លោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រី ហ៊ុន សែន កាលពីថ្ងៃសុក្រ បានដាក់ពាក្យបណ្ដឹងពីបទបរិហារកេរ្តិ៍ប្រឆាំងម្ចាស់គណនីហ្វេសប៊ុកម្នាក់ដែលបានភ្ជាប់រូបលោក និងម្ដាយរបស់លោកទៅនឹងពាណិជ្ជកម្មឈើប្រណីតខុសច្បាប់។
ក្នុងការបង្ហោះលើទំព័រហ្វេសប៊ុកផ្ទាល់របស់លោកកាលពីរសៀលថ្ងៃសុក្រ ឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ បានមានប្រសាសន៍ថា ម្ចាស់គណនីដែលប្រើឈ្មោះ Chham Chhany បានបង្ខូចកិត្តិយស និងក្រុមគ្រួសាររបស់លោក។
ឧត្ដមសេនីយ៍ឯក ម៉ាណែត បានសរសេរថា “ថ្ងៃនេះខ្ញុំចាត់វិធានការផ្លូវច្បាប់លើមនុស្សម្នាក់មានឈ្មោះ Chham Chhany ដែលបានប្រឌិតរឿងដែលធ្វើឲ្យប៉ះពាល់ដល់កិត្តិយសរបស់ខ្ញុំ និងក្រុមគ្រួសាររបស់ខ្ញុំ”។
“ក្នុងសង្គមប្រជាធិបតេយ្យ ពលរដ្ឋគ្រប់រូបមានសិទ្ធិបញ្ចេញមតិ។ ប៉ុន្តែការប្រើសិទ្ធិបញ្ចេញមតិបុគ្គលត្រូវតែមានការទទួលខុសត្រូវ”។
ការបង្ហោះដែលមានចំណងជើងថា ”ឧក្រិដ្ឋជនព្រៃឈើកាច់កុងគ្នា ព្រោះចង់កាន់កាប់តំបន់កាប់ឈើ បានផលត្រកូល ហ៊ុន” បានធ្វើឡើងឆ្លើយតបទៅនឹងក្រុមការងារដែលទើបបង្កើតថ្មីរបស់រដ្ឋាភិបាលដើម្បីបង្ក្រាបការរកស៊ីឈើខុសច្បាប់ដ៏រាលដាល។ ការបង្ហោះនោះភ្ជាប់ឧត្ដមសេនីយ៍ឯក ម៉ាណែត និងម្ដាយរបស់លោក គឺលោកស្រី ប៊ុន រ៉ានី ទៅនឹងឈ្មួញស្ដុកស្ដម្ភពីរនាក់ ឈ្មោះ សឹង សំអុល និង លឹម ប៊ុណ្ណា ដែលនៅពេលថ្មីៗនេះលោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីបានចាត់ទុកថា ជាគោលដៅសំខាន់ក្នុងការបង្ក្រាបថ្មីលើការកាប់ឈើខុសច្បាប់។
ដោយសំដៅទៅដល់ការឆ្មក់ចាប់កាលពីសប្ដាហ៍មុន ដែលលទ្ធផលមិនទាន់ចេញជាសាធារណៈនៅឡើយ ការបង្ហោះនោះបាននិយាយថា “សឹង សំអុល មាន ប៊ុន រ៉ានី ជាខ្នងបង្អែក ចំណែកឯ លឹម ប៊ុណ្ណា មាន ហ៊ុន ម៉ាណែត នៅពីក្រោយ ចឹងហើយបានជាសមត្ថកិច្ចដែលចុះទៅពិនិត្យកន្លែងស្តុកឈើរបស់ លឹម ប៊ុណ្ណា និយាយថា ជាឈើស្របច្បាប់។
Chham Chhany បានសរសេរថា គាត់បានទទួលព័ត៌មានឲ្យដឹងថា “សមត្ថកិច្ចបានទទួលបញ្ជាពី ប៊ុន រ៉ានី ហ៊ុន សែន ឲ្យសម្រួលដល់ការងាររកស៊ីរបស់ឧកញ៉ាទាំងពីរ”។
“ឧកញ៉ា” ជាគោរមងារផ្ដល់ឲ្យពាណិជ្ជករជាថ្នូរនឹងការរួមចំណែកហិរញ្ញវត្ថុដ៏ច្រើនដល់រដ្ឋ។
អ្នកប្រើហ្វេស៊ុកដដែលបានសរសេរថា ”ប្រភពរបស់ខ្ញុំបានបញ្ជាក់ថា ដើមឡើយប្រហែលជា ប៊ុន រ៉ានី ហ៊ុន សែន មិនដឹងថាឧកញ៉ា ខ្នា (លោក ប៊ុណ្ណា) មានទំនាក់ទំនងជាមួយ ហ៊ុន ម៉ាណែត ទេ បានជាខ្ចីដៃសម្ដេចកម្ចាត់ឧកញ៉ា ខ្នា ទុកកន្លែងឲ្យឧកញ៉ា សឹង សំអុល កាប់ឈើ។ តែក្រោយពីឧកញ៉ា ខ្នា សុំអន្តរាគមន៍ពី ហ៊ុន ម៉ាណែត ក៏អ្វីៗបានប្រែប្រួលទៅ គឺ “ឈើស្របច្បាប់” បានន័យថា ឧកញ៉ាទាំងពីរនៅតែមានឱកាសកាប់ឈើដដែល សំខាន់ឲ្យតែមានសំណែនសែនឲ្យ ប៊ុន រ៉ានី និង ហ៊ុន ម៉ាណែត ស៊ីគ្រប់គ្រាន់ តែបើមិនគ្រប់ទេ គុក គុក គុក”។
កាលពីដើមខែនេះ ស្នងការដ្ឋាននគរបាលជាតិបានបង្ហោះរបាយការណ៍មួយលើគេហទំព័ររបស់ខ្លួន ដោយចោទលោក សំអុល ថាបានលាងឈើដែលកាប់ខុសច្បាប់តាមរយៈសម្បទានដីសេដ្ឋកិច្ចមួយកន្លែងនៅខាងក្នុងជម្រកសត្វព្រៃភ្នំព្រិច នៅខេត្តមណ្ឌលគិរី។ក្រោយពីព័ត៌មាននេះជ្រួតជ្រាបដល់បណ្ដាញព័ត៌មាន សេចក្ដីរាយការណ៍នេះបានបាត់ទៅវិញពីគេហទំព័រ ហើយក្រុមមន្ត្រីនគរបាលបានលើកឡើងថា មិនដែលមានព័ត៌មាននេះទេ។
ជាផ្នែកមួយនៃការបង្ក្រាបដែលកើតឡើងបន្ទាប់មកទៀត ឃ្លាំងមួយក្នុងខេត្តក្រចេះរបស់លោក ប៊ុណ្ណា ត្រូវបានគេឆែកឆេររកឈើខុសច្បាប់។ អភិបាលខេត្តមណ្ឌលគិរីក៏បានមានប្រសាសន៍នៅសប្ដាហ៍នេះដែរថា លោក ប៊ុណ្ណា បានទទួលសម្បទានដីសេដ្ឋកិច្ចមួយកន្លែងក្នុងជម្រកសត្វព្រៃភ្នំព្រិច បន្ទាប់ពីលោក ហ៊ុន សែន បានផ្អាកការអភិវឌ្ឍបែបនេះកាលពីឆ្នាំ២០១២ ក៏ប៉ុន្តែក្រសួងបរិស្ថានបាននិយាយថា កិច្ចសន្យានោះគឺគ្រាន់តែកាប់ឆ្ការព្រៃលើដីសម្បទានមួយកន្លែងដែលលុបចោលប៉ុណ្ណោះ”។
សមាជិកគ្រួសាររបស់លោក ហ៊ុន សែន កាលពីមុនត្រូវបានភ្ជាប់ទៅនឹងការកាប់ឈើខុសច្បាប់ ដែលឃើញព្រៃឈើរបស់ប្រទេសកម្ពុជាត្រូវកាប់បំផ្លាញក្នុងអត្រាដ៏លឿនបំផុតមួយនៅលើពិភពលោក ក្នុងរបាយការណ៍ក្លូបលវិតណេសឆ្នាំ២០០៧ ដែលមានចំណងជើងថា ពង្សាវលីកម្ពុជា (Cambodia’s Family Tree) ៖ ការកាប់ឈើខុសច្បាប់ និងការដកហូតទ្រព្យសម្បត្តិសាធារណៈ”។ របាយការណ៍បានសរសេរថា ក្រុមកាប់ឈើខុសច្បាប់ដ៏មានឥទ្ធិពលបំផុតធ្វើប្រតិបត្តិការដោយបងប្អូនជីដូនមួយរបស់លោក ហ៊ុន សែន និងអតីតភរិយារបស់គាត់ជាមិត្តភក្តិរបស់លោកស្រី ប៊ុន រ៉ានី។ រដ្ឋាភិបាលបានបញ្ជាឲ្យរឹបអូស និងបំផ្លាញរបាយការណ៍ថតចម្លងទាំងអស់នោះ។
បន្ទាប់ពីការចេញរបាយការណ៍មួយមុននោះស្ដីពីការកាប់ឈើខុសច្បាប់នៅឆ្នាំ២០០៥ ”ការជាប់ពាក់ព័ន្ធលក្ខណៈជាប្រព័ន្ធ(Taking a Cut)” អង្គការក្លូបលវីតណេស ត្រូវបានគេហាមប្រាមមិនឲ្យធ្វើការក្នុងប្រទេសកម្ពុជា ទោះជាយ៉ាងនេះក្ដី អង្គការនេះបានបន្តធ្វើការស៊ើបអង្កេតលើការលួចប្លន់យកធនធានធម្មជាតិរបស់ប្រទេសកម្ពុជា។
ឧត្ដមសេនីយ៍ឯក ម៉ាណែត បានមានប្រសាសន៍ក្នុងការបង្ហោះរបស់លោកកាលពីថ្ងៃសុក្រថា លោកបានដាក់ពាក្យប្ដឹងពីបទបរិហារកេរ្តិ៍ទៅនគរបាលជាតិ និងបានស្នើឲ្យ Chham Chhany ដែលមានទំព័រហ្វេសប៊ុករបស់គាត់និយាយថា គាត់រៀននៅអាមេរិក និងថាគាត់រស់នៅទីនោះ ត្រូវយកមកផ្ដន្ទាទោសតាមអំណាចច្បាប់ទាំងស្រុង។
ម្ចាស់គណនីហ្វេសប៊ុកនេះមិនអាចទាក់ទងបានភ្លាមៗដើម្បីសុំការពន្យល់ទេ។
លោក នេត សាវឿន អគ្គស្នងការនគរបាលជាតិបានមានប្រសាសន៍ថា លោកមិនទាន់អាចធ្វើអត្ថាធិប្បាយណាមួយទាក់ទិននឹងបណ្ដឹងរបស់ឧត្ដមសេនីយ៍ឯក ម៉ាណែត បានទេ។
លោកបានមានប្រសាសន៍ថា “ខ្ញុំមិនទាន់ទទួលបានបណ្ដឹងនោះដល់ដៃខ្ញុំនៅឡើយទេ”៕ និត