មន្ត្រីម្នាក់បាននិយាយកាលពីម្សិលមិញថា ការប្រជែងដណ្ដើមរូបចម្លាក់ព្រះវិស្ណុអាយុកាល១.៥០០ឆ្នាំដែលកម្មករធ្វើផ្លូវប្រើត្រាក់ទ័រឈូសឆាយឃើញកាលពីដើមឆ្នាំនេះបានបញ្ចប់ហើយ ដោយខេត្តក្រចេះជាអ្នកទទួលបានសិទ្ធិដាក់តាំងបង្ហាញរូបចម្លាក់ធ្វើពីថ្មភក់តាំងពីសម័យចេនឡានេះ។
លោក ទេព វាសនា ប្រធានមន្ទីរវប្បធម៌ និងវិចិត្រសិល្បៈខេត្តបានមានប្រសាសន៍ថា អ្នកជំនាញមកពីក្រសួងវប្បធម៌ និងវិចិត្រសិល្បៈដែលបានពិនិត្យរូបចម្លាក់នេះអះអាងថា វាជារូបចម្លាក់បុរាណពិតៗ បើទោះជានៅរង់ចាំរបាយការណ៍ផ្លូវការក៏ដោយ។
លោក ថៃ នរសត្យា អ្នកនាំពាក្យក្រសួងវប្បធម៌ និងវិចិត្រសិល្បៈមានប្រសាសន៍ថា វត្ថុបុរាណបែបនេះគួរតែយកទៅរក្សាទុកនៅសារមន្ទីរជាតិក្នុងរាជធានីភ្នំពេញ ប៉ុន្តែក្រសួងបានសម្រេចថា អាចរក្សាទុកនៅក្នុងខេត្តបាន ឱ្យតែមន្ត្រីវប្បធម៌មូលដ្ឋានអាចរក្សាទុកដោយសុវត្ថិភាព។
បើទោះជាបច្ចុប្បន្ននេះ សារមន្ទីរខេត្តកំពុងធ្វើការជួសជុលក្ដី ក៏មានភ្ញៀវមួយចំនួនបានមកមើលរូបចម្លាក់ព្រះវិស្ណុដែលជាទេវៈដ៏សំខាន់នៃហិណ្ឌូសាសនា ជាសាសនាមួយក្នុងចំណោមសាសនាផ្លូវការរបស់កម្ពុជាដែលបានកើតមុនពុទ្ធសាសនានេះរួចមកហើយ។
លោក ទេព វាសនា បានមានប្រសាស៍ថា ភ្ញៀវប្រហែល១០នាក់ ដែលភាគច្រើនជាជនបរទេសបានមកមើលរូបចម្លាក់នេះ ដែលបានបាក់ដៃម្ខាងខណៈពេលធ្វើកំណាយកាលពីខែមករា៕សារុន