែន មិនបានដឹងថា មេធាវីរបស់ខ្ញុំកំពុងធ្វើអ្វីនោះទេ រហូតដល់ចេញដីកាចាប់ខ្លួន។ ដូច្នេះ វាមិនពាក់ព័ន្ធនឹងសម្ពាធនយោបាយ [ពីគណបក្សប្រជាជនកម្ពុជា] ទេ ហើយវាមិនមែនជាជម្លោះរវាងបក្ស និងបក្សទេ”។ នៅពេលសុំឲ្យធ្វើអត្ថាធិប្បាយកាលពីម្សិលមិញ លោក ការ សាវុត្ថ បានផ្ដាច់ទូរស័ព្ទរបស់អ្នកយកព័ត៌មាន។
លោក សម រង្ស៊ី ដែលស្ថិតនៅកូរ៉េខាងត្បូង នៅពេលតុលាការចេញដីកាចាប់ខ្លួនលោកមិនទាន់វិលត្រឡប់មកកាន់ប្រទេសកម្ពុជាវិញទេ។ កាលពីថ្ងៃច័ន្ទ ប្រធានគណបក្សប្រឆាំងរូបនេះត្រូវបានតំណាងរាស្ត្រគណបក្សប្រជាជនកម្ពុជា ដកចេញពីរដ្ឋសភា និងដកអភ័យឯកសិទ្ធិសភារបស់លោកទៀត។
មន្ត្រីស្ថានទូតជាច្រើនបានបដិសេធមិនធ្វើអត្ថាធិប្បាយទេកាលពីម្សិលមិញ ស្ដីពីជំនួបបិទទ្វារពិភាក្សាជាមួយលោក ហោ ណាំហុង។
លោក ចេ រ៉េមែន (Jay Raman) អ្នកនាំពាក្យស្ថានទូតអាមេរិក គ្រាន់តែបានបញ្ជាក់ពីវត្តមានចូលរួមរបស់ភារធារី ជូលី ឆាំង (Julie Chung) ប៉ុណ្ណោះ ហើយបានលើកឡើងបន្ថែមថា ជំហររបស់ស្ថានទូតលើស្ថានភាពចលាចលផ្នែកនយោបាយកាលពីពេលថ្មីៗនេះក្នុងប្រទេសកម្ពុជា នៅតែមិនផ្លាស់ប្តូរ។
សេចក្ដីថ្លែងការណ៍មួយចេញដោយស្ថានទូតនេះក្រោយការដកលោក សម រង្ស៊ី ចេញពីរដ្ឋសភាកាលពីថ្ងៃច័ន្ទ បានអំពាវនាវឲ្យប្រគល់អភ័យឯកសិទ្ធិជូនប្រធានគណបក្សប្រឆាំងរូបនេះវិញជាបន្ទាន់ ហើយលុបចោលដីកាចាប់ខ្លួន។
លោក នីកូឡាស ប៊ូឌង់ (Nicolas Baudouin) អ្នកនាំពាក្យស្ថានទូតបារាំង ក៏បានបញ្ជាក់ដែរថា ឯកអគ្គរដ្ឋទូតរបស់ប្រទេសលោកក៏បានចូលរួមដែរ ប៉ុន្តែបដិសេធមិនឆ្លើយរាល់សំណួរស្ដីពីជំនួបនេះទេ។ លោកបានលើកឡើងតាមរយៈសារអេឡិចត្រូនិកថា “យើងព្រួយបារម្ភចំពោះការចេញដីកាចាប់ខ្លួនលោក សម រង្ស៊ី ហើយក្រោយមកដកលោកចេញពីប្រធានគណបក្សប្រឆាំងរបស់កម្ពុជា នៅក្នុងរដ្ឋសភា។ យើងសូមបញ្ជាក់ជាថ្មីថា យើងមានបំណងចង់ឲ្យបន្តការចរចាផ្នែកនយោបាយរវាងគណបក្សទាំងពីរដោយស្មារតីសន្តិវិធី និងការទទួលខុសត្រូវពីគ្រប់ភាគីទាំងអស់ ហើយឈរលើមូលដ្ឋាននៃកិច្ចព្រមព្រៀងនយោបាយខែកក្កដា ឆ្នាំ២០១៤”។
កាលពីថ្ងៃអង្គារ អ្នកនាំពាក្យលោក បាន គីមូន អគ្គលេខាធិការអង្គការសហប្រជាជាតិ បានចេញសេចក្ដីថ្លែងការណ៍ស្រដៀងគ្នាមួយដោយគូសបញ្ជាក់ថា លោក បាន គីមូន កំពុងតាមដានដោយក្ដីបារម្ភចំពោះភាពតានតឹងកាន់តែខ្លាំងឡើងរវាងគណបក្សកាន់អំណាច និងគណបក្សប្រឆាំងក្នុងប្រទេសកម្ពុជា។ លោកអគ្គលេខាធិការជំរុញឲ្យគណបក្សសង្គ្រោះជាតិ និងគណបក្សប្រជាជនកម្ពុជា បន្តកិច្ចសហប្រតិបត្តិការ និងការសន្ទនារបស់ខ្លួន ហើយជំរុញឲ្យភាគីនយោបាយទាំងអស់ចៀសវាងអំពើហិង្សា ការបំភិតបំភ័យ និងការបៀតបៀនយាយី”។
លោក ហ្វីល រ៉ូបឺតសុន (Phil Robertson) អនុប្រធានអង្គការឃ្លាំមើលសិទ្ធិមនុស្ស (HRW) ប្រចាំតំបន់អាស៊ី បានមានប្រសាសន៍ថា មន្ត្រីការទូតដែលលោក ហោ ណាំហុង បានកោះហៅ ទំនងជាមិនទទួលឥទ្ធិពលពីការពន្យល់បកស្រាយរបស់រដ្ឋមន្ត្រីរូបនេះឡើយ។
លោកលើកឡើងតាមសារអេឡិចត្រូនិកមួយថា “លោក ហោ ណាំហុង គ្រាន់តែធ្វើការងាររបស់ខ្លួនតាមរយៈការប្រឌិតរឿងប្រាប់អង្គទូតតែប៉ុណ្ណោះ។ ប៉ុន្តែខ្ញុំមិនរំពឹងថា មនុស្សជាច្រើននៅក្នុងសហគមន៍ការទូត នឹងជឿអ្វីដែលគាត់និយាយឡើយ”៕ សុខុម