សកម្មជនការពារបរិស្ថាន អាឡិច ហ្គនហ្សាឡេស ដេវីដសុន បានធ្វើការអំពាវនាវដោយផ្ទាល់ទៅលោកនាយករដ្ឋមន្ត្រី ហ៊ុន សែន តាមហ្វេសប៊ុកកាលពីម្សិលមិញ ស្នើសុំឲ្យលោកជួយធ្វើយ៉ាងណាឲ្យទទួលបានទិដ្ឋាការវិលត្រឡប់មកប្រទេសកម្ពុជាវិញដើម្បីចូលរួមសវនាការនៅពេលខាងមុខទាក់ទិននឹងការជួួយសកម្មជនបីនាក់ផ្សេងទៀត។
សកម្មជនបីនាក់មកពីអង្គការមាតាធម្ម ជាតិ ជាអង្គការមិនមែនរដ្ឋាភិបាលដែលមាន លោក ហ្គនហ្សាឡេស ដេវីដសុន ជាសហស្ថាបនិកនោះត្រូវបានចាប់ខ្លួន និងចោទប្រកាន់ដោយសាលាដំបូងខេត្តកោះកុងកាល ពីខែសីហា ពីបទគំរាមបង្កការខូចខាត។ ការចោទប្រកាន់នេះកើតចេញពីយុទ្ធនាការមួយ របស់ពួកគាត់ប្រឆាំងនឹងក្រុមហ៊ុនបូមខ្សាច់ដែលពួកគាត់អះអាងថា ធ្វើប្រតិបត្តិការដោយខុសច្បាប់។
កាលពីម្សិលមិញ លោក ហួន ម៉ានី ប្រធាន សាលាដំបូងបានអះអាងថា លោក ហ្គនហ្សាឡេស ដេវីដសុន ក៏ត្រូវបានចោទប្រកាន់ដែរ។
លោកបានមានប្រសាសន៍ថា “តុលាការបានចោទប្រកាន់គាត់រួចហើយ ពីបទសមគំនិតនៅក្នុងបទល្មើសដូចគ្នាដែលថ្នាក់ក្រោម របស់គាត់បានប្រព្រឹត្ត”។លោកបានបដិសេធមិនធ្វើអត្ថាធិប្បាយបន្ថែមឡើយ។
កាលពីឆ្នាំ២០១៤មន្ត្រីរដ្ឋាភិបាលបានចោទប្រកាន់លោក ហ្គនហ្សាឡេស ដេវីដសុន ថាបានដាក់របាំងដោយខុសច្បាប់បិទផ្លូវមួយឆ្ពោះទៅកាន់តំបន់ជ្រលងអារ៉ែងក្នុងខេត្តកោះកុង ជាផ្នែកនៃយុទ្ធនាការដាច់ដោយឡែកមួយទៀតដឹកនាំដោយអង្គការមាតាធម្មជាតិប្រឆាំងគម្រោងទំនប់វារីអគ្គិសនី។ ជាជាងនាំគាត់ទៅកាន់តុលាការ រដ្ឋាភិបាលបានបដិសេធមិនព្រមពន្យារទិដ្ឋាការឲ្យគាត់ទេ ហើយបាននិរទេសសកម្មជនជនជាតិអេស្បា៉ញរូបនេះកាលពីដើមឆ្នាំមុន។
លោក ហ្គនហ្សាឡេស ដេវីដសុន បានលើកឡើងថា ការចូលរួមសវនាការរបស់ខ្លួនគឺជាសិទ្ធិស្របច្បាប់របស់គាត់។ នៅក្នុងវីដេអូមួយបង្ហោះនៅលើទំព័រហ្វេសប៊ុករបស់ខ្លួនកាលពីម្សិលមិញ គាត់បានស្នើឲ្យលោក ហ៊ុន សែន ជួយធ្វើយ៉ាងណាឲ្យគាត់ទទួលបានទិដ្ឋាការដែលគាត់ត្រូវការដើម្បីវិលត្រឡប់មកប្រទេសកម្ពុជាវិញ។
លោកបាននិយាយជាភាសាខ្មែរនៅក្នុងវីដេអូនេះដែលអមដោយទូរបទ(អក្សរលោតលើអេក្រង់)ជាភាសាអង់គ្លេសថា ”លោកនាយករដ្ឋមន្ត្រី ដូចដែលលោកបានដឹងរួចមកហើយថា តុលាការខេត្តកោះកុងបានចោទប្រកាន់ខ្ញុំក្នុងពេលថ្មីៗនេះថា បានសម គំនិតនៅក្នុងបទល្មើសមួយជាមួយនឹងសកម្មជនបីនាក់ផ្សេងទៀតមកពីអង្គការមាតាធម្មជាតិ…ទាក់ទិននឹងយុទ្ធនាការរបស់យើងប្រឆាំងការបូមខ្សាច់នៅក្នុងខេត្តកោះកុង”។
លោកបានលើកឡើងបន្តថា “តុលាការខេត្តកោះកុងនឹងផ្តន្ទាទោសខ្ញុំកំបាំងមុខក្នុងពេលឆាប់ៗ ជាអ្វីដែលខ្ញុំមិនអាចទទួលយកបានទេ ព្រោះការធ្វើបែបនេះរំលោភសិទ្ធិមូលដ្ឋានរបស់ខ្ញុំ”។
“ មាត្រា៣៨នៃរដ្ឋធម្មនុញ្ញកម្ពុជា មាត្រា១៤នៃអនុសញ្ញាអន្តរជាតិស្តីពីសិទ្ធិស៊ីវិល និងសិទ្ធិនយោបាយ និងមាត្រា៣០០នៃក្រមនីតិវិធីព្រហ្មទណ្ឌសុទ្ធតែតម្រូវថា ជនជាប់ចោទត្រូវចូលបង្ហាញខ្លួននៅពេលសវនាការរបស់តុលាការដោយផ្ទាល់”។
លោក ហ្គនហ្សាឡេស ដេវីដសុន បានលើកឡើងបន្តទៀតថា លោកនឹងដាក់ពាក្យស្នើសុំទិដ្ឋាការនៅស្ថានទូតកម្ពុជាមួយដែលលោកមិនបានបញ្ជាក់ច្បាស់លាស់។លោកបាននិយាយថា “ហេតុដូច្នេះ ខ្ញុំស្នើឲ្យនាយករដ្ឋមន្ត្រីនៃប្រទេសកម្ពុជាមេត្តាពន្លឿនពាក្យសុំរបស់ខ្ញុំដើម្បីឲ្យខ្ញុំមានឱកាសបានវិលត្រឡប់មកប្រទេសកម្ពុជាវិញ ហើយចូលរួមការបើក សវនាការរបស់ខ្ញុំ”។
ពេលទាក់ទងតាមអីុម៉េល លោក ហ្គនហ្សាឡេស ដេវីដសុន បានលើកឡើងថា លោកមានគម្រោងដាក់ពាក្យសុំទិដ្ឋាការនៅក្នុងប្រទេសថៃជាកន្លែងដែលលោកបានថតវីដេអូនេះ។
លោកបាននិយាយថា “បើគេព្រមទទួលយក ខ្ញុំនឹងវិលមកប្រទេសកម្ពុជាវិញក្នុងពេលឆាប់ៗតាមដែលអាចធ្វើទៅបាន។ ប្រសិនបើគេបដិសេធ មេធាវីរបស់ខ្ញុំអាចប្រើការបដិសេធនោះដើម្បី ស្នើឲ្យប្រកាសចាត់ទុកសវនាការទាំងមូលរបស់ខ្ញុំជាមោឃៈ ព្រោះថា បើចោទប្រកាន់ពីបទល្មើស ហើយមិនអនុញ្ញាតឲ្យខ្ញុំការពារខ្លួននៅក្នុងតុលាការនោះ គឺវារំលោភច្បាប់មួយចំនួនយ៉ាងច្បាស់ក្រឡែត”។
តំណាងលោក ហ៊ុន សែន មិនអាចទាក់ទងបានទេកាលពីម្សិលមិញ។
តាមផ្លូវច្បាប់ ទិដ្ឋាការគឺស្ថិតក្នុងបន្ទុកផ្លូវច្បាប់របស់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ។ ឧត្តមសេនីយ៍ សុខ ផល ដែលជាអគ្គនាយកនៃអគ្គនាយកដ្ឋាននេះបានលើកឡើងថា លោកកំពុងរង់ចាំការណែនាំពីនាយករដ្ឋមន្ត្រី។ លោកបានមានប្រសាសន៍ថា “ខ្ញុំបានឃើញវីដេអូនោះហើយ ប៉ុន្តែ ខ្ញុំមិន ទាន់ដឹងអំពីការសម្រេចរបស់លោកនាយករដ្ឋមន្ត្រីនៅឡើយទេ”។លោកបានបដិសេធមិនធ្វើអត្ថាធិប្បាយបន្ថែមឡើយ៕ ស៊ុយឈាង