34.8 C
Phnom Penh

លោក សម រង្ស៊ី ប្រដូច​​គណ​បក្ស​ប្រជា​ជន​ទៅ​នឹង​របប​​ខ្មែរក្រហម

ដោយ ឌឹ ខេមបូឌា ដេលី

បទវិភាគ

ការរំឭក​ខួប៤១ឆ្នាំ​ចាប់​តាំង​ពី​ខ្មែរ​ក្រហម​​​​​កាន់​កាប់​ក្រុង​ភ្នំពេញ​ ហើយ​បាន​ចាប់​ផ្តើម​​ការ​​​​គ្រប់​គ្រង​ដ៏​ឃោរ​ឃៅ​​ដែល​​បាន​​ធ្វើ​ឱ្យ​ប្រទេស​​​​ជាតិ​ធ្លាក់​ដល់​ “​ចំណុច​សូន្យ” នោះ​ លោក​ សម រង្ស៊ី មេដឹក​នាំ​គណបក្ស​ប្រឆាំង​​បាន​ប្រើ​ប្រាស់​​​​ពិធី​រំឭក​ខួប​កាលពី​ម្សិលមិញ​ចោទ​គណបក្ស​ប្រជា​ជន​កម្ពុជា​​ថា​បាន​ទទួល​កេរ​ដំណែល​ពី ប៉ុល ពត។

ថ្លែង​ពី​ក្រៅ​ប្រទេស​តាម​រយៈ​វីដេអូលីង ​​(video-link) នៅ​ព្រឹត្តិការណ៍​ដែលបាន​ធ្វើ​ឡើង​នៅ​មជ្ឈមណ្ឌល​ប្រល័យ​ពូជ​សាសន៍​ជើង​ឯក​ក្នុង​រាជ​ធានី​ភ្នំពេញ លោក សម រង្ស៊ី ​បាន​មាន​ប្រសាសន៍​ថា រដ្ឋា​ភិបាល​បច្ចុប្បន្ន​​កំពុង​រក្សា​វប្បធម៌​ហិង្សា​​បន្សល់ទុក​ដោយ​ខ្មែរ​ក្រហម​ ដែល​បាន​កាន់​កាប់​​ប្រទេស​កម្ពុជា​​នៅ​ថ្ងៃទី​១៧ មេសា​​ ១៩៧៥។

លោក​បាន​ថ្លែង​ទៅកាន់​ក្រុម​អ្នក​គាំទ្រ​គណ​​​បក្ស​ប្រឆាំង​ និង​ព្រះ​សង្ឃ​ថា “​ខ្ញុំ​ចង់​និយាយ​​​​​ថា របប​ ប៉ុល​ ពត​ និង​ខ្មែរ​ក្រហម ទោះ​ក្ស័យ​​​​​បាត់​ជា​​យូរ​មក​ហើយក្តី​ តែ​វប្បធម៌​នេះ​នៅ​​តែ​​​រស់​រវើក​ក្នុង​សង្គម​ជាតិ​យើង​ទល់​​​នឹង​សព្វថ្ងៃ”។

លោក​បាន​មាន​ប្រសាសន៍​ថា “​ហើយ​ឥឡូវ​​​​នេះ​ វាដល់​ពេល​លុប​បំបាត់​វប្បធម៌​នេះ​ហើយ ​​​ពីព្រោះ​វាជា​វប្បធម៌​ខ្មែរ​ក្រហម​ ហើយ​ខ្មែរ​ត្រូវ​ចាប់​យក​វប្បធម៌​ថ្មីគឺ​វប្បធម៌​​សន្តិភាព ដែល​មាន​ឈ្មោះ​ថា វប្បធម៌​សន្ទនា”។

A Buddhist monk stands next to a glass case containing 5,000 human skulls belonging to Khmer Rouge victims as people gather to mark the 41st anniversary of the start of the regime, at the Choeung Ek memorial in Phnom Penh, Cambodia April 17, 2016. REUTERS/Samrang Pring
A Buddhist monk stands next to a glass case containing 5,000 human skulls belonging to Khmer Rouge victims as people gather to mark the 41st anniversary of the start of the regime, at the Choeung Ek memorial in Phnom Penh, Cambodia April 17, 2016. REUTERS/Samrang Pring

លោក​ សម រង្ស៊ី បាន​បរិយាយ​អំពី​ការ​អត្ថាធិប្បាយ​របស់​លោក​បង្ហោះ​ក្នុង​ទំព័រ​ហេ្វស​ប៊ុក​​បន្ទាប់​ពី​ព្រឹត្តិការ​ណ៍​នោះ។

លោក​បាន​សរសេរ​ថា “​ដោយ​មេដឹកនាំ​បច្ចុប្បន្ន​របស់យើង​ជា​អតីត​សមាជិក​ឬ​មេ​បញ្ជា​​​ការ​យោធាខ្មែរ​ក្រហម គំនិត​ខ្មែរ​ក្រហម​​បន្ត​មាន​​​​​ក្នុង​ចំណោម​​មេដឹកនាំ​ប្រទេស​កម្ពុជា​ដូច​​ដែល​​​​បាន​​បង្ហាញ​ជា​តឹក​តាង​តាម​រយៈ​វប្បធម៌​ហិង្សា​ ​​និង​និទណ្ឌភាព ដែល​កើត​ចេញ​ពី​​វប្ប​ធម៌​សង្គ្រាម​​ ​​​​ការ​កម្ចាត់​ និង​ភាព​ផ្តាច់​ការរបស់​ ប៉ុល ពត​”។

លោក​​បន្ថែម​ថា “​វា​ក៏​ជា​វប្បធម៌​នៃ​អំពើ​ពុក​រលួយ​ជា​ប្រព័ន្ធ​ផងដែរ​ ដែលក្នុង​នោះ ធន​​​​ធាន​ធម្មជាតិ​ និង​ទ្រព្យ​សម្បត្តិ​រដ្ឋ​​ត្រូវ​បាន​ចាត់​​​ទុក​ថា ជាការ​ខ្ទេច​ខ្ទាំដោយ​សង្គ្រាម​​ពី​សំណាក​់​​​អ្នក​ដែល​កាន់​កាប់​បន្ត​ពី​ ប៉ុល ពត​”។

លោក សម រង្ស៊ីបាន​និរទេស​ខ្លួន​ឯង​កាល​ពី​ខែ​វិច្ឆិកា​​ដើម្បី​ចៀស​ពី​ការ​ផ្តន្ទាទោស​ដាក់​ពន្ធនាគារ​រយៈពេល​ពីរ​ឆ្នាំ​​ពី​បទ​បរិហារ​កេរ្តិ៍​លោក ហោ ណាំហុង អតីត​រដ្ឋមន្ត្រី​ក្រសួង​ការ​បរទេស​អំឡុង​សុន្ទរ​កថានៅ​ជើង​ឯក​ផង​​ដែរ​ដែល​ក្នុង​នោះមេដឹក​នាំ​គណបក្ស​ប្រឆាំង​​​​រូប​នេះ​​បាន​អះ​អាង​ថា សមាជិក​គណបក្ស​កាន់​​​អំណាច​រូបនេះ​បាន​ជួយ​គ្រប់​គ្រង​ពន្ធនា​គារ​​ខ្មែរ​ក្រហម​។

លោក​នាយក​រដ្ឋមន្ត្រី ហ៊ុន សែន អតីត​មេ​បញ្ជាការ​យោធា​ក្រោម​​របប​ ប៉ុល ពត​​ ដែល​​​​បាន​ផ្តាច់​ខ្លួន​ ហើយ​បាន​ចូលរួម​ជាមួយ​កង​កម្លាំង​​​​​គាំទ្រ​ដោយ​វៀត​ណាម​ដែលបាន​ផ្តួល​រំលំ​​ខ្មែរ​​​​ក្រហម​ក្នុង​ឆ្នាំ​១៩៧៩ ជារឿយៗ​តែង​តែ​រំឭក​​​​ឡើង​វិញ​ដល់​ភាព​ភ័យ​រន្ធត់​នៃរបប​នោះ​​អំឡុង​ការ​ថ្លែង​សុន្ទរកថាជា​សាធារ​ណៈ។

ស្ទើរ​តែ​គ្រប់​ឱកាស​ លោក ហ៊ុន សែន បាន​ព្រមាន​ថា ​រដ្ឋាភិបាល​គណបក្ស​សង្គ្រោះ​ជាតិ​​នឹង​ឃើញ​ការ​វិល​ត្រឡប់​នៃ​នយោបាយ​ដែលបាន​បំផ្លាញ​ប្រទេស​ជាតិ​អំឡុង​របប​ខ្មែរ​​​​ក្រហម ជាពិសេស​​ការសន្យា​របស់​គណ​បក្ស​ប្រឆាំង​ថា​នឹង​យក​ដី​ខុសច្បាប់ពី​អ្នក​មាន​ទ្រព្យ​សម្បត្តិ​​មក​​វិញ​ជាដើម។

លោក​នាយក​រដ្ឋមន្ត្រី​បាន​ព្រមាន​នៅក្នុង​លិខិត​មួយ​ច្បាប់​បង្ហោះ​ក្នុង​ទំព័រ​ហ្វេស​ប៊ុក​របស់​​​លោក​​កាលពី​ខែ​តុលាថា “វា​ច្បាស់​ណាស់​ថា គ្មាន​អី​​ខុស​គ្នា​ទេ ព្រោះ [គណបក្ស​សង្គ្រោះ​ជាតិ]​ បច្ចុ​ប្បន្ននេះ​ចាត់​ទុក​អ្នក​មាន​ទ្រព្យ​ជា​សត្រូវ​របស់ខ្លួនទៅហើយ​។ សង្គ្រាម​វណ្ណៈ​នឹង​​​កើត​ឡើង​ ហើយ​ក្លាយ​ជា​សង្គ្រាម​ស៊ីវិល”។

លោក​ ឆាំង​ យុ នាយក​ប្រតិបត្តិ​មជ្ឈ​មណ្ឌល​​​ឯកសារ​កម្ពុជា​​ដែល​ធ្វើការ​ដើម្បី​អប់រំ​ប្រជា​ពល​រដ្ឋ​អំពី​​របបខ្មែរ​ក្រហម​នោះ មាន​ប្រសា​សន៍​​​​កាលពី​ម្សិលមិញ​ថា របប​មួ​យ​ក្នុ​ង​ចំណោម​របប​ដ៏​ខ្មៅ​ងងឹត​នៃប្រវត្តិ​សាស្ត្រ​មនុស្ស​ជាតិ​​ មិន​គួរ​​​​ប្រើ​ដើម្បី​ដាក់ពិន្ទុ​នយោ​បាយ​ទេ។

លោក ឆាំង​ យុ ​ថ្លែងថា “​ខ្ញុំគិត​ថា គួរ​ញែក​​​​ឱ្យ​ដាច់ពីគ្នា​រវាង​​យុត្តិ​ធម៌​ និង​នយោ​បាយ​។ គួរ​​​​ញែក​ឱ្យ​ដាច់ពី​​គ្នា​រវាង​​នយោបាយ​ និង​ការ​រង​គ្រោះ​​នៃអ្នក​នៅ​រស់​រាន​ពី​របប​ខ្មែរ​ក្រហម”។

លោក​​បាន​បន្ថែមថា “​ខ្ញុំគិតថា ៤១ឆ្នាំ​ក្រោយ​​​មក…​​ អនុស្សាវរីយ៍​បាន​នាំ​មក​វិញ​​​​ទាំង​មេរៀន​ និង​បទ​ពិសោធន៍​ថា យើ​ងគួរមាន​ភាព​ចាស់​ទុំជាង​នេះ​ ដូច្នេះ​យើង​អាច​ទន្ទឹង​រង់​ចាំ”៕សារុន​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស