អ្នកនាំពាក្យគណបក្សប្រឆាំងបានច្រានចោលខ្សែអាត់សំឡេងជាបន្តបន្ទាប់ចេញផ្សាយនៅសប្ដាហ៍នេះ ដែលគេថា ជាសំឡេងរបស់លោក កឹម សុខា អនុប្រធានគណបក្សសង្គ្រោះជាតិនិយាយគ្នាជាមួយស្រីស្នេហ៍របស់លោក ហើយលើកឡើងថា ខ្សែអាត់សំឡេងទាំងនេះមានបំណងបង្ក “បញ្ហា” ដល់គណបក្សរបស់លោក។
ខ្សែអាត់សំឡេងទាំងនេះដែលនីមួយៗមានរយៈពេលប្រហែលមួយនាទី ត្រូវបានបង្ហោះកាលពីថ្ងៃច័ន្ទលើទំព័រហ្វេសប៊ុករបស់ស្រីស្នេហ៍ម្នាក់នោះឈ្មោះ “ស្រីមុំ”។ ខ្សែអាត់ទាំងនេះបានធ្វើឲ្យសាធារណជនចាប់អារម្មណ៍យ៉ាងខ្លាំងកាលពីម្សិលមិញ បន្ទាប់ពីគេហទំព័រព័ត៌មានក្នុងស្រុកដើមអំពិល បានបង្ហោះអត្ថបទជាច្រើនអំពីវាដោយភ្ជាប់ Profile ហ្វេសប៊ុករបស់ ស្រីមុំ។
រឿងអាស្រូវនេះត្រូវបានចុះផ្សាយតាមក្រោយដោយស្ថាប័នប្រព័ន្ធផ្សព្វផ្សាយជាភាសាខ្មែរមួយចំនួនទៀតដែលគាំទ្ររដ្ឋាភិបាល និងត្រូវបានជជែកដេញដោលយ៉ាងទូលំទូលាយតាមបណ្ដាញទំនាក់ទំនងសង្គម។
ក្នុងខ្សែអាត់នីមួយៗអាចស្ដាប់ឮបុរសម្នាក់ដែលមានសំឡេងស្រដៀងនឹងសំឡេងរបស់លោក កឹម សុខា និយាយញ៉ែគ្នាជាមួយនារីម្នាក់ដែលគេហទំព័រដើមអំពិលបញ្ជាក់ថា ឈ្មោះ ស្រីមុំ។ នៅក្នុងការសន្ទនាមួយអាចស្ដាប់ឮនារីនោះសួរទៅបុរសនោះទាក់ទិនទំនាក់ទំនងរបស់គាត់ជាមួយសកម្មជននយោបាយ ធី សុវណ្ណថាវ័យ២០ឆ្នាំ ។
នារីនោះសួរថា “បងឯងទាក់ទងគេមែនជាមួយ ធី សុវណ្ណថា? ឥឡូវគេល្បីថាបងឯងទាក់ទងជាមួយគេ និងទិញឡានឲ្យ”។
បញ្ឆិតបញ្ឆៀងដល់ជម្លោះរបស់សកម្មជនរូបនេះជាមួយកញ្ញា កឹម មនោវិទ្យា ដែលត្រូវជាកូនស្រីរបស់លោក កឹម សុខា និងជាអនុប្រធានកិច្ចការសាធារណៈរបស់គណបក្សប្រឆាំង បុរសនោះឆ្លើយថា “អត់មានទេ ព្រោះវាឈ្លោះជាមួយកូនខ្ញុំ ឈ្លោះជាមួយគណបក្សសង្គ្រោះជាតិ”។
បុរសនោះបាននិយាយអំពី ធី សុវណ្ណថា ដូច្នេះថា “វាប្រើប្រាស់គណបក្សសង្គ្រោះជាតិដើម្បីធ្វើនយោបាយ បានលុយបានអីពីក្រៅ។ ខ្ញុំស្បថឲ្យរលាយបើខ្ញុំពាក់ព័ន្ធជាមួយ ធី សុវណ្ណថា”។
នៅក្នុងការសន្ទនាផ្សេងៗទៀត អ្នកទាំងពីរបាននិយាយបញ្ឆិតបញ្ឆៀងដល់ទំនាក់ទំនងផ្លូវភេទរបស់ខ្លួន។ ក្នុងខ្សែអាត់មួយ បុរសនោះសួរថា “អូនឯងចង់ឲ្យបងញាប់អញ្ចឹងហ្អេះ? ពីរថ្ងៃ១០ដងអញ្ចឹងហ្អេះ?”នារីនោះឆ្លើយថា “ចង់”។
បុរសនោះនិយាយទៀតថា “អូនឯងចង់អញ្ចឹងហ្អេះ?” នាងឆ្លើយថា ”អូខេ អត់បញ្ហាបងសំឡាញ់”។
ទាក់ទិនបញ្ហានេះ លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិបានមានប្រសាសន៍កាលពីម្សិលមិញថា បុរសនៅក្នុងខ្សែអាត់សំឡេងនោះមិនមែនជាលោក កឹម សុខា ទេ។
លោកបានបន្តថា “ខ្ញុំបានឮខ្សែអាត់ សំឡេងដែលបង្ហោះតាមប្រព័ន្ធផ្សព្វផ្សាយក្នុងស្រុកហើយ ប៉ុន្តែខ្ញុំគិតថា វាមិនមែនជាសំឡេងរបស់ឯកឧត្តម កឹម សុខា ទេ។ ខ្ញុំគិតថា មានអ្នកណាម្នាក់បានបង្កើតខ្សែអាត់សំឡេងទាំងនេះឡើងដើម្បីបង្កបញ្ហាដល់គណបក្សសង្គ្រោះជាតិ” ហើយថា លោក “មិនព្រួយបារម្ភ” ចំពោះខ្សែអាត់ទាំងនេះឡើយ។
ទោះជាយ៉ាងណា លោក កឹម សុខា កញ្ញា កឹម មនោវិទ្យា និងកញ្ញា ធី សុវណ្ណថា មិនអាចទាក់ទងសុំការបំភ្លឺបានទេកាលពីម្សិលមិញ។
លោក អ៊ូ វីរៈ អ្នកវិភាគនយោបាយ បានមានប្រសាសន៍ថា លោកជឿថា បញ្ហាចេញពីខ្សែអាត់សំឡេងទាំងនេះ មិនថាវាពិតឬមិនពិត គឺវានឹងមិនធំដុំឡើយ។ ”បើយើងក្រឡេកមើលអតីតកាល គឺនៅមុនការបោះឆ្នោតឆ្នាំ២០១៣ មានការទម្លាយព័ត៌មានស្រដៀង គ្នា” នេះជាអ្វីដែលលោក អ៊ូ វីរៈ លើកឡើងអំពីការចោទប្រកាន់ថា លោក កឹម សុខា បានចំណាយប្រាក់ដើម្បីរួមភេទជាមួយក្មេងស្រីអាយុ១៥ឆ្នាំម្នាក់ ហើយក៏បានបោះបង់ស្រីស្នេហ៍ម្នាក់ចោលដែរ ដោយទុកឲ្យនាងចិញ្ចឹមកូនពីរនាក់តែម្នាក់ឯង។
លោកបានបន្តថា “អ្វីដែលខ្ញុំគិតគឺថា តើគាត់ [លោក កឹម សុខា] ដោះស្រាយវាតាមវិធីណា។ ឲ្យតែគាត់មិនអើពើនឹងវា ខ្ញុំគិតថា វាប្រហែលជាស្ងប់ស្ងាត់ទៅវិញក្នុងរយៈពេល១សប្ដាហ៍ ឬ២សប្ដាហ៍ ហើយវានឹងមិនក្លាយជាបញ្ហាធំទេ”៕ សុខុម (រាយការណ៍បន្ថែមដោយ Anthony Jensen)