កាលពីម្សិលមិញ លោកនាយករដ្ឋមន្ត្រី ហ៊ុន សែន បានលើកឡើងថា រដ្ឋសភានឹងបោះឆ្នោតលើសំណើរុះរើគណៈរដ្ឋមន្ត្រីរបស់លោកនៅថ្ងៃទី៤ ខែមេសា ហើយថា លោកនឹងរក្សាព័ត៌មានលម្អិតនេះមិនឲ្យបែកធ្លាយរហូតដល់ពេលនោះ ខណៈការរុះរើចំនួនពីរចុងក្រោយរបស់លោកបានបែកធ្លាយ មុនពេលលោកបញ្ចេញឲ្យគេដឹងអំពីគម្រោងទាំងពីរនោះ។
លោក ហ៊ុន សែន បានមានប្រសាសន៍អំឡុងពិធីចែកសញ្ញាបត្រមួយក្នុងរាជធានីភ្នំពេញទាក់ទិននឹងគម្រោងផ្លាស់ប្តូររដ្ឋមន្ត្រីមួយចំនួនរបស់លោកថា “តាមគម្រោង ថ្ងៃទី៤ ខែមេសា នឹងមានការបោះឆ្នោតផ្លាស់ប្តូរសមាសភាពរាជរដ្ឋាភិបាលមួយចំនួនសំដៅធ្វើឲ្យការងារកាន់តែមានប្រសិទ្ធភាពឡើង”។
លោកបានមានប្រសាសន៍បន្តថា ”ម្សិលមិញ គ្មាននរណាបានដឹងទេ វៃហើយយកត្រាអី មកចុះលេខនៅផ្ទះរួចផ្ញើជូនដល់សភា”។
លោក ហ៊ុន សែន បានលើកឡើងទៀតថា ឥឡូវ ក្រសួងសរុបចំនួន៨កំពុងស្ថិតក្រោម គម្រោងផ្លាស់ប្តូររបស់លោក ប៉ុន្តែ លោកមិនបានបញ្ជាក់ឲ្យបានច្បាស់ថា តើក្រសួងណាខ្លះទេ។
លោកបានថ្លែងថា “មិនមានរដ្ឋមន្ត្រីណាមួយដែលអាក្រក់នោះទេ គ្រាន់តែមានរដ្ឋមន្ត្រីខ្លះហាក់ដូចជាបានតែងតាំងទៅ គឺកាន់មុខតំណែងនឹងរាងស្ទក់បន្តិច។ បើអ៊ីចឹងយើងកែសម្រួលនៅកន្លែងហ្នឹង”។
លោកបានថ្លែងបន្តទៀតថា “ហើយក៏មានរដ្ឋមន្ត្រីខ្លះដឹងគោលបំណងរបស់នាយករដ្ឋមន្ត្រីធ្វើការផ្លាស់ប្តូរគណៈរដ្ឋមន្ត្រី ក៏បានដាក់ពាក្យសុំលាលែងតែម្តង ហើយខ្លះក៏សូមលាលែងទៅបំពេញមុខងារផ្សេង ដូចជាក្រុមប្រឹក្សាធម្មនុញ្ញជាដើម”។
លោក ហ៊ុន សែន បានព្រមានធ្វើការផ្លាស់ប្តូរគណៈរដ្ឋមន្ត្រី បើគ្មានការរុះរើទាំងស្រុង។
កាលពីខែមុនលោកនាយករដ្ឋមន្ត្រីបានមានប្រសាសន៍ថា លោកបានពិចារណាអំពីការផ្លាស់ប្តូរមួយដោយលើកឡើងចំៗដល់រដ្ឋមន្ត្រីក្រសួងសាធារណការនិងដឹកជញ្ជូននិងរដ្ឋមន្ត្រីក្រសួងកសិកម្មចំពោះអ្វីដែលលោកចាត់ទុកថា បំពេញការងារស្ទក់ ដោយចាត់ចំណាត់ថ្នាក់ F ជាចំណាត់ថ្នាក់ ”ស្ទក់ខ្លាំង”សម្រាប់ពួកគាត់។
លោក អៀង សុផាល្លែត អនុរដ្ឋលេខាធិការក្រសួងកសិកម្ម និងជាជំនួយការផ្ទាល់របស់លោក ហ៊ុន សែន បានបដិសេធមិនធ្វើអត្ថាធិប្បាយលើការប្តូរគណៈរដ្ឋមន្ត្រីនេះឡើយ។
លោក ឡេង ប៉េងឡុង អ្នកនាំពាក្យរដ្ឋសភា ក៏បានបដិសេធមិនបញ្ចេញឈ្មោះរដ្ឋមន្ត្រីទាំងនោះដែរ។ លោកបានលើកឡើងថា លោក ហេង សំរិន ប្រធានរដ្ឋសភាបានឯកភាពដាក់សំណើនេះនៅក្នុងរបៀបវារៈរបស់គណៈកម្មាធិការអចិន្ត្រៃយ៍នៃរដ្ឋសភាដែលមានតួនាទីកំណត់កាលបរិច្ឆេទសម្រាប់ការបោះឆ្នោត ប៉ុន្តែថា ថ្ងៃបរិច្ឆេទនៅមិនទាន់កំណត់ជាផ្លូវការនៅឡើយទេ។
គណបក្សប្រជាជនកម្ពុជាមានសំឡេងភាគច្រើនគ្រប់ដណ្តប់លើគណៈកម្មាធិការអចិន្ត្រៃយ៍នេះ និងរដ្ឋសភា ដោយអនុញ្ញាតឲ្យគណបក្សអាចកំណត់កាលបរិច្ឆេទ និងអនុម័តច្បាប់តាមបំណងរបស់ខ្លួនបាន។
លើកចុងក្រោយដែលលោក ហ៊ុន សែន រុះរើគណៈរដ្ឋមន្ត្រីរបស់លោក គឺ ក្រោយការបោះឆ្នោតជាតិនៅក្នុងឆ្នាំ២០១៣បន្តិច ជាពេលដែលគណបក្សកាន់អំណាចស្ទើរតែចាញ់គណបក្សសង្គ្រោះជាតិ។ អំឡុងពេលនោះ រដ្ឋមន្ត្រីក្រសួងកសិកម្ម រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រីក្រសួងពាណិជ្ជកម្ម រដ្ឋមន្ត្រីក្រសួងអប់រំ យុវជននិងកីឡា រដ្ឋមន្ត្រីក្រសួងវប្បធម៌និងវិចិត្រសិល្បៈ រដ្ឋមន្ត្រីក្រសួងបរិស្ថាន និងរដ្ឋមន្ត្រីក្រសួងទូរគម នាគមន៍សុទ្ធតែត្រូវបានជំនួសតំណែង។
នៅក្នុងសុន្ទកថារបស់លោកក្នុងពិធីចែកសញ្ញាបត្រកាលពីម្សិលមិញ លោក ហ៊ុន សែន ក៏បានប្រកាសពីការចូលនិវត្តន៍របស់អភិបាលខេត្តចំនួន៤រូប ដែលដល់អាយុ៦០ឆ្នាំ ជាយុកំណត់សម្រាប់ការចូលនិវត្តន៍ជាផ្លូវការផងដែរ។ មន្ត្រីក្រសួងមហាផ្ទៃបានលើកឡើងកាលពីដើមខែនេះថា អភិបាលខេត្តចំនួន៧រូបនឹងលាលែងពីតំណែងនៅដើមឆ្នាំ២០១៧។
លោក ហ៊ុន សែន បានលើកឡើងបន្តទៀតថា អភិបាលខេត្តមួយចំនួនប្រហែលជាមានលក្ខណៈសម្បត្តិគ្រប់គ្រាន់ក្នុងការជំនួសតូនាទីគណៈរដ្ឋមន្ត្រី ប៉ុន្តែ ផ្ទុយទៅវិញរដ្ឋមន្ត្រីប្រហែលជាមិនអាចជំនួសតួនាទីអភិបាលខេត្តបានទេ។
លោកបានមានប្រសាសន៍ថា “អ្នកខ្លះអាចបំពេញការងាររបស់រដ្ឋមន្ត្រីបាន ប៉ុន្តែ មិនប្រាកដថា ពួកគេ [រដ្ឋមន្ត្រី] អាចធ្វើការងាររបស់អភិបាលខេត្តបានទេ ព្រោះអភិបាលខេត្តអាចធ្វើការងារនៅក្នុងគ្រប់វិស័យទាំងអស់បាន លើកលែងតែការទូត”។
លោកនាយករដ្ឋមន្ត្រីក៏បានព្យាយាមធានាចំពោះអ្នកចាកចេញពីគណបក្សហ្វុ៊នស៊ិនបិុច អតីតដៃគូរដ្ឋាភិបាលចម្រុះរបស់គណបក្សប្រជាជនកម្ពុជាផងដែរថា ពួកគេនឹងមិនបាត់បង់ការងារនៅក្នុងរដ្ឋាភិបាលនោះឡើយ ដ៏រាបណាពួកគេមិនចូលរួមជាមួយគណបក្សសង្គ្រោះជាតិ។
កាលពីខែមុន បន្ទាប់ពីចាញ់ព្រះអង្គម្ចាស់ នរោត្តម រណឫទ្ធិនៅក្នុងការតស៊ូរាប់ឆ្នាំដើម្បីបានអំណាចគ្រប់គ្រងគណបក្សហ្វុ៊នសិុនបិុចនោះ លោក ញឹក ប៊ុនឆៃ អនុប្រធានទី២នៃគណបក្សរាជានិយមមួយនេះបានប្រកាសអំពីការចាប់ផ្តើមបង្កើតគណបក្សផ្ទាល់ខ្លួនរបស់លោក ដោយគំរាមទាញយកសមាជិកនិងមន្ត្រីគណបក្សហ្វុ៊នសិុនបិុចមកធ្វើការជាមួយលោក។
លោក ហ៊ុន សែន បានមានប្រសាសន៍អំឡុងពិធីកាលពីម្សិលមិញថា “ឥឡូវនាយករដ្ឋមន្ត្រីនៃរាជរដ្ឋាភិបាលនេះ បញ្ជាក់ជំហរថា បើទោះបីជាបុគ្គលនោះទៅតាមសម្តេចក្រុមព្រះ ឬទៅតាម ញឹក ប៊ុនឆៃ គឺនៅរក្សាតំណែងដដែល ប៉ុន្តែ បើពួកគេចូលបក្សប្រឆាំងគឺដេញចោល២៤ម៉ោង”។
លោក ទុំ សំបូរ ដែលបានចូលរួមជាមួយគណបក្សខ្មែររួបរួមជាតិរបស់លោក ញឹក ប៊ុនឆៃ បានលើកឡើងថា ការប្រកាសរបស់លោកនាយករដ្ឋមន្ត្រីធ្វើឡើងបន្ទាប់ពីព្រះអង្គម្ចាស់ នរោត្តម រណឫទ្ធិ បានសរសេរលិខិតមួយច្បាប់ផ្ញើជូនលោក ហ៊ុន សែន ដោយស្នើឲ្យបណ្តេញអតីតសមាជិកគណបក្សហ្វុ៊នសិុនបិុចជាង១៣០នាក់ចោល។
លោក ទុំ សំបូរ ដែលបម្រើការជាទីប្រឹក្សា ក្រសួងការពារជាតិបានមានប្រសាសន៍ថា “ខ្ញុំអាចនិយាយបានថា ខ្ញុំរីករាយ ហើយគាំទ្រការសម្រេចរបស់លោកនាយករដ្ឋមន្ត្រី។ ខ្ញុំគឺជាមនុស្សម្នាក់ដែលព្រះអង្គម្ចាស់ចង់បណ្តេញចោលមុនគេ”។អ្នកនាំពាក្យគណបក្សហ្វុ៊នស៊ិនបិុចមិនអាចទាក់ទងសុំអត្ថាធិប្បាយបានទេ៕ស៊ុយឈាង