កាលពីម្សិលមិញ អង្គភាពប្រឆាំងអំពើពុករលួយរបស់កម្ពុជាបានសម្រេចថា ខ្លួនមានយុត្តាធិការលើការចោទប្រកាន់បទពុករលួយប្រឆាំងលោក កឹម សុខា អនុប្រធានគណបក្សសង្គ្រោះជាតិចំពោះការសន្យាផ្ដល់ជីវភាពហ៊ឺហារដល់នារីម្នាក់ដែលគេអះអាងថា ជាស្រីកំណាន់របស់លោកតាមរយៈខ្សែអាត់សំឡេងបែកធ្លាយ។
លោក កឹម សុខា នៅតែរក្សាភាពស្ងាត់ស្ងៀមពាក់ព័ន្ធរឿងអាស្រូវនេះ ចាប់តាំងពីខ្សែអាត់សំឡេងសន្ទនាគ្នារវាងរូបលោក និងស្រីកំណាន់ម្នាក់ចាប់ផ្ដើមបែកធ្លាយតាមហ្វេសប៊ុកនៅដើមខែនេះ។ អង្គភាពប្រឆាំងអំពើពុករលួយបានលើកឡើងកាលពីម្សិលមិញថា ការដែលលោក កឹម សុខា មិនបដិសេធថាសំឡេងក្នុងខ្សែអាត់ដែលបែកធ្លាយកាលពីពេលថ្មីៗនេះមិនមែនជាសំឡេងរបស់ខ្លួនគឺជាការសារភាពដោយប្រយោលថាវាជាសំឡេងរបស់លោក។
ទោះជាយ៉ាងណា អ្នកជំនាញផ្នែកច្បាប់ដែលលេចធ្លោមួយរូប បានចោទសួរអំពីហេតុផលរបស់រដ្ឋាភិបាលទាក់ទិនករណីនេះ។
និស្សិតមួយក្រុមដែលអះអាងថាខ្លួនគ្មានហេតុផលនយោបាយ ឬជាប់ពាក់ព័ន្ធនយោបាយ បានស្នើឲ្យអង្គភាពប្រឆាំងអំពើពុករលួយស៊ើបអង្កេតលោក កឹម សុខា ទាក់ទិនការចោទប្រកាន់រឿងផិតក្បត់ដែលខុសច្បាប់យោងតាមច្បាប់ស្ដីពីអំពើផិតក្បត់ដែលគេមិនសូវប្រើ និងអំពើពុករលួយ។
នៅឯកិច្ចប្រជុំមួយរបស់អង្គភាពប្រឆាំងអំពើពុករលួយកាលពីម្សិលមិញ លោក ឱម យ៉ិនទៀង ដែលជាប្រធានអង្គភាពនេះបានមានប្រសាសន៍ថា អំពើផិតក្បត់មិនមែនជាកិច្ចការដែលអង្គភាពរបស់លោកត្រូវដោះស្រាយទេ។ ប៉ុន្តែលោកបានថ្លែងថា អំពើពុករលួយគឺជាកិច្ចការដែលអង្គភាពរបស់លោកត្រូវដោះស្រាយ ហើយអង្គភាពនេះនឹងសម្រេចថា តើត្រូវចាប់ផ្ដើមស៊ើបអង្កេតឬក៏អត់នៅត្រឹមថ្ងៃព្រហស្បតិ៍។
លោកមានប្រសាសន៍ថា ”កិច្ចប្រជុំនេះមិនមែនដើម្បីកាត់ទោសនរណាម្នាក់ទេ។ កិច្ចប្រជុំនេះគឺដើម្បីពិភាក្សាគ្នាថា តើត្រូវទទួលយកពាក្យបណ្ដឹងឬក៏អត់ ហើយវាស្ថិតក្រោមយុត្តាធិការរបស់យើង”។
ដោយប្រើឈ្មោះហ្វេសប៊ុករបស់នារីម្នាក់ឈ្មោះ ខឹម ចាន់តារាទី វ័យ២៥ឆ្នាំ ដែលបម្រើការនៅហាងកាត់សក់ លោកមានប្រសាសន៍ថា ”យើងអាចសុំឲ្យគាត់បញ្ជាក់បានតាមរយៈការផ្ញើលិខិតសុំឲ្យគាត់បកស្រាយថា តើគាត់បានប្រាក់នោះពីណា។ ប៉ុន្តែយើងនឹងមិនសួរគាត់ថា តើគាត់មានស្រីកំណាន់ម្នាក់ឈ្មោះ ស្រីមុំ ឬអត់ទេ”។
លោក ឱម យ៉ិនទៀង បានគូសបញ្ជាក់ថា អង្គភាពរបស់លោកក៏ប្រហែលជាបើកមើលរបាយការណ៍ប្រកាសទ្រព្យសម្បត្តិរបស់លោក កឹម សុខា ដែលតំណាងរាស្ត្រទាំងអស់តម្រូវឲ្យដាក់ជូនក្រោមច្បាប់ប្រឆាំងអំពើពុករលួយផងដែរ។ ច្បាប់នេះចែងថា ប្រធានអង្គភាពប្រឆាំងអំពើពុករលួយអាចពិនិត្យផ្ទៀងផ្ទាត់បាននូវរបាយការណ៍ប្រកាសទ្រព្យសម្បត្តិដែលនៅតែហាមឃាត់សម្រាប់សាធារណជន “សម្រាប់ការស៊ើបអង្កេតក្នុងករណីចាំបាច់”។
មុនពេលសម្រេចថា តើខ្លួនមានយុត្តាធិការលើសំណុំរឿងនេះឬក៏អត់ អង្គភាពប្រឆាំងអំពើពុករលួយបានពិចារណាយ៉ាងល្អិតល្អន់ថា តើខ្សែអាត់សំឡេងបែកធ្លាយទាំងនោះអាចនឹងប្រើការលែងកើតដោយសារក្រមព្រហ្មទណ្ឌដែលធ្វើឲ្យវាខុសច្បាប់ក្នុងការថតការសន្ទនាជាលក្ខណឯកជនដោយគ្មានការអនុញ្ញាតពីអ្នកពាក់ព័ន្ធ ឬយ៉ាងណា។
ប្រធានអង្គភាពប្រឆាំងអំពើពុករលួយរូបនេះអះអាងថា ការស្ងាត់ស្ងៀមរបស់លោក កឹម សុខា ទាក់ទិនខ្សែអាត់សំឡេងទាំងនេះចាប់តាំងពីវាបែកធ្លាយមក គឺជាភ័ស្តុតាងបង្ហាញថា សំឡេងរបស់បុរសម្នាក់នៅក្នុងខ្សែអាត់ទាំងនោះគឺជាសំឡេងរបស់លោក ហើយលោកបានយល់ព្រមឲ្យគេថត។
លោកបន្តថា “វាមានន័យថា លោក កឹម សុខា បានទទួលស្គាល់រួចទៅហើយថា ខ្សែអាត់សំឡេងទាំងនេះពិតជាសំឡេងរបស់គាត់មែន គាត់ទទួលស្គាល់តាមរយៈការរក្សាភាពស្ងាត់ស្ងៀមជុំវិញបញ្ហានេះ។ សំខាន់ជាងនេះទៅទៀត គាត់មិនត្រឹមតែរក្សាភាពស្ងាត់ស្ងៀមទេ គាត់ថែមទាំងបញ្ចេញ ‘បីមិន’ ទៀតផង។ នោះជាសារបញ្ជាក់ថា គាត់មិនអើពើនឹងវា។ ដូច្នេះ ខ្សែអាត់សំឡេងទាំងនេះអាចប្រើប្រាស់បានដើម្បីតតាំងគ្នាក្នុងតុលាការ”។
“មិនបី” សំដៅដល់ជំហររបស់គណបក្សសង្គ្រោះជាតិដែលបានប្រកាន់យកអំឡុងកិច្ចប្រជុំរបស់បក្សកាលពីពេលថ្មីៗនេះដែលមានដូចជា “មិនឆ្លើយ មិនឆ្លង មិនឈ្លោះ” ក្នុងករណីប្រឈមការបង្ករឿងផ្នែកនយោបាយបន្ថែមទៀត។
ប៉ុន្តែលោក សុខ សំអឿន មេធាវីសិទ្ធិមនុស្សដ៏លេចធ្លោមួយរូបបានចោទសួរហេតុផលរបស់អង្គភាពប្រឆាំងអំពើពុករលួយចំពោះការអះអាងថា ខ្លួនមានយុត្តាធិការលើការចោទប្រកាន់បទពុករលួយ។ លោកគូសបញ្ជាក់ថា ការមិនជំទាស់ឲ្យគេថតសំឡេង និងការមិនបដិសេធថាអ្នកត្រូវគេលួចថតសំឡេង គឺមិនដូចគ្នាឡើយ។
លោកបន្តថា “ច្បាប់មិនចែងថា បើអ្នកមិនបដិសេធមានន័យថា អ្នកយល់ព្រមនោះទេ” ហើយ “មន្ទិលសង្ស័យសមហេតុផល” ចំពោះការយល់ព្រម “គួរតែគាំទ្រជនជាប់ចោទ”។
លោកក៏ចោទសួរដែរថា តើការចំណាយប្រាក់លើស្រីកំណាន់ចាត់ទុកស្មើអំពើពុករលួយ ឬក្រោមរង្វង់សមត្ថកិច្ចរបស់អង្គភាពប្រឆាំងអំពើពុករលួយដែលត្រូវបានរឹតបន្តឹងចំពោះការប្រើប្រាស់ធនធានរបស់រដ្ឋដោយមិនត្រឹមត្រូវ។ អង្គភាពប្រឆាំងអំពើពុករលួយនិយាយថា ខ្សែអាត់ទាំងនោះរួមមានទាំងការពិភាក្សាគ្នាអំពីផែនការទិញផ្ទះល្វែងដោយប្រើលុយបានពីសកម្មភាពរៃអង្គាសដែលគ្មានការបញ្ជាក់ផងដែរ។
លោកគូសបញ្ជាក់ថា “ទាល់តែលុយរបស់រដ្ឋ” ទើបអាចចាត់ទុកថាជាអំពើពុករលួយហើយវាក៏មិនច្បាស់ថា តើទីបំផុតការទិញនោះនឹងធ្វើឡើងតាមវិធីណាឡើយ។ ”បើគាត់គ្រាន់តែនិយាយ ប៉ុន្តែគ្មានសកម្មភាពជាក់ស្តែង ខ្សែអាត់សំឡេងនោះប្រហែលជាមិនពិតទេ”។
យុវជន ស្រី ចំរើន ជាសកម្មជននិស្សិតដែលដាក់ពាក្យប្ដឹងលោក កឹម សុខា និយាយថា រូបគេនឹងត្រឡប់ទៅអង្គភាពប្រឆាំងអំពើពុករលួយវិញនៅថ្ងៃព្រហស្បតិ៍ ដើម្បីជំរុញឲ្យអង្គភាពនេះធ្វើការស៊ើបអង្កេតពេញលេញ។
រូបគេនិយាយថា “យើងនឹងតាមគាត់ទៅគ្រប់វេទិការហូតទាល់តែលោក កឹម សុខា បដិសេធមិនឆ្លើយសំណួររបស់យើង”។ ក្នុងរយៈពេលប៉ុន្មានសប្ដាហ៍ថ្មីៗនេះ ក្រុមនិស្សិតត្រូវបានរារាំងម្ដងហើយម្ដងទៀតមិនឲ្យចូលទៅក្នុងពិធីជួបជុំរបស់គណបក្សសង្គ្រោះជាតិនៅតាមបណ្ដាខេត្ត។
យុវជនរូបនេះនិយាយទៀតថា “បើគាត់បន្តមិនអើពើចំពោះការទាមទាររបស់យើង យើងនឹងចាត់វិធានការផ្សេង ប៉ុន្តែពេលនេះខ្ញុំមិនអាចប្រាប់បានទេថាវាជាផែនការអ្វី”។
ក្រុមនិស្សិតដែលស្ថិតនៅពីក្រោយពាក្យបណ្ដឹងប្រឆាំងលោក កឹម សុខា បានបដិសេធមិននិយាយថា ខ្លួនរៀននៅសាលាណាឡើយដោយសារបារម្ភចំពោះសុវត្ថិភាពរបស់ខ្លួន។ យុវជន ស្រី ចំរើន អះអាងថា ខ្លួនធ្លាប់ទទួលការគំរាមប្រើអំពើហិង្សាលើរាងកាយ។
ទោះជាយ៉ាងណា អ្នកនាំពាក្យគណបក្សសង្គ្រោះជាតិមិនអាចទាក់ទងសុំការបំភ្លឺបានទេជុំវិញបញ្ហានេះ៕ សុខុម (រាយការណ៍បន្ថែមដោយ Zsombor Peter)