លោក អឹុម ឈុនលឹម រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់បានលើកឡើងកាលពីម្សិលមិញថា បុគ្គលិករបស់លោកបានចុះទៅកន្លែងធ្វើការរួចហើយដោយ កំពុងសិក្សាអំពីដីធ្លីដែលរដ្ឋាភិបាលបានដកហូតពីម្ចាស់ដីសម្បទានសេដ្ឋកិច្ចសម្រាប់ចែកជូនគ្រួសារក្រីក្រ ទោះជាយ៉ាងណានៅមិនទាន់មានព័ត៌មានលម្អិតស្តីពីទីតាំងនៃដីសម្បទានសេដ្ឋកិច្ចទាំងនោះនៅឡើយទេ។
កាលពីថ្ងៃព្រហស្បតិ៍ លោកនាយករដ្ឋមន្ត្រី ហ៊ុន សែន បានប្រកាសបញ្ចប់ការពិនិត្យឡើងវិញរាប់ឆ្នាំរបស់រដ្ឋាភិបាលលើដីសម្បទានសេដ្ឋកិច្ចនៅទូទាំងប្រទេស ហើយថា ដីជិតពាក់កណ្តាលនៃដីទំហំជាង២លានហិកតាដែលត្រូវបានចែកទៅឲ្យក្រុមហ៊ុននានាសម្រាប់គម្រោងកសិឧស្សាហកម្មត្រូវបានដកហូតយកមកវិញហើយ។លោកបានលើកឡើងថា ដីជិត១លានហិកតាដែលត្រូវបានដកហូតមកវិញដោយការពិនិត្យឡើងវិញនេះ នឹងត្រូវចែកជូនអ្នកក្រីក្រ និងគ្រួសារគ្មានដីធ្លី ប៉ុន្តែលោកបានផ្តល់ព័ត៌មានលម្អិតតែបន្តិចបន្តួចប៉ុណ្ណោះ។
នៅខាងក្រៅកិច្ចប្រជុំបូកសរុបការងារប្រចាំឆ្នាំរបស់ក្រសួងរៀបចំដែនដីនគរូបនីយកម្ម និងសំណង់ ក្នុងរាជធានីភ្នំពេញកាលពីម្សិលមិញ លោក អឹុម ឈុនលឹម បានលើកឡើងថា ក្រុមការងាររាប់សិបក្រុមបានចាប់ផ្តើមសិក្សាដីសម្បទានសេដ្ឋកិច្ចចំនួន២១កន្លែងក្នុងចំណោមដីសម្បទានសេដ្ឋកិច្ចដែលត្រូវបានលុបចោល ដើម្បីបញ្ជាក់ឲ្យបានច្បាស់ថា ពួកគេផ្តល់ដីសម្បទានសង្គមកិច្ចដែលសមរម្យសម្រាប់អ្នកក្រីក្រ។
លោកបានមានប្រសាសន៍ថា “យើងមានក្រុមការងារចំនួន៣២ក្រុមដែលដឹកនាំដោយ មន្ត្រី មកពីក្រសួងរៀបចំដែនដីនគរូបនីយ កម្ម និងសំណង់ និងមន្ត្រីផ្សេងទៀតមកពីក្រសួងកសិកម្ម និងក្រសួងបរិស្ថាន ព្រមទាំងអាជ្ញាធរមូលដ្ឋានផងដែរ។ ពួកគេកំពុងតែវាស់វែងនៅទីតាំងទាំង២១កន្លែងនោះ”។
“ បន្ទាប់ពីយើងប្រមូលទិន្នន័យរួច យើងនឹងបង្កើតកម្មវិធីជាក់លាក់ ហើយធ្វើផែនការដើម្បីចែកដីទាំងនេះ ប៉ុន្តែ យើងមិនទាន់ប្រមូលទិន្នន័យចប់សព្វគ្រប់នៅឡើយទេ។ ការវាស់វែងត្រូវការធ្វើឡើងប្រកបដោយតម្លាភាពដើម្បីឲ្យដឹងថា ដីណាខ្លះទំនេរ និងដីណាខ្លះកំពុងត្រូវបានប្រើប្រាស់ដោយប្រជាពលរដ្ឋ”។
គ្រួសារដែលគ្មានប័ណ្ណកម្មសិទ្ធិដីធ្លី និងសហគមន៍ជនជាតិដើមភាគតិចកំពុងរស់នៅលើដីសម្បទានសេដ្ឋកិច្ចមួយចំនួនស្រាប់ទៅហើយ ដែលម្ចាស់ដីសម្បទានសេដ្ឋកិច្ចជារឿយៗតែងតែត្រូវបានចោទប្រកាន់ដោយអ្នកភូមិ និងអង្គការសិទ្ធិមនុស្សថា បានចាប់យកដីទាំងនេះ។ លោក អុឹម ឈុនលឹម បានប្រាប់អ្នកចូលរួមថា ក្រៅពីចុះពិនិត្យមើលថាតើដីនៅទីតាំងទាំងនោះពិតជាទំនេរ ឬយ៉ាងណានោះ ក្រុមការងារក៏បានពិនិត្យមើលថា តើដីសម្បទានសេដ្ឋកិច្ចមួយចំនួនដែលរដ្ឋាភិបាលបានដកហូតយកមកវិញមានគុណភាពល្អឬអត់ដែរ។
លោកបានមានប្រសាសន៍ថា “វាមិនមែនមានន័យថា ដីទាំងអស់នោះសុទ្ធតែអាចត្រូវបានប្រើប្រាស់សម្រាប់ដីសម្បទានសង្គមកិច្ចនោះទេ ព្រោះទី១ដីភាគច្រើនគឺស្ថិតក្នុងតំបន់ ដាច់ស្រយាល ហើយទី២យើងត្រូវការពិនិត្យ មើលថា វាជាដីល្អ ឫក៏អត់។ប្រសិនបើយើងចែកដីដែលមានសុទ្ធតែថ្ម វាមិនល្អទេ”។
លោកបានលើកឡើងទៀតថា អាជ្ញាធរមូលដ្ឋាននឹងទទួលខុសត្រូវចំពោះការជ្រើសរើសគ្រួសារដែលទីបំផុតនឹងផ្លាស់ទៅរស់នៅលើទីតាំងទាំងនោះ ទោះជាយ៉ាងណាលោកមិនបានប្រាប់ពីពេលវេលានោះឡើយ។
រដ្ឋាភិបាលនៅមិនទាន់ផ្តល់បញ្ជីនៃដីទំហំជិត១លានហិកតា ដែលលោក ហ៊ុន សែនអះអាងថា ត្រូវបានដកហូតមកវិញពីម្ចាស់កម្មសិទ្ធិដីសម្បទានសេដ្ឋកិច្ចនានានៅឡើយទេ ហើយអង្គការសិទ្ធិមនុស្សនៅតែមានមន្ទិល ចំពោះតួលេខនេះ ។
លោកឧបនាយករដ្ឋមន្ត្រី ប៊ិន ឈិន ដែលនឹងដឹកនាំគណៈកម្មការពិសេសដែលទទួលបន្ទុកពិនិត្យឡើងវិញនូវដីសម្បទានសេដ្ឋកិច្ចមិនអាចទាក់ទងសុំការអត្ថាធិប្បាយបានទេ។ លោក វ៉ាន សំអឿន ដែលក៏មានតួនាទីនៅក្នុងគណៈកម្មការនេះដែរនោះ និងដែលជាអនុប្រធានរបស់លោក ប៊ិន ឈិន នៅអាជ្ញាធរជាតិដោះស្រាយវិវាទដីធ្លី បានលើកឡើងថា លោកគ្មានបញ្ជីនៃដីសម្បទានសេដ្ឋកិច្ចដែលរងផលប៉ះពាល់ឡើយ ហើយបានបង្វែរសំណួរទៅក្រសួងពាក់ព័ន្ធនានា។
លោក អៀង សុផាល្លែត អ្នកនាំពាក្យក្រសួងកសិកម្ម និងជាអ្នកជំនួយការផ្ទាល់របស់លោកនាយករដ្ឋមន្ត្រីបានបដិសេធមិនព្រមចែករំលែកច្បាប់ចម្លងនៃបញ្ជីនេះទេព្រោះលោកលើកឡើងថា សន្និសីទកាសែតស្តីពីការពិនិត្យដីធ្លីឡើវិញគ្រោងនឹងធ្វើឡើងនៅប៉ុន្មានសប្តាហ៍ក្រោយនេះហើយ។
អ្នកនាំពាក្យក្រសួងបរិស្ថានមិនអាចទាក់ទងបាននោះទេ៕ ស៊ុយឈាង (រាយការណ៍បន្ថែម អូន ភាព និង Zsombor Peter)