លោកនាយករដ្ឋមន្ត្រី ហ៊ុន សែន បានបញ្ជាឲ្យអាជ្ញាធរទូទាំងប្រទេស “បង្ក្រាប” ក្រុមដែលជាប់ពាក់ព័ន្ធអំពើប្លន់ប្រដាប់អាវុធបន្ទាប់ពីមានបទឧក្រិដ្ឋកើតឡើងកាលពីពេលថ្មីៗដែលបានបណ្តាលឲ្យមនុស្សមួយចំនួនស្លាប់ និងរងរបួស។
មានប្រសាសន៍នៅពិធីជួបជុំមេដឹកនាំពុទ្ធសាសនា មូស្លីម និងគ្រិស្តសាសនានៅកោះពេជ្រក្នុងរាជធានីភ្នំពេញ កាលពីម្សិលមិញ លោក ហ៊ុន សែន បានថ្លែងថា បើទោះជា”ប្រទេសគំរូ” សម្រាប់ភាពស្ងាប់ស្ងាត់ខាងសាសនា ក៏ដោយ ក៏ប្រទេសកម្ពុជាបានជួបប្រទះអំពើហិង្សាប្រដាប់អាវុធកើតឡើងញឹកញាប់ដែរ។
លោកនាយករដ្ឋមន្ត្រីបានថ្លែងទៅកាន់អ្នកចូលរួមថា “សាសនាអប់រំមនុស្សឲ្យប្រព្រឹត្តអំពើល្អ មិនឲ្យលួចប្លន់ទេ។ ប៉ុន្តែ អំពើប្លន់ប្រដាប់អាវុធបានកើតឡើងក្នុងរយៈកាលកន្លងទៅនេះ”។
លោកបានថ្លែងថា “ដូច្នេះខ្ញុំបានចេញបញ្ជា បន្ថែម…ឲ្យអាជ្ញាធរមានសមត្ថកិច្ច សុំឱ្យគ្រប់ទីកន្លែងទាំងអស់បង្កើនការប្រុងប្រយ័ត្ន និងវ៉ៃ បង្ក្រាបពួកឧក្រិដ្ឋជនប្លន់ប្រដាប់អាវុធនេះ”។
មានអំពើប្លន់ប្រដាប់អាវុធមួយចំនួនកើតឡើងទូទាំងប្រទេសចាប់តាំងពីខែមុនមក។ កាលពីថ្ងៃទី១៥ ខែវិច្ឆិកា ក្មេងប្រុសអាយុ១៣ឆ្នាំម្នាក់ត្រូវបានបាញ់ស្លាប់ក្នុងខេត្តកំពតនៅពេលបុរសពីរនាក់បានប៉ុនប៉ងប្លន់ម៉ូតូហុងដាឌ្រីម មួយគ្រឿង។ កាលពីថ្ងៃទី២២ ខែវិច្ឆិកា មនុស្សបីនាក់ត្រូវបានបាញ់ឲ្យរងរបួសនៅពេលបុរសបួននាក់ប្លន់ម៉ូតូ KTM Duke ពីពួកគេនៅក្នុងខណ្ឌមានជ័យរាជធានីភ្នំពេញ។
កាលពីថ្ងៃសុក្រ បុរសអាយុ២១ឆ្នាំម្នាក់ត្រូវបានបាញ់ស្លាប់ក្នុងខណ្ឌទួលគោក រាជធានី ក្នុងអំពើប្លន់ម៉ូតូហុងដាឌ្រីមមួយគ្រឿងទៀត។ ទីបំផុតអាជ្ញាធរចាប់ខ្លួនជនសង្ស័យបានបួននាក់ក្នុងករណីនោះ ដោយបាញ់សម្លាប់ពួកវាពីរនាក់។ កាលពីចុងសប្តាហ៍ អំពើ ប្លន់ប្រដាប់អាវុធបីដាច់ដោយឡែកពីគ្នានៅក្នុងខេត្តកណ្តាល បាត់ដំបង និងខេត្តពោធិ៍សាត់ បណ្តាលឲ្យស្ត្រីអាយុ៣១ឆ្នាំម្នាក់ស្លាប់និងប្លន់បានមាសនិងប្រាក់ជាង៣០០.០០០ដុល្លារ។
លោកនាយករដ្ឋមន្ត្រីបានលើកឡើងបន្ថែមនៅក្នុងសុន្ទរកថារបស់លោកថា ភាគច្រើននៃអ្នកទាំងនេះជាប់ពាក់ព័ន្ធក្នុងអំពើប្លន់ប្រដាប់អាវុធក្នុងពេលថ្មីៗនេះ ធ្លាប់ជាប់ពន្ធនាគារ ហើយត្រូវបានដោះលែង ហើយថា ត្រូវពិនិត្យពិច័យពីការលើកលែងទោស និងការបន្ធូរបន្ថយទោសចំពោះអ្នកដែលជាប់ពន្ធនាគារពីបទប្លន់ប្រដាប់អាវុធ។
ថ្លែងទៅកាន់អ្នកចូលរួមថា ជនសង្ស័យពីរនាក់ត្រូវកងរាជអាវុធហត្ថបាញ់ស្លាប់ក្នុងខណ្ឌឫស្សីកែវ”ទើបតែត្រូវបានចេញពីពន្ធនាគារនោះ” លោកបានមានប្រសាសន៍ថា “តាមរបាយការណ៍ខ្លះឱ្យដឹងថា ក្រុមចោរប្លន់មុខដដែលៗ ហើយតដៃជាមួយអាវុធហត្ថរាជធានីភ្នំពេញ”។
លោក ហ៊ុន សែន បានមានប្រសាសន៍ថា “អ៊ីចឹងទេ សុំឯកឧត្តមរដ្ឋមន្ត្រីក្រសួងយុត្តិធម៌ [អង្គ វង្សវឌ្ឍានា ] ពិនិត្យពិច័យអាអ្នកជាប់ គុកដោយសារប្លន់ អាអ្នកជាប់គុកដោយសារគ្រឿងញៀន កុំសូវដោះពេក បើវាចេញមក ប្លន់ដដែល ហើយរបាយការណ៍ច្រើនកន្លែងណាស់”។
លោក អេង សោភា នាយការិយាល័យព្រហ្មទណ្ឌរាជធានីភ្នំពេញបានមានប្រសាសន៍ ថា នគរបាលចាប់បានជនសង្ស័យបួននាក់កាលពីថ្ងៃសុក្រ ដែលសារភាពថា ពួកគេជាប់ ពាក់ព័ន្ធការបាញ់កាលពីថ្ងៃទី ខែវិច្ឆិកា និងបទឧក្រិដ្ឋមួយចំនួនទៀត។
លោក សោភា បានថ្លែងថា “ពួកគេបានសារភាពថា ពួកគេបានប្លន់ចំនួនប្រាំលើកក្នុងខណ្ឌមានជ័យ និងបាញ់ជនរងគ្រោះប្រាំមួយនាក់” ដោយលោកកត់សម្គាល់ថា នគរបាលដកហូតបានម៉ូតូបីគ្រឿងពីជនសង្ស័យបួននាក់រួមមានម៉ូតូ Suzuki Nex ម៉ូតូហុងដាឌ្រីម និងម៉ូតូ KTM Duke កាំភ្លើងខ្លីមួយដើម ដាវសាំម៉ូរ៉ៃ និងថ្នាំញៀនមួយចំនួន។
លោកបានមានប្រសាសន៍ថា “ពួកគេបានប្រាប់នគរបាលថា មានជនសង្ស័យប្រាំពីរនាក់មកពីក្រុមរបស់ខ្លួនដែលកំពុងរត់គេចខ្លួននៅឡើយ ហើយឥឡូវនេះយើងកំពុងស្វែងរកចាប់ខ្លួនពួកគេ”។
នៅពេលត្រូវបានសួរអំពីការសើុបអង្កេតពាក់ព័ន្ធអំពើប្លន់សម្លាប់កាលពីថ្ងៃសុក្រ ក្នុងខណ្ឌទួលគោក លោក រ័ត្ន ស៊្រាងមេបញ្ជាការកងរាជអាវុធហត្ថរាជធានីភ្នំពេញ បានមានប្រសាសន៍ថា បុរសពីរនាក់ដែលត្រូវបានបាញ់ស្លាប់ក្នុងការបង្ក្រាបនោះ គឺ សេត ម៉ាត់រ៉ូហ្សា អាយុ១៩ឆ្នាំ និង ប៉ែន ចំណាប់ អាយុ១៨ឆ្នាំ ជាមេខ្លោងនៃក្រុមឧក្រិដ្ឋជន ដែលទទួលខុសត្រូវចំពោះបទឧក្រិដ្ឋមួយចំនួនក្នុងរាជធានី។
ដោយបង្វែរសំណួរទាក់ទងជនសង្ស័យបួននាក់ដែលចាប់ខ្លួនបានទៅសាលាដំបូងរាជធានីភ្នំពេញ ឧត្តមសេនីយ៍ទោ រ័ត្ន ស៊្រាង បានមានប្រសាសន៍ថា “ជនសង្ស័យទាំងពីរនាក់ដែលបានស្លាប់នេះគឺជាមេខ្លោងដែលជាប់ពាក់ព័ន្ធក្នុងអំពើប្លន់ជាច្រើននៅក្នុងរាជធានីភ្នំពេញ”។
ក្រុមមន្ត្រីតុលាការបានបដិសេធមិនធ្វើអត្ថាធិប្បាយទេ៕ សារុន