លោក ហេង សំរិន ប្រធានរដ្ឋសភាបានបដិសេធមិនបញ្ជូនបន្តទៅលោកនាយករដ្ឋមន្ត្រី ហ៊ុន សែន ឡើយនូវលិខិតរបស់តំណាងរាស្ត្រគណបក្សប្រឆាំងមួយរូប ដែលស្នើសុំឲ្យលុបចោលចម្ការកៅស៊ូមួយចំនួនដែលគ្រប់គ្រងដោយមេបញ្ជាការកងទ័ពវៀតណាម ព្រោះវារំលោភរដ្ឋធម្មនុញ្ញ។
លិខិតចុះកាលបរិច្ឆេទថ្ងៃទី២៥ ខែមករា របស់លោក អ៊ុំ សំអាន តំណាងរាស្ត្រគណបក្សសង្គ្រោះជាតិនេះ កើតមានឡើងបន្ទាប់ពីកាសែត ខេមបូឌា ដេលី បានចុះផ្សាយកាលពីខែធ្នូ ដោយលាតត្រដាងថា យោធាវៀតណាម បានកាន់កាប់ចម្ការកៅស៊ូចំនួនបួនជាបន្តបន្ទាប់ដែលមានផ្ទៃសរុបជិត៤០.០០០ហិកតានៅក្នុងខេត្តរតនគិរី តាមបណ្ដោយព្រំដែនកម្ពុជា-វៀតណាម។
កាលពីម្សិលមិញ លោក ឡេង ប៉េងឡុង អ្នកនាំពាក្យ និងជាអគ្គលេខាធិការរដ្ឋសភាបានបញ្ជាក់ថា ពិតជាទទួលបានលិខិតនេះមែន ហើយមានប្រសាសន៍ថា រដ្ឋសភានឹងមិនបញ្ជូនវាទៅនាយករដ្ឋមន្ត្រីឡើយ។ លោកបានគូសបញ្ជាក់ថា “សម្ដេច [លោក ហេង សំរិន] មិនបានបញ្ជូនលិខិតនេះទៅសម្ដេចនាយករដ្ឋមន្ត្រីទេ ពីព្រោះសម្ដេចយល់ថា លិខិតនេះជាការឃោសនារបស់បុគ្គលម្នាក់ និងគ្មានលក្ខណៈសម្បត្តិគ្រប់គ្រាន់”។
ក្នុងលិខិតដែលបង្ហោះលើទំព័រហ្វេសប៊ុករបស់ខ្លួននេះ លោក អ៊ុំ សំអាន បានបញ្ជាក់ថា សម្បទានដីសេដ្ឋកិច្ចរំលោភរដ្ឋធម្មនុញ្ញ ពីព្រោះវាស្មើនឹងមូលដ្ឋានទ័ពវៀតណាម ទោះបីជាគ្មានភ័ស្តុតាងបង្ហាញពីសកម្មភាពយោធានៅលើដីនោះក៏ដោយ។
លិខិតនេះមានខ្លឹមសារដូច្នេះថា ”សូមសម្តេចនាយករដ្ឋមន្ត្រីមេត្តាពិនិត្យ និងដកហូតដីសម្បទានសេដ្ឋកិច្ចពីកងទ័ពប្រជាជនវៀតណាម ដែលកាន់កាប់ និងបោះទីតាំងមូលដ្ឋានយោធាលើដីសម្បទានសេដ្ឋកិច្ចនៅខេត្តរតនគិរី ដោយក្តីអនុគ្រោះ”។
ទន្ទឹមនឹងនេះ នៅលើទំព័រហ្វេសប៊ុករបស់ខ្លួន លោក អ៊ុំ សំអាន បានចោទប្រកាន់លោក ហេង សំរិន ថាបំពានទាំងរដ្ឋធម្មនុញ្ញ និងបទបញ្ជាផ្ទៃក្នុងរដ្ឋសភាតាមរយៈការបដិសេធមិនបញ្ជូនលិខិតនេះបន្តទៅលោក ហ៊ុន សែន។
លោកសរសេរថា “សម្តេច ហេង សំរិន ប្រើសិទ្ធិអំណាច និងតួនាទីរបស់សម្តេចក្នុងនាមជាប្រធានរដ្ឋសភា ហួសព្រំដែន”។
ទាក់ទិនការលើកឡើងបែបនេះ លោក ឡេង ប៉េងឡុង បានឆ្លើយតបថា ប្រធានរដ្ឋសភាមានសិទ្ធិអំណាចសម្រេចថាលិខិតប្រភេទណាគួរទៅដល់លោក ហ៊ុន សែន ហើយបានលើកឡើងជាទឡ្ហីករណ៍ថា លោកនាយករដ្ឋមន្ត្រីបានបកស្រាយយ៉ាងលម្អិតជាសាធារណៈរួចទៅហើយជុំវិញជម្លោះព្រំដែនរ៉ាំរ៉ៃរបស់កម្ពុជា ជាមួយវៀតណាម។
លោកមានប្រសាសន៍ថា “សម្ដេចប្រធាន [លោក ហេង សំរិន] មិនបានរំលោភរដ្ឋធម្មនុញ្ញដូចការចោទប្រកាន់នោះទេ ពីព្រោះសម្ដេចមានឆន្ទានុសិទ្ធិនៅពេលបញ្ជូនឯកសារទៅរដ្ឋាភិបាល។ ហើយសម្ដេចនាយករដ្ឋមន្ត្រីធ្លាប់បានបកស្រាយរឿងនេះរួចមកហើយ ដូច្នេះបើសម្តេចបញ្ជូនលិខិតនេះទៅ វាគ្មានប្រយោជន៍ទេ”។
លោកបានបន្ថែមថា សម្បទានដីសេដ្ឋកិច្ចដែលត្រូវបានលើកឡើងប្រាកដជាស្របច្បាប់ ពីព្រោះលោកនាយករដ្ឋមន្ត្រីជាអ្នកអនុម័តវា។ “ទង្វើរបស់រដ្ឋាភិបាលក្នុងការផ្ដល់សម្បទានដីសេដ្ឋកិច្ចមិនខុសទេ ពីព្រោះសម្ដេចនាយករដ្ឋមន្ត្រីធ្វើអ្វីៗផ្អែកទៅតាមច្បាប់”។
លោក អ៊ុំ សំអាន ដែលកំពុងនិរទេសខ្លួននៅបរទេស មិនអាចទាក់ទងសុំការបំភ្លឺបានទេកាលពីម្សិលមិញ។ តំណាងរាស្ត្រគណបក្សប្រឆាំងរូបនេះស្ថិតក្នុងចំណោមអ្នករិះគន់មិនសំចៃមាត់បំផុតចំពោះការងារកំណត់ព្រំដែនកម្ពុជា-វៀតណាម ដែលកំពុងបន្តរបស់រដ្ឋា-ភិបាល ហើយបានសម្រេចចិត្តនៅបរទេសសិនដោយសារខ្លាចត្រូវចាប់ខ្លួន ក្រោយពីមានការចោទប្រកាន់រូបលោកជាសាធារណៈពីបទញុះញង់។
កាលពីម្សិលមិញ លោក អ៊ូ ច័ន្ទរិទ្ធ តំណាងរាស្ត្រគណបក្សសង្គ្រោះជាតិ ដែលជាសហសេវិករបស់លោក អ៊ុំ សំអាន បានច្រានចោលការបកស្រាយរបស់លោក ឡេង ប៉េងឡុង អំពីបទបញ្ជាផ្ទៃក្នុងដែលកំណត់និយមន័យអំណាចរបស់ប្រធានរដ្ឋសភា។ លោកមានប្រសាសន៍ថា “វាមិនត្រឹមត្រូវទេ។ លិខិតទាំងអស់មិនថាលិខិតប្រភេទណាក៏ដោយ គួរតែបញ្ជូនទៅរដ្ឋាភិបាលទាក់ទិនបញ្ហាណាមួយ ហើយទុកឲ្យរដ្ឋាភិបាលឆ្លើយតប”។
គណបក្សប្រឆាំងចោទប្រកាន់ថា លោក ហេង សំរិន ធ្លាប់បានផ្អឹបលិខិតរបស់ខ្លួនមិនផ្ញើទៅមន្ត្រីរដ្ឋាភិបាលប៉ុន្មានលើករួចមកហើយកាលពីមុន។
និយាយពីសម្បទានដីសេដ្ឋកិច្ចនៅក្នុងខេត្តរតនគិរី លោក អ៊ូ ច័ន្ទរិទ្ធ ថ្លែងថា វាមិនមែនជាជំហរផ្លូវការរបស់គណបក្សសង្គ្រោះជាតិទេដែលថា ចម្ការចំនួនបួនខាងលើនេះត្រូវបានចាត់ទុកជាមូលដ្ឋានយោធាបរទេសដែលរំលោភរដ្ឋធម្មនុញ្ញនោះ ហើយថា ទីតាំងទាំងនេះចាំបាច់ត្រូវមានការស៊ើបអង្កេតបន្ថែមទៀត៕ សុខុម (រាយការណ៍បន្ថែមដោយ Zsombor Peter)