នគរបាលបាននិយាយកាលពីម្សិលមិញថា បុរសកូរ៉េខាងត្បូងម្នាក់ដែលនគរបាលអាំងទែប៉ូលតាមចាប់ពីបទរត់ពន្ធគ្រឿងញៀន ត្រូវបានចាប់ខ្លួននៅខេត្តសៀមរាបកាលពីថ្ងៃអាទិត្យ និងកំពុងរង់ចាំការនិរទេសទៅប្រទេសកំណើតរបស់គាត់វិញ។
លោក ម៉ក់ ជីតូ អគ្គស្នងការរងនគរបាលជាតិ បាននិយាយថា ស៊ីន ជុងជុល (Shin Jung-chul) អាយុ៥៣ឆ្នាំ បានរស់នៅក្នុងប្រទេសកម្ពុជាប្រហែលមួយឆ្នាំមកហើយ ប៉ុន្តែទើបតែត្រូវគេរកឃើញនៅខេត្តសៀមរាប។ លោកបាននិយាយថា ជនជាតិកូរ៉េខាងត្បូងរូបនេះត្រូវបានចាប់ខ្លួនបន្ទាប់ពីនគរបាលអំាងទែប៉ូលបានចេញនិវេទន៍ក្រហមតាមចាប់គាត់កាលពីខែមុន។
ឧត្តមសេនីយ៍ឯក ម៉ក់ ជីតូ បាននិយាយថា “គាត់ជាមេខ្លោងនៃក្រុមរត់ពន្ធគ្រឿងញៀនឆ្លងដែនពីប្រទេសកូរ៉េទៅប្រទេសផ្សេងទៀត” ក៏ប៉ុន្តែ លោកមិនបានផ្តល់សេចក្តីលម្អិតអំពីក្រុមនេះទេ។ លោកបាននិយាយថា បន្ទាប់ពីការចាប់ខ្លួន ជនសង្ស័យរូបនេះត្រូវបានបញ្ជូនទៅអគ្គនាយកដ្ឋានអន្តោប្រវេសន៍នៃក្រសួងមហាផ្ទៃរង់ចាំការនិរទេស។
លោក អ៊ំុ អាំម៉ារ៉ា ស្នងការរងខេត្តសៀមរាបបានបញ្ជាក់ថា លោក ស៊ីន ត្រូវបានចាប់ខ្លួននៅសង្កាត់ស្វាយដង្គំ ក្នុងខេត្តសៀមរាប។ លោកបាននិយាយថា “យើងបានចាប់ខ្លួនគាត់ផ្អែកលើនិវេទន៍ក្រហមរបស់នគរបាលអាំងទែប៉ូល ពីព្រោះគាត់ពាក់ព័ន្ធនឹងករណីគ្រឿងញៀនជាច្រើនករណីក្នុងប្រទេសរបស់គាត់”៕ និត