40.2 C
Phnom Penh

​ផ្ទុះ​​ចលាចល ពេល​​មន្ត្រី​​​​​សាលា​​​​​​រាជ​​​​​​ធានី​ធ្វើ​ពិធី​​​​ផ្តល់​​​សំណង​​​ផ្តាច់​​​ព្រ័ត្រ​​​ដើម្បី​បញ្ចប់​​បញ្ហា​​បុរី​កីឡា​

ដោយ ឌឹ ខេមបូឌា ដេលី

បទវិភាគ

ពិធី​មួយ​ដែល​​​​មន្ត្រី​​សាលា​រាជធានី​ភ្នំពេញ ​រៀប​​​ចំ​​​ឡើង​​​ដើម្បី​​​​​ផ្ដល់​សំណង​​​ផ្តាច់​​​ព្រ័ត្រ​​​​ដល់​ប្រជាពលរដ្ឋ​រាប់​រយ​​​គ្រួសារ​​​​​ដែល​​បាន​ធ្វើ​ការ​តវ៉ា​​​ជា​​​​​​ច្រើន​​​​ឆ្នាំ​​​​​ប្រឆាំង​​​​​​​ការ​​បណ្ដេញ​​​ខ្លួន​​​​​​​​​​​ចេញពី​សហគមន៍​បុរីកីឡា​​ បាន​​​​​​ផ្ទុះ​​​​​​ចលាចល​កាលពី​ម្សិលមិញ ​នៅ​ពេល​​​ក្រុម​​​​សកម្មជន​បាន​​​សម្រុក​ចូល​​​ពិធី​​ជួបជុំ​​​​គ្នា​​​នេះរហូត​​​​​​ឈាន​​​​​​ទៅ​​​ដល់​​​ការ​ប្រវាយ​ប្រតប់​គ្នា​ជាមួយ​នគរ​​​បាល។​

ប្រជាពលរដ្ឋទាំង​១៥៤​គ្រួសារ​​នេះ​គឺ​ជា​គ្រួសារ​ចុង​ក្រោយ​​​គេ​​​​​​ដែល​​​​ត្រូវ​​​​​​ទទួល​​​​បាន​សំណង​ក្នុង​ចំណោម​ប្រជាពលរដ្ឋ​​​យ៉ាង​​​ច្រើន​ដែល​ត្រូវ​បាន​​​​ក្រុម​​​ហ៊ុន​​​​​​ផាន​​​អុីម៉ិច​ បណ្ដេញ​ចេញ​​​ បន្ទាប់ពី​ក្រុម​ហ៊ុន​នេះ​ទទួល​បាន​សិទ្ធិ​អភិវឌ្ឍ​​​ន៍​​​​​​កាល​​​ពី​​​ឆ្នាំ​២០០៣។ ​​ខណៈ​ក្រុម​ហ៊ុន​​​រួម​ដ៏​មាន​ឥទ្ធិពល​មួយ​នេះ​ទទួល​បាន​កិច្ច​សន្យា​​​អភិវឌ្ឍ​ន៍​​​​​​ក្រោម​​​​​​​លក្ខខណ្ឌ​​​​ថា ខ្លួន​នឹងត្រូវ​​​​​​​​សង់​​ផ្ទះ​ល្វែង​ចំនួន​១០អគារ​សម្រាប់​ប្រជា​ពល​រដ្ឋ​​ទាំង​នេះ​​​នោះ ទីបំផុត​ខ្លួន​បាន​សាង​សង​់អគារ​​​​​តែ​​​៨​ប៉ុណ្ណោះ ​​​ ជា​ហេតុ​​​​​​ធ្វើ​ឲ្យ​ប្រជាពលរដ្ឋ​រាប់​​រយ​គ្រួសារ​​​ធ្លាក់​​​ខ្លួន​​​​​រស់​នៅ​ក្នុង​ស្ថានភាព​​កខ្វក់​​​​​​​​​ខ្លាំង​​​គួរ​​​ឲ្យ​​​បារម្ភ​​​​​​​​នៅ​​​​ទីតាំង​​​នេះ។

លោក មាន ចាន់យ៉ាដា ​ប្រធាន​រដ្ឋបាល​សាលា​រាជធានី​ លើក​ដៃ​​​ប្រាប់​​ឲ្យ​ប្រជាពលរដ្ឋ​​នៅ​សហគមន៍​បុរីកីឡា​​ក្នុង​រាជធានី​ភ្នំពេញ រក្សា​ភាព​ស្ងៀមស្ងាត់​​​កាលពី​ម្សិលមិញ អំឡុង​ពិធី​​ផ្ដល់​សំណង​​ផ្ដាច់​ព្រ័ត្រ​​​ដើម្បី​បញ្ចប់​​​​​បញ្ហា​រ៉ាំរ៉ៃ​នៅ​សហគមន៍​នេះ​។ រូបថតៈ Satoshi Takahashi​​​
លោក មាន ចាន់យ៉ាដា ​ប្រធាន​រដ្ឋបាល​សាលា​រាជធានី​ លើក​ដៃ​​​ប្រាប់​​ឲ្យ​ប្រជាពលរដ្ឋ​​នៅ​សហគមន៍​បុរីកីឡា​​ក្នុង​រាជធានី​ភ្នំពេញ រក្សា​ភាព​ស្ងៀមស្ងាត់​​​កាលពី​ម្សិលមិញ អំឡុង​ពិធី​​ផ្ដល់​សំណង​​ផ្ដាច់​ព្រ័ត្រ​​​ដើម្បី​បញ្ចប់​​​​​បញ្ហា​រ៉ាំរ៉ៃ​នៅ​សហគមន៍​នេះ​។ រូបថតៈ Satoshi Takahashi​​​

កាលពី​ខែ​កញ្ញា សាលា​រាជធានី​​​​​​ប្រកាស​​​​ថា ​សំណង​​នឹង​ត្រូវ​ផ្ដល់​​​​ជូន​​​​ប្រជាពល​រដ្ឋ​​​១៥៤​​​គ្រួសារ​ក្នុង​ចំណោម​​​១៨៣​គ្រួសារ​ដែល​កំពុង​​​រស់​នៅ​លើ​ទីតំាង​​​នេះ​​​​នៅ​ឡើយ ដោយ​​៣៥​គ្រួសារ​ទទួល​​​​​​​​បាន​​​សំណង​​​​​​​​​ធំទី១ នោះ​​​​​​​គឺ​ផ្ទះ​​មួយ​ល្វែង​នៅ​លើ​ដី​ដែល​ធ្លាប់​​ជា​របស់​ខ្លួន។ ៨៥​គ្រួសារ​ទៀត​​​​ត្រូវ​បាន​ផ្ដល់​ជម្រើស​ឲ្យ​ទទួល​​​យក​​​​ប្រាក់​ចំនួន​៥.០០០​ដុល្លារ​ ឬ​​ដី​មួយ​ឡូតិ៍​​តូច​​នៅ​កន្លែង​តាំង​លំនៅ​ថ្មី​​​​ក្នុង​​​​ភូមិ​ឧដុង្គ​ ​ខេត្ត​កណ្ដាល ដែល​​​ស្ថិត​​​នៅ​​​​ចម្ងាយ​ប្រហែល​៤៥​គីឡូម៉ែត្រ​ពី​ចំណុច​កណ្ដាល​ក្រុង​ ចំណែក​​​ឯ​៣៤​គ្រួសារ​ចុង​ក្រោយ​​​​គេ​​​ទទួល​បាន​​​​​​ប្រាក់​​​សំណង​​​​​៣.០០០​ដុល្លារ​។ ​​​ដោយ​​​ឡែក​​ ការ​​​ទាម​​​ទារ​​​របស់​​​ប្រជាពលរដ្ឋ​​២៩​គ្រួសារ​​​ផ្សេង​ទៀត​​​មិន​​​​​​ត្រូវ​​​​​​​បាន​​​​​​រដ្ឋាភិបាល​​សម្រេច​​​ទទួល​ស្គាល់​​ឡើយ។

​​​ស្ថិត​​​នៅ​​​​ពី​​​ក្រោម​កៅស៊ូ​តង់​​ដែល​​​​​​​ត្រូវ​​​បាន​​​​​​ដំឡើង​​​​លើ​សំរាម​​​ដែល​​​​ធ្លាប់​​​​​មាន​ប្រជា​ពលរដ្ឋ​​​ចំនួន​​​​​១.៧៧៦​នាក់​រស់​នៅ​​​​​​ លោក មាន ចាន់យ៉ាដា ប្រធាន​រដ្ឋបាល​សាលា​រាជធានី​បាន​មាន​ប្រសាសន៍​ថា ការ​ផ្ដល់​សំណង​​​ផ្តាច់​​​ព្រ័ត្រ​​​នេះ​​បង្ហាញ​​ពី​ការ​បញ្ចប់​ជម្លោះ​ដ៏រ៉ាំ​​​រ៉ៃ។

“បុរី​កីឡា​គឺ​ជា​ករណី​ស្មុគ​​​ស្មាញ​ ហើយ​វា​មាន​ជម្លោះ​ជាយូរ​មក​ហើយ​។ ការ​​​​ជួប​​​ជុំ​​គ្នា​​​​នៅ​ថ្ងៃ​នេះ​​​គឺ​​​ជា​​​​ការ​ដោះ​​ស្រាយ​​​​បញ្ចប់​​​បញ្ហា​​​ជា​លើក​ចុង​ក្រោយ​” នេះ​ជា​អ្វី​​ដែល​​លោក ​មាន ចាន់យ៉ាដា បាន​​​​ថ្លែង​​​​​​ទៅ​កាន់​ប្រជា​ពលរដ្ឋ​​ប្រ​​​មាណ​​​៧០គ្រួសារ​ ភាគច្រើន​ជា​ស្ត្រី​ និង​កុមារ​​ដែល​មើល​ទៅ​ហាក់​​​​​​​មិនសូវ​​​​​​​​​ពេញ​​​ចិត្ត​​​។

លោក​​​​​​​​​លើក​​​ឡើង​​​ទៀត​​​​​​ថា ប្រជា​ពលរដ្ឋ​ទាំង​អស់​​លើក​លែង​តែ​មួយ​គ្រួសារនៅ​​ក្នុង​ចំណោម​​​​​៣៥​គ្រួសារ​ដែល​​ត្រូវ​បាន​ផ្ដល់​ផ្ទះ​ល្វែង បាន​ទទួល​យក​កិច្ច​ព្រមព្រៀង​នេះ​ហើយ​​​​​​​មាន​​​តែ​​​៤០​​​​​គ្រួសារ​​​​​​ប៉ុណ្ណោះ​​​​​​ក្នុង​ចំណោម​​៨៥​​​​គ្រួសារ​​​ដែល​​​​​​​យល់​ព្រម​ទទួល​យក​​​ប្រាក់​​​​សំណង​​​​៥.០០០​ដុល្លារ​ ឬ​ដី​មួយ​ឡូតិ៍​​នៅ​ឧដុង្គ ហើយ​​​​​​​​មាន​តែ​បួន​​គ្រួសារ​ប៉ុណ្ណោះ​​ដែល​​​​​​​សុខ​​​​​​ចិត្ត​​​​​​​​ផ្លាស់​ទៅ​តំបន់​នោះ។ ​​​ក្នុង​ចំណោម​ប្រជា​ពលរដ្ឋ​​៣៤​គ្រួសារ​ដែល​​​ត្រូវ​​​​​​បាន​​​​ផ្តល់​​​ប្រាក់​​​​​​សំណង​៣.០០០​ដុល្លារ​ មាន​តែ​១៦​គ្រួសារ​​​​ប៉ុណ្ណោះ​ដែល​​​សុខ​​​​​​ចិត្ត​​​​ទទួល​យក​។

បន្ទាប់ពី​លោក មាន​ ចាន់យ៉ាដា បញ្ចប់​សុន្ទរកថា​របស់​ខ្លួន ហើយ​​ប្រគល់​​មីក្រូហ្វូន​ឲ្យ​​​​ទៅ​មន្ត្រី​ម្នាក់​​ដែល​បាន​ចាប់​ផ្ដើម​​ហៅ​ឈ្មោះ​អ្នក​ដែល​​​ត្រូវ​​​បាន​​​​ផ្តល់​​​សំណង​​​​ភ្លាម ស្រាប់​​​តែ​​​​​​ស្ត្រី​មួយ​ក្រុម​មាន​គ្នា​​​​​ប្រហែល​​​ប្រាំបី​នាក់​​បាន​ហែក្បួន​​​ឆ្ពោះ​​​​ទៅ​​​រក​​​តង់​នោះ​ ដោយ​លើក​​​បដា​​​​​គ្រវីឯកសារ​ឡើង​​លើ​​​ពេល​ពួកគាត់​ស្រែក​។

អ្នកស្រី ភោគ សុផាន អាយុ​៤៣​ឆ្នាំ​បាន​ស្រែក​ថា “​ខ្ញុំ​នឹង​មិន​​​ចេញ​​​ពី​បុរី​កីឡា​ទេ ក្រុម​ហ៊ុន​​​​​​បាន​​​​​​កម្ទេច​​​ផ្ទះ​ខ្ញុំ​ដើម្បី​​​យក​ដី​ ហើយ​ពេល​នេះ​​ពួកគេ​បាន​សង់​វីឡា​លើ​ដី​នេះ​​​​ហើយ​​​”។

cam-photo-front-channa-1នៅ​ពេល​​​​​ក្រុម​​​អ្នក​យក​ព័ត៌មាន​ប្រហែល​២០​នាក់​​ព័ទ្ធ​ជុំវិញ​សកម្មជន​ទាំង​​​​​​​​នេះ អ្នកស្រី​ ភោគ សុផាន បាន​សម្ដែង​ការ​ខក​ចិត្ត​ចំពោះ​អ្វី​ដែល​អាជ្ញាធរ​បាន​ធ្វើ​​​ដាក់​​​គាត់​។ ប៉ុន្មាន​​​នាទី​ក្រោយ​​​មក លោក​​​ស្រី​​​ កែវ សាកល​​​ ចៅ​​​សង្កាត់​វាល​វង់ ​ខណ្ឌ៧មករា បាន​​​​ចូល​ទៅ​ជិត​អ្នកស្រី​ ភោគ សុផាន ហើយ​បាន​ចាប់​ឱប​អ្នកស្រី​​ហាក់​​​​​​ដូច​​​​​​ជា​ព្យាយាម​​​ធ្វើ​ឲ្យ​​​​អ្នក​​​ស្រី​​​រក្សា​ភាព​ស្ងាត់​​​ស្ងៀម ​​​មុន​ពេល​ប្រគល់​​​​អ្នក​​​ស្រី​​​ភ្លាមៗ​​​​​​ឲ្យ​ទៅ​នគរ​បាល​ខណ្ឌ​​ ដែល​​ចាប់​ផ្ដើម​អូស​​​​​​គាត់​​​​កាត់​មនុស្ស​​​​ជាច្រើន​​​​ឆ្ពោះ​​ទៅ​ផ្លូវ​ថ្នល់។

ពេល​កំពុង​​​​ផ្ទុះ​​​​ចលាចល​នេះ មន្ត្រី​សាលា​រាជធានី​មួយ​រូប​បាន​ពិភាក្សា​ជាមួយ​នគរបាល​ ហើយ​​​​​​​​អ្នក​​​ស្រី​​​ក៏​​ត្រូវ​បាន​បញ្ជូន​ទៅ​ខាង​ក្រោយ​​​​តង់​​​នោះ​​​​ជាមួយ​សកម្មជន​របស់​គាត់ រួច​​​ពិធី​នេះ​​ក៏​ត្រូវ​បាន​បិទ​ភ្លាមៗ​។

ពេលត្រឡប់​ទៅ​ផ្ទះ​ល្វែង​​របស់​​ប្អូន​ប្រុស​គាត់​ដែល​​​​ស្ថិត​នៅ​​អគារ​មួយ​ក្នុង​ចំណោម​ផ្ទះ​ល្វែង​ទាំង​ប្រាំបី​អគារ អ្នកស្រី ភោគ​ សុផាន ​បាន​និយាយ​ទាំង​ទឹក​ភ្នែក​រលីងរលោង​ថា ​អ្នកស្រី​បាន​​សម្រេច​ចិត្ត​​​​ទៅ​អុក​ឡុក​ពិធី​​នេះ​​បន្ទាប់ពី​​​​គ្រួសារ​របស់​គាត់​​ត្រូវ​បាន​លុប​ចេញ​ពី​បញ្ជី​សំណង​​​​ផ្តាច់​​​ព្រ័ត​​​នេះ។

អ្នកស្រី​​​​​​​​​និយាយ​​ថា “​​​ធ្វើ​បែប​នេះ​​​​​​អយុត្តិ​​​ធម៌​​​​​ណាស់​​​។ [លោកស្រី សាកល​​​] បាន​ប្រាប់​​​គេ​ឲ្យ​​​​នាំ​​​​​​​​​ខ្លួន​​​ខ្ញុំ​ទៅ​​​សាលា​​​​ខណ្ឌ តែ​ខ្ញុំ​មិន​ខ្លាច​ទេ​ ព្រោះ​ខ្ញុំ​មិន​បាន​ធ្វើ​ខុស​។ ខ្ញុំ​រស់​នៅ​ទីនេះ​តាំង​ពី​ឆ្នាំ​១៩៩៦ និង​​​​មាន​ឯកសារ​​​​បញ្ជាក់​”។

​​​​​​អ្នកស្រី អីុម ស្រីមុំ អាយុ​៣៥​ឆ្នាំ បាន​​​​​​និយាយ​​​​​នៅ​​​​ផ្លូវ​ឌឿងហែម​​ដែល​សម្បូរ​​ដោយ​​សត្វ​​​​រុយ​កាត់​តំបន់​​​ដែល​មាន​​ប្រជាពល​​​រដ្ឋ​​​​រាប់​រយ​នាក់​កំពុង​រស់​នៅ​​នេះ​​​​ថា អ្នកស្រី​​​សុខ​​​ចិត្ត​​​ចុះ​​​ចាញ់​​​លែង​​​​​​​ប្រឆាំង​សាលា​រាជធានី​ និង​ក្រុម​ហ៊ុន​ផានអុីម៉ិច​​​ទៀត​​​ហើយ​​​​។

cam-photo-borei-keila-jump-channaអ្នកស្រី​​​​​​​បាន​​​បន្ត​​​​​​ថា “​ខ្ញុំ​យល់​ព្រម​ទទួល​យក​​​សំណង​៥.០០០​ដុល្លារ។ ខ្ញុំ​មិន​ចង់ទៅ​​​​រស់​នៅ​​​​ឧដុង្គ​ទេ ព្រោះ​វា​តូច​ពេក​​សម្រាប់​កូនៗ​ខ្ញុំ​។ ខ្ញុំ​មិន​ពេញ​ចិត្ត​​​នឹង​​​កិច្ច​​​ព្រមព្រៀង​នេះ​ទេ ប៉ុន្តែ​ខ្ញុំ​គ្មាន​ជម្រើស​។ ​ខ្ញុំ​មិន​អាច​រស់​នៅ​ទីនេះ​​ទៀត​​​​​បាន​ទេ ខ្ញុំ​ក៏​មាន​អារម្មណ៍​ឈឺចាប់​​ដែរ​នៅ​ទីនេះ​” ហើយ​​ថា គាត់​មាន​​​​គម្រោង​​​ប្រើ​ប្រាស់​​​លុយ​នេះ​​​សម្រាប់​​​ការ​​​​​តាំង​លំនៅ​ថ្មី​ក្នុង​ខេត្ត​កោះកុង។

អ្នកស្រី​​​​បាន​​​លើក​​​​​​ឡើង​​​បន្ថែម​​​ទៀត​​​​ថា “​ខ្ញុំ​បាន​ចូល​រួម​​តវ៉ា​​​យូរ​​ណាស់​មក​ហើយ​។ ខ្ញុំ​ចង់​​​តស៊ូ​​​​បន្ត​​​ទៀត​ ប៉ុន្តែ​ខ្ញុំ​គ្មាន​ជម្រើស​​​ទេ​។ ខ្ញុំ​​​លែង​​​​​​​​ធ្វើ​​​បែប​​​នេះបាន​​​ទៀត​​​ហើយ​​​។ ​ខ្ញុំ​មាន​កូន​ ហើយ​​​​ខ្ញុំ​មិន​អាច​​ទំនុក​បម្រុង​​ពួកគេ​ឲ្យ​បាន​​​ល្អ​​​ទេ​​ បើ​ខ្ញុំ​បន្តធ្វើ​ការ​តវ៉ា​​​ទៀត”​។

ពេល​ទាក់​ទង​បន្ទាប់ពី​​​​វិធី​​នេះ​​​​បិទ លោកស្រី ​​​កែវ សាកល បដិសេធ​ថា​​​​​មិន​បាន​ប្រគល់ខ្លួន​​​អ្នកស្រី ភោគ សុផាន ឲ្យ​​​ទៅ​​​​នគរ​បាល​ទេ​ ហើយ​​​​​​​បាន​​​លើក​ឡើង​ថា ការ​​​ប្រតាយប្រតប់​​​គ្នា​​​មួយ​​​ប្រាវ​​​​នេះ​​​​គ្រាន់​តែ​ជា​ការ​​​យល់​​​ច្រឡំ​​​​ប៉ុណ្ណោះ។

លោកស្រី​បាន​មាន​ប្រសាសន៍​​​​ថា ”​ខ្ញុំ​​ទៅ​ជួយ​​​​​​​គាត់ ពី​ព្រោះ​ខ្ញុំ​ចង់​ឲ្យ​អ្នក​តវ៉ា​​​​និយាយ​ជាមួយ​អាជ្ញាធរ។ ខ្ញុំ​មិន​បាន​ប្រគល់​គាត់​ឲ្យ​​ទៅ​ប៉ូលិស​ទេ។ ការ​តវ៉ា​នេះ​​​កើត​ឡើង​ដោយ​​​សារ​តែ​​អ្នក​កាសែត និង​​អ្នក​ថត​ជា​ច្រើន​​បាំង​ពួក​​​គាត់ ធ្វើ​​​​​​ឲ្យ​​​ពួក​​​គាត់​​​​​ស្ដាប់​មិន​ឮ​អ្វី​ដែល​អ្នក​តំណាង​បាន​ប្រកាស​”។

ទោះ​បី​ជា​សាលា​រាជធានី​​​ប្រឹង​ប្រែង​​​​​បញ្ចប់​​​ជម្លោះ​បុរីកីឡា​យ៉ាង​​​ណា​​​ក្ដី ក៏​អ្នកស្រី ភោគ សុផាន បាន​ប្ដេជ្ញា​​​​ធ្វើ​ការ​តវ៉ា​​​តទៅ​​​ទៀត​​​។ អ្នកស្រី​និយាយ​ថា “​ខ្ញុំ​នឹង​តវ៉ា​ទៀត​​ ខ្ញុំ​មិន​ឈប់ទេ”៕ សុខុម​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស