ក្មេងប្រុសជំទង់ពីរនាក់ និងក្មេងប្រុសវ័យ៨ឆ្នាំម្នាក់ទៀតត្រូវឃាតករប្រើកំាបិតផ្គាក់កាប់ស្លាប់យ៉ាងសាហាវព្រៃផ្សៃ ខណៈពេលពួកគេកំពុងជិះម៉ូតូក្នុងតំបន់ជនបទដាច់ស្រយាលនៃខេត្តសៀមរាប កាលពីថ្ងៃសៅរ៍ ហើយនគរបាលបាននិយាយកាលពីម្សិលមិញថា វាជាករណីសងសឹកគំនុំ និងប្លន់។
យោងតាមលោក ថុង សុគន្ធ ស្នងការរងខេត្តសៀមរាបបានឲ្យដឹងថា ជនរងគ្រោះទាំងបីនាក់ដែលមានឈ្មោះដូចជា ម៉ិច កញ្ញា អាយុ១៦ឆ្នាំ មាឌ ឆាយ៉ា អាយុ១៣ឆ្នាំ និង អង្គ សូយ អាយុ៨ឆ្នាំ បានរងការវាយប្រហារអំឡុងពេលថ្ងៃត្រង់ ខណៈពេលពួកគេកំពុងជិះម៉ូតូហុងដាឌ្រីមស៊េរីឆ្នាំ២០១១មួយគ្រឿងឆ្ពោះទៅចម្ការដំឡូងមីដែលពួកគេធ្វើការនៅក្នុងឃុំគោកដូង ស្រុកអង្គរជុំ។
លោកមានប្រសាសន៍ថា ”ករណីនេះជាឃាតកម្មរៀបចំទុកជាមុនដើម្បីសងសឹកគំនុំដោយជនសង្ស័យប្រើកាំបិតផ្គាក់កាប់ចិញ្ច្រាំពួកគេម្នាក់ម្ដងៗរហូតដល់ស្លាប់នៅលើផ្លូវលំឆ្ពោះទៅចម្ការរបស់ពួកគេនៅក្នុងព្រៃ”។
ឧត្ដមសេនីយ៍ត្រី ថុង សុគន្ធ បានលើកឡើងទៀតថា ជនល្មើសបានសម្ងំលាក់ខ្លួនក្នុងព្រៃជិតផ្លូវលំ ហើយប្រើកំាបិតផ្គាក់ដងវែងស្ទាក់កាប់ក្បាល និងខ្នងរបស់ពួកគេ។ ក្មេងជំទង់ពីរនាក់បានស្លាប់នៅកន្លែងកើតហេតុ រីឯក្មេងតូចជាងគេត្រូវបានប្រទះឃើញស្លាប់ចម្ងាយប្រហែល១០០ម៉ែត្រនៅតាមផ្លូវនោះ បន្ទាប់ពីព្យាយាមគេចខ្លួនពីជនដៃដល់។ ម៉ូតូបានបាត់ពីកន្លែងកើតហេតុ នៅពេលនគរបាលទៅដល់។
លោកបានគូសបញ្ជាក់ថា ”ដំបូងឡើយ យើងសង្ស័យថានេះជាករណីប្លន់ម៉ូតូ ប៉ុន្តែបន្ទាប់ពីនគរបាលយើងចំណាយពេល៥ម៉ោងស៊ើបអង្កេត យើងបានរកឃើញថា ករណីនេះគឺជារឿងគំនុំសងសឹក និងជាឃាតកម្មគិតទុកជាមុនប្រព្រឹត្តដោយជនសង្ស័យឈ្មោះ ឆុន ឆេន អាយុ១៧ឆ្នាំ”។
ជនសង្ស័យ ឆុន ឆេន ដែលរស់នៅក្នុងភូមិជាមួយជនរងគ្រោះ ត្រូវបានចាប់ខ្លួននៅផ្ទះរបស់ខ្លួនក្នុងឃុំគោកដូង វេលាម៉ោង៦ល្ងាចថ្ងៃសៅរ៍ ហើយត្រូវបានឃុំខ្លួនមួយយប់នៅអធិការដ្ឋាននគរបាលស្រុក។
អំឡុងពេលសាកសួរ ឆុន ឆេន បានសារភាពថា ខ្លួនពិតជាបានប្រព្រឹត្តបទល្មើសនេះមែន ដោយនិយាយថា តាមពិតខ្លួនតម្រង់គោលដៅទៅរកតែជនរងគ្រោះ ម៉ិច កញ្ញា ប៉ុណ្ណោះដោយសារការប្រច័ណ្ឌ និងជម្លោះផ្ទាល់ខ្លួនកាលពីពួកគេធ្វើការជាមួយគ្នានៅក្នុងប្រទេសថៃ។ ជនល្មើសបានសារភាពថា ខ្លួនសម្លាប់ក្មេងដែលជិះពីក្រោយទាំងពីរនាក់ដើម្បីបំបាត់សាក្សី។
លោក ថុង សុគន្ធ បានរៀបរាប់ថា “យើងបានចាប់ខ្លួនជនសង្ស័យ ឆុន ឆេន អាយុ១៧ឆ្នាំនៅផ្ទះរបស់វាក្នុងឃុំគោកដូង វេលាម៉ោង៦ល្ងាចម្សិលមិញ ហើយថ្ងៃនេះវាបានសារភាពថា ករណីនេះគឺជាការសងសឹកគំនុំ ហើយវាបានទៅបង្ហាញម៉ូតូរបស់ជនរងគ្រោះ និងកាំបិតផ្គាក់ដែលវាលាក់ទុកក្នុងព្រៃចម្ងាយប្រហែល១០០ម៉ែត្រពីផ្លូវលំ។ វាជាករណីសងសឹកគំនុំ ៖ទី១សងសឹកដោយសារពួកគេស្រឡាញ់ស្រីតែម្នាក់នៅក្នុងភូមិ។ ក្មេងប្រុសពីរនាក់ដែលមានអាយុ៨ឆ្នាំ និង១៣ឆ្នាំ ត្រូវបានកាប់រហូតដល់ស្លាប់ដើម្បីបំបិទមាត់”។
ជនសង្ស័យ ឆុន ឆេន ត្រូវបានផ្ទេរទៅស្នងការដ្ឋាននគរបាលខេត្តសៀមរាប កាលពីព្រឹកម្សិលមិញ ហើយនឹងត្រូវបញ្ជូនខ្លួនទៅសាលាដំបូងខេត្តសៀមរាប នៅថ្ងៃនេះ៕ សុខុម