29 C
Phnom Penh

ក្រសួង​​​មហាផ្ទៃ​​​ក្តៅក្រហាយ​​​​​​ចំពោះ​​​ជំនួយ​​​របស់​​​​​​អូស្ត្រាលី​​​ផ្តល់​​​​​​ដល់​​​កម្ពុជា​​​

ដោយ ឌឹ ខេមបូឌា ដេលី

បទវិភាគ

រហូត​​​មក​​​ទល់​​​ពេល​​​នេះ​​​ប្រទេស​​​អូស្ត្រាលី​​​  បាន​​​ផ្តល់​​​ជំនួយជា​​​ប្រាក់​​​ជាង​​​៣,៥លាន​​​ដុល្លារ​​​ដល់​​​កម្ពុជា​​​រួច​​​ហើយ​​​ជា​​​ផ្នែក​​​នៃ​​​កិច្ច​​​ព្រម​​​ព្រៀង ​​​ដែលជា​ថ្នូរនឹង​ការ​អនុញ្ញាត​ឲ្យ​​​​ជន​​​ភៀស​​​ខ្លួន​​​ដែល​​​អូស្រា្តលី​មិន​​​​ទទួល​យក​អាច​តាំង​​​លំនៅ​​​ថ្មី​នៅ​​​ទី​​​នេះបាន​ ប៉ុន្តែ អ្នក​​​នាំ​​​ពាក្យ​​​ក្រសួង​​​មហាផ្ទៃ​​​​​​​​​មានការ​​​ក្តៅ​​​ក្រហាយ​​​យ៉ាង​​​ខ្លាំង​​​​ដោយ​​​ហេតុថា ប្រាក់​​​នេះ​​​ត្រូវ​​​បាន​​​ផ្តល់​​​មក​​​​​​ឲ្យ​​​ កម្ពុជា​​​​តាម​​​រយៈ​​​ទីភ្នាក់​​​ងារ​​​អភិវឌ្ឍន៍​​​ មិន​​​មែន​​​ផ្តល់​​​ទៅ​​​ឲ្យ​​​រដ្ឋាភិបាល​​​ដោយ​​​ផ្ទាល់​​​នោះ​​​​​​។

ស្ថាន​​​ទូត​​​អូស្ត្រាលី​​​បាន​​​បញ្ជាក់​​​កាល​​​ពី​​​ម្សិល ​​​មិញ​​​ថា ខ្លួន​​​បាន​​​​​​​​​​ចាប់ផ្តើម​ចំណាយ​​​ប្រាក់​​​ដែល ជាផ្នែក​​នៃ​ប្រាក់​ចំនួន​​​៤០លាន​ដុល្លារ​អូស្ត្រាលី​ (២៩,១៦​​​លាន​​​ដុល្លារ​​​) ​​​​​​ដែល​​​លោក​​​ស្រី  ជូលី ប៊ីសប​​​ (Julie Bishop) រដ្ឋ​​​មន្ត្រី​​​ក្រសួង​​​ការ​​​បរទេស​​​អូស្ត្រាលី​​​បាន​​​សន្យា​​​ផ្តល់​​​​សម្រាប់​​​រយៈ​​​ពេល​​​៤ឆ្នាំ​​​ជា​​​ថ្នូរ​​​នឹង​​​ការ​​​ឲ្យ​​​រដ្ឋាភិបាល​​​​​​ក្រុង​​​ភ្នំពេញ​​​ទទួល​​​យក​​​ជន​​​ភៀស​​​ខ្លួន​​​ដែល​​​បច្ចុប្បន្ន​​​​​​រដ្ឋាភិបាល​ក្រុង​កង់បេរ៉ា​ឃុំ​​​ខ្លួន​​​នៅ​​​លើ​​​​​​ប្រទេស​​​ណូរ៉ូ​​​ ​​​ជា​​​ប្រទេស​​​ដែន​​​កោះ​​​ស្ថិត​​​នៅកណ្តាល​មហា​សមុទ្រ​​​ប៉ាស៊ីហ្វិក​​​។

អ្នក​​​នាំ​​​ពាក្យ​​​ស្ថាន​​​ទូត​​​នេះ​​​បាន​​​សរសេរ​​​នៅ​ក្នុង​​​អីុម៉េល​​​មួយ​​​ថា ”ប្រាក់​​​ចំនួន​​​៤,៩៥​​​លាន​​​ដុល្លារ​​​អូស្ត្រាលី [ ៣,៩១​​​លាន​​​ដុល្លារ ​​​​​​] នៃ​​​មូល​​​និធិ​​​ទាំង​​​នោះ​​​ត្រូវ​​​បាន​​​ចំណាយ​​​ក្នុង​​​ឆ្នាំ​​​២០១៤​​​ដល់​​​២០១៥​​​ ហើយ​​​យើង​​​កំពុង​​​តែ​​​ស្ថិត​​​ក្នុង​​​ដំណើ​​​រការ​​​ដើម្បី​​​ធានា​ឲ្យ​​​បាន​​​ថា ​​​ចំនួន​​​ទឹក​​​ប្រាក់​​​ទាំង​​មូល​​​ត្រូវ​​​បាន​​​ចំណាយ​​​សម្រាប់​​​រយៈ​​​ពេល​​​បួន​​​ឆ្នាំ​​​ដូច​​​ដែល​​​បាន​​​ប្រកាស​​​​។ មូល​​​និធិ​​​ទាំង​​​នោះ​​​បាន​​​ចាប់​​​ផ្តើម​​​ចំណាយ​​​សម្រាប់​​​ប្រយោជន៍​​​ពល​​​រដ្ឋ​​​ខ្មែរ​​​តាម​​​រយៈ​​​ការ​​​ចូល​​​រួម​​​ចំណែក​​​នៅ​​​ក្នុង​​​កម្ម​​​វិធី​​​អភិវឌ្ឍន៍​​​ដែល​​​មាន​​​ស្រាប់​​​លើ​​​វិស័យ​​​​​​ផលិត​​​ភាព​​​កសិកម្ម​​​ ការ​​​បោស​​​សម្អាត​​​មីន និង​​​កំណែ​​​ទម្រង់​​​ការ​​​បោះ​​​ឆ្នោត​​​”។

យោង​​​តាម​​​អ្នក​​​នាំ​​​ពាក្យ​​​រូប​​​នេះ​​​បាន​​​ឲ្យដ​​​ឹង​​​ថា ប្រាក់​​​ចំនួន​​​២,១៩​​​លាន​​​​​ដុល្លារ​​​ត្រូវ​​​បាន​​​ផ្តល់​​​ទៅ​​​ឲ្យ​​​ UNDP សម្រាប់​​​កិច្ច​​​ខិត​​​ខំ​​​ប្រឹង​​​ប្រែង​​​ដោះ​​​មីន ៧៣០.០០០ដុល្លារ​​​ត្រូវ​​​បានផ្តល់​​​ទៅ​​​ឲ្យ​​​កម្ម​​​វិធី​​​​លើកស្ទួយ​វិស័យ​កសិកម្ម​នៅ​​កម្ពុជា​​​​​​ (Cambodia Agricultural Value Chain program)សម្រាប់​​​រោង​​​ម៉ាស៊ីន​​​កិន​​​ស្រូវ​​​ និង​​​គម្រោង​​​នាំ​​​ចេញ​​​អង្ករ​​​ និង​១៨២.០០០ដុល្លារ​​​បាន​​​ចំណាយ​​​លើ​​​កំណែ​​​ទម្រង់​​​ការ​​​បោះឆ្នោត​​​តាម​​​រយៈ​​​អង្គការ​​​Unicef ហើយ​​​ ៥១០.០០០​​​ដុល្លារ​​​ផ្សេង​​​ទៀត​​​​​​”ត្រូវ​​​បាន​​​ផ្តល់​​​ទៅ​ឲ្យ​​​​កម្មវិធី​​​អភិវឌ្ឍន៍​​​ផ្សេង​​​ៗ​​​ដែលមានស្រាប់”​​​​។

អ្នក​​​នាំ​​​ពាក្យ​​​រូប​​​នេះ​​​បាន​​​លើក​​​ឡើង​​​ទៀត​​​ថា “ជំនួយ​​​របស់​​​អូស្ត្រាលី​​​មក​​​ឲ្យ​​​កម្ពុជា​​​​​​ត្រូវ​​​បាន​​​នាំ​​​មក​​​តាម​​​រយៈ​​​អង្គ​​​ការ​​​ដៃ​គូ​​​ជា​​​យូរ​​​មក​​​ហើយ​​​មួយ​​​ចំនួន រួម​​​មាន​​​ដូច​​​ជា​​​អង្គការ​​​សហ​​​ប្រជា​​​ជាតិ ធនាគារ​​​ពិភព​​​លោក​​​ ធនាគារ​​​អភិវឌ្ឍន៍​​​អាស៊ី​​​ អង្គការ​​​មិន​​​មែន​​​រដ្ឋាភិបាល​​​របស់​​​អូស្ត្រាលី​​​ និង​​​ក្រុមហ៊ុន​​​គួរ​​​ឲ្យទុក​​​ចិត្ត​​​ផ្សេង​​​ៗ​​​ទៀត”។

ទោះ​​​ជាយ៉ាង​​​ណា នៅ​​​ក្នុង​​​កិច្ច​​​សម្ភាសន៍​​​កាល​​​ពី​​​ថ្ងៃ​​​ច័ន្ទ លោក ខៀវ សុភ័គ អ្នក​​​នាំ​​​ពាក្យ​​​ក្រសួង​​​មហាផ្ទៃ​​​បាន​​​មា​​​ន​​​ប្រសាសន៍​​​ថា ​​​”រដ្ឋា​​​ភិបាល​​​មិន​​​ដែល​​​ទទួល​​​បាន​​ប្រាក់​សូម្បីតែ​មួយ​ដុល្លារ​​​​ បើនិយាយ​ពាក់​​​ព័ន្ធ​​​នឹង​​​ការ​​​ទទួល​​​យក​​​ជន​​​ភៀស​​​ខ្លួន​​​ទាំងនោះ​​​”។លោកបាន​បន្ថែម​​​ថា អូស្ត្រាលី​​​​​​​​​ “ឆោត​​​ល្ងង់​​​” ដែលបាន​ចាប់​​​ផ្តើម​​​ចំណាយ​​​ប្រាក់​​​ ​​​ខណៈ​​​មាន​​​តែ​​​ជន​​​ភៀស​​​ខ្លួន​​​ប្រាំ​​​នាក់​​​ប៉ុណ្ណោះ​​​យល់​​​ព្រម​​​ផ្លាស់​​​ទី​​​លំនៅ​​​មក​​​ទី​​​នេះ​​​។

ដោយ​​​ត្រូវ​​​បាន​​​ប្រាប់​​​កាល​​​ពីម្សិលមិញ​​​ថា តាម​​​ពិត​​​ទៅ​​​ប្រាក់​​​ជាង​​​៣,៥​​​លាន​​​ដុល្លារ​​​​​​បាន​​​មកដល់​​​ដៃកម្ពុជា​​​ក្រោម​​​កិច្ច​​​ព្រម​​​ព្រៀង​​​នេះ​​​ ឧត្តម​​​សេនីយ៍​​​ ខៀវ សុភ័គ បាន​​​ចាប់​​​ផ្តើម​​​ធ្វើ​​​ការ​រិះ​​​គន់​​​ដល់​​​វិធី​​​ដែល​​​រដ្ឋាភិបាល​​​ក្រុង​​​កង់​​​បេ​រា៉​​​ចំណាយ​​​ប្រាក់​​​របស់​​​ខ្លួន​​​។

ឧត្តម​​​សេនីយ៍​​​ ខៀវ សុភ័គ ​​​មាន​​​ប្រសាសន៍​​​​​​ថា “ការ​​​ផ្តល់​​​ប្រាក់​​​ទៅ​​​ឲ្យ UNDP នា​​​ពេល​​​កន្លង​​​មក​​​ យើង​​​ឃើញ​​​ថា ប្រាក់​​​ទាំង​​​នេះ​​​មិន​​​បាន​​​មក​​​ដល់​​​ក្រពះ​​​ពល​​​រដ្ឋ​​​ខ្មែរ​​​ទេ​​​។ ​​​ប្រហែល ​​​ជា​​​៣០​​​ភាគ​​​រយ​​​ប៉ុណ្ណោះ​​​ [ នឹង​​​​ដល់​​​ពល​​​រដ្ឋ​​​ខ្មែរ​​​]  ​​​ហើយ​​​​​​៧០​​​ភាគ​​​រយ​​​ទៀត​​​នឹងត្រូវ​​​គេ​​​ស្រូប​​​យក​​​អស់​​​ហើយ​​​។ អស​​​់​​​លោក​​​អាច​​​សិក្សា​​​ព​​​ី​​​ចំណុច​​​នេះបាន​​​​​​”។​លោក​​​​​​​​​ថ្លែង​​​បន្ថែម​ថា ​​​”បុគ្គលិក​​​ ​​​UNDP ពួក​​​ច្រមុះ​​​ស្រួច ​​​ពួក​​​គេ​​​មិន​​​មែន​​​ទទួល​​​បាន​​​ប្រាក់​​​ខែ​​​ដូច​​​រដ្ឋាភិបាល​​​ដែល​​​​​​​​ទទួល​​​បាន​​​ត្រឹម​​​តែ​​​២០០​​​ដុល្លារ ៣០០​​​ដុល្លារ​​​នោះ​​​ទេ​​​ គឺ​​​ពួក​​​គេ​​​ទទួល​​​បាន​​​២.០០០ដុល្លា ​​​៣.០០០​​​ដុល្លារ​​​ ឯណោះ។ នេះ​​​​​​ជា​​​វប្បធម៌​​​របស់​​​​​​ U.N.”​​​។​​​

ពេល​​​កិច្ច​​​ព្រម​​​ព្រៀង​​​ដែល​​​មាន​​​ទឹក​​​ប្រាក់​​​​​​៤០​​​លាន​​​ដុល្លារ​​​អូស្ត្រាលី​​​ត្រូវ​​​បាន​​​ប្រកាស​​​អំឡុង​​​ពិធី​​​មួយ​​​ក្នុង​​​រាជ​​​ធានី​​​ភ្នំពេញ​​​កាល​​​ពី   ​​​ខែ​​​កញ្ញា​​​ឆ្នាំ​​​មុន​​​ អ្នក​​​អង្កេត​​​ការណ៍​​​នៅ​​​ក្នុង​​​ប្រទេស​​​ទាំង​​​ពីរ​​​បាន​​​សម្តែង​​​ក្តី​​​ព្រួយ​​​បារម្ភ​​​អំពី​ថា តើ​​​ប្រាក់​​​ទាំង​​​នេះ​​​​​​នឹង​​​ទៅ​​​ទី​​​ណា​​​ខ្លះ​​​ ដោយ​​​សារ​​​កម្ពុជា​​​​ត្រូវបាន​ដាក់​​​ចំណាត់​​​ថ្នាក់​​​ថា ជា​​​ប្រទេស​​​មួយ​​​ក្នុង​​​ចំណោម​​​ប្រទេស​​​ពុក​​​រលួយ​​​បំផុត​​​លើ​​​ពិភព​​​លោក​​​។

ឧត្តម​​​សេនីយ៍​​​ ខៀវ សុភ័គ បាន​​​លើក​​​ឡើង​​​ទៀត​​​ថា លោក​​​គិត​​​ថា រដ្ឋាភិបាល​​​នឹង​​​ទទួល​​​បាន​​​ជំនួយ​​​នេះ​​​ដោយ​​​ផ្ទាល់​​​ពី​​​រដ្ឋាភិបាល​​​​ក្រុង​​​កង​​​់​​​បេរា៉ ហើយ​​​អាច​​​ចំណាយ​​​ប្រាក់​​​​រាប់​​​លាន​​​ដុល្លារ​​​នេះ​​​ដោយ​​​សេរី​​​លើ​​​អ្វី​​​ដែល​​​ខ្លួន​​​គិត​ថា សមនឹងចំណាយ​ ហើយ​​​ថា​​​លោក​​​ខឹងយ៉ាងខ្លាំង​​​​ដែល​​​បញ្ហា​​​នេះ​​​​មិន​​​ដូច​​​អ្វីដែល​​​លោក​​​គិត​​​។

លោក​​​បាន​​​មាន​​​ប្រសាសន៍​​​ថា “កិច្ច​​​ព្រម​​​ព្រៀង​​​នេះ​​​គឺ​​​រវាង​​​លោក​​​នាយក​​​រដ្ឋ​​​មន្ត្រី ​​​ហ៊ុន ​​​សែន និង​នាយក​​​រដ្ឋ​​​មន្ត្រី​​​អូស្ត្រាលី ប៉ុន្តែ គ្មាន​​​ប្រាក់​​​មួយ​​​កាក់​​​មួយ​​​សេន​​​ណា​​​បាន​ធ្លាក់​​​ទៅ​​​ដល់​​​ថវិកា​​​របស់​​​រដ្ឋាភិបាល​​​ឡើយ​​​។ ប្រសិន​​​បើ​​​ ជា​​​មនុស្ស​​​របស់​​​ UN ដែលជា​​​អ្នក​​​​​​ធ្វើ​​​ឲ្យ​​​ប្រាក់ទាំង​​​នេះ​​​បាន​​​ទៅ​​​ដល់​​​ដៃ​​​ពល​​​រដ្ឋ​​​ខ្មែរ ​​​អ៊ីចឹង​​​អូស្ត្រាលី​​​មិន​​​ស្ថិត​​​នៅ​​​ក្នុង​​​ការ​​​ចង​​​ចាំ​​​របស់​​​កម្ពុជា​​​ទេ​​​។ UNDP ទេ​​​ដែល​​​ជា​​​ម្ចាស់​​​ជំនួយ​​​”។

ថវិកា​​​ជាតិ​​​​ឆ្នាំ​​​២០១៥​​​ដល់​​ឆ្នាំ​​​២០១៦​​​របស់​​​អូស្ត្រាលី​​​ដែល​​​ចេញ​​​កាល​​​ពី​​​ខែ​​​ឧសភា​​​បង្ហាញ​​​ថា ជំនួយ​​​បរទេស​​​ទំាង​​​អស់​​​ត្រូវ​​​បាន​​​កាត់​​​អស់​​​ចំនួន​​​៧២៩​​​លាន​​​ដុល្លារ​​​។ ប្រទេស​​​តំបន់​​​អាស៊ី​​​ភាគ​​​ច្រើន​​​ត្រូវ​​​បាន​​​កាត់​​​បន្ថយ​​​ជំនួយអស់​​​ប្រហែល​​​៤០​​​ភាគ​​​រយ ​​​លើក​​​លែង​​​តែ​​​ប្រទេ​​​ស​​​នេប៉ាល់​​​​​​ ដែល​​​រង​ការ​​​ខូច​​​ខាត​​​យ៉ាង​​​​​​ដំណំ​​​ក្នុង​​​ឆ្នាំ​​​នេះ​​​ដោយ​​​សារ​​​គ្រោះ​​​រញ្ជួយ​​​​​​ដី​​​​​​ដ៏​​​ខ្លាំង​​​ និង​​​ប្រទេស​​​កម្ពុជា​​​​​​ដែល​​​ត្រូវ​​​បាន​​​សន្យា​​​ផ្តល់​​​ជំនួយ​​​ចំនួន​​​៣៨​​​,២​លាន​​​ដុល្លារ​​​ ដូច​​​ឆ្នាំ​​​មុន​​​ដែរ​​​។

លោក អៀ សុផល អ្នក​​​និពន្ធ​​​សៀវ​​​ភៅ     “​​​ការ​​​​​​ពឹង​​​ផ្អែក​​​ជំនួយ​​​នៅ​​​កម្ពុជា​​​៖​​​ វិធី​​​ដែល​​​ជំនួយ ​​​បរទេស​​​ធ្វើ​​​ឲ្យ​​​ខូច​​​ដល់​​​លទ្ធិ​ប្រជា​​​ធិតេយ្យ” ​​​បាន​​​លើក​​​ឡើង​​​ថា វា​​​ជារឿង​​​ធម្មតា​​​ទេ​ដែល​​​រដ្ឋាភិបាល​​​ក្រុង​​​បេរា៉​​​ខិត​​​ខំ​​​ប្រឹង​​​ប្រែង​​​អស់​​​ពី​​​សមត្ថភាព​​​ដើម្បី​​​គ្រប់​​​គ្រង​​​ប្រាក់​​​ដែល​​​ខ្លួន​​​ផ្តល់​​​មក​​​កម្ពុជា​​​នោះ​​​។

ដោយ​​​សំដៅ​​​លើ​​​ឧទាហរណ៍​​​មួយ​​​ចំនួន​​​ដែល​​​មន្ត្រី​​​រដ្ឋាភិបាល​​​កម្ពុជា​​​ត្រូវ​​​បាន​​​រក​​​ឃើញ​​​ថា បាន​​​ប្រព្រឹត្តិ​​​អំពើ​​​ពុក​​​រលួយ​​​នៅ​​​ក្នុង​​​ជំនួយ​​​ដែលរដ្ឋាភិបាល​​​ទទួល​​​បាន​នោះ​​​​​ លោក​​​បាន​​​សរសេរ​​​ នៅ​​​ក្នុង​​​អីុម៉េល​​​មួយ​​​ថា ​​​”អូស្ត្រាលី​​​ ជា​​​មួយ​​​នឹង​​​ម្ចាស់​​​ជំនួយ​​​ភាគ​​​ច្រើន​​​​​​គិត​​​ថា ប្រាក់​​​របស់​​​ខ្លួន​​​​​​នឹង​​​គ្មាន​​​​​សុវត្ថិភាព​​​ឡើយ​​​ ពេល​​​មក​​​ដល់​​​ដៃ​​​រដ្ឋាភិបាល​​​។វា​​​មាន​​​ការ​​​ប្រពឹត្តិ​​​អំពើ​​​ពុក​​​រលួយ​​​ច្រើន​​​ពេក​​​”។

លោក​​​ អៀ សុផល ដែល​​​ក៏​​​ជា​​​សាស្ត្រាចារ្យ​​​រង​​​ផ្នែក​​​ការ​​​ទូត​​​ និងកិច្ច​​​ការ​​​ពិភពលោក​​​​នៅ​សាកលវិទ្យាល័យ Occidental College ក្នុង​​​រដ្ឋ​​​ឡូសអែនជឺលេសដែរ​​​នោះ​​​​​​​​​​​​បាន​​​បន្ថែម​​​ថា ​​​”មាន​​​ប្រវត្តិ​​​ជា​​​ យូរ​​​មក​​​ហើយ​​​ ស្អីៗ​ក៏ដោយ​ជា​របស់​សាធារណៈត្រូវបានគេងប្រវ័ញ្ច​​​យក​ធ្វើ​ជា​ប្រយោជន៍​​​បុគ្គលផ្ទាល់ខ្លួន​​​​”។

លោក​​​​​​បាន​​​យល់​​​ស្រប​​​​​​​នឹង​​​ការ​​​​​​លើក​​​ឡើង​​​របស់​​​ឧត្តម​​​សេនីយ៍​​​ឯក ខៀវ សុភ័គ ដែល​​​ថា ជំនួយ​​​ភាគ​​​ច្រើន​​​នឹង​​​ត្រូវ​​​ស្រូប​​​យក​​​ដោយ​​​ទី​ភ្នាក់​​​ងារ​​​​​​អនុវត្ត​​​គម្រោង​​​។

លោក​​​បាន​​​មាន​​​ប្រសាសន៍​​​ថា “ពិត​​​ ហើយ​​​វា​​​ត្រូវ​​​បាន​​​ធ្លាក់​​​ទៅ​​​លើ​​​ប្រាក់​​​ខែ​​​របស់​​​ជន​​​បរទេស​​​ ហើយ​​​វា​​​ដូច្នេះគឺ​​​ដោយ​​​សារ​​​តែ​​​​​​​​​ម្ចាស់​​​​​​ជំនួយ​​​ផ្តល់​​​ធនធាន​របស់ខ្លួន​​​​ដោយ​​​ផ្ទាល់​​​ទៅ​​​ឲ្យ​​​អ្នក​​​ផ្តល់​​​ប្រឹក្សា​​​មាន​​​​ប្រាក់ខែ​​​ខ្ពស់​​​ដែល​​​អាច​​​ចាត់​​​ចែង​​​ប្រាក់​​​ដោយពុំ​​​មាន​​​ការ​ប្រព្រឹត្តិ​​​អំពើ​​​ពុក​​​រលួយ ពេល​​​មាន​​​ការ​ប្រព្រឹត្តិ​អំពើ​​​ពុក​​​រលួយ​​​​​​ច្រើន​​​ក្នុង​​​ផ្នែក​​​ផលិត​​​កម្ម”។

ទោះ​​​ជា​​​យ៉ាង​​​​​​ណា​​​ លោក​​​បាន​ជំទាស់​​​នឹង​​​ការ​​​យល់ឃើញ​​​​ដែល​​​ថា រដ្ឋាភិបាល​​​​​​អាច​​​​ចាត់​​​ចែង​​​ប្រាក់​​​ដែលទទួលបានឲ្យធ្លាក់​ដល់​ប្រជា​​ពល​​​រដ្ឋ​​​​​ប្រកបដោយ​ប្រសិទ្ធភាពជាង​​នោះ​។

លោក​​​បាន​​​មាន​​​ប្រសាសន៍​​​ទៀត​​​ថា   ​​​”ប្រសិន​​​ ​​​បើ​​​តាម​​​រយៈ​​​បុគ្គល ​​​[ឧត្តមសេនីយ៍ ​​​ខៀវ  សុភ័គ] មាន​​​ន័យ​​​ថា មន្ត្រី​​​រដ្ឋាភិបាល​​​​​​ ឧទាហរណ៍​ ដូច​​​ជា​​​ អ្ន​​កដែលមាន​មុខងារច្រើន​​​​ជា​​​ដើមនោះ ​​​អ៊ីចឹង​​​ប្រាក់​​​ជា​​​ច្រើន​​​នឹង​​​ត្រូវ​​​ធ្លាក់​​​ចូល​​​​​ហោ​​​ប៉ៅ​​​របស់​​​មន្ត្រី​​​ដែល​​​ពាក់​​​ព័ន្ធ​​​នឹង​​​គម្រោង ហើយ​​​ថា វា​ប្រហែល​​​ជា​​​អ្វី​​​ដែល​​​ពួក​​​គេ​​​ចង់​​​ធ្វើ​​​”។

លោក​​​បន្ថែម​​​​​​ថា “ផ្ទុយ​​​ទៅ​​​​​​វិញ​​​បើ​​​យើង​​​និយាយ​​​អំពី​​​ពល​​​រដ្ឋ​​​ខ្មែរ​​​ដែល​​​ក្រីក្រ​​​បំផុត​​​ដែល​​​ងាយ​​​រង​​​គ្រោះ​​​បំផុត​​​ និងដែល​​​​សមនឹង​​​ទទួល​​​បាន​​​ជំនួយ​​​បំផុត​​​នោះ​​​ គឺ​អត់​​​មាន​​​ទេ​​​ អត់​​​មាន​​​​​ទទួលបាន​​​​ទាល់​​​តែ​​​សោះ​​​”៕ ស៊ុយឈាង​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស